མཚོ་སྔོན་ཞིང་ཆེན་མི་དམངས་སྲིད་གཞུང་དྲ་བ།
ཀྲུང་གུང་ཀྲུང་དབྱང་ཆབ་སྲིད་ཅུའུ་ཡིས་ཟླ7པའི་ཚེས30ཉིན་གྲོས་ཚོགས་བསྡུས་ཏེ། ད་ལོའི་ཟླ10པར་པེ་ཅིང་དུ་ཀྲུང་གོ་གུང་ཁྲན་ཏང་ཀྲུང་དབྱང་ཨུ་ཡོན་ལྷན་ཁང་སྐབས་ཉི་ཤུ་པའི་ཚང་འཛོམས་གྲོས་ཚོགས་ཐེངས་བཞི་པ་བསྡུ་རྒྱུའི་ཐག་བཅད། གྲོས་རིམ་གཙོ་བོ་ནི། ཀྲུང་གུང་ཀྲུང་དབྱང་ཆབ་སྲིད་ཅུའུ་ཡིས་ཀྲུང་དབྱང་ཨུ་ཡོན་ལྷན་ཁང་ལ་བྱ་བའི་སྙན་ཞུ་འབུལ་རྒྱུ་དང་། རྒྱལ་དམངས་དཔལ་འབྱོར་དང་སྤྱི་ཚོགས་འཕེལ་རྒྱས་ཀྱི་ལོ་ལྔའི་འཆར་འགོད་བཅོ་ལྔ་པའི་འཆར་གཞི་གཏན་འབེབས་བྱ་རྒྱུའི་སྐོར་གྱི་གྲོས་གཞིར་ཞིབ་འཇུག་བྱ་རྒྱུ་དེ་རེད། གྲོས་ཚོགས་ལས་མིག་སྔའི་དཔལ་འབྱོར་གྱི་གནས་བབ་ལ་དབྱེ་ཞིབ་དང་ཞིབ་འཇུག་བྱས་པ་དང་ལོ་སྨད་ཀྱི་དཔལ་འབྱོར་བྱ་བ་བཀོད་སྒྲིག་བྱས།
ཀྲུང་གུང་ཀྲུང་དབྱང་གི་སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་གྲོས་ཚོགས་ལ་འགོ་འཛིན་མཛད།
གྲོས་ཚོགས་ལས་བསྟན་དོན། “ལོ་ལྔའི་འཆར་འགོད་བཅོ་ལྔ་པའི”དུས་སྐབས་ནི་སྤྱི་ཚོགས་རིང་ལུགས་དེང་རབས་ཅན་གཞི་རྩའི་ཆ་ནས་མངོན་འགྱུར་བྱེད་པར་རྨང་གཞི་བརྟན་པོ་འདིང་བ་དང་། ཕྱོགས་ཡོངས་ནས་ཤུགས་འདོན་པའི་གནད་འགག་གི་དུས་སྐབས་ཤིག་ཡིན་ལ། རང་རྒྱལ་གྱི་འཕེལ་རྒྱས་ཁོར་ཡུག་གཏིང་ཟབ་ཅིང་རྙོག་འཛིང་ཆེ་བའི་འགྱུར་ལྡོག་ལ་འཕྲད་ཡོད་པ་དང་། འཐབ་ཇུས་ཀྱི་གོ་སྐབས་དང་ཉེན་ཁའི་འགྲན་སློང་མཉམ་དུ་གནས་པ་དང་ངེས་གཏན་མིན་པ་དང་སྔོན་དཔག་དཀའ་བའི་རྒྱུ་རྐྱེན་ཧ་ཅང་མང་། དུས་མཚུངས་སུ་རང་རྒྱལ་གྱི་དཔལ་འབྱོར་རྨང་གཞི་བརྟན་ཞིང་དགེ་མཚན་མང་ལ། མཉེན་ཤུགས་ཆེ་ཞིང་སྦས་ཤུགས་ཆེ་བས། ཡུན་རིང་བཟང་ཕྱོགས་སུ་འཕེལ་བའི་འདེགས་སྐྱོར་ཆ་རྐྱེན་དང་གཞི་རྩའི་འཕེལ་ཕྱོགས་ལ་འགྱུར་བ་བྱུང་མེད། ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་ལམ་ལུགས་ཀྱི་དགེ་མཚན་དང་གཞི་ཁྱོན་ཆེ་བའི་ཚོང་རའི་དགེ་མཚན། ཐོན་ལས་མ་ལག་ཆ་ཚང་གི་དགེ་མཚན། ཕུན་སུམ་ཚོགས་པའི་ཤེས་ལྡན་མི་སྣའི་ཐོན་ཁུངས་ཀྱི་དགེ་མཚན་བཅས་སྔར་ལས་མངོན་གསལ་ཡིན། འཐབ་ཇུས་ཀྱི་ངེས་ཤུགས་རྒྱུན་འཁྱོངས་དང་རྒྱལ་ཁ་ཐོབ་ངེས་པའི་ཡིད་ཆེས་ཇེ་མཐོ། འགྱུར་ལྡོག་ཤེས་པ་དང་འགྱུར་ལྡོག་ལ་ཁ་གཏད་འཇལ་བ། འགྱུར་ལྡོག་ལ་རེ་བ་བཅས་བྱས་ཏེ། སྟོབས་ཤུགས་གཅིག་བསྡུས་ཀྱིས་རང་ཉིད་ཀྱི་བྱ་བ་ལེགས་པར་བསྒྲུབ་པ་དང་། རྒྱལ་སྤྱིའི་འགྲན་རྩོད་དྲག་པོའི་ཁྲོད་འཐབ་ཇུས་ཀྱི་རང་དབང་བརྩོན་ལེན་བྱས་ནས། ཀྲུང་གོའི་ལུགས་ཀྱི་དེང་རབས་ཅན་གྱི་ཁྱོན་ཡོངས་དང་འབྲེལ་བ་འཐབ་ཇུས་ཀྱི་ལས་འགན་ལ་ཐོད་བརྒལ་གལ་ཆེན་ལོན་པར་སྐུལ་འདེད་གཏོང་དགོས།
གྲོས་ཚོགས་ལས་ནན་གྱིས་བསྟན་དོན། ལོ་ལྔའི་འཆར་འགོད་བཅོ་ལྔ་པའི་རིང་དཔལ་འབྱོར་སྤྱི་ཚོགས་འཕེལ་རྒྱས་གཏོང་བར་མར་ཁེ་སི་ལེ་ཉིན་རིང་ལུགས་དང་། མའོ་ཙེ་ཏུང་གི་དགོངས་པ། ཏེང་ཞའོ་ཕིན་གྱི་རིགས་པའི་གཞུང་ལུགས། “མཚོན་བྱེད་གསུམ”གྱི་དགོངས་པ་གལ་ཆེན། ཚན་རིག་དང་མཐུན་པའི་འཕེལ་རྒྱས་ལྟ་བ་བཅས་རྒྱུན་འཁྱོངས་དང་། ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་དགོངས་པ་ཕྱོགས་ཡོངས་ནས་ལག་ལེན་མཐར་ཕྱིན་བྱེད་པ། ཁྱོན་ཡོངས་ནས་སྤྱི་ཚོགས་རིང་ལུགས་དེང་རབས་ཅན་གྱི་རྒྱལ་ཁབ་སྟོབས་ལྡན་སྐྲུན་པ་དང་བརྒྱ་ལོ་གཉིས་པའི་འབད་འཐབ་དམིགས་འབེན་མངོན་འགྱུར་བྱེད་པར་གཞིགས་ནས། ཀྲུང་གོའི་ལུགས་ཀྱི་དེང་རབས་ཅན་ལ་བརྟེན་ནས་ཀྲུང་ཧྭ་མི་རིགས་