མཚོ་སྔོན་ཞིང་ཆེན་གྱིས“ནད་བཅོས”ཁྲིམས་འགལ་བརྡ་ཁྱབ་ལ་ཞིབ་བཤེར་ནན་མོ་དང་རྡུང་རྡེག་དྲག་པོ་བཏང་པ།

མཚོ་སྔོན་གསར་འགྱུར་དྲ་བའི་འཕྲིན། ཟླ8པའི་ཚེས1ཉིན། གསར་འགོད་པས་མཚོ་སྔོན་ཞིང་ཆེན་ཁྲོམ་རའི་ལྟ་སྐུལ་དོ་དམ་ཅུའུ་ནས་ཤེས་གསལ་ལྟར་ན། འཛད་སྤྱོད་པའི་ཁྲིམས་མཐུན་ཁེ་དབང་ལ་སྲུང་སྐྱོང་ཏན་ཏིག་བྱ་ཆེད། ཞིང་ཆེན་ཁྲོམ་རའི་ལྟ་སྐུལ་དོ་དམ་ཅུའུ་ཡིས་དམངས་ཚིས་ཁྱབ་ཁོངས་ཀྱི་ཁྲིམས་འགལ་བརྡ་ཁྱབ་དང་། ལྟ་སྐུལ་དོ་དམ་བྱེད་ཤུགས་ཆེ་རུ་གཏང་བ་དང་གནད་ལ་འཁེལ་བའི་ཁྲིམས་འཛིན་སོགས་ཀྱི་བྱེད་ཐབས་བརྒྱུད། སྤྱིར་བཏང་གི་བཟའ་བཅའ་དང་སྤྱིར་བཏང་གི་ཚོང་ཟོག་ལ་ནད་རིགས་སྨན་བཅོས་བྱེད་པའི་ནུས་པ་ལྡན་པ་ཁྱབ་སྒྲོག་བྱེད་པ་སོགས་ཁྲིམས་འགལ་བརྡ་ཁྱབ་སྤེལ་བའི་བྱ་སྤྱོད་ལ་རྡུང་རྡེག་ནན་མོ་བྱས་ནས། བརྡ་ཁྱབ་ཁྲོམ་རའི་ཁོར་ཡུག་སྔར་ལས་ཇེ་གཙང་དུ་བཏང་།

ཞིང་ཆེན་ཁྲོམ་རའི་ལྟ་སྐུལ་དོ་དམ་ཅུའུ་ཡིས2025ལོའི་བརྡ་ཁྱབ་ལྟ་སྐུལ་དོ་དམ་གྱི་གཙོ་གནད་ལས་འགན་དམ་པོར་བཟུང་བ་དང་། བཟའ་བཅའ་དང་བདེ་སྲུང་མཁོ་ཆས་སོགས་མང་ཚོགས་ཀྱི་འཚོ་བ་དང་འབྲེལ་བ་དམ་ཟབ་ཡོད་པའི་ཚོང་ཟོག་བརྡ་ཁྱབ་གཙོ་གནད་ཞིབ་བཤེར་བྱ་ཡུལ་དུ་བཞག་ནས། ནད་རིགས་གསོ་བཅོས་ཀྱི་ནུས་པ་ལྡན་པར་དྲིལ་སྒྲོག་རྫུན་མ་བྱེད་པར་སྔོན་འགོག་ནན་པོ་བྱས། དྲ་ལམ་གྱི་རིག་ནུས་ལྟ་ཞིབ་ཚད་ལེན་བརྒྱུད་སྲོལ་རྒྱུན་སྨྱན་སྦྱོར་གྱིས་ཁྱབ་བསྒྲགས་བྱས་པའི་བརྡ་ཁྱབ་ལ་ཡོངས་ཁྱབ་ངང་བཤེར་འབེབས་བྱས་ཤིང་། སྨན་བཅོས་དང་སྨན་རྫས། སྨན་བཅོས་ཡོ་བྱད་བཅས་མིན་པའི་མཚམས་སྦྱོར་བརྡ་ཁྱབ་ཁྲོད“སྨན་བཅོས”དང“དྲག་བཅོས” “བདེ་ཐང་ཡོང་བ”སོགས་དང་འབྲེལ་བའི་ཁྲིམས་འགལ་སྒྲིག་འགལ་གྱི་མཚམས་སྦྱོར་སོགས་གཙོ་གནད་དུ་བཟུང་ནས་ཞིབ་བཤེར་བྱས་པ་དང་། བརྡ་ཁྱབ་ཆད་ལུས་མེད་པ་འགན་ལེན་བྱས་ནས་མཚམས་སྦྱོར་བརྡ་ཁྱབ་ཀྱི“མགོ་སྐོར་རྣམ་པའི”དྲིལ་བསྒྲགས་རྩ་བ་ནས་བཀག་འགོག་བྱས་པ་རེད།

