མཚོ་སྔོན་གྱིAརིམ་པའི་ཡུལ་སྐོར་ལྗོངས་ཁུལ་ལྔ་བཅུར་བདེ་འཇགས་ཞིབ་བཤེར་བྱས།

ཉེ་ལམ། གསར་འགོད་པས་མཚོ་སྔོན་ཞིང་ཆེན་རིག་གནས་དང་ཡུལ་སྐོར་ཐིན་ནས་རྒྱུས་ལོན་པ་ལྟར་ན། རང་ཞིང་གིསAརིམ་པའི་ཡུལ་སྐོར་ལྗོངས་ཁུལ་ལྔ་བཅུར་ཞིབ་བཤེར་བྱ་བ་སྤེལ་བ་དང་། གནད་ལ་འཁེལ་བའི་སྒོ་ནས་ལྗོངས་ཁུལ་གྱི་ཞན་ཆ་ངོས་འཛིན་བྱེད་ཅིང་། གནད་དོན་དག་ཐེར་ལ་སྐུལ་འདེད་གཏོང་བ་དང་། ཡུལ་སྐོར་ལྗོངས་ཁུལ་གྱི་སྤུས་ཚད་མཐོ་འདེགས་དང་། ཚད་ལྡན་ཅན་དང་ཚད་གཞི་ཅན་གྱི་འཛུགས་སྐྲུན་ལ་སྐུལ་འདེད་བཏང་སྟེ། ཡུལ་སྐོར་བའི་ཉམས་ལེན་དང་ཟོང་རྟགས་ཀྱི་ཤུགས་རྐྱེན་མཐོར་འདེགས་གཏོང་བ་དང་། རིམ་པ་དཔྱད་འཇོག་གི་དབང་ཟིལ་རང་བཞིན་ལ་སྔར་ལས་སྲུང་སྐྱོང་བྱས་ནས། རྒྱལ་སྤྱིའི་སྐྱེ་ཁམས་ཡུལ་སྐོར་དམིགས་ས་བསྐྲུན་པར་རོགས་ཤུགས་འདོན་རྒྱུ་རེད། 

ཐེངས་འདིའི་ཞིབ་བཤེར་བྱ་བར། རང་ཞིང་གིསAརིམ་པའི་ཡུལ་སྐོར་ལྗོངས་ཁུལ་ལྔ་བཅུ་བདམས་ནས་བདེ་འཇགས་ཞིབ་བཤེར་བྱས་པ་དང་། མངོན་བཤེར་ལྐོག་འདྲི་དང་ཡུལ་སྐོར་བའི་འཕྲིན་བཅར་ཞུ་གཏུག སྨྱན་བྱད་ཀྱི་ཕྱིར་ལྡོག དྲ་ཐོག་གི་དཔྱད་འཇོག་སོགས་ཆ་འཕྲིན་ཟུང་སྦྲེལ་གྱི་བྱེད་ཐབས་བརྒྱུད་དེ་ལྗོངས་ཁུལ་ལ་ཞིབ་བཤེར་བྱས་ཤིང་། གཙོ་བོ་ཞིབ་བཤེར་བྱ་ཡུལ་གྱི་བདེ་འཇགས་དོ་དམ་དང་ཡུལ་སྐོར་དྲིལ་སྒྲོག རྨང་འདིང་གསར་སྒྱུར་གྱི་འགུལ་སྐྱོད་ལག་བསྟར། ཡུལ་སྐོར་སྒྲིག་སྲོལ། སྐྱེ་ཁམས་སྲུང་སྐྱོབ་སོགས་ཕྱོགས་ལྔ་ལ་ཞིབ་བཤེར་བྱས། ཡུལ་དངོས་ཞིབ་བཤེར་གྱི་རྨང་གཞིའི་སྟེང་། ཞིབ་བཤེར་མཇུག་འབྲས་བེད་སྤྱོད་བྱེད་ཚད་ཆེ་རུ་བཏང་བ་དང་། ཞིབ་བཤེར་གྱི་ཚད་གཞིར་ལོངས་མེད་པའི་ཡུལ་སྐོར་ལྗོངས་ཁུལ་ལ་དུས་བཅད་ལེགས་བཅོས་དང་སྐྱོན་བརྗོད། རིམ་པ་ཇེ་དམའ་རུ་གཏོང་བ་དང་ཡང་ན་སྒོ་བྱང་ལེན་པ་སོགས་དེར་བསྟུན་གྱི་ཐག་གཅོད་བྱས།

