མཚོ་སྔོན་ཞིང་ཆེན་མི་དམངས་སྲིད་གཞུང་དྲ་བ།
འཛམ་གླིང་གྲོས་དཔོན་ཚོགས་ཆེན་ཐེངས་དྲུག་པ་ཟླ7པའི་ཚེས29ཉིན་ནས་ཚེས31ཉིན་བར་རི་ནེ་ཝའི་རྒྱལ་ཀུན་ཕོ་བྲང་དུ་འཚོགས། རྒྱལ་ཡོངས་དམངས་ཆེན་རྒྱུན་ལས་ཨུ་ཡོན་ལྷན་ཁང་གི་ཨུ་ཡོན་ཀྲང་ཀྲའོ་ལི་ཅི་ཚོགས་ཆེན་ལ་ཞུགས་པ་མ་ཟད་གསུང་བཤད་གནང་།
འཛམ་གླིང་གྲོས་དཔོན་ཚོགས་ཆེན་ཐེངས་དྲུག་པ་ཟླ7པའི་ཚེས29ཉིན་ནས་ཚེས31ཉིན་བར་རི་ནེ་ཝའི་རྒྱལ་ཀུན་ཕོ་བྲང་དུ་འཚོགས། རྒྱལ་ཡོངས་དམངས་ཆེན་རྒྱུན་ལས་ཨུ་ཡོན་ལྷན་ཁང་གི་ཨུ་ཡོན་ཀྲང་ཀྲའོ་ལི་ཅི་ཚོགས་ཆེན་ལ་ཕེབས་པ་མ་ཟད། ཁ་བྱང་ལ《ཕྱོགས་མང་རིང་ལུགས་རྒྱུན་འཁྱོངས་བྱས་ནས་མཛེས་པའི་ཁྱིམ་གཞིས་མཉམ་དུ་བསྐྲུན》ཞེས་པའི་གསུང་བཤད་གནང་།
ཀྲའོ་ལི་ཅིས་གསུང་བཤད་གནང་སྐབས་བསྟན་དོན། ད་སྔ། མིའི་རིགས་ཀྱི་ཞི་བདེ་དང་འཕེལ་རྒྱས་བྱ་གཞག་འགྲན་སློང་དྲག་པོར་འཕྲད་ཡོད་ལ། ཁྲིམས་འཛུགས་ལས་ཁུངས་ལ་རྣམ་པ་གསར་པའི་རྒྱལ་སྤྱིའི་འབྲེལ་བ་འཛུགས་པར་སྐུལ་འདེད་གཏོང་བར་ནུས་པ་གང་ལེགས་འདོན་པའི་འགན་འཁྲི་ཡོད་ལ། འཛམ་གླིང་ཞི་བདེ་ལྷིང་འཇགས་ཡོང་བའི་ཐུན་མོང་གི་སྲུང་སྐྱོབ་མཁན་དང་། འཛམ་གླིང་ཡོངས་དར་རྒྱས་གོང་འཕེལ་ཡོང་བའི་ཐུན་མོང་གི་སྐུལ་སྤེལ་མཁན། དཔལ་ཡོན་བརྗེ་རེས་ཀྱི་ཕན་ཚུན་བདེན་པར་འཛིན་པའི་ཐུན་མོང་གི་དར་སྤེལ་མཁན་དང་། རྒྱལ་སྤྱིའི་དྲང་བདེན་དྲང་གཞག་གི་ཐུན་མོང་སྐུལ་སྤེལ་མཁན་བྱ་དགོས།
