མཚོ་སྔོན་ཞིང་ཆེན་མི་དམངས་སྲིད་གཞུང་དྲ་བ།
འཛམ་གླིང་གི་ལོ་བརྒྱའི་འགྱུར་ལྡོག་མགྱོགས་མྱུར་ངང་འཕེལ་བཞིན་པའི་འགྲོས་དང་བསྟུན་ནས། བློ་རྒྱ་ཆེན་པོ་བཅངས་ནས་འཁོན་སེམས་ཀྱིས་རབ་ཏུ་མྱོས་པའི་འཁྲུག་རྩོད་ཅི་རིགས་ལས་ཐར་ཐབས་བྱེད་དགོས་ཤིང་། བརྩེ་བ་ཆེན་པོ་བཅངས་ནས་མིའི་རིགས་ཀྱི་ལས་སྐལ་ལ་བདག་སྐྱོང་བྱེད་དགོས། ད་ལོའི་ཚུན་དུ་ཀྲུའུ་ཞི་ཞི་ཅིན་ཕིང་གིས་ཀྲུང་གོའི་སྣེ་ཁྲིད་དེ་མིའི་རིགས་ཀྱི་ལས་སྐལ་གཅིག་མཐུན་ཚོགས་པ་འཛུགས་སྐྲུན་གྱི་དར་ཆ་མཐོན་པོར་བསྒྲེངས་ཏེ། འཛམ་གླིང་ཧྲིལ་པོའི་གྲོས་འགོ་ཆེན་པོ་གསུམ་ལག་ལེན་དུ་བསྟར་ནས། ཀྲུང་གོ་དང་འཛམ་གླིང་གི་རྒྱལ་ཁབ་སོ་སོའི་བར་ཕན་ཚུན་བག་ཆགས་བསྒོ་བ་དང་ཕན་ཚུན་རྒྱབ་སྐྱོར་བྱས་ནས་གྲུབ་འབྲས་ཐོབ་པའི་ལེའུ་གསར་པ་བརྩམས། ཕྲེང་བསྟར་གསར་འགྱུར《སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་ད་ལོའི་ཚུན་གྱི་རྒྱལ་སྲིད་སྐྱོང་ལུགས་སྐོར་གྱི་དངོས་ཟིན》ཞེས་པ་ལས། 《མིའི་རིགས་ཀྱི་མདུན་ལམ་དང་ལས་སྐལ་གྱི་ཆེད་དུ་སྔར་ལས་འོད་ཟེར་ལྡན་པའི་མ་འོངས་པ་བརྩོན་ལེན་བྱེད》ཅེས་པ་ཚེས7ཉིན་བཏང་།
ཟླ4པའི་ཚེས14ཉིན། ཡོ་ནན་རྒྱལ་ཁབ་ཀྱི་ཧི་ནེ་ནས་ཆེད་བཏང་གནམ་གྲུ་ནེ་ཕའེ་རྒྱལ་སྤྱིའི་གནམ་ཐང་དུ་འབྱོར་བ་དང་ཆབས་ཅིག ཀྲུའུ་ཞི་ཞི་ཅིན་ཕིང་གིས་ད་ལོའི་འཚམས་འདྲི་ཐོག་མ་གནང་། དཔྱིད་འགོ་ཚེས་བའི་དུས་དང་བསྟུན་ནས། ཀྲུའུ་ཞི་ཞི་ཅིན་ཕིང་གིས་གདན་ཞུས་ལྟར་ཡོ་ནན་དང་མ་ལེ་ཞི་ཡ། ཁམ་ཕུ་ཁྲེ་བཅས་ཨེ་ཤེ་ཡ་ཤར་ལྷོའི་མཛའ་མཐུན་ཁྱིམ་མཚེས་རྒྱལ་ཁབ་གསུམ་ལ་རྒྱལ་དོན་འཚམས་འདྲི་གནང་།
ད་ལོ་ནི་ཀྲུང་གོ་དང་ཡོ་ནན་བར་འབྲེལ་བ་བཙུགས་ནས་ལོ་དོན་ལྔ་འཁོར་བའི་ལོ་ཡིན། སྤྱི་ཁྱབ་ཧྲུའུ་ཅི་ཞི་ཅིན་ཕིང་དང་ཡོ་ནན་གུང་ཁྲན་ཏང་ཀྲུང་དབྱང་གི་སྤྱི་ཁྱབ་ཧྲུའུ་ཅི་སུའུ་ལིན་གཉིས་ཀྱིས་ལོ་གཅིག་གི་ནང་ཕན་ཚུན་ལ་འཚམས་འདྲི་གནང་བ་མངོན་འགྱུར་བྱུང་ཞིང་། འདིས་ཀྲུང་གོ་དང་ཡོ་ནན་བར་གྱི་འབྲེལ་བའི་འཐབ་ཇུས་རང་བཞིན་དང་ཆུ་ཚད་མཐོན་པོ་མཚོན་ཡོད།
