2025ལོའི་གཙང་པོའི་འགོ་ཁུངས་ཀྱི་ཕྱོགས་བསྡུས་ཚན་རིག་རྟོག་ཞིབ་འགོ་ཚུགས་པ།

རང་རེའི་དྲ་བའི་འཕྲིན། ཟླ7ཚེས27ཉིན། གསར་འགོད་པས་ཆུ་བེད་པུའུ་འབྲི་ཆུ་ཆུ་བེད་ཨུ་ལྷན་འབྲི་ཆུ་ཚན་རིག་ཁང་ནས་ཤེས་རྟོགས་བྱུང་བར།2025ལོའི་གཙང་པོའི་འགོ་ཁུངས་ཀྱི་ཕྱོགས་བསྡུས་ཚན་རིག་རྟོག་ཞིབ་རུ་ཁག་ཟླ་7ཚེས་27ཉིན་ཧུའུ་པེའི་ཝུའུ་ཧན་ནས་ལམ་ལ་ཆས་ཏེ། ཉིན་དེའི་ཕྱི་དྲོར་མཚོ་སྔོན་ཞིང་ཆེན་མངའ་ཁོངས་ཀྱི་འབྲི་ཆུའི་འགོ་ཁུངས་ནས་གྲུ་བའི་མདའ་ཆུའི་བར་ལ་འབྱོར་ནས། རིག་ཚན་མང་པོའི་མ་དཔེ་སྔོག་འདོན་ལྟ་ཞིབ་ཚད་ལེན་བྱས་ཏེ་2025ལོའི་གཙང་པོའི་འགོ་ཁུངས་ཀྱི་ཕྱོགས་བསྡུས་ཚན་རིག་རྟོག་ཞིབ་དངོས་སུ་འགོ་ཚུགས།

ཚེས27ཉིན་གྱི་ཕྱི་དྲོར་ཚན་རིག་རྟོག་ཞིབ་རུ་མིས་གྲུ་བའི་མདའ་ཆུའི་དུམ་བུར་འཁྱེར་བདེ་བའི་དཔྱད་གྲངས་མང་པོའི་ཚོད་ལྟའི་ཡོ་བྱད་སྤྱད་དེ་གཙང་པོའི་ཆུའི་སྤུས་ཚད་དང་གློག་འདྲེན་ཚད་སོགས་དཔྱད་གྲངས་ལ་ཚད་འཇལ་བྱས་པ་དང་འབྲེལ། ཆུའི་མ་དཔེ་དང་བྱེ་འདམ་གྱི་མ་དཔེ་བླངས་ནས་དམིགས་བསལ་གྱི་སྣོད་ཆས་ནང་བླུགས། ཚན་རིག་རྟོག་ཞིབ་ཀྱི་ལམ་ཐག་མཇུག་བསྒྲིལ་རྗེས་མ་དཔེ་ཚོད་ལྟ་ཁང་དུ་བསྐྱལ་ནས་ཞིབ་ཕྲའི་དབྱེ་ཞིབ་བྱ་རྒྱུ་རེད།

“ང་ཚོས་ཆུ་ངོགས་ཀྱི་ཆུ་མི་ཟབ་ས་རུ་ལྟོ་གས་ཉ་དང་། རྔ་ཆུང་ས་མཐོའི་འདམ་ཉ་སོགས་ས་མཐོར་དམིགས་བསལ་དུ་ཡོད་པའི་ཉ་རིགས་རྙེད་པ་དང་།ལ་ལ་གཞི་ནས་མངལ་ནས་ཐོན་མ་ཐག་ཡིན་པས་ཧའོ་སྨི་ཁ་ཤས་ལས་མེད”། ཡུལ་དངོས་ཀྱི་ཚན་རིག་རྟོག་ཞིབ་མི་སྣས་ཉ་རིགས་ལ་དལ་ཆུའི་ཁུལ་དུ་རང་ཉིད་ཀྱི་སྒོ་ང་གཏོང་ས་ཡོད་པ་དང་ཆུའི་སྣོད་བཅུད་ཁོར་ཡུག་གིས་ཉ་རིགས་སྐྱེ་འཚར་གྱི་དགོས་མཁོ་སྐོང་ཐུབ་པ་མཚོན་ཡོད་ཅེས་བཤད་པ་རེད།

