མཚོ་སྔོན་ཞིང་ཆེན་མི་དམངས་སྲིད་གཞུང་དྲ་བ།
ཟླ8པའི་ཚེས15ཉིན། གསར་འགོད་པས་མཚོ་སྔོན་ཞིང་ཆེན་འགྲིམ་འགྲུལ་སྐྱེལ་འདྲེན་ཐིན་ལས་རྒྱུས་ལོན་བྱུང་བ་ལྟར་ན། ཟླ་བརྒྱད་པའི་ཟླ་འགོར། ཞིང་ཆེན་འགྲིམ་འགྲུལ་སྐྱེལ་འདྲེན་ཐིན་གྱིས་ཞིང་ཆེན་སྤྱི་བདེ་ཐིན་འགྲིམ་འགྲུལ་དོ་དམ་ཅུའུ་དང་མཉམ་འབྲེལ་སྒོས། ཞིང་ཆེན་ཡོངས་ཀྱི་ལམ་ཐིག་གཙོ་བོ་ཁག་ནས་འགྲིམ་འགྲུལ་གཞུང་ལམ་མཉམ་འབྲེལ་ཁྲིམས་བསྟར་ཞབས་ཞུའི་ས་ཚིགས12སྤྱོད་འགོ་བརྩམས་པ་དང་། དུས་ལྟར་ལྟ་ཞིབ་དང་སྐོར་ཞིབ་ཁྲིམས་བསྟར་ཟུང་འབྲེལ་བྱས་ཏེ་ནུས་ཤུགས་ཡོད་རྒུས་ཡུལ་སྐོར་དུས་ཚིགས་དང་ཆར་ཆུ་འབབ་ཚད་མང་བའི་སྐབས་ཀྱི་གཞུང་ལམ་བདེ་འཇགས་ལ་འགན་སྲུང་བྱས།
མཉམ་འབྲེལ་ཁྲིམས་བསྟར་ཞབས་ཞུའི་ས་ཚིགས12རུ་འགྲིམ་འགྲུལ་ཁྲིམས་བསྟར་ཞབས་ཞུ་ས་ཚིགས་དང་སྤྱི་བདེའི་ཞིབ་བཤེར་ས་ཚིགས། འགྲིམ་འགྲུལ་ཉེན་རྟོག་པའི་ཁྲིམས་བསྟར་ས་ཚིགས་སོགས་ད་ཡོད་ཀྱི་ཐོན་ཁུངས་གཅིག་བསྡུས་བྱས་ཡོད་ལ། ཡང་དག་པའི་ངང་པེ་ཅིང་ནས་བོད་ལྗོངས་ཀྱི་མྱུར་བགྲོད་གཞུང་ལམG6སྟེང་གི་ཟི་ལིང་ནུབ་སྒོའི་དངུལ་བསྡུའི་ས་ཚིགས་དང་། རྒྱལ་ཁབ་གཞུང་ལམ315ཡི་ཞིས་ཐུའུ་ལམ་ཐིགUརྣམ་པའི་གཞུང་ལམ། ཚྭ་ཁའི་མཛེས་ལྗོངས་སོགས་གཙོ་གནད་ལམ་ཐིག་དང་ལྗོངས་ཁུལ་གྱི་བགྲོད་ལམ་དུ་ཁྱབ་པར་བྱས་ཡོད། ཞབས་ཞུའི་ས་ཚིགས་ཀྱིས་འགྲུལ་བ་སྐྱེལ་འདྲེན་འཁོར་དང་ཉེན་ཁ་ཅན་གྱི་དངོས་པོ་སྐྱེལ་འདྲེན་བྱེད་པ། རླངས་འཁོར་ཆེ་བའི་རིགས་སོགས་ལ་གཞི་བཙུགས་ཏེ། ཞིབ་བཤེར་གསལ་བརྡ་དང་ཞབས་ཞུའི་འགན་སྲུང་ཤུགས་ཆེར་བཏང་། མྱུར་ཚད་ལས་བརྒལ་བ་དང་ཤོང་ཚད་ལ་བརྒལ་བ། ཚད་བཀག་ལས་བརྒལ་བ། ངལ་དུབ་ཀྱིས་རླངས་འཁོར་བསྐོར་བ། ཆང་འཐུང་ནས་རླངས་འཁོར་བསྐོར་བ། ཁྲིམས་འགལ་སྐྱེལ་འདྲེན་བྱེད་པ་སོགས་ཀྱི་ཁྲིམས་འགལ་བྱ་སྤྱོད་གཙོ་གནད་དུ་བཟུང་ནས་ཞིབ་བཤེར་བྱེད་པ་དང་། སྤྱིར་བཏང་གི་རྒྱལ་ཁབ་གཞུང་ལམ་དང་མྱུར་བགྲོད་གཞུང་ལམ་སྣོལ་འཚམས་ཀྱི་ཞབས་ཞུའི་ས་ཚིགས་ཁག་ཅིག་ལ་དམིགས་ཏེ། གསལ་འདེབས་མཚོན་རྟགས་བཟོ་བ་དང་ཡུལ་དངོས་ནས་བཀོད་འདོམས་བྱེད་པ། བརྡ་འཕྲིན་གཏོང་བ་སོགས་ཀྱི་བྱེད་ཐབས་ལ་བརྟེན་ནས། ཡུལ་དངོས་ཀྱི་རླངས་འཁོར་འོས་འཚམ་གྱིས་བསྐྱོད་པ་མངོན་འགྱུར་བྱས་ཏེ། སྤྱིར་བཏང་གཞུང་ལམ་དུ་བགྲོད་པའི་གེགས་རྒྱ་དང་དོན་རྐྱེན་འབྱུང་བའི་ཉེན་ཁ་ཇེ་ཆུང་དུ་བཏང་།
མཉམ་འབྲེལ་ཁྲིམས་བསྟར་ཞབས་ཞུའི་ས་ཚིགས་སོ་སོ་མུ་མཐུད་དུ་ལེགས་བསྒྱུར་བྱས་ཏེ། དུས་བཅད་ལྟ་ཞིབ་དང་སྐོར་ཞིབ་ཟུང་འབྲེལ་གྱི་རྣམ་པར་བརྟེན་ནས་ཁྲིམས་འཛིན་སྲུང་སྐྱོབ་དང་དམངས་ཕན་ཞབས་ཞུའི་འགན་ནུས་དོན་འཁྱོལ་དང་། གཙོ་གནད་རླངས་འཁོར་དང་ཁྲིམས་འགལ་གནད་དོན་ལ་དམ་པོར་དམིགས་པ་བཅས་བྱས། དེ་དང་མཉམ་དུ་བདེ་འཇགས་དྲིལ་བསྒྲགས་དང་དམངས་ཕན་ཞབས་ཞུར་ཤུགས་བསྣན་ཏེ། ལམ་ངོས་ཀྱི་དོ་དམ་དང་བརྩེ་བའི་ཞབས་ཞུ་མཉམ་འདྲེས་ཀྱིས་མི་དམངས་ལ་བདེ་འཇགས་དང་གེགས་མེད་ཀྱི་བགྲོད་ལམ་ཤིག་བསྐྲུན་ཡོད།
