མཚོ་སྔོན་ཞིང་ཆེན་མི་དམངས་སྲིད་གཞུང་དྲ་བ།
ཟླ8པའི་ཚེས1ཉིན། ཞིང་ཆེན་སྲིད་གཞུང་གི་ཏང་ཙུའུ་ཧྲུའུ་ཅི། ཧྲིན་ཀྲང་ལའོ་ཏུང་ཁྲོན་གྱིས་འགོ་འཛིན་བྱས་ནས་ཞིང་ཆེན་སྲིད་གཞུང་གི་ཏང་ཙུའུ་གྲོས་ཚོགས་དང་རྒྱུན་ལས་གྲོས་ཚོགས་བསྡུས་ཏེ། སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་ཉེ་དུས་ཀྱི་གསུང་བཤད་གལ་ཆེན་དང་ཀྲུང་དབྱང་གི་འབྲེལ་ཡོད་གྲོས་ཚོགས་ཀྱི་དགོངས་དོན་སློབ་སྦྱོང་དང་བརྒྱུད་བསྒྲགས་བྱས་པ་དང་། ཞིང་ཆེན་ཏང་ཨུའི་བླང་བྱ་དོན་འཁྱོལ་བྱས་པར་མ་ཟད། དཔལ་འབྱོར་འཁོར་རྒྱུག་དང་སློབ་སྦྱོང་སློབ་གསོ། སྐྱེ་ཁམས་སྲུང་སྐྱོབ་བཅོས་སྐྱོང་། ཚྭ་མཚོའི་རྫས་འགྱུར་བཟོ་ལས་ཐོན་ལས་འཕེལ་རྒྱས་དང་། ཁྲིམས་སྐྱོང་སྲིད་གཞུང་འཛུགས་སྐྲུན་སོགས་ཀྱི་བྱ་བར་ཞིབ་འཇུག་དང་བཀོད་སྒྲིག་བྱས།
ཞིང་ཆེན་སྲིད་གཞུང་གི་ཏང་ཙུའུ་གྲོས་ཚོགས་ལས། ཀྲུང་དབྱང་ཆབ་སྲིད་ཅུའུ་ཡི་གྲོས་ཚོགས་དང་ཏང་ཕྱིའི་མི་སྣའི་བཞུགས་མོལ་ཚོགས་འདུའི་དགོངས་དོན་སློབ་སྦྱོང་དང་ལག་བསྟར་བྱེད་པ་དེ་ཞིང་ཆེན་ཏང་ཨུའི་སྐབས་བཅུ་བཞི་པའི་ཚང་འཛོམས་གྲོས་ཚོགས་ཐེངས་དགུ་པའི་དགོངས་དོན་ལག་བསྟར་དོན་འཁྱོལ་བྱེད་པར་ཟུང་སྦྲེལ་བྱས་ཏེ། ཧུར་ཐག་གིས་ལས་ཞུགས་བརྟན་པོ་དང་ཁེ་ལས་བརྟན་པོ། ཁྲོམ་ར་བརྟན་པོ། སྔོན་དཔག་བརྟན་པོ་བཅས་ཡོང་བར་བྱས་ནས། ནུས་ཤུགས་ཡོད་རྒུས་དུས་ཚིགས་གསུམ་པ་དང་ལོ་ཧྲིལ་བོའི་དམིགས་འབེན་དང་ལས་འགན་ཡོངས་འགྲུབ་བྱེད་དགོས། ལོ་ལྔའི་འཆར་འགོད་བཅོ་ལྔ་པའི་སྐབས་ཀྱི་དུས་རིམ་རང་བཞིན་གྱི་བླང་བྱ་སྟངས་འཛིན་ཡང་དག་བྱེད་པ་དང་། རྒྱལ་ཁབ་ཀྱི་འཆར་འགོད་དང་སྦྲེལ་མཐུད་ཡག་པོ་བྱེད་པ། མཚོ་སྔོན་གྱི་ཁྱད་ཆོས་མངོན་པ་དང་དགེ་མཚན་འདོན་པར་དོ་སྣང་བྱས་ཏེ། རྟོག་ཞིབ་རིགས་སྒྲུབ་ལ་ཤུགས་སྣོན་པ་དང་། བསམ་ཚུལ་རྒྱ་ཆེར་སྡུད་ལེན་བྱས་ནས། འཆར་འགོད་ཀྱི་རྒྱང་ལྟའི་རང་བཞིན་དང་ཚན་རིག་རང་བཞིན། བཀོལ་སྤྱོད་རང་བཞིན་བཅས་ཇེ་དྲག་ཏུ་གཏོང་དགོས་པ་ནན་གྱིས་བསྟན།