རླབས་ཆེན་བསྐྱར་དར་གྱི་ལྟེ་བའི་ལས་འགན་ལ་ཕྱོགས་ཡོངས་ནས་སྐུལ་འདེད་གཏོང་བ་དང་། འཕེལ་རྒྱས་ཀྱི་འདུ་ཤེས་གསར་པ་ཆ་ཚང་ཞིང་གནད་ལ་འཁེལ་བའི་སྒོ་ནས་ལག་ལེན་མཐར་ཕྱིན་བྱེད་པ་དང་བརྟན་ཐོག་ཡར་འཕེལ་གྱི་བྱ་བའི་དགོངས་གཞི་རྒྱུན་འཁྱོངས་བྱས་ནས། “ཕྱོགས་ལྔ་གཞི་གཅིག”གི་སྤྱིའི་བཀོད་སྒྲིག་ལ་གཅིག་གྱུར་འཆར་འགོད་དང་སྐུལ་འདེད་གཏོང་བ། “ཕྱོགས་ཡོངས་བཞིའི”འཐབ་ཇུས་བཀོད་སྒྲིག་ལ་མཐུན་སྦྱོར་ངང་སྐུལ་འདེད་གཏོང་བ་དང་། འཕེལ་རྒྱས་ཀྱི་རྣམ་པ་གསར་པ་གང་མགྱོགས་སྒོས་བསྐྲུན་པ། རྒྱལ་སྤྱི་རྒྱལ་ནང་གི་སྤྱི་ཡོངས་གཉིས་ལ་གཅིག་གྱུར་འཆར་འགོད་བྱེད་པ། འཕེལ་རྒྱས་དང་བདེ་འཇགས་ལ་གཅིག་གྱུར་འཆར་འགོད་བྱེད་པ། དཔལ་འབྱོར་སྤུས་ཚད་མཐོར་འདེགས་ནུས་ལྡན་དང་གྲངས་ཚད་འཕར་སྣོན་ལུགས་མཐུན་ཡོང་བར་སྐུལ་འདེད་གཏོང་བ། མིའི་ཁྱོན་ཡོངས་འཕེལ་རྒྱས་དང་དམངས་ཡོངས་ཐུན་མོང་ཕྱུག་འགྱུར་གྱི་གོམ་སྟབས་བརྟན་པོ་སྤོ་བར་སྐུལ་འདེད་བཏང་སྟེ། སྤྱི་ཚོགས་རིང་ལུགས་དེང་རབས་ཅན་གཞི་རྩའི་ཆ་ནས་མངོན་འགྱུར་འབྱུང་བར་ཐག་གཅོད་རང་བཞིན་གྱི་འཕེལ་རིམ་འབྱུང་བར་འགན་སྲུང་བྱ་དགོས།
གྲོས་ཚོགས་ལས། ད་ལོར་བློ་མཐུན་ཞི་ཅིན་ཕིང་སྲོག་ཤིང་ཡིན་པའི་ཏང་ཀྲུང་དབྱང་གི་འགོ་ཁྲིད་བརྟན་པོའི་འོག ས་གནས་སོ་སོ་དང་སྡེ་ཁག་སོ་སོས་དངོས་སྒྲུབ་དངོས་བརྩོན་དང་འགག་སྒྲོལ་དཀའ་སེལ་བྱས་ཏེ། སྔར་ལས་ཕན་ནུས་ལྡན་པའི་སྤྱི་ཁོག་སྲིད་ཇུས་གང་མགྱོགས་སྒོས་ལག་བསྟར་བྱས་པས། རང་རྒྱལ་གྱི་དཔལ་འབྱོར་འཁོར་སྐྱོད་བརྟན་ཐོག་ཡར་འཕེལ་བྱུང་ལ། སྤུས་ཚད་མཐོ་བའི་འཕེལ་རྒྱས་ལ་གྲུབ་འབྲས་གསར་པ་ཐོབ་ཡོད། དཔལ་འབྱོར་གཙོ་བོའི་དམིགས་ཚད་ལེགས་ཤིང་། སྤུས་གསར་ཐོན་སྐྱེད་ནུས་ཤུགས་འཕེལ་རྒྱས་ཆེན་པོ་བྱུང་། བཅོས་སྒྱུར་སྒོ་འབྱེད་བསྟུད་མར་གཏིང་ཇེ་ཟབ་ཏུ་སྤེལ་བ་དང་། ཁྱབ་ཁོངས་གཙོ་བོའི་ཉེན་ཁ་ནུས་ལྡན་གྱིས་འགོག་ཟོན་དང་སེལ་ཐབས་བྱས་ལ། དམངས་འཚོའི་མཐའ་སྐྱོང་འགན་སྲུང་སྔར་ལས་བཟང་བ་དང་། རང་རྒྱལ་གྱི་དཔལ་འབྱོར་ལ་གསོན་ཤུགས་ཆེན་པོ་དང་མཉེན་ཤུགས་ཆེན་པོ་མངོན་ཡོད་པར་འདོད།
གྲོས་ཚོགས་ལས་དེང་སྐབས་རང་རྒྱལ་གྱི་དཔལ་འབྱོར་འཁོར་སྐྱོད་སྔར་བཞིན་ཉེན་ཁ་དང་འགྲན་སློང་མི་ཉུང་བར་འཕྲད་ཡོད་པས། གནས་བབ་དམ་འཛིན་བྱས་ནས། ཉེན་ཚོར་འདུ་ཤེས་ཇེ་དྲག་དང་ཚད་མཐའི་བསམ་གཞིགས་རྒྱུན་འཁྱོངས། འཕེལ་རྒྱས་ཀྱི་གོ་སྐབས་དང་སྦས་ཤུགས། དགེ་མཚན་བཅས་བེད་སྤྱོད་ལེགས་པོ་བྱས་ཏེ། དཔལ་འབྱོར་བསྐྱར་འཕར་གྱི་འཕེལ་ཕྱོགས་བཟང་པོ་སྲ་བརྟན་དང་རྒྱ་སྐྱེད་གཏོང་དགོས་ཞེས་བསྟན།
གྲོས་ཚོགས་ལས་ནན་གྱིས་བསྟན་དོན། ལོ་སྨད་ཀྱི་དཔལ་འབྱོར་བྱ་བ་ལེགས་པར་བསྒྲུབ་ན། ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་ཀྱི་དགོངས་པ་མཛུབ་སྟོན་དུ་འཛིན་རྒྱུ་རྒྱུན་འཁྱོངས་དང་། བརྟན་ཐོག་ཡར་འཕེལ་གྱི་བྱ་བའི་དགོངས་གཞི་རྒྱུན་འཁྱོངས། འཕེལ་རྒྱས་ཀྱི་འདུ་ཤེས་གསར་པ་ཆ་ཚང་ཞིང་ཡང་དག་པའི་སྒོ་ནས་ལག་ལེན་མཐར་ཕྱིན་བྱེད་པ། འཕེལ་རྒྱས་ཀྱི་རྣམ་པ་གསར་པ་གང་མགྱོགས་སྒོས་བསྐྲུན་པ། སྲིད་ཇུས་ཀྱི་རྒྱུན་མཐུད་རང་བཞིན་དང་བརྟན་པོའི་རང་བཞིན་རྒྱུན་འཁྱོངས་བྱེད་པ། སྐབས་བསྟུན་རང་བཞིན་དང་སྔོན་དཔག་རང་བཞིན་ཇེ་ཆེར་བཏང་སྟེ། ལས་ཞུགས་བརྟན་པོ་དང་ཁེ་ལས་བརྟན་པོ། ཚོང་ར་བརྟན་པོ། སྔོན་དཔག་བརྟན་པོ་བཅས་ཡོང་བར་ཤུགས་བསྣན་ནས། རྒྱལ་སྤྱི་དང་རྒྱལ་ནང་འཁོར་རྒྱུག་ལ་འབད་པས་སྐུལ་འདེད་གཏོང་བ་དང་ལོ་ཧྲིལ་པོའི་དཔལ་འབྱོར་སྤྱི་ཚོགས་འཕེལ་རྒྱས་ཀྱི་དམིགས་འབེན་ལས་འགན་ལེགས་འགྲུབ་བྱས་ནས། “ལོ་ལྔའི་འཆར་འགོད་བཅུ་བཞི་པ”རྒྱལ་ཁའི་ངང་མཇུག་བསྒྲིལ་བར་བྱེད་དགོས།
