ལིས་ཆང་གིས་འགོ་འཛིན་མཛད་ནས་རྒྱལ་སྲིད་སྤྱི་ཁྱབ་ཁང་གི་རྒྱུན་ལས་གྲོས་ཚོགས་བསྡུས།

ཟླ7པའི་ཚེས31ཉིན། རྒྱལ་སྲིད་སྤྱི་ཁྱབ་ཁང་གི་ཙུང་ལི་ལིས་ཆང་གིས་འགོ་འཛིན་མཛད་ནས་རྒྱལ་སྲིད་སྤྱི་ཁྱབ་ཁང་གི་རྒྱུན་ལས་གྲོས་ཚོགས་བསྡུས་ཏེ། སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་ལོ་སྟོད་ཀྱི་དཔལ་འབྱོར་གནས་བབ་དང་ལོ་སྨད་ཀྱི་དཔལ་འབྱོར་བྱ་བ་ལེགས་པོར་བསྒྲུབ་རྒྱུའི་སྐོར་གྱི་གསུང་བཤད་གལ་ཆེན་གྱི་དགོངས་དོན་ལ་སློབ་སྦྱོང་དང་དོན་འཁྱོལ་མཐར་ཕྱིན་བྱས།

གྲོས་ཚོགས་ལས་ནན་གྱིས་བསྟན་དོན། ཏང་ཀྲུང་དབྱང་གི་དཔལ་འབྱོར་གནས་བབ་སྐོར་གྱི་ཚན་རིག་དང་མཐུན་པའི་བརྡར་གཅོད་ལ་གོ་བ་ཟབ་མོ་ལེན་པ་དང་། ལོ་སྨད་ཀྱི་དཔལ་འབྱོར་བྱ་བ་ལེགས་པར་བསྒྲུབ་པའི་འགན་འཁྲིའི་འདུ་ཤེས་དང་འོས་འགན་འདུ་ཤེས་སྔར་ལས་ཇེ་དྲག་ཏུ་གཏོང་བ། འགན་འཁྲི་འཁུར་ཕོད་པ་དང་དཀའ་བ་ཁྱད་གསོད་བྱས་ནས་དཔལ་འབྱོར་བསྐྱར་དུ་བཟང་ཕྱོགས་སུ་འཕེལ་བའི་རྣམ་པ་བཟང་བོ་སྲ་བརྟན་རྒྱ་སྐྱེད་གཏོང་དགོས། ལོ་ཧྲིལ་པོའི་འཕེལ་རྒྱས་ཀྱི་དམིགས་ཚད་ལས་འགན་ལ་དམིགས་ནས་སྤྱི་ཁོག་སྲིད་ཇུས་ཀྱི་ཕན་ནུས་ཆེ་རུ་གཏོང་བ་དང་། རྒྱུན་མཐུད་འགག་སྒྲོལ་དང་དཀའ་གནད་ཁྱད་དུ་བསད་ནས། ཏང་ཀྲུང་དབྱང་གི་ཇུས་ཆོད་བཀོད་སྒྲིག་དོན་འཁྱོལ་ནན་འཛིན་བྱ་དགོས། དཔལ་འབྱོར་འཕེལ་རྒྱས་ཀྱི་ནང་གནས་སྒུལ་ཤུགས་འཕེལ་བར་སྔར་ལས་དོ་སྣང་ཆེན་པོས་སྐུལ་སློང་དང་ཁྱབ་ཁོངས་གཙོ་བོའི་བཅོས་སྒྱུར་ཟབ་སྤེལ་བཏང་སྟེ། རྒྱལ་ཡོངས་གཅིག་གྱུར་གྱི་ཁྲོམ་ར་ཆེན་མོ་འཛུགས་སྐྲུན་དང་ཚོང་གཉེར་ཁོར་ཡུག་ལེགས་བསྒྱུར་སོགས་ཀྱི་ཕྱོགས་ནས་ཕན་འབྲས་སྔར་ལས་ལེགས་པོ་ལེན་དགོས། འཕེལ་རྒྱས་དང་བདེ་འཇགས་ལ་སྔར་ལས་གཅིག་གྱུར་འཆར་འགོད་ལེགས་པོ་བྱས་ནས་མ་ལག་རང་བཞིན་གྱི་ཉེན་ཁ་མི་འབྱུང་བའི་ཚད་མཐའ་བརྟན་སྲུང་བྱ་དགོས། ཞོད་འགོག་རྒུད་སྐྱོབ་བྱ་བ་ཏན་ཏིག་ངང་ལེགས་པོར་བསྒྲུབ་པ་དང་། གདོང་གཏོད་བྱེད་ཐབས་སོ་སོ་སྔར་ལས་ཞིབ་ཚགས་ངང་དོན་འཁྱོལ་བྱས་ཏེ། མི་དམངས་ཀྱི་ཚེ་སྲོག་དང་རྒྱུ་ནོར་བདེ་འཇགས་ལ་ནུས་ཤུགས་ཡོད་རྒུས་འགན་ལེན་བྱ་དགོས།

