ཀྲའོ་ལི་ཅི་ཡིས་སུའེ་ཙེར་ལ་དངོས་གཞིའི་མཛའ་མཐུན་འཚམས་འདྲི་གནང་།

སུའེ་ཙེར་རྒྱལ་ཕྲན་མཉམ་འབྲེལ་གྲོས་ཁང་རྒྱལ་དམངས་ཁང་གི་གྲོས་གཙོ་ལིས་ཉི་ཁི་དང་རྒྱལ་ཕྲན་མཉམ་འབྲེལ་ཁང་གི་གྲོས་གཙོ་ཁ་ལའོ་ཉི་ཡི་གདན་ཞུ་ལྟར། རྒྱལ་ཡོངས་དམངས་ཆེན་རྒྱུན་ལས་ཨུ་ཡོན་ལྷན་ཁང་གི་ཨུ་ཡོན་ཀྲང་ཀྲའོ་ལི་ཅི་ཡིས་ཚེས28ཉིན་ནས་ཚེས31ཉིན་བར་སུའེ་ཙེར་དུ་དངོས་གཞིའི་མཛའ་མཐུན་འཚམས་འདྲི་གནང་།

ལིས་ཉི་ཁི་དང་ཁ་ལའོ་ཉིར་གྲོས་མོལ་མཛད་སྐབས། ཀྲའོ་ལི་ཅི་ཡིས་ཀྲུང་གོ་དང་སུའེ་ཙེར་བར་འབྲེལ་བ་བཙུགས་ནས་ལོ75ཡི་རིང་། “འདྲ་མཉམ་དང་གསར་གཏོད། མཉམ་རྒྱལ”བཅས་ཀྱི་མཉམ་ལས་སྙིང་སྟོབས་མཉམ་དུ་གསོ་སྐྱོང་བྱས་ནས་སྤྱི་ཚོགས་ཀྱི་ལམ་ལུགས་མི་འདྲ་བ་དང་། འཕེལ་རྒྱས་ཀྱི་དུས་རིམ་མི་འདྲ་བ། རྒྱལ་ཁབ་ཆེ་ཆུང་མི་འདྲ་བ་བཅས་ཀྱི་མཉམ་ལས་ཀྱི་མིག་དཔེར་གྱུར་ཡོད། ཀྲུང་གོ་ཕྱོགས་ཀྱིས་སུའེ་ཙེར་ཕྱོགས་དང་མཉམ་དུ་རྒྱལ་ཁབ་གཉིས་ཀྱི་འགོ་ཁྲིད་པའི་ཐུན་མོང་གི་ངོས་འཛིན་གལ་ཆེན་དོན་འཁྱོལ་ལེགས་པོ་བྱས་ཏེ། ཀྲུང་གོ་དང་སུའེ་ཙེར་གྱི་གསར་གཏོད་འཐབ་ཇུས་གྲོགས་པོའི་འབྲེལ་བ་ཆུ་ཚད་མཐོ་བའི་འཕེལ་རྒྱས་འགྲོ་རྒྱུར་སྐུལ་འདེད་གཏོང་འདོད་ཡོད་པ་བསྟན།