གྲོས་ཚོགས་ལས་སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ཐེན་ཧྭ་སོགས་གློག་བརྙན་སྒྱུ་རྩལ་པ་བརྒྱད་ལ་བསྐུར་བའི་འཕྲིན་ལན་གལ་ཆེན་དང་། འཛམ་གླིང་ན་གཞོན་ཞི་བདེའི་ཚོགས་ཆེན་ལ་བསྐུར་བའི་འཕྲིན་ཡིག་གལ་ཆེན་གྱི་དགོངས་དོན་བརྒྱུད་བསྒྲགས་དང་སློབ་སྦྱོང་བྱས། ཞི་ཅིན་ཕིང་གི་རིག་གནས་དགོངས་པ་ལག་བསྟར་གཏིང་ཟབ་བྱེད་པ་དང་། རིག་གནས་སྒྱུ་རྩལ་གསར་རྩོམ་ཐོན་སྐྱེད་ཞབས་ཞུ་དང་ཁྲིད་སྟོན། རྩ་འཛུགས་བཅས་ཀྱི་བྱ་བའི་རྐྱེན་སྲོལ་སྒྱུར་བཅོས་བྱས་ཏེ། བརྩམས་ཆོས་བཟང་པོར་བརྟེན་ནས་མཚོ་སྔོན་གྱི་གཏམ་རྒྱུད་ཡག་པོར་བཤད་དགོས། སེམས་ཤུགས་དང་བརྩེ་བ་ལྡན་པར་ན་གཞོན་གྱི་བྱ་བ་ལེགས་པར་སྒྲུབ་སྟེ། ཞིང་ཆེན་ཡོངས་ཀྱི་རྒྱ་ཆེའི་ན་གཞོན་རྣམས་ཞི་བདེའི་འདུ་ཤེས་དར་སྤེལ་གཏོང་མཁན་དང་ཞི་བདེ་འཕེལ་རྒྱས་ཀྱི་འགུལ་སྐྱོད་མཁན་བྱེད་པར་ཁྲིད་སྟོན་བྱེད་དགོས་པ་ནན་གྱིས་བསྟན།
གྲོས་ཚོགས་ལས་ཉེ་དུས་ཀྱི་ཀྲུང་དབྱང་དང་ཞིང་ཆེན་ཏང་ཨུའི་ཀྲུང་དབྱང་གི་གཏན་འབེབས་དོན་ཚན་བརྒྱད་ཀྱི་དགོངས་དོན་ལག་བསྟར་གཏིང་ཟབ་བྱེད་པའི་སློབ་སྦྱོང་སློབ་གསོ་སྤེལ་བའི་སྐོར་གྱི་འབྲེལ་ཡོད་ཡིག་ཆའི་དགོངས་དོན་བརྒྱུད་བསྒྲགས་དང་སློབ་སྦྱོང་བྱས། སྒྲིག་སྲོལ་ལམ་ལུགས་འཛུགས་རྒྱུ་དམ་འཛིན་ལེགས་པོ་བྱེད་པ་དང་། ལམ་ལུགས་མ་ལག་འཐུས་ཚང་ལ་བརྟེན་ནས་རྒྱལ་དབང་རྒྱུ་ནོར་གྱི་རིན་སྲུང་རིན་འཕར་ལ་ཁག་ཐེག་བྱེད་དགོས། སྨན་པའི་ཀུན་སྤྱོད་ཀྱི་འབྲེལ་ཡོད་གནད་དོན་གཅིག་བསྡུས་ལེགས་བཅོས་བྱེད་པར་མུ་མཐུད་དུ་སྐུལ་འདེད་གཏོང་བ་དང་། ཉེན་བརྡའི་སློབ་གསོར་ཤུགས་སྣོན་པ། གྱོད་དཔེར་བརྟེན་ནས་སློབ་སྦྱོང་ལ་སྐུལ་འདེད་གཏོང་བ་དང་གྱོད་དཔེར་བརྟེན་ནས་བཅོས་སྒྱུར་ལ་སྐུལ་འདེད་གཏོང་བ་ཟབ་སྤེལ་བྱས་ཏེ། སྤྱོད་གཙང་སྲོལ་གཙང་གི་ལས་རིགས་ཁོར་ཡུག་ཅིག་བསྐྲུན་དགོས། དུས་ཐོག་ཏུ་སློབ་སྦྱོང་སློབ་གསོའི་ཕན་འབྲས་དང་ཉམས་མྱོང་ཕྱོགས་སྡོམ་བྱེད་པ་དང་། སྤྱོད་ཚུལ་འཛུགས་སྐྲུན་རྒྱུན་རྣམ་ཅན་དང་ཡུན་ཕན་ཅན་གྱི་ལམ་ལུགས་རྐྱེན་སྲོལ་འཐུས་ཚང་དུ་བཏང་སྟེ། སློབ་སྦྱོང་སློབ་གསོ་གཏིང་ཟབ་ཏུ་སྤེལ་བར་སྐུལ་འདེད་ནན་མོ་གཏོང་དགོས་པ་ནན་གྱིས་བསྟན།