གྲོས་ཚོགས་ལས《“མི་ཐབས་རིག་ནུས་དང་འབྲེལ་བའི”འགུལ་སྐྱོད་ལག་བསྟར་གཏིང་ཟབ་བྱ་རྒྱུའི་སྐོར་གྱི་བསམ་འཆར》ལ་གྲོས་ཞིབ་བྱས་ནས་གྲོས་འཆམ་བྱུང་། གྲོས་ཚོགས་ལས་བསྟན་དོན། “མི་ཐབས་རིག་ནུས་དང་འབྲེལ་བའི”་འགུལ་སྐྱོད་ལག་བསྟར་གཏིང་ཟབ་བྱས་ཏེ། མི་ཐབས་རིག་ནུས་གཞི་ཁྱོན་ཅན་དང་ཚོང་ལས་ཅན་དུ་བཀོལ་སྤྱོད་བྱེད་པར་འབད་པས་སྐུལ་འདེད་ཤུགས་ཆེན་གཏོང་བ་དང་། དཔལ་འབྱོར་སྤྱི་ཚོགས་འཕེལ་རྒྱས་ཀྱི་ཁྱབ་ཁོངས་སོ་སོར་མི་ཐབས་རིག་ནུས་མགྱོགས་མྱུར་ངང་ཁྱབ་གདལ་དང་མཉམ་འདྲེས་གཏིང་ཟབ་ཡོང་བར་སྐུལ་འདེད་བཏང་སྟེ། གསར་གཏོད་ཀྱིས་བཀོལ་སྤྱོད་ལ་སྣེ་ཁྲིད་དང་བཀོལ་སྤྱོད་ཀྱིས་གསར་གཏོད་ལ་སྐུལ་འདེད་གཏོང་བའི་འཁོར་རྒྱུག་བཟང་པོ་ཆགས་དགོས། སྲིད་གཞུང་སྡེ་ཁག་དང་རྒྱལ་གཉེར་ཁེ་ལས་ཀྱིས་དཔེ་སྟོན་སྣེ་ཁྲིད་ལ་ཤུགས་བསྣན་ནས་སྒོ་འབྱེད་དཔེ་རྣམ་སོགས་བརྒྱུད་དེ་ལག་རྩལ་དོན་འཁྱོལ་བྱ་རྒྱུར་རྒྱབ་སྐྱོར་བྱེད་དགོས། མི་ཐབས་རིག་ནུས་ཀྱི་གསར་གཏོད་སྐྱེ་ཁམས་ལེགས་སྒྱུར་བྱས་ནས། རྩིས་ཤུགས་དང་རྩིས་ཐབས། གཞི་གྲངས་བཅས་འདོན་སྤྲོད་བྱེད་ཤུགས་ཆེ་རུ་གཏོང་བ་དང་། སྲིད་ཇུས་ཀྱི་རྒྱབ་སྐྱོར་བྱེད་ཤུགས་ཆེ་རུ་གཏོང་བ། ཤེས་ལྡན་མི་སྣའི་དཔུང་སྡེ་འཛུགས་སྐྲུན་ལ་ཤུགས་སྣོན་དང་ཁུངས་འབྱེད་སྒོ་འབྱེད་མ་ལག་བཙུགས་ཏེ། ཐོན་ལས་འཕེལ་རྒྱས་དང་རྒྱ་སྐྱེད་གཏོང་བར་འདེགས་སྐྱོར་ནུས་ལྡན་འདོན་སྤྲོད་བྱ་དགོས། བདེ་འཇགས་ཀྱི་ནུས་པ་དང་ཆུ་ཚད་ཇེ་མཐོར་བཏང་སྟེ། འགུལ་རྣམ་མྱུར་ཞིང་སྣ་མང་མཐུན་སྦྱོར་གྱི་མི་ཐབས་རིག་ནུས་བཅོས་སྐྱོང་གི་རྣམ་པ་ཞིག་མགྱོགས་མྱུར་སྒོས་འགྲུབ་དགོས།

