མདོ་དབུས་མཐོ་སྒང་གི་དབྱར་རྩྭ་དགུན་འབུ་སྲུང་སྐྱོབ་བེད་སྤྱོད་མཐུན་སྦྱོར་ཚོགས་འདུ་ཟི་ལིང་དུ་འཚོགས།

ཟླ7ཚེས30ཉིན། མདོ་དབུས་མཐོ་སྒང་གི་དབྱར་རྩྭ་དགུན་འབུ་སྲུང་སྐྱོབ་བེད་སྤྱོད་མཐུན་སྦྱོར་ཚོགས་འདུ་ཟི་ལིང་དུ་འཚོགས། ཚོགས་འདུའི་སྟེང་ཞི་ཅིན་ཕིང་གི་སྐྱེ་ཁམས་དཔལ་ཡོན་དགོངས་པ་ལག་བསྟར་གཏིང་ཟབ་བྱས་ལ། ཚོགས་འདུའི་དམིགས་ཡུལ་ནི་ཐུན་མོང་ངོས་འཛིན་སྔར་ལས་གཅིག་སྒྲིལ་བྱེད་པ་དང་། མཉམ་ཤུགས་གྲུབ་པར་བྱས་ཏེ་མདོ་དབུས་མཐོ་སྒང་གི་དབྱར་རྩྭ་དགུན་འབུའི་ཐོན་ཁུངས་ལ་ཆུ་ཚད་མཐོ་བའི་སྲུང་སྐྱོང་དང་ཐོན་ལས་སྤུས་ཚད་མཐོ་བའི་འཕེལ་རྒྱས་ལ་ལག་གདང་སྦྲེལ་ནས་སྐུལ་འདེད་གཏོང་རྒྱུ་དེ་རེད། ཞིང་ཆེན་ཏང་ཨུའི་ཧྲུའུ་ཅི་གཞོན་པ་ལིའུ་ཆི་ཧྥན་ཚོགས་འདུར་ཞུགས་པར་མ་ཟད་གཏམ་བཤད་པ་དང་། ཧྲིན་ཀྲང་གཞོན་པ་ལིའུ་ཐའོ་ཚོགས་འདུར་ཞུགས། ཀྲུང་གོ་ཚན་རིག་གླིང་གི་ཡོན་ཧྲི་ཝེ་ཅང་ཁྲུན་གྱིས་བརྙན་ལམ་ནས་རང་གི་བསམ་ཚུལ་གླེང་།

མཚོ་སྔོན་དང་། སི་ཁྲོན། ཀན་སུའུ། ཡུན་ནན། བོད་ལྗོངས་བཅས་ཞིང་ལྗོངས་ལྔའི་འབྲེལ་ཡོད་སྡེ་ཁག་གིས་རང་ས་ཆའི་དབྱར་རྩྭ་དགུན་འབུ་སྲུང་སྐྱོབ་བེད་སྤྱོད་ཉམས་མྱོང་དང་དཔེ་མཚོན་བྱེད་སྟངས་ངོ་སྤྲོད་བྱས་པར་མ་ཟད། མདོ་དབུས་མཐོ་སྒང་གི་དབྱར་རྩྭ་དགུན་འབུའི་སྲུང་སྐྱོབ་བེད་སྤྱོད་ལ་སྐུལ་འདེད་གཏོང་བའི་མཉམ་འགུལ་ཇུས་གཞིར》མིང་རྟགས་བཀོད། ཁྲིན་ཏུའུ་ཀྲུང་ལུགས་གསོ་རིག་སློབ་ཆེན་གྱི་དགེ་རྒན་ཆེན་མོ་ཀོ་ཅིན་ལིན་དང་། མཚོ་སྔོན་ཞིང་ཆེན་དབྱར་རྩྭ་དགུན་འབུའི་མཐུན་ཚོགས་ཀྱི་དྲུང་ཡིག་ཆེན་མོ་ཡའོ་ཞོ་པའོ་ཡིས་ཐོན་ཁུངས་སྲུང་སྐྱོབ་དང་། ཐོན་ལས་འཕེལ་རྒྱས། ཚད་ལྡན་གཉེར་སྐྱོང་སོགས་ལ་དམིགས་ནས་གཏམ་བཤད།