ཀྲའོ་ལི་ཅི་ཡིས་ནན་གྱིས་བསྟན་དོན། ཀྲུང་གོའི་རྒྱལ་ཡོངས་དམངས་ཆེན་གྱིས་རྒྱལ་ཁབ་སོ་སོའི་གྲོས་ཁང་མནའ་འབྲེལ་དང་རྒྱལ་ཁབ་སོ་སོའི་ཁྲིམས་འཛུགས་ལས་ཁུངས་བར་གྱི་བརྗེ་རེས་མཉམ་ལས་ལ་ཤུགས་བསྣན་ཏེ། འཛམ་གླིང་འཕེལ་རྒྱས་ཀྱི་གྲོས་འགོ་ཆེན་མོ་གསུམ་ལག་བསྟར་དང་མིའི་རིགས་ཀྱི་ལས་སྐལ་གཅིག་མཐུན་ཚོགས་པ་གསར་འཛུགས་བྱ་འདོད་ཡོད།
ཟླ7པའི་ཚེས30ཉིན་གྱི་སྔ་དྲོར། ཀྲའོ་ལི་ཅི་ཡིས་ཚོགས་ཆེན་གྱི་སྤྱིར་བཏང་རང་བཞིན་གྱི་རྩོད་གླེང་ལ་འགོ་འཛིན་གནང་།
འཛམ་གླིང་གྲོས་དཔོན་ཚོགས་ཆེན་འདི་རྒྱལ་ཁབ་སོ་སོའི་གྲོས་ཁང་མནའ་འབྲེལ་གྱིས་གཙོ་སྒྲུབ་བྱས་ཏེ། 2000ལོ་ནས་བཟུང་ལོ་ལྔ་རེར་ཐེངས་གཅིག་རེར་འཚོགས་བཞིན་ཡོད། ཐེངས་འདིའི་ཚོགས་ཆེན་གྱི་བརྗོད་དོན་གཙོ་བོ་ནི“ཟིང་ཟང་ཁྲོད་ཀྱི་འཛམ་གླིང་སྟེ། གྲོས་ཁང་མཉམ་ལས་དང་ཕྱོགས་མང་རིང་ལུགས་ལ་བརྟེན་ནས་མིའི་རིགས་ཀྱི་ཞི་བདེ་དང་དྲང་གཞག དར་རྒྱས་བཅས་ལ་སྐུལ་འདེད་གཏོང་དགོས”ཞེས་པ་ཡིན་ལ། རྒྱལ་ཁབ120ནས་ཡོང་བའི་གྲོས་ཁང་གི་འགོ་ཁྲིད་པ་ཚོགས་འདུར་ཞུགས། ཟླ7པའི་ཚེས31ཉིན། ཚོགས་ཆེན་ལས《འཛམ་གླིང་གྲོས་དཔོན་ཚོགས་ཆེན་ཐེངས་དྲུག་པའི་མཐོ་རིམ་བསྒྲགས་གཏམ》ལ་གྲོས་འཆམ་བྱུང་།
གྲོས་ཚོགས་ཀྱི་སྐབས་སུ། ཀྲའོ་ལི་ཅི་ཡིས་གྲོས་ཁང་མནའ་འབྲེལ་གྱི་ཀྲུའུ་ཞི་ཨ་ཁི་སུང་དང་དྲུང་ཡིག་ཆེན་མོ་ཁྲུན་ཀོང་ལ་མཇལ་འཕྲད་གནང་། ཀྲའོ་ལི་ཅི་ཡིས་བསྟན་དོན། ཀྲུང་གོའི་རྒྱལ་ཡོངས་དམངས་ཆེན་གྱིས་གྲོས་ཁང་མནའ་འབྲེལ་དང་བརྗེ་རེས་མཉམ་ལས་གཏིང་ཟབ་བྱས་ནས། ཁྲིམས་འཛུགས་ལས་ཁུངས་བར་གྱི་འབྲེལ་འདྲིས་ཐད་ཕན་འབྲས་སྔར་ལས་ཆེ་བ་ཐོན་པར་སྐུལ་འདེད་གཏོང་འདོད་ཡོད། ཨ་ཁི་སུང་གིས་བསྟན་དོན། འཛམ་གླིང་གྲོས་ཁང་མནའ་འབྲེལ་གྱིས་ཀྲུང་གོ་ཕྱོགས་དང་མཉམ་དུ་མིའི་རིགས་ཀྱི་ལས་སྐལ་གཅིག་མཐུན་ཚོགས་པ་འཛུགས་པར་སྐུལ་འདེད་གཏོང་འདོད་ཡོད། ཁྲུན་ཀོང་གིས་ཀྲུང་གོའི་ཕྱོགས་ཀྱིས་གྲོས་གཙོ་མནའ་འབྲེལ་གྱི་བྱ་བར་ཧུར་ཐག་གིས་ཞུགས་པ་དང་བྱས་རྗེས་ཆེན་པོ་བཞག་པར་བཀའ་དྲིན་ཆེ་ཞུས།