གྲོས་ཚོགས་ལས་བསྟན་དོན། སྤྱི་ཁོག་སྲིད་ཇུས་ཀྱིས་བསྟུད་མར་ཤུགས་སྣོན་དང་དུས་བསྟུན་ཤུགས་སྣོན་བྱ་དགོས། སྔར་ལས་ཞིབ་ཚགས་དང་སྔར་ལས་དགེ་མཚན་ལྡན་པའི་ནོར་སྲིད་སྲིད་ཇུས་དང་ཁོད་ཡངས་པའི་དངུལ་ལོར་སྲིད་ཇུས་དོན་འཁྱོལ་བྱས་ནས། སྲིད་ཇུས་ཀྱི་ཕན་ནུས་འདོན་སྤེལ་གང་ལེགས་བྱ་དགོས། སྲིད་གཞུང་གི་བུན་འཛིན་འགྲེམ་སྤེལ་དང་བེད་སྤྱོད་ཇེ་མགྱོགས་སུ་བཏང་ནས། དངུལ་སྤྱོད་ལས་ཆོད་ཇེ་མཐོར་གཏོང་དགོས། གཞི་རིམ་གྱི“འགན་སྲུང་གསུམ”གྱི་ཚད་མཐའ་བརྟན་པོར་བསྲུང་དགོས། དངུལ་ལོར་སྲིད་ཇུས་ཀྱིས་འཁོར་རྒྱུག་རང་བཞིན་འདང་ངེས་ཡོད་པ་སྲུང་འཛིན་བྱས་ཏེ། སྤྱི་ཚོགས་ཀྱི་ཕྱོགས་བསྡུས་དངུལ་བསྲེས་མ་རྩ་མར་ཆག་པར་ཡར་སྐུལ་གཏོང་དགོས། གྲུབ་ཚུལ་རང་བཞིན་གྱི་དངུལ་ལོར་སྲིད་ཇུས་བྱེད་ཐབས་སོ་སོ་ལེགས་པར་སྤྱད་དེ། ཚན་རྩལ་གསར་གཏོད་དང་འཛད་སྤྱོད་ཇེ་མཐོ། ཁེ་ལས་ཆུང་གྲས་དང་ཕྱི་འཚོང་བརྟན་པོ་ཡོང་བ་སོགས་ལ་རྒྱབ་སྐྱོར་བྱེད་ཤུགས་ཆེ་རུ་གཏོང་དགོས། དཔལ་འབྱོར་ཞིང་ཆེན་ཆེ་གྲས་ཀྱིས་འགན་གཙོ་བོ་འཁུར་བའི་ནུས་པ་འདོན་པར་རྒྱབ་སྐྱོར་བྱ་དགོས། སྤྱི་ཁོག་སྲིད་ཇུས་ཀྱི་འཁྱེར་ཕྱོགས་གཅིག་གྱུར་རང་བཞིན་ཇེ་མཐོར་གཏོང་དགོས།
གྲོས་ཚོགས་ལས་ནང་མཁོའི་སྦས་ཤུགས་ཕན་ནུས་ལྡན་པའི་ངང་གློད་དགོས། འཛད་སྤྱོད་ཇེ་མཐོར་གཏོང་བའི་ཆེད་དོན་བྱེད་སྒོ་ལག་བསྟར་གཏིང་ཟབ་བྱས་ཏེ། ཚོང་ཟོག་འཛད་སྤྱོད་རྒྱ་ཆེ་རུ་གཏོང་བ་དང་ཆབས་ཅིག་ཏུ། འཛད་སྤྱོད་ཀྱི་འཕར་གནས་