ས་གནས་དང་སྡེ་ཁག་སོ་སོས་ཞོད་འགོག་རྒུད་སྐྱོབ་ཀྱི་བྱ་བ་རྒྱུན་མཐུད་ངང་ལེགས་པོར་བསྒྲུབས་ཏེ་མང་ཚོགས་བདེ་འཇགས་སྒོས་ཞོད་དུས་ལས་བརྒལ་བར་འགན་སྲུང་བྱས།

ས་གནས་དང་སྡེ་ཁག་སོ་སོས་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་མཛུབ་སྟོན་གལ་ཆེན་གྱི་དགོངས་དོན་ལག་བསྟར་ནན་ཏན་བྱས་ཏེ། ཞོད་འགོག་རྒུད་སྐྱོབ་ཀྱི་བྱ་བ་སོ་སོ་རྒྱུན་མཐུད་ངང་ལེགས་པོར་བསྒྲུབས་ཏེ་མང་ཚོགས་བདེ་འཇགས་སྒོས་ཞོད་དུས་ལས་བརྒལ་བར་འགན་ལེན་བྱས།

ཟླ8པའི་ཚེས7ཉིན་གྱི་ཚུན་དུ། ཀན་སུའུ་ཞིང་ཆེན་ལན་ཀྲོའུ་གྲོང་ཁྱེར་ཡུས་ཀྲུང་རྫོང་སོགས་སུ་བསྟུད་མར་དྲག་ཆར་བབས་ནས་ཆུ་ལོག་བྱུང་སྟེ་གྲོང་རྡལ་དང་ཡུལ་ཚོ8ལ་གནོད་འཚེ་ཐེབས། གནོད་འཚེ་ཚབས་ཆེ་བའི་ཡུས་ཀྲུང་རྫོང་མ་ལེན་ཐང་ཡུལ་ཚོ་རུ། རོགས་སྐྱོབ་མི་སྣས་རོགས་སྐྱོབ་ཡོ་བྱད་འཁྱེར་ནས་རྐང་ཐང་དུ་བསྐྱོད་དེ“ཞིབ་ཕྲའི”འཚོལ་སྐྱོབ་བྱས། ཚེས9ཉིན། བཅའ་སྡོད་དཔོན་དམག་དང་དམངས་དམག　 རྒྱལ་ཁབ་ནུབ་བྱང་ས་ཁོངས་འཕྲལ་བསྟུན་རོགས་སྐྱོབ་ལྟེ་གནས། ས་གནས་ཀྱི་རོགས་སྐྱོབ་མི་སྣ་སོགས་སྟོབས་ཤུགས་མཉམ་དུ་བསྡུས་ནས།　 གནོད་འཚེ་ཚབས་ཆེན་ཐེབས་པའི་མཱ་ལན་ཐང་ཡུལ་ཚོ་དང་ཅིའུ་ཀྲོང་ཀོའུ་ཡུལ་ཚོ། ཞིན་ལུང་ཧྲན་ཡུལ་ཚོ་སོགས་ཀྱི་ས་ཁོངས་སུ་རྒྱུན་མཐུད་ངང་བསྐྱོད་དེ།　 ཚོ་ཆུང་ཁག་བགོས་ཀྱིས་ཆུ་བོའི་འགྲམ་རྒྱུད་དུ་གར་སོང་ཆ་མེད་དུ་གྱུར་བའི་མི་སྣ་འཚོལ་སྐྱོབ་བྱ་རྒྱུར་ཤུགས་བསྣན།

ཀན་སུའུ་ཞིང་ཆེན་མེ་ཟོན་རོགས་སྐྱོབ་སྤྱི་ཁྱབ་རུ་ཁག་གི་སྤྱི་ཁྱབ་རུ་དཔོན་གཞོན་པ་ཀྲང་ཧྲེང་ཧྭ་ཡིས་བཤད་རྒྱུར། མིག་སྔར་འཚོལ་སྐྱོབ་བྱ་བ་བྲེལ་མྱུར་ངང་སྤེལ་བཞིན་ཡོད་ལ། ང་ཚོས་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་བཀའ་སློབ་གལ་ཆེན་གྱི་དགོངས་དོན་མཐའ་གཅིག་ཏུ་ལག་བསྟར་དོན་འཁྱོལ་བྱས་ཏེ། གར་སོང་ཆ་མེད་དུ་གྱུར་བའི་མང་ཚོགས་འཚོལ་སྐྱོབ་བྱ་རྒྱུ་དེ་མིག་སྔའི་ལས་འགན་ཨང་དང་པོར་བརྩིས་ནས། རེ་བ་ཕྲན་ཙམ་ཡོད་ཚེ། ང་ཚོས་གཏན་ནས་མི་བསྐྱུར་ཟེར།

