ཞིང་ཆེན་སྲིད་གྲོས་ཀྱིས་ཏང་ཙུའུ་ཡི་རྒྱས་འཛོམས་གྲོས་ཚོགས་བསྡུས།

ཟླ7ཚེས31ཉིན། ཞིང་ཆེན་སྲིད་གྲོས་ཀྱི་ཏང་ཙུའུ་ཧྲུའུ་ཅི། ཀྲུའུ་ཞི་མགོན་པོ་བཀྲ་ཤིས་ཀྱིས་འགོ་འཛིན་བྱས་ཏེ་ཞིང་ཆེན་སྲིད་གྲོས་ཏང་ཙུའུ་ཡི་རྒྱས་འཛོམས་གྲོས་ཚོགས་བསྡུས་ནས། ཞིང་ཆེན་ཏང་ཨུ་སྐབས་བཅུ་བཞི་པའི་ཚང་འཛོམས་གྲོས་ཚོགས་ཐེངས་དགུ་པའི་དགོངས་དོན་བརྒྱུད་བསྒྲགས་དང་སློབ་སྦྱོང་བྱས་པ་དང་། དོན་འཁྱོལ་བསམ་འཆར་ལ་ཞིབ་འཇུག་བྱས།

གྲོས་ཚོགས་སྟེང་། ཝང་ཀྲིན་ཁྲང་གིས་ཞིང་ཆེན་ཏང་ཨུ་སྐབས་བཅུ་བཞི་པའི་ཚང་འཛོམས་གྲོས་ཚོགས་ཐེངས་དགུ་པའི་དགོངས་དོན་བརྒྱུད་བསྒྲགས་སློབ་སྦྱོང་བྱས་པ་དང་། ཀྲང་ཞའོ་རོང་དང་ཐེན་ཁུའེ། ལུའི་ཏ་ཡེ་བཅས་ཀྱིས་བརྗེ་རེས་གཏམ་བཤད་སྤེལ།

གྲོས་ཚོགས་ལས་བསྟན་དོན། ཞིང་ཆེན་ཏང་ཨུ་སྐབས་བཅུ་བཞི་པའི་ཚང་འཛོམས་གྲོས་ཚོགས་ཐེངས་དགུ་པ་ནི་རང་ཞིང་གིས་ཀྲུང་དབྱང་གི་གཏན་འབེབས་དོན་ཚན་བརྒྱད་ཀྱི་དགོངས་དོན་ལག་བསྟར་གཏིང་ཟབ་བྱེད་པའི་སློབ་སྦྱོང་སློབ་གསོ་སྤེལ་བའི་གནད་འགག་གི་དུས་སྐབས་དང་། ཀྲུང་དབྱང་གིས་མཚོ་སྔོན་དུ་སྐོབ་ཞིབ་བྱེད་སྐབས་བསྡུས་པའི་ཚོགས་འདུ་ཧ་ཅང་གལ་ཆེན་ཞིག་ཡིན་ལ། ཚང་འཛོམས་གྲོས་ཚོགས་ཀྱིས་སྤྱོད་ཚུལ་འཛུགས་སྐྲུན་དང་སྤུས་ཚད་མཐོ་བའི་འཕེལ་རྒྱས་བརྗོད་དོན་དང་གཙོ་ཐིག་ཏུ་བྱས་ཏེ། སྤྱོད་ཚུལ་གྱི་འགྱུར་ལྡོག་ཆེན་པོར་བརྟེན་ནས་མཚོ་སྔོན་གྱི་གཙོ་གནད་བྱ་བ་སོ་སོ་སྤུས་ཚད་མཐོ་བའི་སྒོ་ནས་འཕེལ་རྒྱས་སུ་འགྲོ་བར་སྐུལ་སློང་གི་བཀའ་བསྒྲགས་ཡོད། དེས་ཞིང་ཆེན་ཏང་ཨུས་ཆབ་སྲིད་སྟེང་སྤྱོད་ཚུལ་གནད་དོན་ལ་ལྟ་སྟངས་འཛིན་པ་དང་། རྒྱུན་ཆད་མེད་པར་སྤྱོད་ཚུལ་འཛུགས་སྐྲུན་ལ་ཤུགས་སྣོན་པ། ནུས་ཤུགས་ཡོད་རྒུས་དཔལ་འབྱོར་འཕེལ་རྒྱས་སུ་གཏོང་བ་བཅས་ཀྱི་འཐབ་ཇུས་ངེས་ཤུགས་དང་རྣམ་འགྱུར་གསལ་བོ་མཚོན་ཡོད། 

