ཞིང་ཆེན་ཡོངས་ཀྱི་ཕྱོགས་བསྡུས་སྨན་བཅོས་བཅོས་སྒྱུར་བྱ་བའི་སྐུལ་སྤེལ་ཚོགས་འདུ་ཟི་ལིང་དུ་འཚོགས།

ཟླ7ཚེས30ཉིན། ཞིང་ཆེན་ཡོངས་ཀྱི་ཕྱོགས་བསྡུས་སྨན་བཅོས་བཅོས་སྒྱུར་བྱ་བའི་སྐུལ་སྤེལ་ཚོགས་འདུ་ཟི་ལིང་དུ་འཚོགས། ཚོགས་འདུའི་སྟེང་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་བདེ་ཐང་ཀྲུང་གོའི་སྐོར་གྱི་རྒྱས་བཤད་གལ་ཆེན་ལ་སློབ་སྦྱོང་བྱས་ཏེ་གོ་བ་གཏིང་ཟབ་བླངས་པ་དང་། ཏང་ཀྲུང་དབྱང་དང་རྒྱལ་སྲིད་སྤྱི་ཁྱབ་ཁང་གི་སྨན་བཅོས་བཅོས་སྒྱུར་བྱ་བ་གཏིང་ཟབ་ཏུ་གཏོང་རྒྱུའི་སྐོར་གྱི་ཐབས་ཇུས་བཀོད་སྒྲིག་ཁྱོན་ཡོངས་ནས་ལག་བསྟར་དོན་འཁྱོལ་བྱས་ལ། བྱ་བའི་ཕན་འབྲས་ཕྱོགས་སྡོམ་དང་། གནས་བབ་ལ་དབྱེ་ཞིབ་དང་དཔྱད་བསྡུར་བྱས་ཏེ་དུས་རིམ་རྗེས་མའི་གཙོ་གནད་ལས་འགན་བཀོད་སྒྲིག་བྱས། རྒྱལ་ཁབ་འཕྲོད་བསྟེན་བདེ་ཐང་ཨུ་ཡོན་ལྷན་ཁང་གི་ཀྲུའུ་རིན་གཞོན་པ་ལིའུ་ཅིན་ཧྥུན་དང་ཧྲིན་ཀྲང་གཞོན་པ་ཁྲིན་ཅི་ཝེ་ཚོགས་འདུར་ཞུགས་པར་མ་ཟད་གཏམ་བཤད།

ཚོགས་འདུ་ལས་བསྟན་དོན། ཉེ་བའི་ལོ་ཤས་རིང་། ཞིང་ཆེན་ཡོངས་ཀྱི་གོང་འོག་ཚང་མས་སྨན་བཅོས་བྱེད་དཀའ་བ་དང་སྨན་བཅོས་རིན་གོང་མཐོ་བའི་གནད་དོན་ཐག་གཅོད་བྱ་རྒྱུ་གཙོ་གནད་དུ་བཟུང་སྟེ། གཞི་རྩའི་སྨན་བཅོས་འགན་སྲུང་གི་སྤུས་ཚད་དང་ཕན་འབྲས་ཆེ་རུ་གཏོང་རྒྱུར་ནུས་ཤུགས་ཡོད་རྒུས་སྐུལ་འདེད་བཏང་བས། སྨན་བཅོས་ཞབས་ཞུའི་ནུས་པ་མངོན་གསལ་སྒོས་མཐོ་རུ་ཕྱིན་པ་དང་། གཞུང་བཙུགས་སྨན་ཁང་གི་བཅོས་སྒྱུར་མུ་མཐུད་ནས་གཏིང་ཟབ་ཏུ་ཕྱིན་ལ། སྤྱི་པའི་འཕྲོད་བསྟེན་མ་ལག་ཇེ་བརྟན་དུ་ཕྱིན་པ་དང་། ཀྲུང་བོད་ལུགས་སྨན་བཅོས་བྱ་གཞག་གསར་གཏོད་ལྡན་པར་གོང་དུ་སྤེལ་ཞིང་། ཕྱོགས་བསྡུས་སྨན་བཅོས་བཅོས་སྒྱུར་ལ་དུས་རིམ་རང་བཞིན་གྱི་ཕན་འབྲས་ཐོབ་ཡོད།