ཚོགས་འདུ་ལས་དབྱར་རྩྭ་དགུན་འབུའི་ཐོན་ཁུངས་ལ་སྲུང་སྐྱོབ་བྱེད་པར་མཉམ་དུ་ནུས་ཤུགས་འདོན་པ་དང་འཕེལ་རྒྱས་ཀྱི་རྨང་གཞི་བརྟན་པོ་འདིང་དགོས་པ་དང་། དབྱར་རྩྭ་བརྐོ་བའི་དོ་དམ་ཚད་ལྡན་དུ་གཏོང་བ་དང་། ཐོན་ཁུངས་སྲུང་སྐྱོབ་ཚད་ལྡན་དུ་གཏོང་བ། ལྟ་ཞིབ་ཚད་ལེན་དང་ཉམས་གསོ་དམ་འཛིན་ལེགས་པོ་བྱེད་དགོས་ལ། འབྲེལ་ཡོད་སྡེ་ཁག་གིས་གཅིག་གྱུར་འཆར་འགོད་དང་། བྱེད་ཐབས་སྤྱད་ནས་རང་བྱུང་ཁམས་ཀྱིས་བསྩལ་བའི་དབྱར་རྩྭ་དགུན་འབུའི་རྩ་ཆེའི་ཐོན་ཁུངས་ལ་གཅེས་སྐྱོང་བྱེད་དགོས། ཚན་ཞིབ་གསར་གཏོད་བྱེད་པར་མཉམ་དུ་ཤུགས་བསྣན་ནས་ཐོན་ལས་རིམ་སྤོར་ལ་སྐུལ་འདེད་གཏོང་དགོས། ཚན་ཞིབ་མཉམ་ལས་ལ་ཤུགས་བསྣན་ནས་ཟས་སྨན་ཐུན་མོང་ཐོན་ཁུངས་ཁྲོད་ཚུད་པར་བརྩོན་ལེན་བྱ་དགོས། དབྱར་རྩྭ་དགུན་འབུའི་རྨང་གཞིའི་ཞིབ་འཇུག་ལ་ཤུགས་བསྣན་ནས་ཚན་རྩལ་ནུས་སྤྲོད་མཐོར་འདེགས་བྱེད་དགོས། དབྱར་རྩྭ་དགུན་འབུའི་ཐོན་ལས་དེ་ཚན་རྩལ་གསར་གཏོད་གཙོ་བོར་བྱེད་པའི་རིམ་པ་མཐོ་བའི་སྤོ་སྒྱུར་ལ་སྐུལ་འདེད་གཏོང་དགོས། དམངས་ལ་བདེ་སྐྱིད་བསྐྲུན་པར་ཤུགས་བསྣན་ནས་འཕེལ་རྒྱས་ཀྱི་གྲུབ་འབྲས་མཉམ་སྤྱོད་བྱེད་དགོས། བདེ་འཇགས་འགན་ལེན་ལ་ཤུགས་སྣོན་པ་དང་། སྤུས་ཚད་ལྟ་སྐུལ་དོ་དམ་ལ་ཤུགས་སྣོན་པ། ས་ཁོངས་ཀྱི་སྤུས་རྟགས་གཏོད་པ། དབྱར་རྩྭ་དགུན་འབུ་ཡིས་རོང་འབྲོག་མང་ཚོགས་ཀྱི་ཡོང་འབབ་འཕར་སྣོན་ལ་སྐུལ་འདེད་གཏོང་བའི་ཁྲོད་ཀྱི་ནུས་པ་གལ་ཆེན་འདོན་སྤེལ་བྱས་ནས་རོང་འབྲོག་མང་ཚོགས་ཀྱི་ཁེ་དབང་ལ་སྲུང་སྐྱོབ་ཡག་པོ་བྱེད་དགོས་པའི་གྲོས་འགོ་བཏོན།

ཉིན་དེར། མཚོ་སྔོན་ཞིང་ཆེན་གྱི་དབྱར་རྩྭ་དགུན་འབུའི་སྲུང་སྐྱོབ་བེད་སྤྱོད་ཀྱི་གསར་འགྱུར་སྒྲོག་སྤེལ་ཚོགས་འདུ་བསྡུས་ནས། 《མཚོ་སྔོན་ཞིང་ཆེན་གྱི་དབྱར་རྩྭ་དགུན་འབུའི་རྒྱབ་ཤ་དཀར་པོའི་དཔེ་དེབ》དང《དབྱར་རྩྭ་དགུན་འབུ་དང་མིས་བཟོས་དབྱར་རྩྭ་དགུན་འབུའི་དབྱེ་འབྱེད་ལག་རྩལ་སྒྲིག་སྲོལ》སོགས་ཚོགས་པའི་ཚད་གཞི་ཁྱབ་བསྒྲགས་བྱས་ཤིང་། མདོ་དབུས་མཐོ་སྒང་གི་དབྱར་རྩྭ་དགུན་འབུའི་སྲུང་སྐྱོབ་བེད་སྤྱོད་བགྲོ་གླེང་ཚོགས་འདུ་བསྡུས་པ་དང་། ཞིང་ལྗོངས་ལྔའི་ནགས་རྩྭའི་ལས་ཁུངས་དང་དབྱར་རྩྭ་དགུན་འབུའི་མཐུན་ཚོགས། ལས་རིགས་ཆེད་མཁས་པ། ཁེ་ལས་ཀྱི་འཐུས་མི་སོགས་ཚོགས་འདུར་ཞུགས།