གྲོས་ཚོགས་ལས་སྤྱོད་ཚུལ་འཛུགས་སྐྲུན་ལ་ཤུགས་སྣོན་པ་ནི་ཁྱོན་ཡོངས་ལ་འབྲེལ་བ་དང་དུས་ཀྱི་འཕེལ་ཕྱོགས་ཡིན་ལ། དོན་དངོས་ཀྱི་དགོས་མཁོ་ཡིན་པས། ཚང་འཛོམས་གྲོས་ཚོགས་ཀྱི་དགོངས་དོན་ཁྲོད་སྤྱོད་ཚུལ་འཛུགས་སྐྲུན་ལ་ཤུགས་སྣོན་པའི་ཤེས་རབ་དང་སྟོབས་ཤུགས་བསྡུ་ལེན་བྱས་ཏེ། དཀའ་སྡུག་གཟི་བརྗིད་དུ་བརྩི་རྒྱུ་རྒྱུན་འཁྱོངས་དང་དཀའ་སྡུག་ཁྲོད་མདུན་དུ་སྐྱོད་མཁས་པར་བྱེད་པ། དཀའ་སྤྱད་འབད་བརྩོན་དེ་ཏང་ཡོན་ལས་བྱེད་པའི་གདམས་ཚིག་ཏུ་བརྩིས་ནས། དྲིན་ཚོར་བ་དང་བརྩེ་བ་ལྡན་པ། དངོས་སྒྲུབ་ལ་བརྩི་མཐོང་བྱེད་པ་དེ་ལས་འགན་སྒྲུབ་པའི་ཕྱོགས་སོ་སོའི་གོ་རིམ་ཧྲིལ་བོར་སྦྲེལ་དགོས་པ་དང་། རང་འགུལ་ངང་སྒྲིག་སྲོལ་བརྩི་སྲུང་བྱེད་པ་དང་། སྤོབས་པ་ཆེན་པོས་ལས་སྒྲུབ་ལས་གཏོད་བྱེད་པ། སྤྱོད་ཚུལ་ལ་འགྱུར་ལྡོག་ཆེན་པོ་བཏང་བར་བརྟེན་ནས་འགན་སྒྲུབ་ནུས་པ་དང་ཆུ་ཚད་མཐོར་འདེགས་ལ་སྐུལ་འདེད་བཏང་སྟེ། ཤུགས་ཡོད་ཕན་ལྡན་སྒོས་དེང་རབས་ཅན་གྱི་མཚོ་སྔོན་གསར་པ་འཛུགས་སྐྲུན་གྱི་ཁྱོན་ཡོངས་ལ་ཞབས་འདེགས་ཞུ་དགོས་ཞེས་བསྟན། 