ཞིང་ཆེན་སྲིད་གཞུང་གི་རྒྱུན་ལས་གྲོས་ཚོགས་ལས། ཉེ་སྔོན་གྱི་རྒྱལ་སྲིད་སྤྱི་ཁྱབ་ཁང་གི་རྒྱུན་ལས་གྲོས་ཚོགས་ཀྱི་དགོངས་དོན་བརྒྱུད་བསྒྲགས་དང་སློབ་སྦྱོང་བྱས། ནུས་ཤུགས་ཡོད་རྒུས་དཔལ་འབྱོར་འཁོར་རྒྱུག་དང་ཞོད་འགོག་གནོད་སེལ། བདེ་འཇགས་ཐོན་སྐྱེད་སོགས་བྱ་བ་དམ་འཛིན་ལེགས་པོ་བྱེད་པ་དང་། རང་ཞིང་གི་སློབ་སྔོན་སློབ་གསོའི་སློབ་རིན་མེད་པར་གཏོང་བ་དང་བྱིས་པ་གསོ་སྐྱོང་གི་ཁ་གསབ། བུ་སྐྱེས་སྲིད་ཇུས་བཅས་དངོས་འབེབས་ལེགས་པོ་བྱས་ཏེ། མི་ཐབས་རིག་ནུས་ཀྱི་འགུལ་སྐྱོད་ལག་བསྟར་གཏིང་ཟབ་བྱེད་པ་དང་། མི་སྒེར་གྱི་འཛད་སྤྱོད་དངུལ་བུན་དང་ཞབས་ཞུ་ལས་རིགས་ཀྱི་ཚོང་གཉེར་བྱེད་མཁན་གྱི་དངུལ་བུན་སྐྱེད་ཀ་སྤྲོད་པའི་སྲིད་ཇུས་དངོས་འབེབས་ནན་མོ་བྱས་ཏེ། ཚད་ཆེས་ཆེ་བའི་སྒོ་ནས་སྲིད་ཇུས་ཀྱི་ནུས་པ་འདོན་དགོས་པ་ནན་གྱིས་བསྟན།
གྲོས་ཚོགས་ལས། གོང་འོག་གཞི་གཅིག་ཏུ་འབྲེལ་བའི་སྐྱེ་ཁམས་ཁོར་ཡུག་བཅོས་སྐྱོང་མ་ལག་མགྱོགས་མྱུར་ངང་འཛུགས་པ་དང་། རྨ་ཆུའི་འབབ་རྒྱུད་ཀྱི་སྐྱེ་ཁམས་སྲུང་སྐྱོབ་ཆེན་མོ་དང་མཐུན་སྦྱོར་ཆེན་མོའི་སྒྲིག་གཞིའི་ཁྲོད་སྔར་ལས་རང་འགུལ་ངང་འདྲེས་པར་བྱེད་དགོས། ཆུ་དཔོན་ལམ་ལུགས་ཀྱི་བདེ་སྐྱིད་ཆུ་བོའི་འཛུགས་སྐྲུན་ཁྲོད་ཀྱི་འགག་རྩའི་བྱེད་ནུས་ལེགས་པར་བཏོན་ནས། ནུས་ཤུགས་ཡོད་རྒུས་མཐོ་སྒང་གི་ཁྱད་ལྡན་བདེ་སྐྱིད་ཆུ་བོ་འཛུགས་སྐྲུན་བྱེད་དགོས། རྒྱབ་སྐྱོར་བྱེད་ཤུགས་ཇེ་ཆེར་བཏང་སྟེ། ཚྭ་མཚོའི་བཟོ་ལས་ཐོན་ལས་ཀྱི་ལྗང་མདོག་ཐཱན་ཉུང་གི་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་གཏོང་དགོས། ཁྲིམས་སྐྱོང་གི་བསམ་བློ་དང་ཁྲིམས་སྐྱོང་གི་བྱེད་ཐབས་ལ་བརྟེན་ནས་ཁྲིམས་མཐུན་སྲིད་འཛིན་ལ་སྐུལ་འདེད་གཏོང་བ་དང་། ཡུན་རིང་བྱས་རྗེས་བཞག་སྟེ་སྲིད་གཞུང་གི་རང་ངོས་འཛུགས་སྐྲུན་ལ་ཤུགས་སྣོན་དགོས་པ་ནན་གྱིས་བསྟན།
གྲོས་ཚོགས་ལས། 《མཚོ་སྔོན་ཞིང་ཆེན་མི་དམངས་སྲིད་གཞུང་གི་རྒྱུན་ལས་གྲོས་ཚོགས་ཀྱི་བྱ་བའི་ཚད་གཞི》དང་། 《མཚོ་སྔོན་ཞིང་ཆེན་གྱི་ཐོན་སྐྱེད་རང་བཞིན་གྱི་ཞབས་ཞུའི་ལས་རིགས་ཀྱི་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་གཏོང་བའི་བྱེད་ཐབས་འགའ》 《མཚོ་སྔོན་ཞིང་ཆེན་གྱི་འཛད་སྤྱོད་འཕར་བའི་འགུལ་སྐྱོད་ཀྱི་ལག་བསྟར་ཇུས་གཞི》བཅས་ལ་གྲོས་ཞིབ་བྱས་པར་མ་ཟད་རྩ་དོན་སྟེང་གྲོས་འཆམ་བྱུང་།
གྲོས་ཚོགས་སྟེང་ད་དུང་དོན་དག་གཞན་དག་ལ་ཞིབ་འཇུག་བྱས།
