མཚོ་སྔོན་ཞིང་ཆེན་མི་དམངས་སྲིད་གཞུང་དྲ་བ།
ཟླ8ཚེས7ཉིན་བཟོ་བའི་ཉིན་རེའི་ཚགས་པར་གྱིས་པེ་ཅིང་ནས་སྤེལ་བའི་འཕྲིན། ཉིན་དེར་རྒྱལ་སྲིད་སྤྱི་ཁྱབ་ཁང་གཞུང་སྒྲུབ་ཁང་གིས་རྒྱལ་སྲིད་སྤྱི་ཁྱབ་ཁང་སྲིད་ཇུས་འཆར་ཅན་ཁྱབ་སྒྲོག་ཚོགས་འདུ་བསྡུས་ཏེ། སྔོན་འགྲོ་སློབ་གསོ་རིན་མེད་མྱོང་བའི་སྲིད་ཇུས་རིམ་བཞིན་ལག་བསྟར་བྱ་བའི་འབྲེལ་ཡོད་གནས་ཚུལ་ངོ་སྤྲོད་གནང་། གསར་འགོད་པས་ཚོགས་ཐོག་ཏུ་རྒྱུས་ལོན་པ་ལྟར་ན། རྒྱལ་ཁབ་ཀྱིས་གཅིག་གྱུར་ཐོག་ལག་བསྟར་བྱེད་པའི་སྔོན་འགྲོ་སློབ་གསོའི་སློབ་ཡོན་མི་དགོས་པའི་སྲིད་ཇུས་དེ་བུ་བཅོལ་ཁང་ཡོད་ཚད་ཀྱི་ལོ་རིམ་གསུམ་པའི་བྱིས་པ་ཡོངས་ལ་ལག་བསྟར་བྱ་རྒྱུ་ཡིན་པ་མ་ཟད། སྔོན་དཔག་བྱས་ན་ད་ལོའི་སྟོན་དུས་ཀྱི་སློབ་སྐབས་ཚུགས་ནས་བཟུང་ཧ་ལམ་མི་བྱེ་བ་གཅིག་ས་ཡ་གཉིས་ལ་ཕན་བདེ་བསྐྲུན་རྒྱུ་རེད།
ནོར་སྲིད་པུའུ་ཡི་པུའུ་ཀྲང་གཞོན་པ་ཀའོ་ཐིན་ཐིན་གྱིས་ཚོགས་ཐོག་ཏུ་འདི་སྐད། སྔོན་འགྲོ་སློབ་གསོ་རིན་མེད་མྱོང་བའི་སྲིད་ཇུས་རིམ་བཞིན་ལག་བསྟར་བྱ་བ་ནི་སྲིད་གཞུང་གིས་མ་དངུལ་གཏོང་ཤུགས“ཇེ་ཆེར”བཏང་བ་ལ་བརྟེན་ནས་ཁྱིམ་ཚང་གི་སློབ་གསོའི་གཏོང་སྒོ“ཉུང་གཏོང”བྱེད་པ་ཞིག་ཡིན། བུ་བཅོལ་སློབ་གསོའི་སློབ་ཡོན་གྱིས་ཁྱིམ་ཚང་གི་སྔོན་འགྲོ་སློབ་གསོའི་སྤྱིའི་གཏོང་སྒོ་ལས་བསྡུར་ཚད་ཅུང་མཐོན་པོ་ཞིག་བཟུང་ཡོད་པས། སློབ་ཡོན་མེད་པར་བཟོས་རྗེས་ཁྱིམ་ཚང་གི་སློབ་གསོའི་གཏོང་སྒོ་ཇེ་ཉུང་དུ་གཏང་ཐུབ་པ་ཡིན། ཚོད་རྩིས་ལྟར་ན། ད་ལོའི་སྟོན་དུས་ཀྱི་སློབ་སྐབས་ཁོ་ནར་རྒྱལ་ཡོངས་ནོར་སྲིད་ཀྱིས་ཧ་ལམ་མ་དངུལ་དུང་ཕྱུར200གཏང་དགོས་ལ། དེས་ཁྱིམ་ཚང་གི་གཏོང་སྒོ་སྒོར་དུང་ཕྱུར200གྲོན་ཆུང་བྱ་ཐུབ་ཡོད་ཅེས་ཟེར།