ཏང་གཉིས་ཀྱི་སྤྱི་ཁྱབ་ཧྲུའུ་ཅི་ཡིས་འཐབ་ཇུས་ཀྱི་དོན་སྙིང་ལྡན་པའི་ཀྲུང་གོ་དང་ཡོ་ནན་གྱི་ལས་སྐལ་གཅིག་མཐུན་ཚོགས་པ་མགྱོགས་མྱུར་སྒོས་བསྐྲུན་ནས། འཛམ་གླིང་གི་ལོ་བརྒྱའི་འགྱུར་ལྡོག་ཁྲོད་སྤྱི་ཚོགས་རིང་ལུགས་ཀྱི་བྱ་གཞག་འཕེལ་རྒྱས་ཆེན་པོ་ཡོང་བར་མཉམ་དུ་སྐུལ་འདེད་གཏོང་དགོས་པའི་ངོས་འཛིན་གནང་།
མ་ལེ་ཞི་ཡ་ནི་ཀྲུའུ་ཞི་ཞི་ཅིན་ཕིང་ཨེ་ཤ་ཡ་ཤར་ལྷོར་ཕེབས་པའི་ས་ཚིགས་གཉིས་པ་ཡིན་ལ། ཐེངས་འདིའི་འཚམས་འདྲིའི་གྲུབ་འབྲས་གལ་ཆེན་ནི་རྒྱལ་ཁབ་གཉིས་ཀྱི་འགོ་ཁྲིད་པས་ཆུ་ཚད་མཐོ་བའི་འཐབ་ཇུས་རང་བཞིན་གྱི་ཀྲུང་གོ་དང་མ་ལེ་ཞི་ཡའི་ལས་སྐལ་གཅིག་མཐུན་ཚོགས་པ་བསྐྲུན་རྒྱུ་ཁྱབ་སྒྲོག་གནང་སྟེ། ཀྲུང་གོ་དང་མ་ལེ་ཞི་ཡའི་མཛའ་མཐུན་མཉམ་ལས་ཐད་ཀྱི་སྐབས་རྗེས་མའི“གནད་འགག་གི་ལོ50”དངོས་སུ་མགོ་བརྩམས་པ་དེ་ཡིན།
ཨེ་ཤ་ཡ་ཤར་ལྷོའི་འགྲུལ་བཞུད་ཀྱི་མཇུག་མཐའི་ས་ཚིགས་ནི་ཁམ་ཕུ་ཁྲེ་ཡིན། ཁམ་ཕུ་ཁྲེར་འཚམས་འདྲི་གནང་སྐབས། རྒྱལ་ཁབ་གཉིས་ཀྱི་འགོ་ཁྲིད་པས་མཉམ་དུ། ཀྲུང་གོ་དང་ཁམ་ཕུ་ཁྲེའི་འབྲེལ་བའི་གཏན་གནས་དེ་དུས་རབས་གསར་པའི་ནང་རྒྱལ་ཁབ་གཉིས་བར་ལས་སྐལ་གཅིག་མཐུན་ཚོགས་པ་མཉམ་སྐྲུན་བྱ་རྒྱུ་ཡིན་པ་ཁྱབ་སྒྲོག་གནང་ལ། དེ་ནི་ཀྲུང་གོས་ཕྱོགས་གཉིས་ཀྱི་ངོས་ནས་གསར་འཛུགས་བྱས་པའི་དུས་རབས་གསར་བའི་དུས་དང་རྣམ་པ་ཀུན་གྱི་ལས་སྐལ་གཅིག་མཐུན་ཚོགས་པ་ཐོག་མ་དེ་ཡིན།
ཀྲུའུ་ཞི་ཞི་ཅིན་ཕིང་གིས་ཨེ་ཤ་ཡ་ཤར་ལྷོའི་རྒྱལ་ཁབ་གསུམ་ལ་འཚམས་འདྲི་གནང་བ་དེ་ནི། ད་ལོར་རྒྱལ་ཁབ་ཀྱི་གཙོ་འཛིན་གྱིས་རྒྱལ་དོན་འཚམས་འདྲི་གནང་ཐེངས་ཐོག་མ་ཡིན་ལ། འཛམ་གླིང་ཧྲིལ་པོར་དམིགས་པའི་གཟིགས་རྒྱང་གིས་མཐའ་འཁོར་ལ་ཞིབ་ལྟ་དང་མཐའ་འཁོར་བར་ཕྱི་འབྲེལ་བཙུགས་པར་བརྟེན། འཛམ་གླིང་ཧྲིལ་པོར་ཁྱབ་པའི་ཕྱི་འབྲེལ་བྱ་སྤྱོད་གལ་ཆེན་ཞིག་ཀྱང་ཡིན།
ཐེངས་འདིའི་འཚམས་འདྲིར་མ་ཕེབས་པའི་སྔོན་གྱི་ཉིན་འགའི་རིང་། ཀྲུང་དབྱང་གི་མཐའ་འཁོར་བྱ་བའི་ཚོགས་འདུ་པེ་ཅིང་དུ་བསྡུས། སྤྱི་ཁྱབ་ཧྲུའུ་ཅི་ཞི་ཅིན་ཕིང་ཚོགས་འདུར་ཞུགས་པར་མ་ཟད་གསུང་བཤད་གལ་ཆེན་གནང་ནས་། མཐའ་འཁོར་གྱི་ལས་སྐལ་གཅིག་མཐུན་ཚོགས་པ་འཛུགས་རྒྱུར་དམིགས་ཏེ། མཐའ་འཁོར་བྱ་བའི་རྣམ་པ་གསར་པ་འབད་པས་བསྐྲུན་དགོས་ཞེས་ནན་གྱིས་བསྟན།
ཀྲུང་གོ་དང་ཨེ་ཤ་ཡ་དབུས་མའི་རྒྱལ་ཁབ་དག་རི་ཆུས་དམ་པོར་སྦྲེལ་ཞིང་ཕན་ཚུན་རྒྱབ་རྟེན་བྱས་ཡོད།
