ཀྲང་གོ་ཆིང་གིས་ཧི་པེ་རུ་གནོད་ཐེབས་མང་ཚོགས་ལ་འཚམས་འདྲི་་བྱས་ནས་རྒུད་སྐྱོབ་དང་བྲེལ་མྱུར་སླར་གསོ་བྱ་བར་མཛུབ་ཁྲིད་བྱས།

སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་མངགས་བཅོལ་ལྟར། ཀྲུང་གུང་ཀྲུང་དབྱང་ཆབ་སྲིད་ཅུའུ་ཡི་ཨུ་ཡོན། རྒྱལ་སྲིད་སྤྱི་ཁྱབ་ཁང་གི་ཙུང་ལི་གཞོན་པ་ཀྲང་གོ་ཆིང་གིས་ཏང་ཀྲུང་དབྱང་དང་རྒྱལ་སྲིད་སྤྱི་ཁྱབ་ཁང་གི་ཚབ་བྱས་ནས་ཚེས1ཉིན་གྱི་སྔ་དྲོར་འབྲེལ་ཡོད་སྡེ་ཁག་གི་འགན་འཁུར་བློ་མཐུན་གྱི་སྣེ་ཁྲིད་དེ་ཧི་པེ་ཁྲིན་ཏི་གྲོང་ཁྱེར་ཞིན་ལུང་རྫོང་དུ་སོང་སྟེ་གནོད་འཚེ་ཕོག་པའི་མང་ཚོགས་ལ་འཚམས་འདྲི་བྱས་པ་དང་། རྒུད་སྐྱོབ་དང་བྲེལ་མྱུར་ཞིག་གསོ་བྱ་བར་མཛུབ་ཁྲིད་བྱས།

ཁོང་གིས་ནན་གྱིས་བསྟན་དོན། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་གནོད་ཐེབས་ས་ཁུལ་དང་གནོད་ཐེབས་མང་ཚོགས་ལ་ཐུགས་ཁུར་ཆེན་པོ་གནང་གིན་ཡོད་ལ། འབྲེལ་ཆད་མི་སྣའི་འཚོལ་སྐྱོབ་དང་། རྨས་སྐྱོན་ཕོག་པའི་མི་སྣའི་སྐྱོབ་བཅོས། རྨས་སྐྱོན་ཕོག་པའི་མང་ཚོགས་ཀྱི་བཀོད་སྒྲིག་སོགས་ཉེན་སེལ་རྒུད་སྐྱོབ་བྱ་བ་སོ་སོའི་གནས་ཚུལ་ལ་ཐུགས་ཁུར་ཧ་ཅང་ཆེན་པོ་གནང་ནས་མི་དམངས་ཀྱི་ཚེ་སྲོག་དང་རྒྱུ་ནོར་གྱི་བདེ་འཇགས་ལ་འགན་སྲུང་བྱ་རྒྱུ་དེ་ཨང་དང་པོར་འཇོག་དགོས་པ་དང་། ནུས་ཤུགས་ཡོད་རྒུས་བྲེལ་མྱུར་ཞིག་གསོའི་འཕེལ་རིམ་ཇེ་མགྱོགས་སུ་བཏང་ནས་རྒྱུན་གཏན་གྱི་ཐོན་སྐྱེད་འཚོ་བའི་སྒྲིག་ལམ་གང་མགྱོགས་སླར་གསོ་བྱེད་དགོས་པར་ཡང་ཡང་མངག་བཅོལ་གནང་། ཙུང་ལི་ལིས་ཆང་གིས་མི་སྣའི་འཚོལ་སྐྱོབ་དང་། ཉེན་ཁའི་གནས་ཚུལ་ལེབ་བཤེར་ཐག་གཅོད། མང་ཚོགས་ཀྱི་གནས་སྤོ་བདེ་འགོད་སོགས་ལ་བཀོད་སྒྲིག་གནང་བས། ས་གནས་སོ་སོའི་འབྲེལ་ཡོད་ཕྱོགས་ཀྱིས་བློ་ཐག་རྦད་ཆོད་ངང་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་མཛུབ་སྟོན་དང་མཆན་བཀོད་གལ་ཆེན་གྱི་དགོངས་དོན་དོན་འཁྱོལ་མཐར་ཕྱིན་བྱེད་པ་དང་། ཙུང་ལི་ལིས་ཆང་གིས་བཏོན་པའི་བླང་བྱ་དོན་འཁྱོལ་བྱས་ནས་གནོད་ཁུལ་གྱི་ཞོད་འགོག་ཉེན་སེལ་རྒུད་སྐྱོབ་ཀྱི་བྱ་བ་སོ་སོ་ལེགས་པོར་བསྒྲུབ་རྒྱུར་ནུས་ཤུགས་ཡོད་རྒུས་རྒྱབ་སྐྱོར་དང་རོགས་རམ་བྱ་དགོས།