གྲོས་ཚོགས་ལས་མི་སྒེར་གྱི་འཛད་སྤྱོད་དངུལ་བུན་གྱི་སྐྱེད་གསབ་སྲིད་ཇུས་དང་ཞབས་ཞུའི་ལས་རིགས་གཉེར་སྐྱོང་བྱ་ཡུལ་གཙོ་བོའི་དངུལ་བུན་སྐྱེད་གསབ་སྲིད་ཇུས་ལག་བསྟར་བྱ་རྒྱུའི་བཀོད་སྒྲིག་བྱས། གྲོས་ཚོགས་ལས་བསྟན་དོན། མི་སྒེར་གྱི་འཛད་སྤྱོད་དངུལ་བུན་དང་ཞབས་ཞུའི་ལས་རིགས་ཀྱི་གཉེར་སྐྱོང་བདག་པོའི་དངུལ་བུན་ལ་སྐྱེད་ཀ་སྟེར་དགོས་པ་དང་། ནོར་སྲིད་དང་དངུལ་རྩ་མཉམ་འགུལ་བྱེད་སྟངས་བརྒྱུད། གྲོང་མིའི་ཡིད་རྟོན་དངུལ་བུན་གྱི་མ་རྩ་དང་ཞབས་ཞུའི་ལས་རིགས་ཀྱི་གཉེར་སྐྱོང་བདག་པོའི་མ་དངུལ་བསྡུ་སྒྲིལ་གྱི་མ་རྩ་ཇེ་དམའ་རུ་བཏང་ནས་འཛད་སྤྱོད་ཀྱི་སྦས་ཤུགས་དང་ཁྲོམ་རའི་གསོན་ཤུགས་སྔར་ལས་ཇེ་མཐོར་གཏོང་བར་ཕན། སྐྱེད་ཀ་སྤྲོད་པའི་སྲིད་ཇུས་རྩ་འཛུགས་དང་ལག་བསྟར་བྱ་རྒྱུ་དམ་འཛིན་ཡག་པོ་བྱས་ནས། སྡེ་ཁག་མཐུན་སྦྱོར་ལ་ཤུགས་སྣོན་དང་འགྲོ་ལུགས་སྟབས་ཇེ་བདེར་གཏོང་བ། སྲིད་ཇུས་གང་མགྱོགས་སྒོས་དོན་འཁྱོལ་བྱེད་པར་སྐུལ་འདེད་གཏོང་བའི་ཞོར་ལ། མ་དངུལ་བེད་སྤྱོད་ཀྱི་ཕན་འབྲས་ཆེ་རུ་གཏོང་བར་ལྟ་སྐུལ་དོ་དམ་ནན་མོ་བྱས་ཏེ། ནོར་སྲིད་མ་དངུལ་གནད་འཁེལ་བེད་སྤྱོད་བྱེད་པར་འགན་སྲུང་བྱེད་དགོས།

གྲོས་ཚོགས་ལས《ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་རྨོ་ཞིང་སྲུང་སྐྱོབ་དང་སྤུས་ཚད་མཐོར་འདེགས་བཅའ་ཁྲིམས(འཆར་ཟིན)》ལ་གྲོས་བསྡུར་བྱས་ནས་རྩ་དོན་ཐོག་གྲོས་འཆམ་བྱུང་བ་དང་། རྒྱལ་ཡོངས་དམངས་ཆེན་རྒྱུན་ལས་ཨུ་ཡོན་ལྷན་ཁང་ལ་གྲོས་ཞིབ་ཏུ་སྤྲོད་རྒྱུའི་གྲོས་ཐག་བཅད། གྲོས་ཚོགས་ལས་ཁྲིམས་ལྟར་རྨོ་ཞིང་ལ་སྲུང་སྐྱོབ་བྱེད་པའི་འགན་འཁྲི་འཁུར་སེམས་ཇེ་དྲག་ཏུ་བཏང་སྟེ། རྨོ་ཞིང་གི་གྲངས་ཀ་དང་སྤུས་ཚད། སྐྱེ་ཁམས་བཅས་གཞི་གཅིག་ཏུ་སྲུང་སྐྱོང་བྱ་རྒྱུ་རྒྱུན་འཁྱོངས་དང་། ཕྱོགས་བསྡུས་ཇུས་བསྟར་བྱས་ནས་རྨོ་ཞིང་གི་སྐྱེ་ཁམས་བྱེད་ནུས་བསྟུད་མར་སླར་གསོ་དང་ཇེ་མཐོར་བཏང་སྟེ། དུས་གཏན་བེད་སྤྱོད་ཐུབ་པར་འགན་སྲུང་བྱེད་དགོས་ཞེས་བསྟན།

གྲོས་ཚོགས་ལས་ད་དུང་དོན་དག་གཞན་དག་ལ་ཞིབ་འཇུག་བྱས།