ད་ལོའི་ཟླ6པར་ཀྲུའུ་ཞི་ཞི་ཅིན་ཕིང་ཧ་སག་སི་ཐན་དུ་ཕེབས་ནས་ཀྲུང་གོ་དང་ཨེ་ཤ་ཡ་དབུས་མའི་རྩེ་ཚོགས་སྐབས་གཉིས་པར་ཞུགས། རྩེ་ཚོགས་ཀྱི་བརྗོད་དོན་གསུང་བཤད་ཁྲོད། ཀྲུའུ་ཞི་ཞི་ཅིན་ཕིང་གིས“ཀྲུང་གོ་དང་ཡ་གླིང་དབུས་མའི་སྙིང་སྟོབས”ཞེས་པ་ཐོག་མར་བཏོན་པར་མ་ཟད་དེའི་ཐད་ནས་གསལ་འགྲེལ་གནང་།
ཀྲུའུ་ཞི་ཞི་ཅིན་ཕིང་གིས་ང་ཚོས་ཀྲུང་གོ་དང་ཡ་གླིང་དབུས་མའི་སྙིང་སྟོབས་སྣེ་ཁྲིད་དུ་བྱས་ནས། སྔར་ལས་ཡར་བརྩོན་གྱི་རྣམ་འགྱུར་དང་སྔར་ལས་དངོས་གཉེར་གྱི་བྱེད་ཐབས་སྤྱད་དེ་མཉམ་ལས་ལ་ཤུགས་སྣོན་དགོས་པ་དང་། རྒྱུད་གཅིག་ལམ་གཅིག་མཉམ་སྐྲུན་གྱི་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་བཏང་ནས། ལས་སྐལ་གཅིག་མཐུན་ཚོགས་པའི་དམིགས་འབེན་གྱི་ཕྱོགས་སུ་འབད་འབུངས་མདུན་སྐྱོད་བྱེད་དགོས་ཞེས་གསུངས།
ཀྲུའུ་ཞི་ཞི་ཅིན་ཕིང་ཨ་སི་ཐ་ནར་བཞུགས་རིང་དུས་ཚོད48ཀྱང་མ་འགོར་ནའང་། ཁོང་ཕྱོགས་གཉིས་ཀྱི་བྱེད་སྒོ་བཅུ་ལྷག་ལ་ཞུགས་ནས། སྲོལ་རྒྱུན་གྱི་མཛའ་བརྩེ་གླེང་བ་དང་མཉམ་ལས་ཀྱི་ཇུས་ཆེན་ལ་གྲོས་མོལ་གནང་བ། འཕེལ་རྒྱས་ཀྱི་འཆར་གཞི་མཉམ་འགོད་མཛད་དེ། ཕན་ཚུན་བར་མཉམ་ལས་ཀྱི་གྲུབ་འབྲས་བརྒྱ་ལྷག་བྱུང་ཡོད།
ལོ་འགོར་ཧ་འར་པིན་གྱི་ཡ་གླིང་དགུན་དུས་ལུས་རྩལ་འགྲན་ཚོགས་སྐབས་དགུ་པ་གཟབ་རྒྱས་ངང་འཚོགས་པ་དང་། དཔྱིད་ཀར་ཀྲུང་དབྱང་གི་མཐའ་འཁོར་བྱ་བའི་ཚོགས་འདུ་བསྡུས། མཐའ་འཁོར་རྒྱལ་ཁབ་བར་གྱི་མཛའ་བརྩེ་སྐྱོང་ཆེད་གཙོ་འཛིན་བསྟུད་མར་ཐེངས་གསུམ་རིང་ཕྱི་རྒྱལ་ལ་འཚམས་འདྲིར་ཕེབས་པ་དང་། ཁྱིམ་མཚེས་རྒྱལ་ཁབ་ཀྱི་འགོ་ཁྲིད་ཀྱང་གཅིག་རྗེས་གཉིས་མཐུད་ངང་ཀྲུང་གོར་འཚམས་འདྲིར་ཡོང་། ད་ལོའི་ལོ་འགོ་ནས་ད་ལྟའི་ཚུན་ལ། ཀྲུང་གོའི་མཐའ་འཁོར་ཕྱི་འབྲེལ་ཐད་ངོ་མཚར་ཆེ་བའི་ལེའུ་བརྩམས་ཡོད།
ཀྲུང་དབྱང་ཏང་གི་སློབ་གྲྭའི་དགེ་རྒན་ཆེན་མོ་ཀྲའོ་ལེ་ཡིས་བཤད་རྒྱུར། སྤྱི་ཁྱབ་ཧྲུའུ་ཅིས་མཐའ་འཁོར་ཕྱི་འབྲེལ་ལ་ཚད་མཐོའི་མཐོང་ཆེན་གནང་བཞིན་ཡོད་པ་དང་། དངོས་སུ་ཕྱོགས་སྟོན་གྱི་འགན་བཞེས་ཏེ། དོན་དག་གལ་ཆེན་དང་གནད་ཆེའི་བྱ་བ་ཚང་མར་དངོས་སུ་སྐུལ་འདེད་དང་ཇུས་འགོད། བཀོད་སྒྲིག་བཅས་གནང་། ད་ལྟ། ཀྲུང་གོ་དང་མཐའ་འཁོར་རྒྱལ་ཁབ་བར་གྱི་འབྲེལ་བ་ནི་ཉེ་རབས་ནས་བཟུང་ལོ་རྒྱུས་ཀྱི་དུས་སྐབས་ཡག་ཤོས་རེད་ཅེས་བཤད་ཆོག