ཞི་ཅིན་ཕིང་གིས་པར་ཙིར་གྱི་སྲིད་འཛིན་ལུའུ་ལ་དང་ཞལ་པར་བསྐྱོན།

ཟླ8པའི་ཚེས12ཉིན། རྒྱལ་ཁབ་ཀྱི་ཀྲུའུ་ཞི་ཞི་ཅིན་ཕིང་གིས་གདན་ཞུ་ལྟར་པར་ཙིར་གྱི་སྲིད་འཛིན་ལུའུ་ལ་དང་ཞལ་པར་བསྐྱོན།

ཞི་ཅིན་ཕིང་གིས་ཀྲུང་གོ་དང་པར་ཙིར་གྱི་འབྲེལ་བ་ལོ་རྒྱུས་སྟེང་གི་དུས་སྐབས་ཆེས་ཡག་ཤོས་སུ་སླེབས་ཡོད་དེ།　 ཀྲུང་གོ་དང་པར་ཙིར་གྱི་ལས་སྐལ་གཅིག་མཐུན་ཚོགས་པ་འཛུགས་སྐྱོང་དང་། རྒྱལ་ཁབ་གཉིས་ཀྱི་འཕེལ་རྒྱས་འཐབ་ཇུས་འབྲེལ་མཐུད་ཀྱི་འགོ་ལེགས་པོ་བརྩམས་པ་དང་འཕེལ་རིམ་བདེ་བླག་བྱུང་ཡོད། ཀྲུང་གོས་པར་ཙིར་དང་མཉམ་དུ་གོ་སྐབས་དམ་འཛིན་དང་གཅིག་གྱུར་འཆར་འགོད་བྱས་ཏེ། གཉིས་ཕན་མཉམ་ལས་ཀྱི་གྲུབ་འབྲས་སྔར་ལས་མང་པོ་བཏོད་ནས། འཛམ་གླིང་ལྷོ་ཕྱོགས་རྒྱལ་ཁབ་ཆེན་པོའི་མཐུན་སྒྲིལ་རང་སྟོབས་ཀྱི་མིག་དཔེ་སྟོན་པ་དང་། ལག་གདང་སྦྲེལ་ནས་སྔར་བས་དྲང་གཞག་གི་འཛམ་གླིང་དང་རྒྱུན་མཐུད་ཐུབ་པའི་གོ་ལ་ཞིག་བསྐྲུན་འདོད་ཡོད་པ་བསྟན།

ལུའུ་ལ་ཡིས་པར་ཙིར་ཕྱོགས་ཀྱིས་ཀྲུང་གོའི་འབྲེལ་བར་ཚད་མཐོའི་མཐོང་ཆེན་བྱེད་ཀྱིན་ཡོད་ལ། ཀྲུང་གོ་དང་མཉམ་ལས་བྱེད་ཤུགས་ཆེ་རུ་གཏོང་བ་དང་འཐབ་ཇུས་འབྲེལ་མཐུད་གཏིང་ཟབ་ཏུ་བཏང་སྟེ།　 རྒྱལ་ཁབ་གཉིས་ཀྱི་འབྲེལ་བར་འཕེལ་རྒྱས་སྔར་ལས་ཆེ་བ་ཡོང་རྒྱུར་སྐུལ་འདེད་གཏོང་རྒྱུའི་རེ་བ་ཡོད་པ་དང་། ལུའུ་ལ་ཡིས་པར་ཙིར་དང་ཨ་རིའི་ཉེ་ལམ་གྱི་འབྲེལ་བའི་གནས་ཚུལ་དང་། དེ་མིན་པར་ཙིར་ཕྱོགས་ཀྱིས་རང་ངོས་ཀྱི་བདག་དབང་མཐའ་གཅིག་ཏུ་སྲུང་སྐྱོང་བྱེད་པའི་རྩ་དོན་གྱི་ལངས་ཕྱོགས་ངོ་སྤྲོད་གནང་ལ། ཀྲུང་གོས་ཕྱོགས་མང་རིང་ལུགས་རྒྱུན་འཁྱོངས་དང་རང་མོས་ཉོ་འཚོང་གི་སྒྲིག་སྲོལ་སྲུང་སྐྱོང་བྱས་ཏེ། རྒྱལ་སྤྱིའི་ལས་དོན་ཁྲོད་འགན་འཁྲིའི་ནུས་པ་འདོན་སྤེལ་བཅས་བྱས་པར་བསྔགས་བརྗོད་བྱས།　 པར་ཙིར་ཕྱོགས་ཀྱིས་ཀྲུང་གོ་དང་མཉམ་དུ་གསེར་ལྡན་སོགས་ཕྱོགས་མང་ལམ་སྲོལ་ཁྲོད་ཀྱི་འབྲེལ་འདྲིས་མཐུན་སྦྱོར་ལ་ཤུགས་བསྣན་ནས། ཕྱོགས་རྐྱང་བཙན་བརྙས་བྱ་སྤྱོད་ལ་ངོ་རྒོལ་བྱས་ཏེ། རྒྱལ་ཁབ་སོ་སོའི་ཐུན་མོང་གི་ཁེ་ཕན་སྲུང་སྐྱོང་བྱེད་འདོད་ཡོད་པ་བསྟན།

