ཟི་ལིང་ནས་ཁྲེང་ཏུའུ་བར་གྱི་ལྕགས་ལམ་འཛུགས་སྐྲུན་གྱི་གནས་ཚུལ།

རང་རེའི་དྲ་བའི་འཕྲིན། ཉེ་སྔོན། གསར་འགོད་པས་ཁྲེང་ལན་ལྕགས་ལམ་ཚད་ཡོད་འགན་ལེན་ཀུང་སི་ནས་ཤེས་རྟོགས་བྱས་པར། ཟི་ལིང་ནས་ཁྲེང་ཏུའུ་བར་གྱི་ལྕགས་ལམ་ལས་མཛོད་དགེ་ཕུག་ལམ་བདེ་བླག་ངང་བརྟོལ་ཐུབ་པ་བྱུང་། དེ་ནི་ཟི་ལིང་ནས་ཁྲེང་ཏུའུ་བར་གྱི་ལྕགས་ལམ་ལས་སི་ཁྲོན་ལམ་དུམ་གྱི་སྨི2000ཡན་གྱི་ཕུག་ལམ་ཐོག་མ་ཡིན་ཅིང་། ཕུག་ལམ་དེ་ཤར་གཏོང་བྱས་རྗེས་ཁྲེང་ཏུའུ་ནས་མཛོད་དགེ་རྩྭ་ཐང་ཆེན་མོ་བར་ཆུ་ཚོད2.5ཙམ་གྱིས་སླེབས་ཐུབ་པ་དང་། ཁྲེང་ཏུའུ་ནས་ཟི་ལིང་བར་ལའང་ཆུ་ཚོད5ཡིས་ཐོན་ཐུབ།

ཟི་ལིང་ནས་ཁྲེང་ཏུའུ་བར་གྱི་ལྕགས་ལམ་ནི་རང་རྒྱལ་གྱི“ཕྱོགས་བཞི་མཚམས་བརྒྱད”ཀྱི་མྱུར་བགྲོད་ལྕགས་ལམ་དྲ་རྒྱ་ལས་ལན་གྲུ་དང་ཟི་ལིང་། ཀོང་ཀྲོའུ་བར་གྱི་ལྕགས་ལམ་གྲུབ་ཆ་གལ་ཆེན་ཞིག་ཡིན། མཚོ་སྔོན་ཞིང་ཆེན་ཟི་ལིང་གྲོང་ཁྱེར་གྱི་ཟི་ལིང་ས་ཚིགས་ནས་འགོ་བརྩམས་ཏེ། མཚོ་སྔོན་ཞིང་ཆེན་མཚོ་ཤར་གྲོང་ཁྱེར་དང་རྨ་ལྷོ་བོད་རིགས་རང་སྐྱོང་ཁུལ། ཀན་སུའུ་ཞིང་ཆེན་ཀན་ལྷོ་བོད་རིགས་རང་སྐྱོང་ཁུལ། སི་ཁྲོན་ཞིང་ཆེན་རྔ་བ་བོད་རིགས་ཆཱང་རིགས་རང་སྐྱོང་ཁུལ་བཅས་བརྒྱུད་དེ་སི་ཁྲོན་ཞིང་ཆེན་ཁྲེང་ཏུའུ་གྲོང་ཁྱེར་གྱི་ཁྲེང་ཏུའུ་ཤར་ཕྱོགས་ས་ཚིགས་སུ་བསླེབ་ཐུབ།

ད་སྔར། སི་ཁྲོན་ལམ་དུམ་གྱི་ཨར་ལས་འཛུགས་སྐྲུན་དེ་ལས་གཞིའི་རྣམ་གྲངས་སྣ་ཚོགས་རིམ་ལྡན་གྱིས་སྤེལ་ཏེ། ཕུག་ལམ་ཨར་ལས་ཀྱི་འགྲུབ་ཚད66.2%ལ་བསླེབས་ཡོད་ཅིང་། ཕུག་ལམ5བརྟོལ། ཟམ་པའི་ཨར་ལས་ཀྱི་འགྲུབ་ཚད77.5%དང་ལམ་གྱི་རྨང་འདིང་ཨར་ལས58.8%ལེགས་འགྲུབ་བྱས་ཟིན་ཅེས་ཁྲེང་ལན་ལྕགས་ལམ་ཚད་ཡོད་འགན་ལེན་ཀུང་སིའི་ལྕགས་ལམ་བཀོད་འདོམས་དཔོན་དབྱིན་ཅན་ཝུན་གྱིས་དེ་ལྟར་ངོ་སྤྲོད་བྱས།