མཚོ་སྔོན་ཞིང་ཆེན་མི་དམངས་སྲིད་གཞུང་དྲ་བ།
2025ལོའི་ཧྲང་ཧའེ་མཉམ་ལས་རྩ་འཛུགས་ཀྱི་རྩེ་ཚོགས་ཟླ8པའི་ཚེས31ཉིན་ནས་ཟླ9པའི་ཚེས1ཉིན་བར་ཐེན་ཅིན་ནས་བསྡུ་རྒྱུ་རེད། རྒྱལ་ཁབ་ཀྱི་ཀྲུའུ་ཞི་ཞི་ཅིན་ཕིང་གིས་ཧྲང་ཧའེ་མཉམ་ལས་རྩ་འཛུགས་ཁོངས་གཏོགས་རྒྱལ་ཁབ་ཀྱི་གཙོ་འཛིན་ལས་འཛིན་ལྷན་ཚོགས་ཀྱི་གྲོས་ཚོགས་ཐེངས་ཉེར་ལྔ་པ་དང་ཧྲང་ཧའེ་མཉམ་ལས་རྩ་འཛུགས་ཀྱི་གྲོས་ཚོགས་ལ་འགོ་འཛིན་གནང་རྒྱུ་ཡིན་པར་མ་ཟད། གསུང་བཤད་གནང་རྒྱུ་རེད། རྩེ་ཚོགས་སྐབས་སུ། ཀྲུའུ་ཞི་ཞི་ཅིན་ཕིང་གིས་ད་རུང་ཚོགས་ཞུགས་འགོ་ཁྲིད་མི་སྣར་དགའ་བསུ་ཞུ་བའི་མཛད་སྒོ་དང་ཕྱོགས་གཉིས་ཀྱི་བྱ་འགུལ་སྤེལ་རྒྱུ་རེད།
ཟླ8ཚེས22ཉིན། ཕྱི་འབྲེལ་པུའུ་ཡིས་ཀྲུའུ་ཞི་ཞི་ཅིན་ཕིང2025ལོའི་ཧྲང་ཧའེ་མཉམ་ལས་རྩ་འཛུགས་ཀྱི་རྩེ་ཚོགས་ལ་ཞུགས་རྒྱུ་ཡིན་པ་མ་ཟད། འབྲེལ་ཡོད་བྱེད་སྒོ་སྤེལ་རྒྱུ་ཡིན་པར་གཞིགས་ནས་ཀྲུང་གོ་དང་ཕྱི་རྒྱལ་གྱི་སྨྱན་སྦྱོར་ལ་བརྡ་བཏང་།
ཕྱི་འབྲེལ་པུའུ་ཡིས་རྒྱལ་ཁབ་ཀྱི་ཀྲུའུ་ཞི་ཞི་ཅིན་ཕིང་གིས་ད་ཐེངས་ཀྱི་རྩེ་ཚོགས་ཀྱི་ཁོངས་གཏོགས་རྒྱལ་ཁབ་ཀྱི་གཙོ་འཛིན་ལས་འཛིན་ལྷན་ཚོགས་ཀྱི་གྲོས་ཚོགས་དང“ཧྲང་ཧའེ་མཉམ་ལས་རྩ་འཛུགས”ཀྱི་གྲོས་ཚོགས་ལ་འགོ་འཛིན་མཛད་རྒྱུ་ཡིན་པ་མ་ཟད། བརྗོད་དོན་གསུང་བཤད་གནང་ནས། ཧྲང་ཧའེ་མཉམ་ལས་རྩ་འཛུགས་ཀྱིས“ཧྲང་ཧའེ་ཡི་སྙིང་སྟོབས”དར་སྤེལ་དང་དུས་རབས་ཀྱི་འགན་འཁྲི་ཕྲག་ཏུ་བླངས་པ། མི་དམངས་ཀྱི་རེ་སྒུག་ལ་ལན་སློག་པ་བཅས་ཀྱི་བསམ་གཞིགས་གསར་པ་དང་འདོད་ཚུལ་གསར་པ་རྒྱས་བཤད་གནང་སྟེ། ཧྲང་ཧའེ་མཉམ་ལས་རྩ་འཛུགས་ཀྱི་སྤུས་ཚད་མཐོ་བའི་འཕེལ་རྒྱས་དང་ཕྱོགས