འཛམ་གླིང་ཡོངས་ལ་མཚོན་ནས་བཤད་ན། ཞི་བདེ་དང་འཕེལ་རྒྱས། བརྟན་བརླིང་བཅས་ནི་ད་ལྟའི་རྒྱལ་སྤྱིའི་སྤྱི་ཚོགས་ཀྱི་འཕེལ་ཕྱོགས་གཙོ་བོ་ཡིན་ལ་རྒྱལ་ཁབ་སོ་སོའི་རེ་བའང་ཡིན། ཀྲུང་གོ་ནི་ཉེན་ཁ་བཟོ་མཁན་མིན་པར་ཀྲུང་གོ་ནི་གོ་སྐབས་ཡིན་ལ། ཀྲུང་གོ་ནི་དགེ་མཚན་ལྡན་པའི་སྟོབས་ཤུགས་ཤིག་ཡིན་པ་བརྒྱུད་སྒྲོག་བྱས།
ལོ་བརྒྱར་བྱུང་མ་མྱོང་བའི་འཕོ་འགྱུར་ཆེན་པོར་ཁ་གཏད་དེ། ཀྲུང་གོས་ཐོག་མཐའ་བར་གསུམ་དུ་རྒྱལ་ཁབ་ཆེན་པོའི་མཐུན་སྦྱོར་དང་དགེ་མཚན་ལྡན་པའི་བརྗེ་རེས་ལ་སྐུལ་འདེད་གཏོང་རྒྱུར་གཞོལ་ནས། ཞི་བདེ་མཉམ་གནས་དང་སྤྱི་ཡོངས་བརྟན་བརླིང་། དོ་མཉམ་འཕེལ་རྒྱས་བཅས་ཡིན་པའི་རྒྱལ་ཁབ་ཆེན་པོའི་འབྲེལ་བའི་རྣམ་པ་ཞིག་བསྐྲུན་རྒྱུར་སྐུལ་འདེད་གཏོང་བཞིན་ཡོད།
ད་ལོའི་ཚུན་ལ། ཀྲུའུ་ཞི་ཞི་ཅིན་ཕིང་དང་ཨུ་རུ་སུའི་སྲིད་འཛིན་ཕུའུ་ཅིན་བར་འཐབ་ཇུས་ཀྱི་འབྲེལ་འདྲིས་དམ་ཟབ་རྒྱུན་འཁྱོངས་བྱས་ནས། ཀྲུང་ཨུའི་འབྲེལ་བ་འགོག་རྐྱེན་མང་པོ་ཐེབས་པའི་ལོ་བརྒྱར་བྱུང་མ་མྱོང་བའི་འཕོ་འགྱུར་ཁྲོད་བློ་བརྟན་འགྱུར་མེད་ངང་མདུན་སྐྱོད་བྱ་རྒྱུར་ཁྲིད་སྟོན་བྱས། ཟླ5པར། གདན་དྲངས་པ་ལྟར་ཀྲུའུ་ཞི་ཞི་ཅིན་ཕིང་གིས་ཨུ་རུ་སུར་རྒྱལ་དོན་འཚམས་འདྲི་གནང་བ་དང་འབྲེལ། སུའུ་ལེན་གྱི་རླབས་ཆེན་རྒྱལ་སྲུང་དམག་འཁྲུག་ལ་རྒྱལ་ཁ་ཐོབ་ནས་ལོ80འཁོར་བར་རྗེས་དྲན་ཞུ་བའི་རྟེན་འབྲེལ་མཛད་སྒོར་ཞུགས།
ཀྲུང་གོ་དང་ཨ་མེ་རི་ཁ་ཇི་ལྟར་མཉམ་གནས་བྱ་རྒྱུ་དེ་རྒྱལ་ཁབ་གཉིས་ཀྱི་མི་དམངས་ཀྱི་བདེ་སྐྱིད་དང་འབྲེལ་བ་ཡོད་ལ། འཛམ་གླིང་གི་མདུན་ལམ་དང་ལས་སྐལ་དང་ཡང་འབྲེལ་བ་ངེས་ཅན་ཡོད། ད་ལོའི་ཚུན་ལ། ཀྲུའུ་ཞི་ཞི་ཅིན་ཕིང་གིས་དུས་བཅད་ལྟར། ཨ་མེ་རི་ཁའི་སྲིད་འཛིན་ཐི་ལང་ཕུའུ་དང་ཁ་པར་གྱི་ལམ་ནས་བཀའ་མོལ་ཐེངས་གཉིས་གནང་།
