མཚོ་སྔོན་ཞིང་ཆེན་མི་དམངས་སྲིད་གཞུང་དྲ་བ།
ཟླ8པའི་ཚེས1ཉིན་ནི་བརྒྱད་གཅིག་དམག་འཛུགས་དུས་ཆེན་རེད། དཔའ་བོའི་མི་དམངས་དམག་དཔུང་ལོ་ངོ98ཀྱི་རྒྱང་སྐྱོད་ཀྱི་བཞུད་ལམ་བརྒྱུད་དེ། དམག་འཁྲུག་གི་མེ་ཕུང་ལས་བཙོ་སྦྱངས་ཐོབ་པའི་སྙིང་སྟོབས་ལ་ཉམས་པ་མེད་ལ། རྒྱལ་ཁབ་སྲུང་བའི་དུང་བརྡ་ནམ་ཡང་མཚམས་བཞག་མ་མྱོང་། ལོ་རྒྱུས་ལས་རྒྱལ་ཁབ་སྟོབས་ལྡན་གཏོང་དགོས་ན་ངེས་པར་དུ་དམག་དཔུང་སྟོབས་ལྡན་དུ་གཏོང་དགོས་པ་དང་དམག་དཔུང་སྟོབས་ལྡན་དུ་བཏང་ན་གཞི་ནས་རྒྱལ་ཁབ་བདེ་འཇགས་ཡོང་ཐུབ་པ་གསལ་བཤད་བྱས་ཡོད། ཀྲུའུ་ཞི་ཞི་ཅིན་ཕིང་གིས“ཀྲུང་ཧྭ་མི་རིགས་རླབས་ཆེན་བསྐྱར་དར་ཡོང་བར་བྱ་རྒྱུ་ནི་ཀྲུང་ཧྭ་མི་རིགས་ཀྱི་ཉེ་རབས་ཚུན་གྱི་ཆེས་རླབས་ཆེན་གྱི་ཕུགས་འདུན་ཡིན་ཞེས་བསྟན་ཡོད། ཕུགས་འདུན་འདི་ནི་རྒྱལ་ཁབ་སྟོབས་ལྡན་དུ་འགྱུར་བའི་ཕུགས་འདུན་ཡིན་ལ། དམག་དཔུང་གི་ངོས་ནས་བཤད་ན། དམག་དཔུང་སྟོབས་ལྡན་གཏོང་བའི་ཕུགས་འདུན་ཡང་ཡིན་ཞེས་བཤད་ཆོག བགྲོད་ལམ་རིང་ཡང་ཐོག་མའི་བསམ་འདུན་མི་འགྱུར། ཏང་ཀྲུང་དབྱང་དང་། ཀྲུང་དབྱང་དམག་དོན་ཨུ་ཡོན་ལྷན་ཁང་། ཀྲུའུ་ཞི་ཞི་ཅིན་ཕིང་བཅས་ཀྱི་འགྱུར་མེད་འགོ་ཁྲིད་འོག དམག་ཡོངས་ཀྱི་དཔོན་དམག་གིས་ཏང་དང་མི་དམངས་ཀྱིས་དཀྲིས་པའི་ལོ་རྒྱུས་ཀྱི་འགན་འཁྲི་ལྕི་མོ་མཐའ་གཅིག་ཏུ་ཁུར་ནས་ནུས་ཤུགས་ཡོད་རྒུས་དམག་དཔུང་འཛུགས་སྐྲུན་གྱི་ལོ་བརྒྱའི་འབད་འཐབ་དམིགས་འབེན་མངོན་འགྱུར་བྱེད་པའི་འགག་སྒྲོལ་དམག་འཐབ་ཡག་པོར་བརྒྱབ་སྟེ། ཕྱོགས་ཡོངས་ནས་འཛམ་གླིང་གི་དམག་དཔུང་རྩེ་གྲ་འཛུགས་སྐྲུན་བྱེད་པར་འབད་འབུངས་བྱེད་བཞིན་ཡོད།
ཐེན་ཧྲན་རི་བོའི་དབུས་ཁུལ་དུ། སྐམ་དམག་གི་དམར་དམག་སྟོང་དཔུང་ག་གེ་མོ་ཞིག་གི་དངོས་འཐབ་ཅན་གྱི་འཁྲབ་སྦྱོང་སྤེལ་བཞིན་ཡོད་པ་དང་། འཕྲལ་རྒོལ་རླངས་འཁོར་མང་པོ་ཞིག་གིས་དཔུང་དབྱིབས་བསྒྱུར་ནས་ཕར་རྒོལ་བྱས། ཆ་རྒྱུས་མེད་པའི་ས་ཁམས་ཁོར་ཡུག་དང་བྱེ་རྡུལ་ཅན་གྱི་གནམ་གཤིས