ཐེངས་འདིའི་ཞིབ་བཤེར་བྱ་བར། ཆེད་མཁས་ཚན་ཆུང་གིས་ཚད་གཞི་ནན་མོ་དང་མཛུབ་སྟོན་ནན་མོ། མཐོར་འདེགས་གཏོང་བ་བཅས་ཀྱི་རྩ་དོན་རྒྱུན་འཁྱོངས་བྱས་ནས། ཞིབ་བཤེར་གྱི་བརྒྱུད་རིམ་ཁྲོད་གནད་དོན་ཡང་དག་འཚོལ་བ་དང་། ལྗོངས་ཁུལ་གྱི་བྱ་བའི་ལེགས་ཆར་ཁས་ལེན་བྱེད་ཅིང་། གནད་དོན་དང་མི་འདང་སར་ཡུལ་དངོས་ནས་མཛུབ་སྟོན་བྱས་ཏེ། ཡུལ་སྐོར་ལྗོངས་ཁུལ་གྱི་ལས་རིགས་མཛུབ་སྟོན་ལ་ཤུགས་སྣོན་རྒྱུ་རེད། དེར་མ་ཟད། Aརིམ་པའི་ཡུལ་སྐོར་ལྗོངས་ཁུལ་གྱི་འབྲེལ་ཡོད་རྒྱལ་ཁབ་ཀྱི་ཚད་གཞིར་དམིགས་ནས། མིག་སྔའི་ཡུལ་སྐོར་ལྗོངས་ཁུལ་གྱི་བྱ་བའི་བླང་བྱར་ཟུང་འབྲེལ་བྱེད་པ་དང་། ཞིབ་བཤེར་ནང་དོན་ལ་གཞིགས་ནས་དོན་ཚན་རེ་རེར་ཞིབ་བཤེར་བྱེད་ཤིང་། དུས་ཐོག་ཏུ་གནད་དོན་མཐོང་བ་དང་། ལྗོངས་ཁུལ་དུ་རང་བཤེར་རང་བཅོས་ཀྱི་རྐྱེན་སྲོལ་འཛུགས་པར་མཛུབ་སྟོན་བྱས་ནས། དུས་ལྟར་ཞིབ་བཤེར་སྤུས་ཚད་ལ་དཔྱད་འཇོག་བྱེད་ཅིང་། གནད་དོན་བསྐྱར་དུ་འབྱུང་བར་གཡོལ་བ་དང་། ལེགས་བཅོས་བྱ་བའི་ཕན་འབྲས་ལ་ཁག་ཐེག་བྱེད་རྒྱུ་རེད། དེ་དང་མཉམ་དུ། ཆེད་མཁས་ཚན་ཆུང་གིས་ཞིབ་བཤེར་བྱ་བར་ཟུང་སྦྲེལ་སྒོས་ཡུལ་སྐོར་ལྗོངས་ཁུལ་གྱི་དོ་དམ་རྣམ་པ་དང་། སྣེ་ལེན་བྱེད་ཐེངས། ལས་ཞུགས་གནས་ཚུལ། མཐུན་སྡུར་གཞི་གྲངས་ཀྱི་འགྱུར་ལྡོག་སོགས་གཞི་རྩའི་ཆ་འཕྲིན་ལ་རྒྱུས་ལོན་གསལ་བོ་བྱས་ཏེ། ཡུལ་སྐོར་སྤུས་གསར་ཐོན་སྐྱེད་ནུས་ཤུགས་སྐྱེད་སྲིང་བྱེད་པ་དང་། ཡུལ་སྐོར་ལས་རིགས་ཀྱི་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་གཏོང་བར་རྨང་གཞི་བརྟན་པོ་འདིང་རྒྱུ་རེད།