གསར་པ་བསྐྱེད་པར་ཞབས་འདེགས་ཞུ་དགོས། དམངས་འཚོ་འགན་སྲུང་དང་ལེགས་སྒྱུར་ཁྲོད་འཛད་སྤྱོད་ཀྱི་དགོས་མཁོ་རྒྱ་སྐྱེད་གཏོང་བ་དང་། སྤུས་ཚད་མཐོ་བའི་སྒོ་ནས“གལ་ཆེན་གཉིས”ཀྱི་འཛུགས་སྐྲུན་ལ་སྐུལ་འདེད་གཏོང་བ། དམངས་ཁྲོད་ཀྱི་མ་དངུལ་གཏོང་བའི་གསོན་ཤུགས་འཕེལ་བར་བྱེད་པ། ཕན་ནུས་ལྡན་པའི་སྒོ་ནས་མ་དངུལ་གཏོང་རྒྱ་ཆེ་རུ་བསྐྱེད་དགོས་པ་ནན་གྱིས་བསྟན།
གྲོས་ཚོགས་ལས་བློ་བརྟན་འགྱུར་མེད་ངང་བཅོས་སྒྱུར་གཏིང་ཟབ་ཏུ་གཏོང་དགོས། ཚན་རྩལ་གསར་གཏོད་ལ་བརྟེན་ནས་སྤུས་གསར་ཐོན་སྐྱེད་ནུས་ཤུགས་འཕེལ་རྒྱས་སུ་གཏོང་བར་སྐུལ་ཁྲིད་བྱེད་རྒྱུ་རྒྱུན་འཁྱོངས་དང་། རྒྱལ་སྤྱིའི་འགྲན་རྩོད་ནུས་པ་ལྡན་པའི་གསར་དར་ཐོན་ལས་གཙོ་བོ་གང་མགྱོགས་སྒོས་གསོ་སྐྱོང་བྱེད་པ། ཚན་རྩལ་གསར་གཏོད་དང་ཐོན་ལས་གསར་གཏོད་མཉམ་འདྲེས་གཏིང་ཟབ་ཡོང་བར་སྐུལ་འདེད་གཏོང་དགོས། རྒྱལ་ཡོངས་ཀྱི་གཅིག་གྱུར་ཁྲོམ་ར་ཆེན་པོ་འཛུགས་སྐྲུན་རྒྱ་སྐྱེད་དང་གཏིང་ཟབ་ཏུ་གཏོང་བ་དང་། ཁྲོམ་རའི་འགྲན་རྩོད་སྒྲིག་ལམ་མུ་མཐུད་ཇེ་ལེགས་སུ་ཡོང་བར་སྐུལ་འདེད་གཏོང་དགོས། ཁྲིམས་སྲོལ་ལྟར་ཁེ་ལས་ཀྱི་གོ་རིམ་མེད་པའི་འགྲན་རྩོད་བཅོས་སྐྱོང་བྱ་དགོས། གཙོ་གནད་ལས་རིགས་ཀྱི་ཐོན་ནུས་བཅོས་སྐྱོང་བྱེད་པ་དང་། ས་གནས་ཀྱི་ཚོང་འགུག་དངུལ་འདྲེན་གྱི་སྤྱོད་སྟངས་ཚད་ལྡན་དུ་གཏོང་བ། “གཡོ་འགུལ་མེད་པ་གཉིས”རྒྱུན་འཁྱོངས་བྱས་ནས་གཉེར་སྐྱོང་བྱེད་པོ་སྣ་ཚོགས་ཀྱི་གསོན་ཤུགས་རྒྱས་སུ་འཇུག་དགོས་པ་བསྟན།