ཀྲུའུ་ཞི་ཞི་ཅིན་ཕིང་གིས། ཀྲུང་གོ་དང་ཨ་མེ་རི་ཁའི་བར་གྱི་འབྲེལ་བའི་གྲུ་གཟིངས་ཆེན་པོ་འདིའི་སྐྱོད་ཕྱོགས་ཡང་དག་པའི་ལམ་དུ་ཁྲིད་ཆེད། ང་ཚོས་ཁ་ཕྱོགས་ལེགས་པོ་འཛིན་པ་དང་ཁ་ཕྱོགས་གཏན་འཁེལ་ལེགས་པོ་བྱེད་དགོས། ལྷག་པར་དུ་འགལ་རྐྱེན་སྣ་ཚོགས་དང་ཐ་ན་གཏོར་བཤིག་ཀྱང་སེལ་དགོས། འདི་ནི་ཤིན་ཏུ་གལ་ཆེ། ཀྲུང་གོ་དང་ཨ་མེ་རི་ཁའི་བར་གྱི་ཉོ་ཚོང་འབྲེལ་བའི་ངོ་བོ་ནི་གཉིས་ཕན་མཉམ་རྒྱལ་ཡིན། ཕན་ཚུན་གདོང་གཏོད་དང་ཕན་ཚུན་འགལ་ཟླར་ལངས་རེས་བྱེས་པ་ནི་ཕྱོགས་གཉིས་ཀྱི་འདེམས་འོས་པའི་གདམ་ག་མིན། ཕྱོགས་གཉིས་ཀྱིས་ཕན་ཚུན་བརྩི་འཇོག་དང་ཞི་བདེ་མཉམ་གནས། མཉམ་ལས་མཉམ་རྒྱལ་བཅས་ཀྱི་རྩ་དོན་གཞིར་བཟུང་ནས། མཉམ་ལས་ལ་ཤུགས་སྣོན་དགོས་པ་དང་། རྒྱལ་ཁབ་གཉིས་དང་འཛམ་གླིང་ལ་ཕན་པའི་དོན་ཆེན་དང་དོན་དངོས། དོན་བཟང་བཅས་མང་ཙམ་བསྒྲུབ་དགོས་པ་ནན་གྱིས་བསྟན།
རྒྱལ་ཁབ་གཉིས་ཀྱི་གཙོ་འཛིན་གྱིས་འཐབ་ཇུས་འབྲེལ་འདྲིས་ཀྱི་བགྲོད་ལམ་འཛུགས་པ་དང་། རྒྱལ་ཁབ་གཉིས་ཀས་དོ་ཁུར་བྱེད་ཀྱིན་པའི་གནད་དོན་གལ་ཆེན་གྱི་ཐད་ནས་རྒྱུན་ལྡན་རང་བཞིན་གྱི་འབྲེལ་བ་རྒྱུན་འཁྱོངས་བྱེད་པར་མོས་མཐུན་བྱུང་བ་དང་། ཕྱོགས་གཉི་གའི་ཚོགས་པས་མུ་མཐུད་དུ་རྒྱལ་ཁབ་གཉི་གའི་གཙོ་འཛིན་བར་བྱུང་བའི་ཐུན་མོང་གི་དགོངས་པ་དོན་འཁྱོལ་ལེགས་པོ་བྱ་རྒྱུར་མོས་མཐུན་བྱུང་།
ཡོ་རོབ་གླིང་ནི་ཀྲུང་གོའི་ཕྱི་འབྲེལ་གྱི་ཁ་ཕྱོགས་གལ་ཆེན་ཞིག་ཡིན་པ་དང་། སྔར་ལས་བདེ་ཐང་དང་བརྟན་བརླིང་གི་ཀྲུང་ཡོའི་འབྲེལ་བ་ནི་ཕྱོགས་གཉིས་ཀའི་རྩ་བའི་ཁེ་ཕན་དང་འཚམ་ལ། འཛམ་གླིང་ཡོངས་ཀྱི་རེ་སྒུག་དང་ཡང་འཚམ།
ད་ལོ་ནི་ཀྲུང་གོ་དང་ཡོ་རོབ་གླིང་མནའ་འབྲེལ་བར་འབྲེལ་བ་བཙུགས་ནས་ལོ་ལྔ་བཅུ་འཁོར་བའི་ལོ་ཡིན། ཟླ7པའི་ཚེས24ཉིན། ཀྲུའུ་ཞི་ཞི་ཅིན་ཕིང་གིས་པེ་ཅིན་དུ་ཀྲུང་གོར་ཀྲུང་གོ་དང་ཡོ་རོབ་མནའ་འབྲེལ་གྱི་འགོ་ཁྲིད་པའི་མཇལ་འཕྲད་ཐེངས་ཉེར་ལྔ་པ་སྤེལ་བར་འོང་བའི་ཡོ་རོབ་ལས་འཛིན་ལྷན་ཚོགས་ཀྱི་ཀྲུའུ་ཞི་ཁུ་སི་ཐ་དང་ཡོ་རོབ་མནའ་འབྲེལ་ཨུ་ཡོན་ལྷན་ཁང་གི་ཀྲུའུ་ཞི་ཧྥུན་ཏི་ལའེ་ཨུན་ལ་མཇལ་འཕྲད་གནང་། ཀྲུའུ་ཞི་ཞི་ཅིན་ཕིང་གིས་ཀྲུང་གོ་དང་ཡོ་རོབ་ཀྱི་འབྲེལ་བའི་མ་འོངས་པའི་འཕེལ་རྒྱས་ལ་བཞེད་དགོངས་གསུམ་བཏོན་པ་སྟེ། གཅིག་ནི་ཕན་ཚུན་བརྩི་འཇོག་གི་རྒྱུན་བསྐྱངས་ནས་གྲོགས་པོའི་འབྲེལ་བའི་ངེས་གནས་ཇེ་བརྟན་དུ་གཏོང་དགོས། གཉིས་ནི་སྒོ་འབྱེད་མཉམ་ལས་