་ཡོངས་མཉམ་ལས་ཀྱི་བྱེད་ཐབས་གསར་པ་དང་འགུལ་སྐྱོད་གསར་པར་རྒྱབ་སྐྱོར་བྱ་རྒྱུ་ཡིན་པ་ཁྱབ་སྒྲོག་དང་། ཧྲང་ཧའེ་མཉམ་ལས་རྩ་འཛུགས་ཀྱིས་དགེ་མཚན་ལྡན་པའི་སྒོ་ནས་འཛམ་གླིང་འཁྲུག་ཆེན་གཉིས་པའི་རྗེས་ཀྱི་རྒྱལ་སྤྱིའི་སྒྲིག་ལམ་སྲུང་སྐྱོང་དང་། འཛམ་གླིང་བཅོས་སྐྱོང་མ་ལག་འཐུས་ཚང་དུ་གཏོང་བའི་བྱེད་ཐབས་གསར་པ་དང་ཐབས་ལམ་གསར་པ་འདོན་རྒྱུ་ཡིན་པར་མ་ཟད། ད་དུང་ཚོགས་ཞུགས་རྒྱལ་ཁབ་སོ་སོའི་འགོ་ཁྲིད་པ་དང་རྒྱལ་སྤྱིའི་རྩ་འཛུགས་ཀྱི་འགན་ཁུར་བར་འབྲེལ་ཡོད་ཕྱོགས་གཉིས་ཀྱི་བྱེད་སྒོ་རྩ་འཛུགས་བྱ་རྒྱུ་རེད་ཅེས་བསྟན། འདི་ནི་ཀྲུང་གོས་གཙོ་སྒྲུབ་བྱས་པའི་ཧྲང་ཧའེ་མཉམ་ལས་རྩ་འཛུགས་ཀྱི་རྩེ་ཚོགས་ཐེངས་ལྔ་པ་ཡིན་ལ། ཧྲང་ཧའེ་མཉམ་ལས་རྩ་འཛུགས་བཙུགས་པའི་ཚུན་གྱི་གཞི་ཁྱོན་ཆེས་ཆེ་བའི་རྩེ་ཚོགས་ཐེངས་ཤིག་ཀྱང་ཡིན། སྐབས་དེར། ཀྲུའུ་ཞི་ཞི་ཅིན་ཕིང་གིས་ད་དུང་ཧྲང་ཧའེ་མཉམ་ལས་རྩ་འཛུགས་ཀྱི་ཁོངས་གཏོགས་རྒྱལ་ཁབ་གཞན་དག་གི་འགོ་ཁྲིད་པ་དང་ལྷན་དུ་མཚན་རྟགས་བཀོད་ནས《ཐེན་ཅིན་བསྒྲགས་གཏམ》སྤེལ་རྒྱུ་ཡིན་པ་མ་ཟད། 《ཧྲང་ཧའེ་མཉམ་ལས་རྩ་འཛུགས་ཀྱི་མ་འོངས་པའི་ལོ་བཅུའི་འཕེལ་རྒྱས་འཐབ་ཇུས》ལ་ཆོག་མཆན་གནང་རྒྱུ་ཡིན་ལ། འཛམ་གླིང་གི་ཧྥ་ཤི་སིར་ངོ་རྒོལ་བྱེད་པའི་དམག་འཁྲུག་ལ་རྒྱལ་ཁ་ཐོབ་པ་དང་མཉམ་འབྲེལ་རྒྱལ་ཚོགས་དབུ་བརྙེས་ནས་ལོ་ངོ80འཁོར་བའི་གསལ་བསྒྲགས་སྤེལ་ནས། བདེ་འཇགས་དང་དཔལ་འབྱོར། མི་ཆོས་རིང་ལུགས་ཀྱི་མཉམ་ལས་བཅས་ལ་ཤུགས་སྣོན་པའི་སྐོར་གྱི་གྲུབ་འབྲས་ཡིག་ཆ་རབ་དང་རིམ་པར་གྲོས་འཆམ་འབྱུང་ངེས།
