ཞི་ཅིན་ཕིང་གིས་འཛམ་གླིང་ན་གཞོན་ཞི་བདེའི་ཚོགས་ཆེན་ལ་འཕྲིན་ཡིག་སྤྲིངས།

ཟླ7པའི་ཚེས29ཉིན། རྒྱལ་ཁབ་ཀྱི་ཀྲུའུ་ཞི་ཞི་ཅིན་ཕིང་གིས་འཛམ་གླིང་ན་གཞོན་ཞི་བདེའི་ཚོགས་ཆེན་ལ་འཕྲིན་ཡིག་སྤྲིངས།

ཞི་ཅིན་ཕིང་གིས་བསྟན་དོན། ད་ལོ་ནི་ཀྲུང་གོ་མི་དམངས་ཀྱི་འཇར་འགོག་དམག་འཁྲུག་དང་འཛམ་གླིང་གི་ཧྥ་ཞི་སིར་ངོ་རྒོལ་བྱས་པའི་དམག་འཁྲུག་ལ་རྒྱལ་ཁ་བླངས་ཏེ་ལོ80འཁོར་བའི་ལོ་ཡིན། ལོ་ངོ80ཡི་སྔོན་དུ། ཀྲུང་གོ་མི་དམངས་ཀྱིས་འཛམ་གླིང་མི་དམངས་དང་མཉམ་དུ། དཀའ་སྤྱད་ཚད་མེད་ཀྱི་ཁྲག་བཏོན་དམར་འཛིང་བྱས་པ་བརྒྱུད། ཧྥ་ཞི་སི་རིང་ལུགས་རྩ་བ་ནས་ཕམ་པར་རྒྱབ་སྟེ། ཐོབ་དཀའ་བའི་ཞི་བདེའི་རྒྱལ་ཁ་བླངས།

ཞི་ཅིན་ཕིང་གིས་ནན་གྱིས་བསྟན་དོན། ཞི་བདེའི་མ་འོངས་པ་ནི་ན་གཞོན་ཚོར་བཅོལ་ཡོད། རྒྱལ་ཁབ་སོ་སོའི་ན་གཞོན་གྲོགས་པོ་རྣམས་ཀྱིས་ཐེངས་འདིའི་ཚོགས་ཆེན་གོ་སྐབས་སུ་བཟུང་སྟེ། བསམ་བློ་བརྗེ་རེས་དང་རྒྱུས་ལོན་གཏིང་ཟབ། མཛའ་མཐུན་དམ་ཟབ་བཅས་བྱས་ནས། མཉམ་དུ་ཞི་བདེའི་འདུ་ཤེས་དར་སྤེལ་གཏོང་མཁན་དང་ཞི་བདེའི་འཕེལ་རྒྱས་ཀྱི་འགུལ་སྐྱོད་པ་བྱས་ཏེ། མིའི་རིགས་ཀྱི་ལས་སྐལ་གཅིག་མཐུན་ཚོགས་པ་འཛུགས་རྒྱུར་སྐུལ་འདེད་གཏོང་བར་བློ་གྲོས་དང་སྟོབས་ཤུགས་འབུལ་དགོས།

འཛམ་གླིང་ན་གཞོན་ཞི་བདེའི་ཚོགས་ཆེན་ཉིན་དེར་པེ་ཅིང་དུ་འཚོགས་པ་དང། “མཉམ་དུ་ཞི་བདེའི་ཆེད་དུ”ཅེས་པ་བརྗོད་དོན་དུ་བྱས་ལ། ཀྲུང་གོ་མི་དམངས་ཕྱི་ཕྱོགས་མཛའ་མཐུན་ལྷན་ཚོགས་དང་ཀྲུང་ཧྭ་རྒྱལ་ཡོངས་ན་གཞོན་མཉམ་འབྲེལ་ལྷན་ཚོགས་ཀྱིས་མཉམ་དུ་བསྒྲུབས་པ་རེད།