ཀྲའོ་ལི་ཅི་ཡིས་ད་དུང་པ་ཞི་དང་། ཕ་ཁི་སི་ཐན། ཨུ་རུ་སུ། ཧ་སག་སི་ཐན་བཅས་ཀྱི་གྲོས་ཁང་གི་འགོ་ཁྲིད་པར་མཇལ་འཕྲད་གནང་། པ་ཞིའི་གྲོས་ཁང་ཞོལ་མའི་གྲོས་དཔོན་མོ་ཐ་ལ་མཇལ་འཕྲད་གནང་སྐབས། ཀྲའོ་ལི་ཅི་ཡིས་བསྟན་དོན། ཀྲུང་གོ་ཕྱོགས་ཀྱིས་ཕ་ཁི་སི་ཐན་ཕྱོགས་དང་མཉམ་དུ་རྒྱལ་ཁབ་གཉིས་ཀྱི་གཙོ་འཛིན་གྱི་ཐུན་མོང་ངོས་འཛིན་གལ་ཆེན་དོན་འཁྱོལ་བྱེད་པ་དང་། ཁྲིམས་འཛུགས་ལས་ཁུངས་ཀྱི་དུས་གཏན་བརྗེ་རེས་ཀྱི་ལམ་སྲོལ་ལེགས་པར་སྤྱོད་འདོད་ཡོད། མོ་ཐ་ཡིས་བསྟན་དོན། ཕ་ཁི་སི་ཐན་དང་ཀྲུང་གོའི་ཁྲིམས་འཛུགས་ལས་ཁུངས་ཀྱིས་བརྗེ་རེས་ལ་ཤུགས་བསྣན་པ་དེས་རྒྱལ་ཁབ་གཉིས་ཀྱི་ཉོ་འཚོང་དང་། རིག་གནས། གནམ་གཤིས་ཀྱི་འགྱུར་བ་སོགས་ཀྱི་ཁྱབ་ཁོངས་མཉམ་ལས་ལ་གྲུབ་འབྲས་གསར་པ་ཐོབ་པར་ཕན་བཏགས་ཡོད།
ཕ་ཁི་སི་ཐན་རྒྱལ་དམངས་གྲོས་ཁང་གི་གྲོས་དཔོན་ས་ཏི་ཁི་ལ་མཇལ་འཕྲད་གནང་སྐབས། ཀྲའོ་ལི་ཅི་ཡིས་བསྟན་དོན། རྒྱལ་ཁབ་གཉིས་ཀྱི་ཁྲིམས་འཛུགས་ལས་ཁུངས་ཀྱིས་ཁྲིམས་འཛུགས་ཐད་ཕན་ཚུན་ལ་སློབ་སྦྱོང་དང་ཕན་ཚུན་དཔྱད་གཞིར་འཛིན་དགོས་པ་དང་བྱ་བའི་ཉམས་མྱོང་ལ་ལྟ་སྐུལ་བྱས་ནས། ཀྲུང་གོ་དང་ཕ་ཁི་སི་ཐན་གྱི་འབྲེལ་བའི་འཕེལ་རྒྱས་ལ་སྐུལ་འདེད་གཏོང་བར་བྱས་རྗེས་འཇོག་རྒྱུ་ཡིན།