ཀྱི་རྒྱུན་བསྐྱངས་ནས་འགལ་བ་ཐག་གཅོད་འོས་འཚམ་བྱེད་དགོས། གསུམ་ནི་ཕྱོགས་མང་རིང་ལུགས་ལག་ཏུ་བསྟར་ནས་རྒྱལ་སྤྱིའི་སྒྲིག་སྲོལ་ལ་སྲུང་སྐྱོང་བྱེད་དགོས། ཡོ་རོབ་ཕྱོགས་ཀྱིས་ཀྲུའུ་ཞི་ཞི་ཅིན་ཕིང་གི་ཡོ་རོབ་དང་ཀྲུང་གོའི་འབྲེལ་བའི་སྐོར་གྱི་བཞེད་དགོངས་གསུམ་ནི་ཤིན་ཏུ་གལ་ཆེན་པོ་ཡིན་པས། ཀྲུང་གོ་ཕྱོགས་དང་མཉམ་དུ། ཡོ་རོབ་དང་ཀྲུང་གོའི་འབྲེལ་བའི་མ་འོངས་པའི་ལོ་ལྔ་བཅུའི་ངོ་མཚར་གྱི་ལེའུ་མུ་མཐུད་ནས་འབྲི་བར་རེ་ལྟོས་བྱེད་བཞིན་ཡོད་ཅེས་བསྟན།
ལོ་བརྒྱར་བྱུང་མ་མྱོང་བའི་འཕོ་འགྱུར་ཆེན་པོའི་མདུན་དུ། འཛམ་གླིང་ལ་ཕྱོགས་མང་རིང་ལུགས་སྔར་ལས་མཁོ།
ཟླ3པར་ཀྲུའུ་ཞི་ཞི་ཅིན་ཕིང་གིས་རྒྱལ་སྤྱིའི་བཟོ་ཚོང་ལས་རིགས་ཁག་གི་འཐུས་མིར་མཇལ་འཕྲད་གནང་སྐབས་བསྟན་དོན། ཕྱོགས་མང་རིང་ལུགས་ནི་འཛམ་གླིང་གིས་འགྲན་སློང་ཆེན་པོ་ཐག་གཅོད་པའི་ལྡོག་མེད་ཀྱི་གདམ་ག་ཡིན་པ་དང་། ཀྲུང་གོས་ཕྱོགས་མང་རིང་ལུགས་དངོས་རྒྱུན་འཁྱོངས་བྱེད་ཀྱིན་ཡོད་པ་དང་། སྒོ་འབྱེད་རྣམ་པའི་འཛམ་གླིང་དཔལ་འབྱོར་བསྐྲུན་པར་ཤུགས་འདོན་བཞིན་ཡོད་ཅེས་གསུངས།
ཟླ4པར། ཀྲུའུ་ཞི་ཞི་ཅིན་ཕིང་གིས་གནམ་གཤིས་དང་དྲང་གཞག་ཚུལ་བསྒྱུར་འགོ་ཁྲིད་པའི་བརྙན་རིས་རྩེ་ཚོགས་ལ་ཤིས་ཚིག་ཕུལ་ནས་ཕྱོགས་མང་རིང་ལུགས་བརྟན་སྲུང་བྱེད་པ་དང་། ཕྱོགས་མང་བཅོས་སྐྱོང་བྱས་པ་བརྒྱུད། གནམ་གཤིས་ཀྱི་ཉམས་ཉེན་ལ་མཉམ་དུ་གདོང་གཏོད་དགོས་པ་ནན་གྱིས་བསྟན།
ད་ལོའི་ཚུན་ལ། ཀྲུང་གོས་མཐའ་གཅིག་ཏུ་རྒྱལ་སྤྱིའི་སྤྱི་ཚོགས་དང་མཉམ་དུ་ཕྱོགས་མང་རིང་ལུགས་ལ་སྲུང་སྐྱོང་ཧུར་ཐག་བྱས་པ་དང་། ཕྱོགས་རྐྱང་བཙན་བརྙས་བྱ་སྤྱོད་ལ་ངོ་རྒོལ་བྱས་ཏེ། ཕྱོགས་མང་རིང་ལུགས་ཀྱི་དཔལ་འབར་གྱིས་མིའི་རིགས་མདུན་སྐྱོད་ཀྱི་ལམ་བུར་འོད་སྣང་བསྩལ།
མིག་སྔར། འཛམ་གླིང་ལྷོ་ཕྱོགས་དཀྱུས་གཅིག་ཏུ་འཕེལ་རྒྱས་སུ་ཕྱིན་པ་དང་། ཀྲུང་གོ་ནི་ཐོག་མཐའ་བར་གསུམ་དུ་འཛམ་གླིང་ལྷོ་ཕྱོགས་ཀྱི་ཁོངས་གཏོགས་རྒྱལ་ཁབ་གལ་ཆེན་ཡིན་ཞིང་། འཛམ་གླིང་ལྷོ་ཕྱོགས་ཀྱི་མཐུན་སྒྲིལ་དར་རྒྱས་ལ་སྐུལ་བར་མཐའ་གཅིག་ཏུ་ཤུགས་འདོན་བཞིན་ཡོད།
ད་ལོའི་ཚུན་ལ། ཀྲུའུ་ཞི་ཞི་ཅིན་ཕིང་གིས་འཛམ་གླིང་ལྷོ་ཕྱོགས་ཀྱི་མཐུན་སྒྲིལ་མཉམ་ལས་འབད་པས་དར་སྤེལ་དུ་བཏང་ནས། དྲང་གཞག་ལུགས་མཐུན་གྱི་འཛམ་གླིང་བཅོས་སྐྱོང་མ་ལག་འཛུགས་པར་སྐུལ་འདེད་བཏང་།
ཟླ5པར། ཀྲུའུ་ཞི་ཞི་ཅིན་ཕིང་པེ་ཅིང་དུ་ཀྲུང་གོ་དང་ལ་ཏིང་མེ་གླིང་། ཅ་ལེ་པིའི་རྒྱལ་ཁབ་གཅིག་མཐུན་ཚོགས་པའི་གླེང་སྟེགས་ཀྱི་པུའུ་ཀྲང་རིམ་པའི་ཚོགས་འདུ་སྐབས་བཞི་པའི་འགོ་རྩོམ་མཛད་སྒོར་ཞུགས་པར་མ་ཟད་གསུང་བཤད་གལ་ཆེན་གནང་། ཁོང་གིས་རྒྱལ་ཁབ་ཁག་གིས་མཐུན་སྒྲིལ་མཉམ་ལས་བྱས་ན། གཞི་ནས་འཛམ་གླིང་གི་ཞི་བདེ་བརྟན་བརླིང་ལ་སྲུང་སྐྱོང་དང་། འཛམ་གླིང་གི་འཕེལ་རྒྱས་དང་དར་རྒྱས་ལ་སྐུལ་འདེད་གཏོང་ཐུབ་ཅེས་བསྟན།
སྤུས་ཚད་མཐོ་བའི“རྒྱུད་གཅིག་ལམ་གཅིག”མཉམ་སྐྲུན་བྱེད་པ་ནི་མིའི་རིགས་ཀྱི་ལས་སྐལ་གཅིག་མཐུན་ཚོགས་པ་ལག་བསྟར་བྱེད་པའི་ལས་སྟེགས་གལ་ཆེན་ཞིག་ཡིན།
ད་ལོའི་ཚུན་ལ། ཀྲུའུ་ཞི་ཞི་ཅིན་ཕིང་གིས་གླིང་ཆེན་པོ་ལྔ་ནས་ཡོང་བའི་ཕྱི་རྒྱལ་གྱི་འགོ་ཁྲིད་པར་མཇལ་འཕྲད་གནང་བ་དང་།“རྒྱུད་གཅིག་ལམ་གཅིག”ནི་ཀྲུང་གོའི་གཙོ་འཛིན་གྱི་ཕྱི་འབྲེལ་ལས་རིམ་ཁྲོད་ཐེངས་མང་གླེང་བཞིན་པའི་ཐ་སྙད་ཅིག་ཡིན།
ཟླ་དང་པོར། ཀྲུའུ་ཞི་ཞི་ཅིན་ཕིང་གིས་སི་རི་ལན་ཁའི་སྲིད་འཛིན་ཏི་ས་ནཱ་ཡ་ཁི་ལ་གྲོས་མོལ་གནང་སྐབས། ཀྲུང་གོ་ཕྱོགས་ཀྱིས་སི་རི་ལན་ཁ་ཡིས་དཔལ་འབྱོར་འཛུགས་སྐྲུན་ལ་འབད་པར་རྒྱབ་སྐྱོར་བྱ་རྒྱུ་ཡིན་ལ། སྤུས་ཚད་མཐོ་བའི“རྒྱུད་གཅིག་ལམ་གཅིག”མཉམ་སྐྲུན་སོགས་ཀྱི་ཁྱབ་ཁོངས་མཉམ་ལས་ལ་སྐུལ་འདེད་བཏང་ནས་ཁྱད་ཆོས་གསར་སྐྲུན་བྱ་རྒྱུ་ཡིན་ཚུལ་བསྟན།
ཟླ4པར་ཀྲུའུ་ཞི་ཞི་ཅིན་ཕིང་གིས་ཁེན་ནི་ཡའི་སྲིད་འཛིན་ལུའུ་ཐུའོ་ལ་གྲོས་མོལ་གནང་སྐབས། “རྒྱུད་གཅིག་ལམ་གཅིག”མཉམ་སྐྲུན་བྱ་རྒྱུ་ནི་རྒྱལ་ཁབ་གཉིས་ཀའི་མཉམ་ལས་ཀྱི་བཀྲག་མདངས་འཚེར་བའི་མིང་བྱང་ཞིག་ཡིན་པས། སྤུས་ཚད་མཐོ་བའི“རྒྱུད་གཅིག་ལམ་གཅིག”མཉམ་སྐྲུན་གྱི་སྣེ་ཁྲིད་པ་བྱེད་དགོས་པ་བསྟན།
ཟླ5པར་ཀྲུའུ་ཞི་ཞི་ཅིན་ཕིང་གིས་པ་ཞི་རྒྱལ་ཁབ་ཀྱི་སྲིད་འཛིན་ལུའུ་ལཱར་གྲོས་མོལ་གནང་སྐབས། ཀྲུང་གོ་དང་པ་ཞི་ཡི་ལས་སྐལ་གཅིག་མཐུན་ཚོགས་པའི་ནང་དོན་སྔར་ལས་ཕུན་སུམ་ཇེ་ཚོགས་སུ་གཏོང་དགོས་པ་དང་། “རྒྱུད་གཅིག་ལམ་གཅིག”གི་གྲོས་འགོ་དང་པ་ཞི་ཡི་འཕེལ་རྒྱས་འཐབ་ཇུས་ནུས་ལྡན་སྒོས་འབྲེལ་མཐུད་ཡོང་བར་འབད་དགོས་པ་བསྟན།
