མཚོ་སྔོན་ཞིང་ཆེན་མི་དམངས་སྲིད་གཞུང་དྲ་བ།
ཟླ8ཚེས10ཉིན། རྨ་ལྷོ་སོག་རྫོང་གིས་ ཡུལ་ཚོ་ཆུ་ཧེ་སྡེ་བ་ནས་ཡོང་བའི་འབྲོག་པ་ཚེ་ཁོས་ཞོགས་པ་སྔ་མོ་ཞིག་ནས་སྐམས་འཁོར་སྒམ་གང་དྲུད་དེ་ཁྲོམ་རར་ཐོན་བྱུང་། ཁོས་འདི་སྐད། ས་འདིའི་ཁོར་ཡུག་གཙང་ལ་བག་ལྷོད་པ། ཉོ་ཚོང་གི་གོ་རིམ་ཧ་ཅང་ཚད་ལྡན་ཡིན་པས། བསྡུ་ཉོ་ཚོང་བ་ཡང་ཧ་ཅང་མང་། འདི་རུ་འཚོང་བརྒྱབ་ན་གོང་ཐང་ཉེ་འཁོར་གྱི་ཟོག་ཚོང་རྒྱག་ས་ལས་མཐོ་བས་ང་རང་རྒྱུན་དུ་ཁྲོམ་ར་འདིར་ཡོང་ནས་ཕྱིར་འཚོང་བརྒྱབ་པ་ཡིན་ཟེར།
སྐམས་ལུག་ཉོ་མཁན་ཚོང་བ་ཁྲེན་ཅིན་མིན་ནི་སི་ཁྲོན་ཁྲི་འདུ་ལུང་ཞང་ཉོ་ཚོང་བཤའ་ཟོག་ཚད་ཡོད་ཀུང་སིའི་འགན་འཁུར་བ་ཡིན་ཞིང་། ཁོས་འདི་སྐད་ཁྲོམ་ར་འདིའི་གྲངས་ཀའི་ཉོ་ཚོང་སྟེགས་བུ་ཧ་ཅང་རིག་ནུས་རེད། ཚོང་མགྲོན་ལ་ཧ་ཅང་བདེ་འཇགས་ཡིན་ལ་སྟབས་བདེ་བའི་ཉོ་ཚོང་ཁོར་ཡུག་འདོན་ཐུབ། ཁོས་ཉོས་པའི་སྐམས་ལུག་གཙོ་བོ་སི་ཁྲོན་ཞིང་ཆེན་གྱི་སྡེབ་འཚོང་ཁྲོམ་ར་སོ་སོ་ནས་ཡོང་བ་ཡིན་པ་དང་། སྐམས་ལུག་གི་ཉིན་ཉོ་འཚོང་གི་ཚད་མགོ་གྲངས500ལ་བསླེབས་ཡོད།
ལཱ་ཡུང་ཆིང་གིས་འདི་སྐད། ཟླ7ཚེས10ཉིན་ནས་ཟླ8ཚེས10ཉིན་བར། སྤྱིའི་ཉོ་ཚོང་གི་མ་དངུལ་སྒོར་ཁྲི8717ལ་བསླེབས་ཤིང་། སྤྱིའི་ཉོ་ཚོང་གི་གྲངས་འབོར་མགོ་གྲངས19436ལ་བསླེབས། དེའི་ནང་སྐམས13572དང་། ལུག5864ཡོད། ཉོ་ཚོང་ལྟེ་གནས་ཀྱི་ཉིན་ཉོ་ཚོང་གི་ཚད་ཆེས་མཐོ་བ་སྒོར་ཁྲི1000ལས་བརྒལ་ཡོད་པ་དང་། དེ་ལས་སྐམས800ལྷག་དང་། ལུག600ལྷག་ལ་བསླེབས། གཞན་ད་དུང་ཉོ་ཚོང་ལྟེ་གནས་ཀྱིས་ལས་གནས་གསར་པ50ཡན་ཁ་སྣོན་བརྒྱབ་ནས་འབྲེལ་ཡོད་ཀྱི་ཞབས་ཞུ་ལས་སྒོ་རུ་མི1000ལས་ཞུགས་སུ་སྐུལ་ཁྲིད་བྱས་པ་དང་། ད་ལྟ་ཕྱུག་ཟོག་གི་སྤྱི་གཉེར་པ300ལྷག་ཡོད་ཟེར།
2022ལོའི་ཟླ8ཚེས22ཉིན་ཉོ་ཚོང་ལྟེ་གནས་གཉེར་སྐྱོང་བྱས་པ་ནས་བཟུང་། ཉོ་ཚོང་ཕྱུག་ཟོག་གི་ཡོང་ཁུངས་དེ་རྨ་ལྷོ་སོག་རྫོང་གི་ཁོངས་མ་གཏོགས་ད་དུང་ཐུན་རིན་གྲོང་ཁྱེར་དང་། རྩེ་ཁོག་རྫོང་། གཅན་ཚ་རྫོང་སོགས་ཉེ་འཁོར་གྱི་རྫོང་དང་གྲོང་ཁྱེར། དེ་མིན་ཀན་སུའུ་རྨ་ཆུ་དང་སི་ཁྲོན་གྱི་མཛོད་དགེ་སོགས་ས་ཁུལ་ལ་ཁྱབ་ནས་ས་ཁོངས་རང་བཞིན་གྱི་ཕྱུག་ཟོག་ཉོ་ཚོང་གི་ལྟེ་བ་གལ་ཆེན་ཞིག་ཏུ་རིམ་བཞིན་འཕེལ་ཡོད་པ་རེད།
