ཞི་ཅིན་ཕིང་གིས་ཀན་སུའུ་ལན་ཀྲོའུ་གྲོང་ཁྱེར་ཡུས་ཀྲུང་རྫོང་དུ་ཆུ་ལོག་གི་གནོད་འཚེ་ཐེབས་པར་མཛུབ་སྟོན་གལ་ཆེན་གནང་།

ཟླ8པའི་ཚེས7 ཉིན་གྱི་ཚུན་དུ། ཀན་སུའུ་ལན་ཀྲོའུ་གྲོང་ཁྱེར་ཡུས་ཀྲུང་རྫོང་སོགས་སུ་བསྟུད་མར་དྲག་ཆར་བབས་ནས་ཆུ་ལོག་གི་གནོད་འཚེ་ཐེབས་པ་དང་། ཚེས8ཉིན་གྱི་ཕྱི་དྲོའི་དུས་ཚོད་གསུམ་དང་སྐར་མ་སུམ་ཅུའི་བར་དུ། མི་བཅུ་རྐྱེན་ལམ་དུ་ཤོར་བ་དང་མི་སོ་གསུམ་གར་སོང་མ་ཤེས།

ཆུ་ལོག་གི་གནོད་འཚེ་བྱུང་རྗེས། ཀྲུང་གུང་ཀྲུང་དབྱང་གི་སྤྱི་ཁྱབ་ཧྲུའུ་ཅི། རྒྱལ་ཁབ་ཀྱི་ཀྲུའུ་ཞི། ཀྲུང་དབྱང་དམག་དོན་ཨུ་ཡོན་ལྷན་ཁང་གི་ཀྲུའུ་ཞི་ཞི་ཅིན་ཕིང་གིས་ཆུ་ལོག་གི་དོན་རྐྱེན་དེར་ཚད་མཐོའི་མཐོང་ཆེན་གནང་བར་མ་ཟད་མཛུབ་སྟོན་གལ་ཆེན་གནང་ནས་བསྟན་དོན། ཀན་སུའུ་ལན་ཀྲོའུ་གྲོང་ཁྱེར་ཡུས་ཀྲུང་རྫོང་སོགས་ས་གནས་ལ་བསྟུད་མར་དྲག་ཆར་བབས་ནས་ཆུ་ལོག་གི་གནོད་འཚེ་ཐེབས་པར་བརྟེན། མི་སྣར་ཤི་རྨས་ཚབས་ཆེན་བྱུང་ལ། གནད་འགག་གི་སྐབས་འདིར་ཐབས་བརྒྱ་ཇུས་སྟོང་གིས་གར་སོང་ཆ་མེད་དུ་གྱུར་བའི་མི་སྣ་འཚོལ་སྐྱོབ་བྱེད་དགོས་པ་དང་། གནོད་ཐེབས་མང་ཚོགས་གནས་སྤོར་བཀོད་སྒྲིག་བྱེད་དགོས་ལ། ཚད་གཞི་མཐོ་བའི་སྒོ་ནས་མི་སྣ་ཤི་རྨས་ཀྱི་ཚད་ཇེ་ཉུང་དུ་གཏོང་བ་དང་། 　འཕྲིན་གཏོང་དང་འགྲིམ་འགྲུལ་གང་མགྱོགས་ངང་སླར་གསོ་བྱེད་དགོས། ཉེ་དུས་ཀྱི་གནམ་གཤིས་ངན་པའི་གནས་ཚུལ་ལ་དམིགས་ཏེ། ས་ཁུལ་སོ་སོ་དང་འབྲེལ་ཡོད་སྡེ་ཁག་སོ་སོས་བག་མེད་ལྷོད་གཡེང་གི་བསམ་བློ་མཐའ་གཅིག་ཏུ་ཁྱད་གསོད་བྱེད་པ་དང་། ཉེན་བརྡ་གཏོང་བར་ཤུགས་སྣོན་པ། 　མངོན་མེད་རྐྱེན་ངན་གྱི་གཙང་བཤེར་དང་དག་ཐེར་ལེགས་བཅོས་ལ་ཤུགས་སྣོན་པ། འཕྲལ་བསྟུན་རེས་མོས་ཀྱི་ལས་གནས་བརྟན་སྲུང་བཅས་ལ་ཤུགས་སྣོན་དགོས་པར་མ་ཟད། དམིགས་འབེན་རང་བཞིན་ཡོད་པའི་སྒོ་ནས་ཞོད་འགོག་རྒུད་སྐྱོབ་ཀྱི་བྱ་བ་སོ་སོ་ལེགས་པོར་བསྒྲུབ་ནས། མང་ཚོགས་ཀྱི་བདེ་འཇགས་ལ་འགན་ལེན་བྱེད་དགོས་ཞེས་གསུངས།