དུས་མཚུངས་སུ། གནད་དོན་གྱི་ཕྱོགས་སྟོན་མཐའ་འཁྱོངས་བྱེད་པ། དུས་ཚིགས་དང་པོའི་བརྡ་ཁྱབ་ལྟ་ཞིབ་ཚད་ལེན་ཁྲོད་སྤྱིར་བཏང་གི་བཟའ་བཅའ་དང་སྤྱིར་བཏང་གི་ཚོང་ཟོག་ལ་ཁྲིམས་འགལ་བྱེད་ཚད་ཅུང་མཐོ་བའི་གནད་དོན་ལ་དམིགས་ནས། ཞིང་ཆེན་ཁྲོམ་རའི་ལྟ་སྐུལ་དོ་དམ་ཅུའུ་ཡིས་མཛུབ་ཁྲིད་དང་ལྟ་ཞིབ་བྱེད་ཤུགས་ཆེ་རུ་བཏང་ནས། ས་གནས་ཁག་གིས་ཁོངས་གཏོགས་ལྟ་སྐུལ་དོ་དམ་གྱི་འགན་འཁྲི་དོན་འཁྱོལ་དང་། མང་ཚོགས་ཀྱི་བསམ་འཆར་དྲག་པོ་ཐོན་པའི་བརྡ་ཁྱབ་རྫུན་མ་ཁག་ཅིག་ལ་གནད་ལ་འཁེལ་བའི་རྡུང་རྡེག་བཏང་། དེའི་ནང་སྨྱན་སྦྱོར་ག་གེ་མོ་ཞིག་གིས་ཁྱབ་བསྒྲགས་བྱས་པའི་ཕན་སྐྱེས་སྲིན་འབྲུ་རིགས་ཕྱེ་ཡི་བརྡ་ཁྱབ་ནང“རྩ་སྐམ་པར་ཕན་ནུས་ཆེར་བརྗོད་བྱས་པ་དང་། ཞ་ཆིན་སོ་བཀག་སྦྱིན་ཀ་རའི་བརྡ་ཁྱབ་ནང“རྒས་པ་ལྡོག་ཐུབ་པ་དང་། ཕྲ་ཕུང་རྒས་པ་ཐག་གཅོད་བྱེད་ཐུབ”ཅེས་སྒྲོ་འདོགས་དྲིལ་སྒྲོག་བྱས་ཡོད་པ། སྤྱིར་བཏང་གི་ཚོང་ཟོག་མིག་སྲུང་སྦྱར་གྱི་བརྡ་ཁྱབ་ནང་ཀྲུང་ལུགས་གསོ་རིག་གི་གསང་མིག་སྦྱར་ནས་མིག་ནད་སྨན་བཅོས་བྱེད་ཐུབ་པ་དང་། གཟའ་འཁོར་གསུམ་ནང་ནད་གཞི་མེད་པར་གཏོང་ཐུབ་པ་སོགས་བརྡ་ཁྱབ་རྫུན་མ་འདི་དག་ལ་ཁྲིམས་ལྟར་ཞིབ་བཤེར་ཐག་གཅོད་བྱས།《ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་བརྡ་ཁྱབ་བཅའ་ཁྲིམས》ཀྱི་འབྲེལ་ཡོད་གཏན་འབེབས་གཞིར་བཟུང་ནས་འབྲེལ་ཡོད་བརྡ་ཁྱབ་ཁྱབ་བསྒྲགས་བྱེད་མཁན་ལ་ཁྲིམས་ལྟར་སྲིད་འཛིན་ཆད་གཅོད་བྱས་པ་དང་། འཇིགས་སྐུལ་ནུས་ལྡན་ཞིག་ཆགས་ཡོད་པ་རེད།

གཞན་ཡང་། བཅོས་སྒྲིག་གི་ཕན་འབྲས་སྲ་བརྟན་དུ་གཏོང་ཆེད། ཞིང་ཆེན་ཁྲོམ་རའི་ལྟ་སྐུལ་དོ་དམ་ཅུའུ་ཡིས་མཐོ་གནོན་གྱི་རྣམ་པ་མུ་མཐུད་དུ་རྒྱུན་འཁྱོངས་བྱས་ནས། དམངས་ཚིས་དང་འབྲེལ་བ་ཡོད་པའི་ཁྱབ་ཁོངས་ཀྱི་བརྡ་ཁྱབ་ལ་རྒྱུན་རྣམ་ཅན་གྱི་ལྟ་ཞིབ་ཚད་ལེན་བྱས། དེ་དང་ཆབས་ཅིག འབྲེལ་ཡོད་སྡེ་ཁག་དང་མཉམ་ལས་གཞོགས་འདེགས་བྱེད་ཤུགས་ཆེ་རུ་བཏང་བ་དང་། མཐུན་སྦྱོར་མཉམ་སྐྱོང་བྱེད་ཤུགས་ཆེ་རུ་གཏོང་བ། བྱ་ཐབས་སྣ་ཚོགས་བརྒྱུད་དེ་བཅའ་ཁྲིམས་དང་ཁྲིམས་སྲོལ་དྲིལ་སྒྲོག་ལ་ཤུགས་བསྣན་ནས། བརྡ་ཁྱབ་གཉེར་སྐྱོང་བྱེད་པོའི་ཁྲིམས་སྲུང་འདུ་ཤེས་རྒྱུན་ཆད་མེད་པར་ཤུགས་ཆེ་རུ་གཏོང་བ་དང་། གཉེར་སྐྱོང་བྱེད་མཁན་གྱིས་བཅའ་ཁྲིམས་ཀྱི་མ་མཐའི་ཚད་ཐིག་ལ་བརྩི་སྲུང་ནན་པོ་བྱས་ནས་སྒྲིག་སྲོལ་དང་མཐུན་པའི་གཉེར་སྐྱོང་བྱེད་སྒོ་སྤེལ་རྒྱུར་ཁྲིད་སྟོན་བྱས།