་ཀྱིས་དཔུང་སྡེ་ལ་འགོག་རྐྱེན་ཚབས་ཆེན་བཟོས་ཡོད། གནད་འགག་གི་དུས་སུ། མཉམ་སྡེབ་སྒར་དཔུང་འདིའི“ཏང་ཡོན་འཕྲལ་རྒོལ་རུ་ཁག”གིས་འགག་སྒྲོལ་གྱི་ལས་འགན་ལྕི་མོ་དང་དུ་བླངས་ནས། མགྱོགས་མྱུར་སྒོས་ཇུས་གཞི་ལེགས་སྒྲིག་དང་། སྟབས་བསྟུན་གྱིས་འཐབ་རྩལ་བེད་སྤྱོད། ཆེད་ལས་མཐུན་སྦྱོར་དམ་ཟབ་དང་མི་མེད་ཡན་ལག་རུ་ཁག་གིས་ལྐོག་ཏུ་མྱུལ་ཞིབ་བྱེད་པ། འཐབ་འཛིང་ཚོགས་ཆུང་གིས་ནུས་ཆེའི་གསོད་རྨས་གཏོང་བ་སོགས་རྒྱུ་རྐྱེན་གཙོ་བོ་ཁག་གཅིག་གྱུར་སྒོས་གནད་འཁེལ་རྡུང་རྡེག་བྱས་པ་བརྒྱུད་དུས་ལྟར་འགན་འཁྲི་ལེགས་འགྲུབ་བྱས།
སྐམ་དམག་གི་དམར་དམག་སྟོང་དཔུང་ག་གེ་མོའི་ལུའུ་པོ་ཡིས་བཤད་རྒྱུར། “ཏང་གིས་དམག་དཔུང་ལ་མཐའ་གཅིག་ཏུ་འགོ་ཁྲིད་པ་ནི་རང་རེའི་དམག་དཔུང་གི་བླ་སྲོག་དང་སྲོག་རྩ་ཡིན། དེ་ནི་དུས་ནམ་ཡང་འགྱུར་མི་རུང་ལ། ནམ་ཡང་འདོར་ཡང་མི་རུང་། ཀྲུའུ་ཞི་ཞི་ཅིན་ཕིང་གི་ནན་གསུང་ཡང་ཡང་གནང་བའི“གཏན་ནས་བྱེད་མི་རུང”གཉིས་ཀྱིས་མི་དམངས་དམག་དཔུང་གི་ཁ་སང་དང་། དེ་རིང་། སང་ཉིན་བཅས་དམ་པོར་སྦྲེལ་ཡོད། དུས་རབས་གསར་པའི་ནང་། ང་ཚོས་མུ་མཐུད་དུ་བརྟན་སྲུང་དང་། རྒྱུན་འཛིན་ཁྲོད་ཏང་གིས་དམག་དཔུང་ལ་མཐའ་གཅིག་ཏུ་འགོ་ཁྲིད་པའི་རྩ་བའི་རྩ་དོན་དང་ལམ་ལུགས་འཐུས་ཚང་དུ་གཏོང་དགོས་ཤིང་། ཆེས་རྩ་བ་ནི་ཞི་ཅིན་ཕིང་གིས་དམག་དཔུང་སྟོབས་ཆེར་གཏོང་བའི་དགོངས་པའི་བསམ་བློའི་སྙིང་སྟོབས་དམ་འཛིན་བྱས་ནས་ཏང་གི་བཀའ་ལ་ཉན་པ་དང་ཏང་གི་རྗེས་སུ་འབྲང་བའི་བསམ་བློའི་རྨང་གཞི་མུ་མཐུད་ནས་ཇེ་བརྟན་དུ་གཏོང་བ་དང་། ཀྲུའུ་ཞི་ཞི་ཅིན་ཕིང་གི་ཐུགས་བློ་བདེ་བའི་འཐབ་མོ་བ་ཡག་པོ་ཞིག་བྱེད་དགོས་ཟེར།