རྨས་མ་སྐྱོབ་བཅོས་དང་མང་ཚོགས་གནས་སྤོར་བཀོད་སྒྲིག་སོགས་ཀྱི་བྱ་བ་ཡང་མགྱོགས་མྱུར་ངང་སྤེལ་བཞིན་ཡོད། ལན་ཀྲོའུ་ཡུས་ཀྲུང་རྫོང་མི་དམངས་སྨན་ཁང་དང་པོ་རུ། 　སྐྱབས་པའི་མི15ཡིས་སྨན་བཅོས་དང་ལེན་བྱེད་བཞིན་ཡོད་པ་དང་། ཁོ་ཚོ་མང་ཆེ་བར་སྐྱི་བཤུས་དང་རུས་ཆག་སོགས་ཀྱི་རྨས་སྐྱོན་ཕོག་ཡོད། མིག་སྔར་གནས་ཚུལ་གཏན་འཇགས་རེད། ཀན་སུའུ་ཞིང་ཆེན་འཕྲོད་བསྟེན་བདེ་ཐང་ཨུ་ཡོན་ལྷན་ཁང་གིས་ཞིང་ཆེན་རིམ་པའི་སྨན་ཁང6གི་ཚན་ཁག་མང་པོའི་ཆེད་མཁས་པ26འདེམས་ནས་ཡུས་ཀྲུང་རྫོང་དུ་སྨན་བཅོས་རོགས་སྐྱོབ་ནང་ཞུགས་ཡོད། མིག་སྔར་ཡུས་ཀྲུང་རྫོང་གིས་མགྲོན་ཁང54བེད་སྤྱོད་བྱས་ཏེ། སློབ་གྲྭ་དང་གྲོང་ཚོའི་ཨུ་ཡོན་ལྷན་ཁང་སོགས་གཅིག་སྡུད་བཀོད་སྒྲིག་བྱ་ཡུལ14བཙུགས་པ་དང་བསྡོམས་རྩིས་བྱས་ན་མང་ཚོགས9800ལྷག་གནས་སྤོར་བཀོད་སྒྲིག་བྱས་ཡོད།

ཀན་སུའུ་ཞིང་ཆེན་ལན་ཀྲོའུ་གྲོང་ཁྱེར་ཡུས་ཀྲུང་རྫོང་མ་ཕོ་ཡུལ་ཚོ་མ་ལེན་ཐང་སྡེ་བའི་སྡེ་མི་ལུའུ་ཧུང་ཞ་ཡིས་བཤད་རྒྱུར། ང་ཁ་སང་དགོང་མོའི་དུས་ཚོད་བརྒྱད་ཀྱི་སྟེང་འདི་རུ་སྤར་ཡོང་བ་དང་དེ་མ་ཐག་ལས་བྱེད་མི་སྣས་དགོང་ཟས་གྲ་སྒྲིག་བྱས་ཡོད་ཅིང་སྔོ་ཚོད་རིགས་བཞི་བརྔོས་འདུག དེ་རིང་སྔ་དྲོའི་ཟ་མ་དེ་ལས་ཀྱང་བཟང་། ཕྱོགས་གང་ཅིའི་ཐད་ནས་ཧ་ཅང་བཟང་ཟེར།

ཐེངས་འདིར་ཆར་པ་འབབ་ཚད་ཆེ་ཤོས་ནི་ཡུས་ཀྲུང་རྫོང་ཞིན་ལུང་ཧྲན་ཡུལ་ཚོ་ཡིན་ལ། 　མིག་སྔར། མཁར་གྲོང་ནས་ཤིང་ལུང་དུ་སྐྱོད་པའི་གཞུང་ལམ་གཙོ་བོ་སྟེ་ཞིང་ཆེན་གྱི་གཞུང་ལམ104ད་དུང་མྱུར་དུ་སླར་གསོ་བྱེད་བཞིན་ཡོད་པ་དང་ཉེན་སེལ་མི་སྣས་ལམ་དུམ་ཇེ་བརྟན་དུ་གཏོང་བ་དང་འདམ་རྫབ་གཙང་སེལ་བྱེད་བཞིན་ཡོད། ཚེས9ཉིན་གྱི་ཕྱི་དྲོའི་དུས་ཚོད6པའི་བར་གནོད་འཚེ་ཐེབས་ཁུལ་དུ་གློག80%སླར་གསོ་བྱུང་ནས་འཕྲིན་གཏོང་གཞི་རྩའི་ཆ་ནས་སླར་གསོ་བྱུང་ཡོད།