ཀྲའོ་ལི་ཅི་ཡིས་ཀྲུང་གོ་ཕྱོགས་ཀྱིས་སུའེ་ཙེར་ཕྱོགས་དང་མཐོ་རིམ་འགྲོ་འོང་གི་རྣམ་པ་བཟང་པོ་སྲུང་འཛིན་བྱེད་འདོད་ཡོད། སུའེ་ཙེར་ཕྱོགས་ཀྱི་འགོ་ཁྲིད་པ་དང་གྲོས་མིའི་གྲོགས་པོ་སྔར་ལས་མང་པོ་ཀྲུང་གོར་འཚམས་འདྲིར་ཡོང་ནས་དོན་དངོས་དང་ཕྱོགས་ཡོངས་ཀྱི་ཀྲུང་གོར་རྒྱུས་ལོན་བྱེད་པར་དགའ་བསུ་ཞུ་རྒྱུ་ཡིན། ཀྲུང་གོ་ཕྱོགས་ཀྱིས་སུའེ་ཙེར་ཕྱོགས་ཀྱིས་ཀྲུང་གོར་མཉམ་ལས་བྱེད་རྒྱ་ཆེ་རུ་གཏོང་རྒྱུ་རྒྱུན་འཁྱོངས་བྱས་པར་བསྔགས་བརྗོད་བྱེད་ཀྱིན་ཡོད། བརྗེ་རེས་འགྲོ་འོང་ལ་ཤུགས་བསྣན་ནས་ཀྲུང་གོ་དང་སུའེ་ཙེར་གྱི་འབྲེལ་བའི་འཕེལ་རྒྱས་ཆེད་དྲང་ནུས་སྔར་ལས་མང་པོ་གཅིག་ཏུ་བསྒྲིལ་རྒྱུའི་རེ་བ་ཡོད་པ་བསྟན། ཀྲུང་གོ་དང་སུའེ་ཙེར་གྱི་རང་མོས་ཉོ་འཚོང་ཆོད་ཡིག་གི་ནུས་པ་ཐོན་ནས་བཟུང་། ཕྱོགས་གཉིས་ཀྱི་ཉོ་འཚོང་མཉམ་ལས་མགྱོགས་མྱུར་ངང་འཕེལ་རྒྱས་འགྲོ་བཞིན་ཡོད། རང་མོས་ཉོ་འཚོང་གི་ཆོད་ཡིག་རིམ་སྤར་གྲོས་མོལ་དང་དངུལ་རྩའི་ཁྱབ་ཁོངས་ཀྱི་སྤུས་ཚད་མཐོ་བའི་མཉམ་ལས་ལ་ཐུན་མོང་གིས་སྐུལ་འདེད་གཏོང་བའི་རེ་བ་ཡོད་པ་དང་། སུའེ་ཙེར་གྱི་དངུལ་གཏོང་ལས་ཁུངས་ཀྱིས་ཀྲུང་གོར་དངུལ་འཇོག་རྒྱ་ཆེ་རུ་གཏོང་རྒྱུར་དགའ་བསུ་ཞུ། ཕྱོགས་གཉིས་ཀྱིས་སྒྱུ་རྩལ་དང་། ལུས་རྩལ། སློབ་གསོ་སོགས་ཁྱབ་ཁོངས་ཀྱི་མཉམ་ལས་གཏིང་ཟབ་ཏུ་བཏང་ནས། རྒྱལ་ཁབ་གཉིས་ཀྱི་མཛའ་མཐུན་གྱི་སྤྱི་ཚོགས་དང་དམངས་འདོད་ཀྱི་རྨང་གཞི་ཇེ་བརྟན་དུ་གཏོང་དགོས།

ཀྲའོ་ལི་ཅི་ཡིས་ཀྲུང་གོའི་རྒྱལ་ཡོངས་དམངས་ཆེན་དང་སུའེ་ཙེར་རྒྱལ་ཕྲན་མཉམ་འབྲེལ་གྲོས་ཁང་གིས་ཡུན་རིང་མཛའ་མཐུན་འབྲེལ་བ་སྲུང་འཛིན་བྱས་ནས། ཀྲུང་གོ་དང་སུའེ་ཙེར་གྱི་འབྲེལ་བ་འཕེལ་རྒྱས་དང་དངོས་སྒྲུབ་མཉམ་ལས་ལ་བྱས་རྗེས་ཆེན་པོ་བཞག་ཡོད། ཕྱོགས་གཉིས་ཀྱིས་ཁྲིམས་འཛུགས་ལས་ཁུངས་བར་གྱི་མཛའ་མཐུན་འགྲོ་འོང་ལ་སྔར་ལས་ཤུགས་བསྣན་ཏེ། ཁྲིམས་འཛུགས་དང་ལྟ་སྐུལ་སོགས་བྱ་བའི་ཉམས་མྱོང་བརྗེ་རེས་དང་ཕན་ཚུན་དཔྱད་གཞིར་འཛིན་པ་དང་། རྒྱལ་ཁབ་གཉིས་ཀྱི་མཉམ་ལས་ལ་ཕན་པའི་བཅའ་ཁྲིམས་ཡིག་ཆ་དུས་ཐོག་ཏུ་གཏན་འབེབས་དང་། བཟོ་བཅོས། ཆོག་མཆན་འགོད་པ་བཅས་བྱེད་དགོས་ལ། རྒྱལ་ཁབ་སོ་སོའི་གྲོས་ཁང་མནའ་འབྲེལ་སོགས་ཕྱོགས་མང་ལམ་སྲོལ་ཁྲོད་འབྲེལ་འདྲིས་དང་རོགས་ལས་བྱེད་ཤུགས་ཆེ་རུ་གཏོང་དགོས་པ་བསྟན།