སྐམ་དམག་གི་འབུམ་སྡེ་ཆེན་མོ80པའི་པའོ་ཧའེ་ཝུའུ་ཡིས་བཤད་རྒྱུར། ང་ཚོས་དངོས་འཐབ་ཕྱོགས་སྟོན་བརྟན་པོར་ཆགས་ནས་ཞི་ཅིན་ཕིང་གི་དམག་དཔུང་སྟོབས་ལྡན་གཏོང་བའི་དགོངས་པ་སློབ་སྦྱོང་གཏིང་ཟབ་དང་གོ་བ་གཏིང་ཟབ་བླངས་ནས། ཆབ་སྲིད་ཀྱི་ཁྲིད་སྟོན་ཆེ་རུ་གཏོང་བ་དང་། “གཏན་འཁེལ་གཉིས་”ཀྱི་ཐག་གཅོད་རང་བཞིན་གྱི་དོན་སྙིང་ལ་གོ་བ་གཏིང་ཟབ་ལེན་དགོས་ལ། “འདུ་ཤེས་བཞི”ཇེ་དྲག་ཏུ་གཏོང་བ། “རང་རྟོན་བཞི་”ཇེ་བརྟན་དུ་གཏོང་བ། “སྲུང་སྐྱོང་གཉིས་”ལེགས་པར་བསྒྲུབ་པ་བཅས་བྱས་ནས། དམག་དོན་ཨུ་ཡོན་ལྷན་ཁང་གི་ཀྲུའུ་ཞིའི་འགན་ཁུར་ལམ་ལུགས་ལག་ལེན་མཐར་ཕྱིན་བྱེད་དགོས་ཟེར།
ཏང་གི་ཚོགས་ཆེན་བཅོ་བརྒྱད་པའི་ཚུན་ལ། བློ་མཐུན་ཞི་ཅིན་ཕིང་སྲོག་ཤིང་ཡིན་པའི་ཏང་ཀྲུང་དབྱང་གིས་ཀྲུང་ཧྭ་མི་རིགས་རླབས་ཆེན་བསྐྱར་དར་ཡོང་བའི་འཐབ་ཇུས་ཀྱི་ཁྱོན་ཡོངས་དང་འཛམ་གླིང་ཐོག་ལོ་བརྒྱ་རིང་བྱུང་མྱོང་མེད་པའི་འཕོ་འགྱུར་ཆེན་པོར་དམིགས་ནས། ཏང་གི་དུས་རབས་གསར་པའི་དམག་དཔུང་སྟོབས་ལྡན་དུ་གཏོང་བའི་དམིགས་འབེན་བཏོན་ལ། དུས་རབས་གསར་པའི་དམག་དོན་འཐབ་ཇུས་བྱེད་ཕྱོགས་གཏན་འཁེལ་བྱས། རྒྱལ་སྲུང་དང་དམག་དཔུང་དེང་རབས་ཅན་དུ་འགྱུར་བའི“གོམ་པ་གསུམ་བགྲོད”ཀྱི་འཐབ་ཇུས་གསར་པ་གཏན་འབེབས་བྱས་ཏེ། དམག་ཡོངས་ཀྱིས་ཆབ་སྲིད་ལ་བརྟེན་ནས་དམག་དཔུང་འཛུགས་སྐྲུན་དང་། བཅོས་སྒྱུར་ལ་བརྟེན་ནས་དམག་དཔུང་སྟོབས་ལྡན་དུ་གཏོང་བ། ཚན་རྩལ་ལ་བརྟེན་ནས་དམག་དཔུང་སྟོབས་ལྡན་གཏོང་བ། འཇོན་མིར་བརྟེན་ནས་དམག་དཔུང་སྟོབས་ལྡན་དུ་གཏོང་བ། ཁྲིམས་ལྟར་དམག་དཔུང་སྐྱོང་བ་བཅས་ལ་སྐུལ་འདེད་གཏོང་བར་སྣེ་ཁྲིད་བྱེད་དགོས། ད་ལྟ། སྤྱི་ཡོངས་རང་བཞིན་དང་གསར་བརྗེའི་རང་བཞིན་གྱི་བསྐྱར་འཛུགས་དེས། མི་དམངས་དམག་དཔུང་གི་སྒྲིག་སྲོལ་གསར་པ་དང་གྲུབ་ཚུལ་གསར་པ། རྣམ་པ་གསར་པ། སྣང་བརྙན་གསར་པ་ཞིག་ཏུ་བསྒྱུར་ཡོད། ཆབ་སྲིད་སྒྲིག་སྦྱོང་བསྟུད་མར་གཏིང་ཟབ་དང་། དམག་སྦྱོང་དམག་གྲབས་ལ་ཕྱོགས་ཡོངས་ནས་ཤུགས་བསྣན་ཏེ། འཆར་འགོད་འགག་སྒྲོལ་ལ་སྐུལ་འདེད་བཏང་ནས་འགོག་ཐབས་མེད་པའི་གོམ་སྟབས་ཀྱིས་འཛམ་གླིང་གི་རྩེ་གྲ་རུ་སྐྱོད་བཞིན་ཡོད།
སྐམ་དམག་འབུམ་སྡེ་ཆེན་མོ73པའི་ཡུས་ཧུང་ཧན་གྱིས་བཤད་རྒྱུར། ད་ལོ་ནི་དམག་དཔུང་འཛུགས་སྐྲུན་ཐད་ཀྱི་“ལོ་ལྔའི་འཆར་འགོད་བཅུ་བཞི་པའི”འཆར་འགོད་མཇུག་བསྡུ་བའི་ལོ་ཡིན་ལ། དམག་བཙུགས་བརྒྱ་ལོའི་འབད་འཐབ་དམིགས་འབེན་མངོན་འགྱུར་བྱེད་པའི་འགག་རྩའི་ལོ་ཞིག་ཀྱང་ཡིན། ང་ཚོས་ངེས་པར་དུ་སྟོབས་ཤུགས་ཡོད་རྒུ་བཏོན་ནས་ངེས་པར་དུ་འགྲུབ་པར་བྱ་དགོས། གོམ་སྟབས་རེ་རེ་བཞིན་ཀྲུའུ་ཞི་ཞི་ཅིན་ཕིང་གིས་གཏན་འཁེལ་གནང་བའི་དམག་དཔུང་སྟོབས་ལྡན་དུ་གཏོང་བའི་འཆར་གཞི་མངོན་འགྱུར་བྱེད་དགོས་ལ། རྒྱལ་སྲུང་དང་དམག་དཔུང་དེང་རབས་ཅན་གྱི་རྣམ་པ་གསར་པ་རྒྱུན་ཆད་མེད་པར་བཏོད་དགོས།
“དམག་དཔུང་ནི་འཐབ་འཛིང་ལ་གྲ་སྒྲིག་བྱེད་པ་ཡིན་པས། བྱ་བ་མཐའ་དག་ལ་ངེས་པར་དུ་འཐབ་འཛིང་ནུས་པ་ཚད་གཞིར་འཛིན་རྒྱུ་རྒྱུན་འཁྱོངས་བྱེད་དགོས། དམག་འཐབ་རྒྱག་ཐུབ་པ་དང་རྒྱལ་ཁ་ལེན་ཐུབ་པའི་ཕྱོགས་ལ་དམིགས་དགོས། དུས་རབས་གསར་པའི་ནང་ཀྲུའུ་ཞི་ཞི་ཅིན་ཕིང་གིས་དམག་དོན་སྦྱོང་བརྡར་ལ་དོ་ཁུར་ཆེན་པོ་གནང་ནས་མཛུབ་སྟོན་གལ་ཆེན་ཐེངས་མང་གནང་ཡོད། ཉེ་བའི་ལོ་ཤས་རིང་། མི་དམངས་དམག་དཔུང་གིས་དམག་འཐབ་སྟོབས་ཤུགས་གསར་པ་འཛུགས་སྐྲུན་དང་བེད་སྤྱོད་རྣམ་པ་གསར་གཏོད་དང་འཚོལ་ཞིབ་བྱས་ཡོད་དེ། སྤུས་གསར་འཐབ་འཛིང་ནུས་ཤུགས་བཅིངས་འགྲོལ་དང་འཕེལ་རྒྱས་སུ་བཏང་ཡོད། རང་རྒྱལ་ནས་ཐོན་པའི་མ་གྲུ་དང་། ཉིང་རྡུལ་ཆུར་འཛུལ་དམག་གྲུ་གསར་པ། “ཤར་རླུང”རྟགས་ཅན་གྱི་འཕུར་མདའ་སོགས་རྒྱལ་ཁབ་ཆེན་པོའི་མཚོན་ཆ་ཆེ་ཤས་སྔ་རྗེས་སུ་སྒྲིག་སྦྱོར་བྱས་པ་དང་། འཐབ་ཇུས་སྔོན་བརྡ་གཏོང་བ། རྒྱང་རིང་རྒྱ་མཚོའི་འགོག་སྲུང་། རྒྱང་བསྟེན་རྡུང་རྡེག འཐབ་ཇུས་སྐྱེལ་སྤྲོད། ཆ་འཕྲིན་རོགས་སྐྱོར་སོགས་ཀྱི་དམག་འཐབ་བྱེད་ནུས་ཚད་རིམ་མཐོན་པོ་ཞིག་ཏུ་སླེབས་པར་བྱས།