སླད་ཕྱིན་གྱི་ཚན་རིག་རྟོག་ཞིབ་ཀྱི་ལམ་བུའི་ཐོག་འབྲི་ཆུ་ཚན་རིག་ཁང་གིས་བཙུགས་པའི་རིག་ཚན་མང་པོའི་ཚན་རིག་རྟོག་ཞིབ་རུ་ཁག་གིས་ལོ་རིམ་བྱུང་གི་ཚན་རིག་རྟོག་ཞིབ་ཀྱི་རྨང་གཞིའི་ཐོག་འབྲི་ཆུའི་ཆུ་འགོ་ཐའོ་ཐའོ་གཙང་པོ་དང་རྫ་ཆུའི་ཆུ་འགོ་བཅས་ལ་དམིགས་ནས་ཚན་རིག་རྟོག་ཞིབ་བྱ་རྒྱུ་དང་།རྟོག་ཞིབ་ནང་དོན་ནང་ཆུ་དཔྱད་དང་།བྱེ་འདམ།ཆུ་ལམ་གྱི་ཆུ་བོའི་གནས་ཚུལ།ཆུའི་སྣོད་བཅུད།ཆུའི་ཐོན་ཁུངས།ས་ཆུ་ཤོར་བ།འཁྱགས་རོམ་སོགས་གཙང་གསུམ་འགོ་ཁུངས་ཀྱི་སྐྱེ་ཁམས་ཁོར་ཡུག་གནས་ཚུལ་ལ་ཕྱོགས་ཡོངས་ནས་རྒྱུས་ལོན་བྱ་རྒྱུ་རེད།

གཙང་གསུམ་འགོ་ཁུངས་ཁུལ་ནི་གནམ་གཤིས་འགྱུར་ལྡོག་ཧ་ཅང་ཆེ་བ་དང་སྣོད་བཅུད་ཁོར་ཡུག་ཉམས་ཞན་ཁུལ་ཞིག་ཡིན་པ་དང་མཚོ་བོད་ས་མཐོའི་སྣོད་བཅུད་མ་ལག་གི་གྲུབ་ཆ་གལ་ཆེན་ཞིག་རེད།

ཤེས་རྟོགས་བྱུང་བར་གཞིགས་ན། གཙང་པོའི་འགོ་ཁུངས་ཀྱི་ཚན་རིག་རྟོག་ཞིབ་དེ་2012ལོ་ནས་བཟུང་ལོ་ལྟར་སྤེལ་འགོ་ཚུགས་པ་དང་འབྲི་ཆུའི་ཆུ་འགོར་སྤེལ་ཐེངས་མང་ཤོས་དང་ཁྱབ་རྒྱ་ཆེ་ཤོས་ཀྱི་ཚན་ཞིབ་བྱེད་སྒོའི་གྲས་ཤིག་ཡིན་པ་དང་།གཙང་པོའི་འགོ་ཁུངས་སྲུང་སྐྱོང་གི་ཚན་ཞིབ་འདེགས་སྐྱོར་ལས་སྟེགས་གལ་ཆེན་ཞིག་ཏུ་གྱུར་ནས་སྣོད་བཅུད་ཁོར་ཡུག་གི་གྲངས་གཞི་དང་དཔྱད་གཞི་རྩ་ཆེན་འབོར་ཆེན་ལོ་རེ་བཞིན་གསོག་འཇོག་བྱས་ཡོད།

“གཙང་གསུམ་ཆུ་འགོར་ཚན་རིག་དང་མཐུན་པའི་རྟོག་ཞིབ་མུ་མཐུད་བྱས་ནས་སྣོད་བཅུད་ཁོར་ཡུག་འགྱུར་ལྡོག་རབ་དང་རིམ་པ་བྱུང་བའི་རྨང་གཞིའི་གྲངས་གཞི་ཐོབ་པ་དེས་འབྲི་ཆུའི་འགོ་ཁུངས་ཀྱི་སྣོད་བཅུད་ཁོར་ཡུག་གི་གནས་བབ་སྔར་བས་ཁོང་དུ་ཆུད་པ་དང་གཙང་གསུམ་འགོ་ཁུངས་ཀྱི‘ཀྲུང་ཧྭའི་ཆུ་མཛོད’ལ་སྲུང་སྐྱོང་ཡག་པོ་བྱ་རྒྱུར་ཕན་པ་ཡོད་ལ་ང་ཚོས་གཙང་གསུམ་འགོ་ཁུངས་ས་ཁུལ་དུ་གཙང་པོ་སྲུང་སྐྱོང་དང་བཅོས་སྐྱོང་གི་ལག་ལེན་ལ་ཁྱོན་ཡོངས་ནས་སྐུལ་འདེད་གཏོང་རྒྱུ་ཡིན”ཅེས་འབྲི་ཆུ་ཚན་རིག་ཁང་གི་ཡོན་ཀྲང་གཞོན་པ་ཡའོ་ཧྲི་མིང་བཤད།