ལིས་ཉི་ཁི་ཡིས་ཕན་ཚུན་བརྩི་འཇོག་དང་། སྒོ་འབྱེད། བཟང་སེམས་བཅས་རྒྱུན་འཁྱོངས་བྱེད་པའི་རྨང་གཞིའི་ཐོག སུའེ་ཙེར་དང་ཀྲུང་གོའི་འབྲེལ་བ་བརྟན་པོའི་ངང་འཕེལ་རྒྱས་དང་གྲུབ་འབྲས་གཡུར་དུ་ཟ་བ་ཐོབ་ཡོད། སུའེ་ཙེར་རྒྱལ་ཕྲན་མཉམ་འབྲེལ་གྲོས་ཁང་གི་རྒྱལ་དམངས་ཁང་གིས་ཀྲུང་གོའི་རྒྱལ་ཡོངས་དམངས་ཆེན་དང་མཉམ་ལས་ལ་ཤུགས་བསྣན་ནས། རྒྱུན་མཐུད་འཕེལ་རྒྱས་ལ་ཡར་སྐུལ་གཏོང་ཆེད་དགེ་མཚན་ལྡན་པའི་ནུས་པ་འདོན་སྤེལ་བྱེད་འདོད་ཡོད་པ་བསྟན།

ཁ་ལའོ་ཉི་ཡིས་ཀྲུང་གོ་དང་མཉམ་ལས་བྱེད་ཤུགས་ཆེ་རུ་གཏོང་རྒྱུ་དེ་སུའེ་ཙེར་ལ་འཐབ་ཇུས་ཀྱི་དོན་སྙིང་ལྡན། སུའེ་ཙེར་རྒྱལ་ཕྲན་མཉམ་འབྲེལ་གྲོས་ཁང་གི་རྒྱལ་ཕྲན་མཉམ་འབྲེལ་ཁང་གིས་ཀྲུང་གོའི་ཕྱོགས་དང་བརྗེ་རེས་གླེང་མོལ་བྱ་རྒྱུར་སྔར་ལས་ཤུགས་སྣོན་རྒྱུའི་རེ་སྒུག་བྱེད་བཞིན་ཡོད། ཕན་ཚུན་རྒྱུས་ལོན་ཇེ་ཟབ་ཏུ་བཏང་ནས་ཐུན་མོང་འཕེལ་རྒྱས་འགྲོ་རྒྱུར་ཡར་སྐུལ་གཏོང་རྒྱུ་ཡིན་པ་བསྟན།

སུའེ་ཙེར་ལ་འཚམས་འདྲི་གནང་སྐབས། ཀྲའོ་ལི་ཅི་ཡིས་ཏིས་སི་མན—ཧྥིན་མེ་དབྱི་ཀུང་སིར་གཟིགས་ཞིབ་བྱས་པ་དང་། སུའེ་ཙེར་གྱི་དངུལ་གཏོང་ཁེ་ལས་ཀྱིས་ཀྲུང་གོར་ཉོ་འཚོང་དང་ཚན་རྩལ་མཉམ་ལས་བྱེད་རྒྱ་ཆེ་རུ་ཧུར་ཐག་གཏོང་རྒྱུར་དགའ་བསུ་ཞུ་བ་དང་། གཉིས་ཕན་མཉམ་རྒྱལ་ཡོང་བར་བྱ་རྒྱུ་ཡིན།