ད་ལོའི་ཟླ6པར། ལུའོ་ཉིན་མ་གྲུ་དང་ཧྲན་ཏུང་མ་གྲུའི་རུ་སྒྲིག་གིས་སྔ་རྗེས་སུ་ཧོང་ཧའེ་རྒྱ་མཚོ་དང་། ཤར་རྒྱ་མཚོ། ལྷོ་རྒྱ་མཚོ་དང་། ཞི་བདེ་རྒྱ་མཚོ་ནུབ་མ་སོགས་མཚོ་ཁོངས་སུ་བསྐྱོད་དེ་དངོས་འཐབ་དངོས་སྦྱོང་དང་། མཉམ་འཐབ་མཉམ་སྦྱོང་། མ་ལག་དམག་སྦྱོང་བཅས་རྒྱུན་འཁྱོངས་བྱས། མྱུལ་ཞིབ་ཉེན་བརྡ་དང་། འགོག་ཟོན་རྡུང་རྡེག མཚོ་ཐོག་འཕྲལ་རྒོལ། བར་སྣང་འགོག་སྲུང་། གྲུ་ཐོག་གནམ་གྲུས་ཉིན་མཚན་བརྒལ་བའི་འཐབ་རྩལ་འཕུར་སྐྱོད་སོགས་ཀྱི་རྩལ་ནུས་སྦྱོང་བརྡར་བྱས།
མཚོ་དམག་ཧྲན་ཏུང་དམག་གྲུའི་རུ་སྒྲིག་ཀའོ་ཞང་གིས་བཤད་རྒྱུར། རྗེས་མར་ང་ཚོས་མ་གྲུའི་རུ་སྒྲིག་ལས་འགན་ལ་དམིགས་ནས། དེང་རབས་ཀྱི་མཚོ་ཐོག་དམག་འཐབ་ལས་རྒྱལ་ཁ་ལེན་ཐབས་ལ་ཞིབ་འཇུག་གཏིང་ཟབ་བྱེད་པ་དང་། ལྟེ་བའི་དམག་འཐབ་བྱེད་ནུས་ཐད་ཀྱི་ཞིབ་འཇུག་དང་འགག་སྒྲོལ་མུ་མཐུད་གཏིང་ཟབ་ཏུ་གཏོང་བ། རུ་སྒྲིག་དམག་འཐབ་བྱེད་ནུས་ཆེ་རུ་གཏོང་བ། རྒྱང་རིང་མཚོ་ཆེན་ཐོག་དགྲ་བོ་འདུལ་བ་དང་གཡུལ་ལས་རྒྱལ་ཐབས་སྦྱོང་བརྡར་བྱས་ནས་ཧྲག་དཔུང་བསྐྲུན་རྒྱུ་ཡིན་ཟེར།
ཏང་གིས་ཆེས་ཐོག་མར་བཙུགས་པ་དང་འགོ་ཁྲིད་བྱས་པའི་དྲག་ཆས་སྟོབས་ཤུགས་ཡིན་པའི་ཆ་ནས། སྐམ་དམག་གི་དམག་དཔུང་ལ་ལོ་རྒྱུས་ཡུན་རིང་ལྡན་པ་དང་། དམག་འཐབ་ལ་མཁས་པ། འཐབ་འཛིང་གི་བྱས་རྗེས་གཟེངས་སུ་ཐོན་པ་བཅས་ཡིན། ཉེ་བའི་ལོ་ཤས་རིང་། སྐམ་དམག་མཉམ་འབྲེལ་དམག་འཐབ་མ་ལག་ནང་མགྱོགས་མྱུར་ངང་མཉམ་འདྲེས་བྱུང་ལ། མ་འོངས་པའི་གཡུལ་སར་དམིགས་ཏེ། བབ་བསྟུན་དམག་འཐབ་དང་ལངས་གཟུགས་རྒོལ་འགོག་གི་རྣམ་སྒྱུར་བླང་བྱ་ལ་ཕྱོགས་ནས་ནུས་སྐྱེད་རིམ་འཕར་ཇེ་མགྱོགས་སུ་བཏང་ཡོད། ཨན་ཧུའེ་ཤར་རྒྱུད་ཀྱི་དམག་སྦྱོང་ར་བ་ཞིག་ཏུ། སྐམ་དམག་འབུམ་སྡེ་ཆེན་མོ71པའི་མཉམ་སྡེབ་མདའ་དཔུང་ག་གེ་མོ་ཞིག་གི་མ་ལག་འཁྲབ་སྦྱོང་ཁྲོད། མྱུལ་ཞིབ་ཁྲིད་སྟོན་དང་། མེ་ཤུགས་རོགས་སྐྱོར། ཁྲབ་ལྡན་འཕྲལ་རྒོལ། མཁའ་ཟོན་འགེབས་སྲུང་སོགས་དམག་འཐབ་བྱེད་སྟངས་སྣ་ཚོགས་མཉམ་འདྲེས་གཏིང་ཟབ་བྱུང་། ཉེ་བའི་ལོ་ཤས་རིང་། མཉམ་སྡེབ་མདའ་དཔུང་འདིས་ཨན་ཧུའེ་ཤར་རྒྱུད་ཀྱི་དཀྱིལ་དབུས་དང་། ཧོང་ཧེ་རྒྱ་མཚོའི་ཉེ་འགྲམ། ནུབ་བྱང་བྱེ་ཐང་ཆེན་མོ་སོགས་ཆ་རྒྱུས་མེད་པའི་ཁོར་ཡུག་རྙོག་འཛིང་ཅན་མང་པོ་རུ་སྦྱོང་བརྡར་འཚོལ་ཞིབ་བྱས་ཏེ་ད་ལྟ་གོམ་སྟབས་ཆེན་པོས་མཉམ་སྡེབ་དམག་འཐབ་ཕྱོགས་ཀྱི་མཆོང་སྐྱོད་མངོན་འགྱུར་བྱེད་བཞིན་ཡོད།