གྲོས་ཚོགས་ལས་ནན་གྱིས་བསྟན་དོན། ཞིང་ཆེན་ཡོངས་ཀྱི་སྲིད་གྲོས་ཀྱིས་ཚང་འཛོམས་གྲོས་ཚོགས་ཀྱི་དགོངས་དོན་སློབ་སྦྱོང་དང་དྲིལ་སྒྲོག་བྱེད་པ་དེ་དེང་སྐབས་ཀྱི་ཆབ་སྲིད་ལས་འགན་གལ་ཆེན་དུ་བརྩི་བ་དང་། འགོ་ཁྲིད་ཀྱིས་སྣེ་ཁྲིད་པ་དང་གོང་རིམ་གྱིས་འོག་རིམ་ལ་སྣེ་ཁྲིད་བྱེད་པ་རྒྱུན་འཁྱོངས་བྱས་ཏེ་ཚང་འཛོམས་གྲོས་ཚོགས་ཀྱི་དགོངས་དོན་སྔར་ལས་ལེགས་པའི་སྒོ་ནས་དོན་འཁྱོལ་བྱེད་པར་སྐུལ་འདེད་གཏོང་དགོས། བྱེད་ཐབས་མང་པོ་མཉམ་དུ་སྤྱད་དེ་བསམ་བློ་ཆབ་སྲིད་ཀྱི་སྣེ་ཁྲིད་ལ་ཤུགས་སྣོན་དགོས་པ་དང་། སྲིད་གྲོས་རྩ་འཛུགས་དང་སྲིད་གྲོས་ཨུ་ཡོན་རང་ངོས་ཀྱི་སློབ་སྦྱོང་དང་ལག་བསྟར་དམ་འཛིན་ཡག་པོ་བྱེད་དགོས་ལ། ལས་རིགས་སོ་སོའི་མང་ཚོགས་ལ་ཁ་ཕྱོགས་ནས་དྲིལ་བསྒྲགས་དང་འགྲེལ་བཤད་ཡག་པོ་བྱས་ཏེ་ཚང་འཛོམས་གྲོས་ཚོགས་ཀྱི་དགོངས་དོན་མི་རིགས་སོ་སོ་དང་ལས་རིགས་སོ་སོའི་ཆབ་སྲིད་ཀྱི་ཐུན་མོང་ངོས་འཛིན་དང་རང་རྟོགས་ཀྱི་བྱ་སྤྱོད་དུ་འགྱུར་བར་སྐུལ་འདེད་གཏོང་དགོས། ལོ་འཁོར་གྱི་གཙོ་གནད་གྲོས་མོལ་གྲོས་གཞིར་མགྱོགས་མྱུར་ངང་སྐུལ་འདེད་གཏོང་བ་དང་། ཚང་འཛོམས་གྲོས་ཚོགས་སྟེང་བཀོད་སྒྲིག་བྱས་པའི་གཙོ་གནད་དང་དཀའ་གནད་ལས་འགན་ལ་ཟུང་འབྲེལ་དམ་ཟབ་བྱས་ནས་གྲོས་མོལ་སྲིད་གླེང་གཏིང་ཟབ་བྱེད་པ། དངོས་སྒྲུབ་ཀྱིས་ཐབས་འདོན་ཇུས་འབུལ་བྱེད་པ། དམངས་གཙོ་ལྟ་སྐུལ་བྱེད་ཤུགས་ཆེ་རུ་གཏོང་བ་བཅས་བྱས་ཏེ། སྤུས་ཚད་མཐོ་བའི་འགན་སྒྲུབ་གྲུབ་འབྲས་ལ་བརྟེན་ནས“ལོ་ལྔའི་འཆར་འགོད་བཅུ་བཞི་པ”མཇུག་ལེགས་པོར་བསྡུ་བ་དང་། “ལོ་ལྔའི་འཆར་འགོད་བཅོ་ལྔ་པའི”འགོ་ཡག་པོ་རྩོམ་པར་རོགས་རམ་བྱེད་དགོས། ཐོག་མཐའ་བར་གསུམ་དུ་སློབ་སྦྱོང་སློབ་གསོ་དམ་འཛིན་ཡག་པོ་བྱེད་པ་དང་། ཆོད་སེམས་མི་འགྱུར་བ་དང་། ཚད་གཞི་མི་དམའ་བ། ཤུགས་ཚད་ཇེ་ཉུང་དུ་མི་གཏོང་བ་བཅས་རྒྱུན་འཁྱོངས་བྱས་ཏེ། སློབ་སྦྱོང་དང་གོ་བ་ལེན་ཚད་སྔར་ལས་གཏིང་ཟབ་ཏུ་གཏོང་བ་དང་། ཞིབ་བཤེར་དང་བཅོས་སྒྱུར་གྱི་གནད་དོན་ཐད་སྔར་ལས་མདོ་ཁུར་བྱེད་པ། སྒྲིག་སྲོལ་ལམ་ལུགས་འཛུགས་པའི་ཐད་སྔར་ལས་ནུས་ཤུགས་འདོན་པ། མིག་སྔའི་བཅོས་སྒྱུར་དང་ཡུན་རིང་རྒྱུན་འཁྱོངས་ཟུང་འབྲེལ་བྱེད་པ། རང་འགུལ་ངང་ལས་བྱེད་པ་དང་མང་ཚོགས་ཀྱི་ལྟ་སྐུལ་དང་ལེན་བྱས་ཏེ། དོན་དངོས་དང་མཐུན་པའི་བཅོས་སྒྲིག་གི་ཕན་འབྲས་ལ་བརྟེན་ནས་མང་ཚོགས་ལ་ལན་འདེབས་པ་དང་། མང་ཚོགས་ལ་ཡིད་ཆེས་ཐོབ་པར་བྱེད་དགོས། 

རིན་ཆེན་རྣམ་རྒྱལ་དང་།  ཁོང་ཡུང་། ལི་ཞའོ་ནན། གསེར་ཁྲི་ཆོས་ཀྱི་བློ་གྲོས་རྒྱ་མཚོ། མཱ་ཡུའེ་ཞང་། ཞེ་པོ་ཨིན་དང་ལས་ཁུངས་ཀྱི་ཁྲུའུ་རིམ་པ་ཡན་གྱི་ཏང་ཡོན་ལས་བྱེད་པ་བཅས་གྲོས་ཚོགས་ལ་ཞུགས།