ཚོགས་འདུ་ལས་ས་གནས་སོ་སོ་དང་སྡེ་ཁག་སོ་སོས་སྨན་བཅོས་འཕྲོད་བསྟེན་དང་སྨན་བཅོས་འགན་སྲུང་། སྨན་རྫས་བཅས་ཀྱི་མཐུན་སྦྱོར་བཅོས་སྒྱུར་གཏིང་ཟབ་ཏུ་གཏོང་བ་དང་། སན་མེན་གྲོང་ཁྱེར་གྱི་སྨན་བཅོས་བཅོས་སྒྱུར་ཉམས་མྱོང་ཁྱབ་གདལ་གཏོང་བ། སྨན་བཅོས་འགན་བཅོལ་གཏོང་སྤྲོད་ལམ་སྲོལ་བཅོས་སྒྱུར་གཏིང་ཟབ་ཏུ་གཏོང་བ། སྨན་རྫས་ཟད་གྲོན་རྒྱུ་ཆ་གཅིག་སྡུད་དང་དོ་དམ་བྱེད་ཤུགས་ཆེ་རུ་གཏོང་དགོས། གཞུང་བཙུགས་སྨན་ཁང་གི་བཅོས་སྒྱུར་འགག་སྒྲོལ་དང་། སྨན་བཅོས་ཞབས་ཞུའི་རིན་གོང་འཐུས་ཚང་དུ་གཏོང་བ། མི་དོན་གླ་ཕོགས་རྐྱེན་སྲོལ་གསར་གཏོད་བྱས་ནས་རྒྱལ་ཁབ་ཀྱི་དཔེ་སྟོན་རྣམ་གྲངས་འཛུགས་སྐྲུན་ལ་སྐུལ་འདེད་གཏོང་དགོས། རིམ་དབྱེ་སྨན་བཅོས་མ་ལག་ཇེ་ལེགས་སུ་གཏོང་བ་དང་། སྤུས་ལེགས་སྨན་བཅོས་ཐོན་ཁུངས་གཞི་རིམ་དུ་ཟབ་ཞུགས་བྱེད་ཚད་ཇེ་མགྱོགས་སུ་གཏོང་བ། ལྷག་པར་དུ་དམ་ཟབ་ཅན་གྱི་རྫོང་ཁོངས་སྨན་བཅོས་སྤྱི་ཐུན་སྒྲིག་གཞི་འཛུགས་སྐྲུན་བྱ་རྒྱུར་ཤུགས་སྣོན་དགོས།  གྲངས་འཛིན་སྨན་བཅོས་ཀྱི་ནུས་སྤྲོད་ལ་ཤུགས་སྣོན་པ་དང་། བདེ་ཐང་ཆ་འཕྲིན་འབྲེལ་མཐུད་ལ་སྐུལ་འདེད་གཏོང་བ། མི་ཐབས་རིག་ནུས་སྨན་བཅོས་ཀྱི་བཀོལ་སྤྱོད་ཁྱབ་གདལ་བཏང་ནས་མང་ཚོགས་ཀྱི་སྨན་བཅོས་ཉམས་ལེན་ལེགས་བཅོས་བྱ་དགོས། ནད་འགོག་མ་ལག་གི་བཅོས་སྒྱུར་ཇེ་མགྱོགས་སུ་གཏོང་བ་དང་། ཀྲུང་བོད་སྨན་རྫས་རྒྱུན་འཛིན་གསར་གཏོད་ལ་སྐུལ་འདེད་གཏོང་བ། “རྒན་པ་གཅིག་དང་བྱིས་པ་གཅིག”གི་ཞབས་ཞུ་འཐུས་ཚང་དུ་གཏོང་བ། མཐོ་སྒང་གི་གསོ་རིག་ཞིབ་འཇུག་ལ་ཤུགས་སྣོན་པ། མཐོ་སྒང་གི་བདེ་ཐང་ཁམས་གསོ་ཐོན་ལས་འཕེལ་རྒྱས་སུ་བཏང་ནས་ཞིང་ཆེན་ཡོངས་ཀྱི་འཕྲོད་བསྟེན་བདེ་ཐང་བྱ་གཞག་སྤུས་ཚད་མཐོན་པོས་འཕེལ་རྒྱས་སུ་འགྲོ་བར་ཧུར་ཐག་གིས་སྐུལ་འདེད་གཏོང་དགོས་པའི་བླང་བྱ་བཏོན།