ཀྲང་གོ་ཆིང་གནོད་འཚེ་ཚབས་ཆེན་ཐེབས་ཡོད་པའི་ལིའུ་ཏའོ་ཧི་གྲོང་རྡལ་ཀྲུའུ་ཅ་ཀོའུ་སྡེ་བ་དང་ལིའུ་ཏའོ་ཀོའུ་སྡེ་བ། དེ་མིན་གནས་སྤོས་མང་ཚོགས་ཀྱི་གནས་སྐབས་བདེ་འགོད་ས་གནས། རྫོང་མི་དམངས་སྨན་ཁང་བཅས་ལ་ཕེབས་་ནས་གནོད་ཐེབས་མང་ཚོགས་དང་། གཞི་རིམ་ལས་བྱེད་པ། རོགས་སྐྱོབ་ཞིག་གསོ་མི་སྣ་བཅས་ལ་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་མཛུབ་སྟོན་དང་མཆན་བཀོད་གལ་ཆེན་གྱི་དགོངས་དོན་བརྒྱུད་བསྒྲགས་གནང་བ་དང་། སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་བྱམས་བརྩེ་ལྡན་པའི་འཚམས་འདྲི་དང་ཐུགས་ཁུར་བརྒྱུད་བསྒྲགས་གནང་རྗེས། མི་སྣ་འཚོལ་སྐྱོབ་དང་། རྨས་མ་སྐྱོབ་བཅོས། གནས་སྤོ་བདེ་འགོད། རྨང་གཞིའི་སྒྲིག་བཀོད་བྲེལ་མྱུར་ཞིག་གསོ་སོགས་ཀྱི་གནས་ཚུལ་རྒྱུས་ལོན་ཞིབ་ཕྲ་བྱས།

ཀྲང་གོ་ཆིང་གིས་ནན་གྱིས་བསྟན་དོན། ཉེ་དུས་གནོད་ཐེབས་ས་ཁུལ་ཁག་ཅིག་ཏུ་ད་རུང་དྲག་ཆར་འབབ་སྲིད་པས། འབབ་རྒྱུད་རང་བཞིན་གྱི་ཉེན་ཟོན་སྔོན་བརྡ་གཏོང་བར་ཤུགས་སྣོན་དགོས་པ་དང་། སྡེ་ཁག་ལས་བརྒལ་བ་དང་ས་ཁོངས་ལས་བརྒལ་བའི་མཉམ་འབྲེལ་གྲོས་མོལ་ལ་ཤུགས་སྣོན། ཆུ་བོའི་སྟོད་སྨད་རྒྱུད་དང་། ཆུ་ངོགས་གཡས་གཡོན། ཆུ་གཞུང་དང་ཡན་ལག་ཆུ་བོ་བཅས་ཀྱི་ཉེན་ཁའི་རྒྱུ་རྐྱེན་ལ་ཕྱོགས་བསྡུས་ངང་ཞིབ་འཇུག་བརྡར་གཅོད་བྱས་ནས་པེ་ཅིང་དང་། ཐེན་ཅིན། ཧི་པེ་བཅས་ཀྱི་མཐུན་སྦྱོར་མཉམ་འགུལ་གྱི་ཞོད་འགོག་གནོད་འཕྲི་ཐད་ཤུགས་སྣོན་དགོས། དུས་སྔོན་ས་གནས་ཁ་ཤས་ཀྱི་ཉེན་གཡོལ་གནས་སྤོ་ཁྲོད་ཀྱི་ཞན་ཆར་དམིགས་ཏེ། གནམ་གཤིས་ངན་པའི་གནས་ཚུལ་འོག་གི་ཉེན་གཡོལ་སྔོན་ཇུས་ལ་ཕྱོགས་ཡོངས་ནས་བསམ་གཞིགས་བཏང་སྟེ། ཉེན་གཡོལ་བྱ་དགོས་པའི་མི་སྣ་དང་། ཁྱབ་ཁོངས། འཕྲལ་བསྟུན་བྱེད་ཐབས་བཅས་ཞིབ་ཕྲ་བཟོ་དགོས། རྒན་པ་དང་ཉམ་ཆུང་། ནད་པ་དང་དབང་པོ་སྐྱོན་ཅན་སོགས་འགུལ་སྐྱོད་སྟབས་བདེ་མིན་པའི་མི་ཚོགས་ལ་དམིགས་བསལ་གྱིས་དོ་སྣང་བྱས་ཏེ་དུས་ཐོག་ཏུ་བདེ་འཇགས་ངང་གནས་སྤོ་ཐུབ་པར་འགན་སྲུང་བྱ་དགོས།