ཞི་ཅིན་ཕིང་གིས་ཀྲུང་གོ་ཕྱོགས་ཀྱིས་པར་ཙིར་མི་དམངས་ཀྱིས་རྒྱལ་ཁབ་ཀྱི་བདག་དབང་སྲུང་སྐྱོང་དང་། པར་ཙིར་ཕྱོགས་ཀྱིས་རང་ངོས་ཀྱི་ལུགས་མཐུན་ཁེ་དབང་སྲུང་སྐྱོང་བྱ་རྒྱུར་རྒྱབ་སྐྱོར་བྱ་རྒྱུ་ཡིན། རྒྱལ་ཁབ་ཁག་གིས་མཐུན་སྒྲིལ་བྱས་ཏེ་དར་ཆ་གསལ་བསྒྲེངས་ཀྱིས་ཕྱོགས་རྐྱང་རིང་ལུགས་དང་སྲུང་སྐྱོབ་རིང་ལུགས་ལ་ངོ་རྒོལ་བྱེད་དགོས་ཤིང་།　 གསེར་ལྡན་ལམ་སྲོལ་ནི་གོ་ལ་ཧྲིལ་པོའི་ལྷོ་ཕྱོགས་ཀྱི་ཐུན་མོང་ངོས་འཛིན་གཅིག་ཏུ་སྒྲིལ་བའི་སྟེགས་བུ་གལ་ཆེན་ཞིག་ཡིན། པར་ཙིར་གྱིས་གསེར་ལྡན་རྒྱལ་ཁབ་ཀྱི་འགོ་ཁྲིད་པའི་མཇལ་འཛོམས་བདེ་བླག་ངང་གནང་བར་རྟེན་འབྲེལ་ཞུས། འཛམ་གླིང་ལྷོ་ཕྱོགས་རྒྱལ་ཁབ་ཀྱིས་ལག་གདང་སྦྲེལ་ནས་རྒྱལ་སྤྱིའི་དྲང་སྙོམས་དྲང་བདེན་ལ་སྲུང་སྐྱོང་དང་། རྒྱལ་སྤྱིའི་འབྲེལ་བའི་གཞི་རྩའི་ཚད་གཞི་སྲུང་སྐྱོང་། འཕེལ་རྒྱས་སུ་འགྲོ་བཞིན་པའི་རྒྱལ་ཁབ་ཀྱི་ལུགས་མཐུན་ཁེ་དབང་སྲུང་སྐྱོང་བཅས་བྱ་དགོས། ཀྲུང་གོ་དང་པར་ཙིར་གཉིས་ཀྱིས་མུ་མཐུད་དུ་གོ་ལ་ཧྲིལ་པོའི་རང་བཞིན་གྱི་འགྲན་སློང་ལ་ཁ་གཏད་འཇལ་ནས། མཉམ་འབྲེལ་རྒྱལ་ཚོགས་ཀྱི་གནམ་གཤིས་འགྱུར་ལྡོག་གི་པེ་ལོན་ཚོགས་ཆེན་ལེགས་འགྲུབ་ཡོང་བར་འགན་ལེན་བྱས་ཏེ། “ཞི་བདེའི་གྲོགས་པོ”ཚན་ཆུང་གིས་ཆབ་སྲིད་ཀྱི་ཐོག་ནས་ཡུག་རེན་གྱི་ཉམས་ཉེན་ཐག་གཅོད་པར་ནུས་པ་འདོན་རྒྱུར་སྐུལ་འདེད་གཏོང་དགོས་པ་བསྟན།