ས་ཏི་ཁི་ཡིས་བསྟན་དོན། ཕ་ཁི་སི་ཐན་དང་ཀྲུང་གོའི་འབྲེལ་བས་ཉམས་སད་ཐེག་ཐུབ་ལ། ཉིན་རེ་བཞིན་སྟོབས་ལྡན་དུ་འགྱུར་བཞིན་ཡོད་པས། ཕ་ཁི་སི་ཐན་རྒྱལ་དམངས་གྲོས་ཁང་གིས་ཕ་ཁི་སི་ཐན་དང་ཀྲུང་གོའི་མཛའ་བརྩེའི་སྐུལ་སྤེལ་ཐད་སྔར་ལས་འབད་པ་བྱ་འདོད་ཡོད།
ཨུ་རུ་སུའི་རྒྱལ་ཕྲན་མཉམ་འབྲེལ་ཨུ་ཡོན་ལྷན་ཁང་གི་ཀྲུའུ་ཞི་མཱ་ཐི་ཝེ་ཡན་ཁི་ལ་མཇལ་འཕྲད་གནང་སྐབས། ཀྲའོ་ལི་ཅི་ཡིས་བསྟན་དོན། རྒྱལ་ཁབ་གཉིས་ཀྱི་ཁྲིམས་འཛུགས་ལས་ཁུངས་ཀྱིས་ཀྲུའུ་ཞི་ཞི་ཅིན་ཕིང་དང་སྲིད་འཛིན་ཕུའུ་ཅིན་གཉིས་ཀྱི་ཐུན་མོང་གི་ངོས་འཛིན་གལ་ཆེན་ཕྱོགས་ཡོངས་ནས་དོན་འཁྱོལ་བྱས་ནས། ཕྱོགས་གཉིས་ཀྱི་དངོས་དོན་མཉམ་ལས་ལ་བཅའ་ཁྲིམས་ཀྱི་འགན་སྲུང་འདོན་སྤྲོད་བྱེད་དགོས། མཱ་ཐི་ཝེ་ཡན་ཁི་ཡིས་བསྟན་དོན། རྒྱལ་ཁབ་གཉིས་ཀྱི་ཁྲིམས་འཛུགས་ལས་ཁུངས་ཀྱིས་ཕྱོགས་གཉིས་དང་ཕྱོགས་མང་མཉམ་ལས་ལ་ཤུགས་བསྣན་ཏེ། ཨུ་རུ་སུ་དང་ཀྲུང་གོའི་འབྲེལ་བ་འཕེལ་རྒྱས་འགྲོ་བར་སྐུལ་འདེད་གཏོང་རྒྱུའི་རེ་བ་ཡོད།
ཧ་སག་སི་ཐན་གྱི་གྲོས་ཁང་ཞོལ་མའི་གྲོས་དཔོན་ཁི་ཧྲ་ནོ་ཧྥུ་ལ་མཇལ་འཕྲད་གནང་སྐབས། ཀྲའོ་ལི་ཅི་ཡིས་བསྟན་དོན། ཀྲུང་གོའི་རྒྱལ་ཡོངས་དམངས་ཆེན་གྱིས་ཧ་སག་སི་ཐན་གྱི་གྲོས་ཁང་བར་གྱི་བརྗེ་རེས་ལ་ཤུགས་བསྣན་ཏེ། ཀྲུང་གོ་དང་ཧ་སག་སི་ཐན་གྱི་མཉམ་ལས་དང་། ཀྲུང་གོ་དང་ཡ་གླིང་དབུས་མའི་ལས་སྐལ་གཅིག་མཐུན་ཚོགས་པའི་འཛུགས་སྐྲུན་ལ་སྔར་ལས་བྱས་རྗེས་འཇོག་དགོས། ཁི་ཧྲ་ནོ་ཧྥུ་ཡིས་བསྟན་དོན། ཧ་སག་སི་ཐན་གྲོས་ཁང་གིས་རྒྱལ་ཁབ་གཉིས་ཀྱི་ཉོ་འཚོང་དང་། རིག་གནས་སོགས་ཀྱི་ཁྱབ་ཁོངས་མཉམ་ལས་ལ་སྐུལ་འདེད་གཏོང་བར་ཁྲིམས་འཛུགས་ལས་ཁུངས་ཀྱིས་ནུས་པ་གང་ལེགས་འདོན་སྤེལ་བྱེད་འདོད་ཡོད།