སྐམ་དམག་འབུམ་སྡེ་ཆེན་མོ71པའི་ཀྲིན་ཀྲི་ཅང་གིས་བཤད་རྒྱུར། ཀྲུའུ་ཞི་ཞི་ཅིན་ཕིང་གིས་དམག་སྦྱོང་དམག་གྲབས་ཀྱི་ཕྱོགས་སྟོན་ཁ་གསལ་བྱ་རྒྱུར་ཤུགས་སྣོན་དགོས་པ་དང་། བློ་བརྟན་འགྱུར་མེད་ངང་དམག་དོན་སྦྱོང་བརྡར་དེ་འཐབ་ཇུས་ཀྱི་གནས་བབ་ཐོག་འཇོག་པ་དང་ལྟེ་བའི་བྱ་བ་རུ་བརྩི་དགོས་པའི་དགོངས་པ་ཟབ་མོ་གནང་ཡོད། ང་ཚོས་ངེས་པར་དུ་ཐོག་མཐའ་བར་གསུམ་དུ་འགན་འཁྲི་གཙོ་བོ་དང་ལས་སྒོ་གཙོ་བོར་དམིགས་ཏེ། སྲོལ་རྒྱུན་དང་སྤུས་གསར་སྟོབས་ཤུགས། གཙོ་འཐབ་དང་འགན་སྲུང་སྟོབས་ཤུགས་བཅས་ཀྱི་མཉམ་འདྲེས་ལེགས་པོ་ཡོང་བར་བྱེད་པ་དང་། དགྲ་བོ་འདུལ་བ་དང་གཡུལ་སར་རྒྱལ་ཁ་ལེན་པའི་མཉམ་སྡེབ་རྩེ་དམག་སྐྱེད་སྲིང་བྱས་ནས། དུས་ལྟར་དམག་བཙུགས་བརྒྱ་ལོ་དང་པོའི་འབད་འཐབ་དམིགས་འབེན་མངོན་འགྱུར་བྱེད་པའི་ཕྱོགས་སུ་བློ་སྤོབས་ཆེན་པོས་མདུན་སྐྱོད་བྱེད་དགོས།
བར་སྣང་དུ། དམག་འཐབ་གནམ་གྲུས་བབ་བསྟུན་དམག་འཐབ་བྱེད་པར་བསྒུག་ཡོད་པ་དང་། ས་ངོས་སུ། ས་སྒྱོགས་རེག་བརྡ་ཡིས་དྲ་རྒྱ་བཙུགས། མཚོ་ཐོག་ཏུ། དམག་གྲུ་ཚོས་ས་ཁུལ་སོ་སོར་དགར་ནས་འགོག་སྲུང་བྱས། མཁའ་དམག་གི་རྟེན་གཞི་ག་གེ་མོའི་གཅིག་གྱུར་བཀོད་འདོམས་འོག དམག་རིགས་དང་དཔུང་རིགས་མི་གཅིག་པ་མང་པོ་མཉམ་བསྲེས་བྱས་པའི་སྦྱོང་བརྡར་ཞིག་ཡོངས་སུ་སྤེལ་འགོ་བརྩམས། གཙོ་རྒྱུ་སོ་སོས་མཐུན་སྦྱོར་དམ་ཟབ་དང་ཕན་ཆེའི་གཞོགས་འདེགས་བྱས་ནས་ཆུ་ཚད་མཐོ་བའི་མ་ལག་དམག་འཐབ་ནུས་པ་མངོན་པར་བྱས། ཉེ་བའི་ལོ་ཤས་རིང་། མི་དམངས་མཁའ་དམག་གིས་རྒྱུན་ཆད་མེད་པར་རྒྱང་རིང་རྒྱ་མཚོའི་མཁའ་དབྱིངས་སུ་ནུས་པ་རྒྱ་སྐྱེད་བཏང་སྟེ། བར་སྣང་དང་ས་ངོས་གཞི་གཅིག་ཅན་དང་རྒོལ་འགོག་གཉིས་ལྡན་གྱི་ཕྱོགས་སུ་ཁྱོན་ཡོངས་ནས་མཆོང་སྐྱོད་བྱས་པ་དང་། འཐབ་ཇུས་རྡུང་རྡེག་དང་། འཐབ་ཇུས་སྐྱེལ་འདྲེན། འཐབ་ཇུས་ཉེན་བརྡ་བཅས་ཀྱི་ནུས་པ་མགྱོགས་མྱུར་ཆེ་རུ་འགྲོ་བར་རོགས་སྐུལ་བྱས།