གྲོས་ཚོགས་ལས་ཆུ་ཚད་མཐོ་བའི་ཕྱི་ཕྱོགས་སྒོ་འབྱེད་ཀྱི་རྒྱ་ཆེ་རུ་བཏང་ནས། ཕྱི་འཚོང་ཕྱི་དངུལ་གྱི་གཞི་རྩའི་ཆ་ཇེ་བརྟན་དུ་གཏོང་དགོས། བརྡབ་གསིག་ཐེབས་ཤུགས་ཅུང་ཆེ་བའི་ཕྱི་འཚོང་ཁེ་ལས་ལ་རོགས་རམ་དང་། དངུལ་བསྲེས་ཀྱི་རྒྱབ་སྐྱོར་བྱེད་ཤུགས་ཆེ་རུ་བཏང་ནས། ཕྱི་ནང་ཉོ་འཚོང་གཞི་གཅིག་ཅན་དུ་འཕེལ་རྒྱས་ཡོང་བར་ཡར་སྐུལ་གཏོང་དགོས། ཕྱིར་གཏོང་ཁྲལ་སློག་སྲིད་ཇུས་ལེགས་སྒྱུར་དང་། རང་མོས་ཉོ་འཚོང་ཚོད་ལྟ་ཁུལ་སོགས་སྒོ་འབྱེད་ལས་སྟེགས་ཆུ་ཚད་མཐོ་བའི་འཛུགས་སྐྲུན་བྱ་དགོས་པ་ནན་གྱིས་བསྟན།
གྲོས་ཚོགས་ལས་གཙོ་གནད་ཁྱབ་ཁོངས་ཀྱི་ཉེན་ཁ་མུ་མཐུད་དུ་འགོག་ཟོན་བྱེད་པ་དང་སེལ་དགོས། ཀྲུང་དབྱང་གི་གྲོང་ཁྱེར་བྱ་བའི་ཚོགས་འདུའི་དགོངས་དོན་དོན་འཁྱོལ་ལེགས་པོ་བྱས་ནས། སྤུས་ཚད་མཐོ་བའི་སྒོ་ནས་གྲོང་ཁྱེར་གསར་སྒྱུར་བྱ་དགོས། ས་གནས་སྲིད་གཞུང་གི་བུ་ལོན་ཉེན་ཁ་འབད་པས་སེལ་བ་དང་། མངོན་མེད་བུ་ལོན་གསར་དུ་འཕར་བའི་རིགས་ནན་འགོག་བྱེད་པ། ས་གནས་ཀྱི་མ་དངུལ་མཉམ་བསྲེས་ལས་སྟེགས་གཙང་འབུད་ཕན་ནུས་ལྡན་ལ་གོ་རིམ་ཡོད་པའི་ངང་སྤེལ་བ། རྒྱལ་ནང་གི་མ་རྩའི་ཁྲོམ་རའི་འགུག་ཤུགས་དང་དཀྱེལ་ཡངས་རང་བཞིན་ཆེ་རུ་གཏོང་བ་དང་། མ་རྩའི་ཁྲོམ་ར་བརྟན་ཐོག་ལེགས་ཕྱོགས་སུ་འཕེལ་བའི་རྣམ་པ་ཇེ་བརྟན་དུ་གཏོང་དགོས་པ་བསྟན།
གྲོས་ཚོགས་ལས་དམངས་འཚོ་འགན་སྲུང་གི་བྱ་བ་ཏན་ཏིག་ངང་ལེགས་པར་བསྒྲུབ་དགོས། ལས་ཞུགས་སྔོན་འགྲོའི་སྲིད་ཇུས་ཀྱི་ཕྱོགས་སྟོན་མངོན་གསལ་ཡོང་བར་བྱས་ནས། མཐོ་རིམ་སློབ་གྲྭའི་མཐར་ཕྱིན་སློབ་མ་དང་། དམག་ཁོངས་ནས་བུད་པའི་དམག་མི། ཞིང་པ་ཞོར་ལས་པ་སོགས་གཙོ་གནད་ཚོགས་སྤྱིའི་ལས་ཞུགས་ལ་ཡར་སྐུལ་གཏོང་དགོས། དམངས་ཕན་སྲིད་ཇུས་དོན་འཁྱོལ་ལེགས་པོ་བྱས་ནས། རིམ་དབྱེ་རིགས་དགར་གྱི་སྤྱི་ཚོགས་རོགས་སྐྱོབ་མ་ལག་འཐུས་ཚང་དུ་གཏོང་དགོས། “ཞིང་གསུམ”གྱི་རྨང་གཞི་ཇེ་བརྟན་དུ་གཏོང་བ་དང་། འབྲུ་རིགས་དང་ཞིང་ལས་ཐོན་རྫས་གཙོ་བོའི་རིན་གོང་ལུགས་མཐུན་གྱི་ཚད་གཞི་འཛིན་པར་སྐུལ་འདེད་གཏོང་དགོས། དབུལ་ཐར་མཁྲེགས་གཏོར་གྱི་གྲུབ་འབྲས་སྲ་བརྟན་དང་རྒྱ་བསྐྱེད་དེ། གཞི་ཁྱོན་རང་བཞིན་གྱི་ཡང་བསྐྱར་དབུལ་ཕོངས་སུ་འགྱུར་བ་སྔོན་འགོག་བྱ་དགོས། མི་དམངས་མང་ཚོགས་ཀྱི་ཚེ་སྲོག་བདེ་འཇགས་རྟག་ཏུ་དང་པོར་བཞག་ནས། བདེ་འཇགས་ཐོན་སྐྱེད་དང་ཟས་རིགས་བདེ་འཇགས་ལྟ་སྐུལ་དོ་དམ་བྱེད་ཤུགས་ཆེ་རུ་གཏོང་དགོས། ནུས་ཤུགས་ཡོད་རྒུས་ཞོད་འགོག་འཕྲལ་བསྟུན་རྒུད་སྐྱོབ་བྱ་བ་ལེགས་པར་སྒྲུབ་སྟེ། དབྱར་དུས་ཀྱི་ནུས་ཁུངས་དང་གློག་འདོན་ལ་འགན་སྲུང་བྱ་དགོས་ལ། ལོ་ལྔའི་འཆར་འགོད་བཅོ་ལྔ་པའི་འཆར་གཞི་སྒྲིག་བཟོའི་བྱ་བ་ལེགས་པར་བསྒྲུབ་དགོས་པ་ནན་གྱིས་བསྟན།
གྲོས་ཚོགས་ལས་ཕྱོགས་སོ་སོའི་བརྩོན་སེམས་ལེགས་པར་བསྐྱེད་དགོས། འགོ་ཁྲིད་ལས་བྱེད་པར་ཡང་དག་པའི་སྲིད་འབྲས་ལྟ་བ་ཆགས་པ་དང་ལག་ཏུ་བསྟར་ནས། འཕེལ་རྒྱས་ཀྱི་འདུ་ཤེས་གསར་པ་ལྟར་དཔལ་འབྱོར་གྱི་བྱ་བ་ལེགས་པར་བསྒྲུབ་དགོས། ཁེ་ལས་པ་སྤོབས་པ་ཆེན་པོས་མདུན་དུ་བསྐྱོད་དེ། སྤུས་ལེགས་ཐོན་རྫས་དང་ཞབས་ཞུར་བརྟེན་ནས་ཁྲོམ་རའི་འགྲན་རྩོད་ཀྱི་རང་འགུལ་ཐོབ་པར་བྱ་དགོས། ས་ཁུལ་སོ་སོ་དང་སྡེ་ཁག་སོ་སོས་ཏང་ཀྲུང་དབྱང་གི་ཐབས་ཇུས་བཀོད་སྒྲིག་ཕྱོགས་ཡོངས་ནས་དོན་འཁྱོལ་བྱས་ཏེ། ཀྲུང་དབྱང་གི་གཏན་འབེབས་དོན་ཚན་བརྒྱད་ཀྱི་དགོངས་དོན་ལག་བསྟར་གཏིང་ཟབ་བྱེད་པའི་སློབ་སྦྱོང་སློབ་གསོའི་གྲུབ་འབྲས་བཟང་པོར་བརྟེན་ནས། སྤུས་ཚད་མཐོ་བའི་འཕེལ་རྒྱས་ལ་སྒུལ་ནུས་ཆེན་པོ་འདོན་སྤྲོད་བྱ་དགོས་པ་བསྟན།
གྲོས་ཚོགས་ལས་དོན་དག་གཞན་དག་ལའང་ཞིབ་འཇུག་བྱས།