ད་ལོའི་ཚུན་དུ། གཙོ་འཛིན་གྱི་ཕྱི་འབྲེལ་སྣེ་ཁྲིད་འོག་ཏུ། ཀྲུང་གོ་རྒྱལ་སྤྱིའི་ས་ཁུལ་གྱི་གནད་དོན་ཚ་ཤོས་ཀྱི་ཆབ་སྲིད་ཐག་གཅོད་ཁྲོད་འཛུགས་སྐྲུན་རང་བཞིན་གྱི་སྒོ་ནས་ཞུགས་པ་དེས་འགན་འཁུར་བའི་རྒྱལ་ཁབ་ཆེན་པོའི་སྣང་བརྙན་མངོན།
ཀྲུའུ་ཞི་ཞི་ཅིན་ཕིང་གིས་མུ་མཐུད་འགོར་འགྱངས་བྱས་པའི་ཝུའུ་ཁི་ལན་གྱི་ཉམས་ཉེན་ལ་དམིགས་ཏེ། ཀྲུང་གོ་ཕྱོགས་ཀྱིས་ཞི་བདེར་ཕན་པའི་འབད་བརྩོན་མཐའ་དག་ལ་དགའ་བསུ་དང་། གླེང་མོལ་བྱས་པ་བརྒྱུད་འདྲ་མཉམ་དང་ཡུན་བརྟན། ཚོད་འཛིན་ནུས་པ་བཅས་ལྡན་པར་མ་ཟད། ཕྱོགས་གཉི་གས་དང་ལེན་བྱེད་ཐུབ་པའི་ཞི་བདེ་ཡི་གྲོས་མཐུན་ཞིག་འཇོག་རྒྱུར་རེ་ལྟོས་བྱེད་ཀྱིན་ཡོད་ཅེས་བསྟན།
ཀྲུའུ་ཞི་ཞི་ཅིན་ཕིང་གིས་དབུས་ཤར་གྱི་གནས་བབ་ལ་དམིགས་ཏེ། དམག་དོན་འཁྲུག་རྩོད་ནི་གནད་དོན་ཐག་གཅོད་བྱེད་པའི་ཐབས་ལམ་མིན་པ་དང་། ས་ཁུལ་གྱི་གནས་བབ་ཛ་དྲག་ཏུ་འགྱུར་བཞིན་པ་དེ་རྒྱལ་སྤྱིའི་སྤྱི་ཚོགས་ཀྱི་ཐུན་མོང་གི་ཁེ་ཕན་དང་མི་མཐུན། ཀྲུང་གོ་ཕྱོགས་ཀྱིས་ཕྱོགས་སོ་སོ་དང་མཉམ་དུ་འབད་བརྩོན་བྱས་ཏེ། དབུས་ཤར་ས་ཁུལ་གྱི་ཞི་བདེ་དང་བརྟན་བརླིང་སླར་གསོ་བྱེད་པར་དགེ་མཚན་ལྡན་པའི་ནུས་པ་འདོན་འདོད་ཡོད་ཅེས་བསྟན།
འཛམ་གླིང་གི་ལོ་བརྒྱའི་རིང་བྱུང་མ་མྱོང་བའི་འཕོ་འགྱུར་ཆེན་པོའི་མདུན་དུ། དུས་རབས་གསར་པའི་ཀྲུང་གོའི་ཁྱད་ཆོས་ཀྱི་རྒྱལ་ཁབ་ཆེན་པོའི་ཕྱི་འབྲེལ་གྱིས་ཞི་ཅིན་ཕིང་གི་ཕྱི་འབྲེལ་དགོངས་པ་ཁྲིད་སྟོན་དུ་བཟུང་སྟེ། མིའི་རིགས་ཀྱི་ལས་སྐལ་གཅིག་མཐུན་ཚོགས་པ་འཛུགས་པའི་དར་ཆ་མཐོན་པོར་བསྒྲེངས་བ་དང་། འཛམ་གླིང་འཕེལ་རྒྱས་ཀྱི་གྲོས་འགོ་དང་འཛམ་གླིང་ཤེས་རིག་གི་གྲོས་འགོ། འཛམ་གླིང་བདེ་འཇགས་ཀྱི་གྲོས་འགོ་བཅས་ལག་བསྟར་བྱས་ཏེ། འཕེལ་ཕྱོགས་ཆེན་པོ་དོན་གཉེར་དང་བདེན་དོན་ཆེན་པོ་འཁུར་བ། ལམ་ཕྱོགས་ཆེན་པོར་བསྐྱོད་པ་བཅས་བྱས་ནས། ཀྲུང་གོའི་སྤུས་ཚད་མཐོ་བའི་འཕེལ་རྒྱས་ལ་ཕྱི་རོལ་གྱི་ཁོར་ཡུག་ལེགས་པོ་ཞིག་དང་། མིག་སྔའི་ཟིང་ཟིང་གི་འཛམ་གླིང་འདིར་རིན་ཐང་ཆེ་བའི་བརྟན་བརླིང་རང་བཞིན་སྩོལ་བཞིན་ཡོད།