མཁའ་དམག་གི་རྟེན་གཞི་ག་གེ་མོའི་ཨན་ཞིན་ཡུས་ཀྱིས་བཤད་རྒྱུར། ཀྲུའུ་ཞི་ཞི་ཅིན་ཕིང་གིས་ན་ནིང་གི་ཟླ11པར་མཁའ་དམག་གི་དཔུང་སྡེར་གཟིགས་ཞིབ་གནང་སྐབས། རྙོག་འཛིང་གི་ཆ་རྐྱེན་ལ་རྐང་ཚུགས་ཏེ་གཙོ་རྒྱུ་ཡོངས་དང་། མ་ལག་གྲུབ་པ། གྱོད་གཞི་དངོས་སུ་འགྱུར་བ་བཅས་ཀྱི་སྦྱོང་བརྡར་ལ་ཤུགས་སྣོན་དང་། དམག་རིགས་དང་དཔུང་རིགས་གཞན་དག་དང་མཉམ་དུ་སྦྱོང་བརྡར་བྱེད་ཤུགས་ཆེ་རུ་གཏོང་བ། དམག་འཐབ་སྦྱོང་བརྡར་གྱི་གཏིང་ཚད་ཟུང་སྦྱོར་ལ་སྐུལ་འདེད་གཏོང་བ། མཉམ་འབྲེལ་བཀོད་འདོམས་དང་། མཉམ་འབྲེལ་བྱ་སྤྱོད། མཉམ་འབྲེལ་འགན་སྲུང་བཅས་ཀྱི་ནུས་པ་ཆེ་རུ་གཏོང་དགོས། ང་ཚོའི་རྟེན་གཞི་ཅན་དུ་འགྱུར་བའི་མཉམ་སྦྱོང་ནི། དམག་རིགས་དང་དཔུང་རིགས་ལས་བརྒལ་བ་དང་། གཡུལ་ཁོངས་ལས་བརྒལ་བའི་མཉམ་སྦྱོང་སྟེགས་བུ་བསྐྲུན་ཏེ། དམག་རིགས་དང་དཔུང་རིགས་མང་བའི་དམག་དཔུང་གིས་བཙན་རྫོང་གཏོར་བ་དང་། མཉམ་དུ་རྩལ་སྦྱོང་ཐུབ་པར་བྱེད་དགོས།
གྲོག་རོང་གཏིང་ཟབ་ཏུ། རྒྱུན་སྲོལ་གྱི་འཕུར་མདའ་དམག་དཔུང་ཞིག་གིས་དལ་གྱིས་དཔུང་བསྒྲིགས་ཏེ། ཉིན་མཚན་བརྒལ་བའི་མེ་ཤུགས་འཕྲལ་རྒོལ་སྦྱོང་བརྡར་བྱས། མྱ་ངམ་ཐང་དུ། འཐབ་ཇུས་འཕུར་མདའི་དཔུང་སྡེ་ཞིག་འཕྲེད་གཞུང་དུ་རྒྱུག་བཞིན། ཚད་མཐོའི་ཆ་རྐྱེན་འོག་འཕེན་གཏོང་སྦྱོང་བརྡར་བྱས་པ་དང་། ནགས་ཚལ་སྟུག་པོའི་ཁྲོད་དུ། སྐོར་སྐྱོད་འཕུར་མདའ་ཞིག་གི་དམག་དཔུང་སྐོར་ནས་འགྲོ་བཞིན་ཡོད་ལ། སྦྱོང་བརྡར་ནང་དོན་མང་པོ་ཕན་ཚུན་སྦྲེལ་ནས་ལས་ཀ་བྱེད་པ་སོགས་འཕྲེད་གཞུང་གི་གནས་ཚད་མི་འདྲ་བ་དང་། མདེལ་ལམ་མི་འདྲ་བའི་སྟེང་ནས། ཟིལ་རླབས་དགུང་འཕྱུར་གྱི“རྣམ་པ”བཏོད་ཡོད་ལ། རྒྱལ་ཁབ་ཆེན་པོའི་སྦྱོང་བརྡར་གསར་པའི་ནུས་པ་མངོན།