ཀྲུང་གུང་ཀྲུང་དབྱང་ཆབ་སྲིད་ཅུའུ་ཡི་རྒྱུན་ལས་ཨུ་ཡོན། རྒྱལ་སྲིད་སྤྱི་ཁྱབ་ཁང་གི་ཙུང་ལི་ལིས་ཆང་གིས་མཆན་བཀོད་མཛུབ་སྟོན་གནང་ནས་བསྟན་དོན། གར་སོང་ཆ་མེད་དུ་གྱུར་ཞིང་ཉེན་ཁའི་གནས་སུ་ལྷུང་བའི་མི་སྣར་གཙང་བཤེར་དང་འཚོལ་སྐྱོབ་བྱ་རྒྱུར་དམ་འཛིན་དང་། ནུས་ཤུགས་ཡོད་རྒུས་ཉེན་སེལ་རྒུད་སྐྱོབ་བྱེད་པ། འཕྲིན་གཏོང་དང་འགྲིམ་འགྲུལ་སོགས་གཏོར་སྐྱོན་ཐེབས་པའི་སྒྲིག་ཆས་མགྱོགས་མྱུར་སྒོས་ཞིག་གསོ་བྱས་ནས། གནོད་ཐེབས་མང་ཚོགས་དུས་ཐོག་ཏུ་གནས་སྤོར་བཀོད་སྒྲིག་བྱེད་དགོས། མིག་སྔར་སྔར་བཞིན“ཆར་ཞོད་མང་པའི་དུས”ཀྱི་ཞོད་འགོག་གི་གནད་འགག་དུས་སྐབས་ཡིན་པས། རྒྱལ་ཁབ་ཞོད་འགོག་ཐན་འགོག་སྤྱི་ཁྱབ་བཀོད་འདོམས་པུའུ་ཡིས་ས་གནས་སོ་སོ་དང་འབྲེལ་ཡོད་ཕྱོགས་ཁག་གིས་སྔར་ལས་ལྷག་པའི་སྒོ་ནས་དོགས་ཟོན་ཆེ་རུ་གཏོང་བ་དང་འགན་འཁྲི་དོན་འཁྱོལ་བྱེད་པ། ཆར་པ་འབབ་ཚུལ་དང་ཆུ་ལོག་གི་གནས་ཚུལ་ལ་ལྟ་ཞིབ་ཚད་ལེན་དང་སྔོན་བརྡ་གཏོང་བ། གནོད་འགོག་བཅས་ཀྱི་ཁ་གཏད་བྱ་བར་མཛུབ་སྟོན་བྱས་ཏེ། ཤི་རྨས་ཇེ་ཉུང་དུ་གཏོང་གང་ཐུབ་བྱེད་དགོས་ཞེས་གསུངས།

ཞི་ཅིན་ཕིང་གི་མཛུབ་སྟོན་གལ་ཆེན་དང་ལིས་ཆང་གི་བླང་བྱ་ལྟར་དུ། འཕྲལ་བསྟུན་དོ་དམ་པུའུ་ཡིས་བྱ་བའི་ཚོ་ཆུང་ཡུལ་དངོས་སུ་འཚོལ་སྐྱོབ་བྱ་བར་མཛུབ་སྟོན་བྱེད་དུ་མངགས་པ་དང་། ཀན་སུའུ་ཞིང་ཆེན་ཏང་ཨུའི་འགན་འཁུར་བློ་མཐུན་གཙོ་བོས་ཡུལ་དངོས་སུ་ཉེན་སེལ་རྒུད་སྐྱོབ་བྱ་བར་བཀོད་གཏོང་དང་བཀོད་འདོམས་བྱས་ནས། མིག་སྔར་བྱ་བ་སོ་སོ་ཛ་དྲག་དང་གོ་རིམ་ལྡན་པའི་ངང་སྤེལ་བཞིན་ཡོད།