མཚོ་སྔོན་ཞིང་ཆེན་གྱི་གྲོང་གཞས་འགྲན་བསྡུར་སྐབས་དང་པོའི་རྟིང་རྩོད་བར་མ་ཁྲི་ཀ་རུ་བསྡུས་པ།

རང་རེའི་དྲ་བའི་འཕྲིན། ཟླ8པའི་ཚེས12ཉིན་ནས་ཚེས13ཉིན་བར། མཚོ་སྔོན་ཞིང་ཆེན་གྱི་གྲོང་གཞས་འགྲན་བསྡུར་སྐབས་དང་པོའི་རྟིང་རྩོད་བར་མ་མཚོ་ལྷོ་བོད་རིགས་རང་སྐྱོང་ཁུལ་ཁྲི་ཀ་རྫོང་གི་གནའ་མཁར་ཐང་ཆེན་དུ་བསྡུས།  ཐེངས་འདིའི་བྱེད་སྒོ་ནི་མཚོ་སྔོན་ཞིང་ཆེན་ཏང་ཨུའི་དྲིལ་སྒྲོག་པུའུ་དང་།མཚོ་སྔོན་ཞིང་ཆེན་རིག་གནས་ཡུལ་སྐོར་ཐིང་། མཚོ་སྔོན་ཞིང་ཆེན་ཞིང་ལས་ཞིང་སྡེ་ཐིང་། མཚོ་ལྷོ་བོད་རིགས་རང་སྐྱོང་ཁུལ་མི་དམངས་སྲིད་གཞུང་བཅས་ཀྱི་གཙོ་སྒྲུབ་དང་།མཚོ་སྔོན་ཞིང་ཆེན་སྦྲེལ་དྲ་གསར་འགྱུར་ལྟེ་གནས་དང་མཚོ་སྔོན་ཞིང་ཆེན་གླུ་གར་ཁང་།མཚོ་ལྷོ་བོད་རིགས་རང་སྐྱོང་ཁུལ་རིག་གནས་ཡུལ་སྐོར་རྒྱང་སྒྲོག་ཅུའུ།མཚོ་སྔོན་ཞིང་ཆེན་སྦྲེལ་དྲ་གསར་འགྱུར་ཚད་ཡོད་ཀུང་ཟི་བཅས་ཀྱིས་འགན་སྒྲུབ་གནང་། ཀྲུང་གུང་ཁྲི་ཀ་རྫོང་ཏང་ཨུ་དང་ཁྲི་ཀ་རྫོང་མི་དམངས་སྲིད་གཞུང་གིས་རོགས་སྒྲུབ་གནང་།

ཐོག་མའི་འགྲན་རིམ་ནས་གོ་རིམ་རབ་དང་རིམ་པ་མང་པོ་ཞིག་བརྒྱུད་དེ་དམངས་ཁྲོད་ཀྱི་འགྲན་ཞུགས་པ་བརྒྱ་ཡི་ནང་ནས་གསལ་ནས་བརྒྱད་ཀྱི་ནང་འདེམས་ནས་ཐེངས་འདིར་འགྲན་རྩོད་པ12ཆེས་མཐའ་འཇུག་གི་རྟིང་རྩོད་འགྲན་སྡུར་ཁྲོད་ཚུད་པ་རེད། ཉིན་དེར་ཁྲི་ཀའི་གནའ་མཁར་རིག་གནས་ཐང་ཆེན་དུ་མི་ཚོགས་ཀྱི་འདུ་འཛིས་ཁེངས་ཏེ་གླུ་སྐད་སྙན་མོ་ཕྱོགས་བཞིར་མཆེད་ཡོད་ལ། དཔྱད་འདེམས་དགེ་རྒན་ཡང་མིང་གྲགས་ཅན་གྱི་གླུ་བ་ཏོན་ཞིན་ཧྭ་དང་རྒན་ཀླུ་མོ་སྒྲོལ་མ་སོགས་ཐོན་ཡོད་པ་རེད།  

འགྲན་བསྡུར་ཁྲོད། འགྲན་ཞུགས་རུ་ཁག་སོ་སོས་རང་ཉིད་ཀྱི་འཇོན་ནུས་ངོམ་པ་དང་། གླུ་སྐད་ལ་བརྟེན་ནས་ཕ་ཡུལ་གྱི་གཏམ་རྒྱུད་བརྗོད་ཀྱིན་ཡོད། ལ་ལས་དམངས་སྲོལ་གྱི་ཡུལ་སྲོལ་གོམས་གཤིས་ལ་བརྟེན་ནས་གྲོང་གསེབ་ཀྱི་འཚོ་བའི་སྣང་ཚུལ་གསོན་ཉམས་དོད་པོས་མངོན་པར་བྱས་ཡོད་ལ།     ད་དུང་བརྩམས་ཆོས་ཁ་ཤས་ཀྱིས་གྲོང་གསེབ་ཀྱི་འགྱུར་ལྡོག་དང་འཕེལ་རྒྱས་ལ་དམིགས་ནས། ཡུལ་མི་ཚོས་མ་འོངས་བའི་མཛེས་སྡུག་ལྡན་པའི་འཚོ་བར་ཡིད་སྨོན་དང་རེ་སྙེག་བྱེད་པ་མཚོན་ཡོད། ཕུན་སུམ་ཚོགས་པའི་རིག་རྩལ་བརྩམས་ཆོས་བརྒྱུད་དེ་འགྲན་བསྡུར་གྱི་རྣམ་པས་སྟེགས་བུའི་སྟེང་འཁྲབ་སྟོན་བྱས་པ་དེས་རོལ་དབྱངས་དང་ཕ་ཡུལ་ལ་དགའ་བའི་རིག་རྩལ་ལས་དོན་པར་རང་ཉིད་ཀྱི་ཁྱད་ཆོས་མངོན་པ་དང་བརྗེ་རེས་སློབ་སྦྱོང་གི་སྟེགས་བུ་འདོན་སྤྲོད་བྱས་པར་མ་ཟད།    མཚོ་སྔོན་གྱི་གྲོང་གསེབ་རིག་གནས་ཀྱི་གསོན་ཤུགས་མངོན་པར་བྱས་པ་དང་།    ས་གནས་རང་གི་གྲོང་གསེབ་རིག་གནས་འཕེལ་རྒྱས་ལ་སྐུལ་འདེད་གཏོང་བའི་གོ་སྐབས་གལ་ཆེན་ཞིག་ཏུ་གྱུར་ཡོད།

རྒྱུས་ལོན་པ་ལྟར་ན།    མཚོ་སྔོན་ཞིང་ཆེན་གྱི་གྲོང་གཞས་འགྲན་བསྡུར་ཆེན་མོ་སྐབས་དང་པོའི་མཇུག་མཐའི་རྟིང་རྩོད་འགྲན་སྡུར་ཟླ9པའི་ཚེས23ཉིན་གསེར་ཆེན་རྫོང་དུ་སྤེལ་རྒྱུ་རེད།

གསར་འགོད་པ། ཤ་མོ་འཚོ།