མེ་ཤུགས་འཕུར་མདའི་དམག་དཔུང་ག་གེ་མོའི་ཧན་སིན་གྱིས་བཤད་རྒྱུར། ང་ཚོས་དམག་འཁྲུག་རྒྱག་ཐུབ་པ་དང་རྒྱལ་ཁ་ལེན་ཐུབ་པའི་རྩ་བའི་བླང་བྱར་དམིགས་ཏེ། སྒྲིག་ཆས་གསར་པ་དང་རྩལ་ནུས་གསར་པ། འཐབ་ཐབས་གསར་པ་བཅས་ཀྱི་སྦྱོང་བརྡར་ལ་མངོན་གསལ་སྒོས་ཤུགས་བསྣན་ཏེ། དཔུང་སྡེ་ཚང་མར་ཉམས་སད་ཐེག་ཐུབ་པ་དང་། འཕེན་གཏོང་སྒྲོམ་བུ་ཚང་མར་དུས་དང་རྣམ་པ་ཀུན་ཏུ་དམག་འཐབ་བྱེད་ཐུབ་པའི་འགན་ལེན་བྱས། “ཉིང་རྡུལ་རྒྱུན་ལྡན་གཉིས་ལྡན་དང་ས་ཁོངས་ཡོངས་ཀྱི་ཟིལ་གྱིས་གནོན་པའི”འཐབ་ཇུས་ཀྱི་བླང་བྱ་དང“དུས་དང་རྣམ་པ་ཀུན་ཏུ་དམག་འཁྲུག་རྒྱག་ཐུབ་པ་དང་། དུས་ཐོག་ཏུ་འཕེན་པ། གཏོར་རྨས་ནུས་ལྡན་གཏོང་བ”བཅས་ཀྱི་སྲོག་ཤིང་ཚད་གཞིའི་བླང་བྱ་ལྟར། འཐབ་ཇུས་ཀྱི་རྡུང་རྡེག་ནུས་པ་མགྱོགས་མྱུར་ངང་ཆེ་རུ་བཏང་ནས། འཛམ་གླིང་གི་འཐབ་ཇུས་ཀྱི་དཔུང་རིགས་རྩེ་གྲ་འཛུགས་སྐྲུན་བྱེད་པའི་དམིགས་འབེན་ཕྱོགས་སུ་གོམ་སྟབས་ཆེན་པོས་མདུན་སྐྱོད་བྱེད་དགོས། ང་ཚོས་ངེས་པར་དུ་ཀྲུའུ་ཞིའི་མངག་བཅོལ་བློ་ལ་བརྟན་པོར་ངེས་ནས་རྒྱལ་ཁ་ལེན་པའི་འཇོན་ཐང་ཆེ་རུ་བཏང་སྟེ། ཏང་དང་མི་དམངས་བློ་སེམས་བདེ་བར་བྱ་དགོས་ཟེར།
ཀྲུའུ་ཞི་ཞི་ཅིན་ཕིང་གི་དུས་རབས་ཀྱི་བཀའ་རྒྱའི་ཁྲོད་དམག་དཔུང་སྟོབས་ལྡན་དུ་བཏང་ནས་རྒྱལ་ཁ་ལེན་པའི་སྟོབས་ཤུགས་ཆེན་པོ་གཅིག་ཏུ་བསྒྲིལ་ཡོད། དཔའ་བོའི་མི་དམངས་དམག་དཔུང་གིས་འགག་སྒྲོལ་དཀའ་སེལ་དང་། དཔའ་ངར་ཆེན་པོས་མདུན་སྐྱོད་བྱེད་པ། དམག་འཁྲུག་གི་མེ་ལྕེ་ལས་འོངས་པའི་མི་དམངས་དམག་དཔུང་གིས་དམག་འཁྲུག་རྒྱག་ཐུབ་པ་དང་། རྒྱལ་ཁ་ལེན་ཐུབ་པའི་གཟི་བརྗིད་སྲོལ་རྒྱུན་རྒྱུན་མི་ཆད་པར་དར་སྤེལ་བཏང་ནས། རྩ་བའི་ཚད་གཞི་ཁོ་ན་ཡིན་པའི་འཐབ་ནུས་བརྟན་པོ་ཆགས་དགོས། བོས་ན་ཡོང་ཐུབ་པ་དང་། ཡོང་ན་འཐབ་ཐུབ་པ། འཐབ་ན་རྒྱལ་ཐུབ་པ་བཅས་ཀྱིས་དུས་རབས་གསར་པའི་དམག་གྲབས་དམག་འཐབ་ནུས་པ་ཕྱོགས་ཡོངས་ནས་ཆེ་རུ་གཏོང་བ་དང་། རྒྱལ་ཁབ་ཀྱི་བདག་དབང་དང་། བདེ་འཇགས། འཕེལ་རྒྱས་ཀྱི་ཁེ་ཕན་བཅས་སྲུང་སྐྱོང་མཐའ་གཅིག་ཏུ་བྱེད་དགོས།