ཐེངས་འདིར་བཏོན་པའི་བུ་བཅོལ་སློབ་གསོའི་སློབ་ཡོན་མི་དགོས་པར་བཟོས་པའི་སྲིད་ཇུས་དེས་འགྲོ་གྲོན་ཁག་ཁུར་ལུགས་མཐུན་གྱིས་བགོ་བའི་རྩ་དོན་ལ་བརྩི་སྲུང་བྱས་ཡོད་དེ། དེ་ཡང་བུ་བཅོལ་སློབ་གསོའི་སློབ་ཡོན་མེད་པའི་ཁ་གསབ་མ་དངུལ་དེ་ཀྲུང་དབྱང་དང་ས་གནས་གཉིས་ཀྱིས་མཉམ་དུ་འགན་ཁུར་རྒྱུ་དང་། དེ་ལས་ཀྲུང་དབྱང་ནོར་སྲིད་ཀྱིས་མང་ཤོས་བཏང་སྟེ་དབུས་ནུབ་རྒྱུད་ཀྱི་ས་ཁུལ་ལ་ཤུགས་ཆེན་པོ་འདོན་རྒྱུ། ས་གནས་སོ་སོས་ཀྲུང་དབྱང་གི་ཁ་གསབ་རོགས་དངུལ་དང་རང་སྟེང་གི་ནོར་ཤུགས་གཅིག་གྱུར་ཐོག་བཀོད་སྒྲིག་བྱས་ནས་དུས་ཐོག་ཏུ་མ་དངུལ་འདང་ངེ་གཏོང་སྤྲོད་ཐུབ་པར་ཁག་ཐེག་དང་། དམངས་ཕན་སྲིད་ཇུས་འདི་གེགས་མེད་བདེ་བླག་ངང་ལག་ལེན་ཏུ་བསྟར་བར་འགན་སྲུང་བྱ་རྒྱུ་རེད།
ཤེས་གསལ་ལྟར་ན། ནོར་སྲིད་པུའུ་ཡིས་མ་དངུལ་འདང་ངེ་ཞིག་ཀྲུང་དབྱང་ནོར་སྲིད་ནས་འགན་ཁུར་དགོས་པའི་སྔོན་འགྲོ་སློབ་གསོའི་སློབ་ཡོན་མེད་པའི་ཁ་གསབ་མ་དངུལ་ཕྱོགས་ལ་བཀོད་སྒྲིག་བརྒྱབ་ནས་ཉེ་ལམ་གཤམ་སྤྲོད་བྱས་པ་དང་ཆབས་ཅིག ས་གནས་ཁག་གིས་སྔོན་འགྲོ་སློབ་གསོའི་སློབ་ཡོན་མེད་པའི་ཁ་གསབ་མ་དངུལ་དོན་འཁྱོལ་ཡོང་བར་ཁྲིད་སྟོན་བྱ་དགོས་པ་དང་། ཞིང་ཆེན་ཁག་གི་ནོར་སྲིད་དང་སློབ་གསོ་སྡེ་ཚན་གྱིས་ཀྲུང་དབྱང་གི་ཁ་གསབ་མ་དངུལ་དང་ས་གནས་ཀྱི་འབྲེལ་ཡོད་མ་དངུལ་གཅིག་གྱུར་འཆར་འགོད་ཐོག་བཀོད་སྒྲིག་བརྒྱབ་ཏེ། ཞིང་ཆེན་མངའ་ཁོངས་ཀྱི་བུ་བཅོལ་ཁང་གི་རིན་མེད་སློབ་གསོ་ཡི་ནོར་སྲིད་ཁ་གསབ་རོགས་དངུལ་ལག་བསྟར་དོན་འཁྱོལ་བྱ་དགོས་པ་མ་ཟད། ལམ་སེང་གཤམ་སྤྲོད་བྱས་ནས་རིན་མེད་སློབ་གསོ་ལག་བསྟར་མ་འཁྱོངས་བ་ལ་བརྟེན་ནས་བུ་བཅོལ་ཁང་གི་རྒྱུན་ལྡན་འཁོར་སྐྱོད་ལ་ཤུགས་རྐྱེན་ཐེབས་པར་འགན་ལེན་བྱ་དགོས་པ་རེད།