ཧྲང་ཧའེ་མཉམ་ལས་རྩ་འཛུགས་བཙུགས་ནས་ལོ་4འགོར་བའི་རིང་ལ། “ཕན་ཚུན་ཡིད་ཆེས་དང་གཉིས་ཕན། འདྲ་མཉམ། གྲོས་མོལ། དཔལ་ཡོན་སྣ་མང་ལ་བརྩི་འཇོག ཐུན་མོང་འཕེལ་རྒྱས་དོན་གཉེར”བཅས་ཀྱི“ཧྲང་ཧའེ་ཡི་སྙིང་སྟོབས”ཀྱི་སྣེ་ཁྲིད་འོག ཐོག་མའི་གསར་གཏོད་ཁོངས་གཏོགས་རྒྱལ་ཁབ6ནས། ད་ལྟ་ཡ་གླིང་དང་ཡོ་རོབ། ཧྥེ་གླིང་བཅས་གླིང་ཆེན་གསུམ་གྱི་རྒྱལ་ཁབ26ལ་ཁྱབ་པའི་ཧྲང་ཧའེ་མཉམ་ལས་རྩ་འཛུགས་ཀྱི་ཁྱིམ་གཞི་ཆེན་མོར་འཕེལ་རྒྱས་བྱུང་སྟེ། བདེ་འཇགས་ལ་མཉམ་དུ་སྲུང་སྐྱོབ་དང་། དར་རྒྱས་ལ་མཉམ་དུ་སྐུལ་འདེད། དམངས་ཚིས་ལ་མཉམ་དུ་ཕན་འདོགས་པ། ཁེ་ཕན་མཉམ་དུ་སྤྱོད་པ། མ་འོངས་མཉམ་རྒྱལ་བཅས་ཀྱི་ཞི་བདེ་འཕེལ་རྒྱས་བགྲོད་ལམ་དང་མཉམ་ལས་ཀྱི་ལམ་བུ་གསར་པ་ཞིག་རྒྱལ་ཁའི་ངང་བཏོད།
མིག་སྔར་ཧྲང་ཧའེ་མཉམ་ལས་རྩ་འཛུགས་ཀྱི་རྒྱལ་ཁབ་ཚང་མ་མགྱོགས་མྱུར་འཕེལ་རྒྱས་འགྲོ་བའི་དུས་མཚམས་གལ་ཆེན་དུ་གནས་ཡོད། ཀྲུང་གོས་ཐེན་ཅིན་གྱི་རྩེ་ཚོགས་བརྒྱུད་དེ། ཧྲང་ཧའེ་མཉམ་ལས་རྩ་འཛུགས་ཀྱི་རྒྱལ་ཁབ་དང་མཉམ་དུ། ཆབ་སྲིད་ཀྱི་ཐུན་མོང་ངོས་འཛིན་གཅིག་སྡུད་བྱས་ནས། མཉམ་ལས་ཀྱི་སྒུལ་ནུས་སྐུལ་སློང་དང་ཐུན་མོང་གི་རེ་འདུན་སྒྲོག་པ། མཉམ་འབྲེལ་འགུལ་སྐྱོད་སྤེལ་བ་བཅས་བྱས་ཏེ། ཧྲང་ཧའེ་མཉམ་ལས་རྩ་འཛུགས་ཀྱི་བརྟན་བརླིང་རང་བཞིན་དང་འགྱུར་མེད་རང་བཞིན་ལ་བརྟེན་ནས། རྒྱལ་སྤྱིའི་ཁོར་ཡུག་གི་ངེས་མེད་སྔོན་དཔག་དཀའ་བའི་རྒྱུ་རྐྱེན་ལ་ཁ་གཏད་འཇལ་ཏེ། རང་ས་གནས་ཀྱི་རྒྱལ་ཁབ་སོ་སོའི་མི་དམངས་ལ་ཡུན་རིང་ཞི་བདེ་དང་ཡོངས་ཁྱབ་བདེ་འཇགས། ཐུན་མོང་དར་རྒྱས། སྒོ་འབྱེད་དཀྱེལ་ཡངས། འཆམ་མཐུན་མཛའ་མཐུན་བཅས་ཀྱི་ཁོར་ཡུག་ལེགས་པོ་ཞིག་བསྐྲུན་རྒྱུར་རེ་བ་བྱེད་བཞིན་ཡོད།
