ལུའོ་ཏུང་ཁྲོན་གྱིས་ཟི་ལིང་གྲོང་ཁྱེར་དུ་ཁེ་ལས་གཙོ་བོའི་འཁོར་སྐྱོད་གནས་ཚུལ་ལ་རྟོག་ཞིབ་བྱས།

ཟླ7པའི་ཚེས25ཉིན། ཞིང་ཆེན་ཏང་ཨུའི་ཧྲུའུ་ཅི་གཞོན་པ། ཧྲིན་ཀྲང་ལུའོ་ཏུང་ཁྲོན་གྱིས་ཟི་ལིང་གྲོང་ཁྱེར་དུ་ཁེ་ལས་གཙོ་བོའི་འཁོར་སྐྱོད་གནས་ཚུལ་ལ་རྟོག་ཞིབ་བྱེད་སྐབས་ནན་གྱིས་བསྟན་དོན།  སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་མཚོ་སྔོན་ལ་གཟིགས་ཞིབ་གནང་སྐབས་ཀྱི་གསུང་བཤད་གལ་ཆེན་གྱི་དགོངས་དོན་ལག་བསྟར་གཏིང་ཟབ་བྱེད་པ་དང་།    ཏང་ཀྲུང་དབྱང་གི་ཐབས་ཇུས་བཀོད་སྒྲིག་དང་ཞིང་ཆེན་ཏང་ཨུའི་བྱ་བའི་བླང་བྱ་མཐའ་གཅིག་ཏུ་དངོས་འབེབ་བྱེད་པ།    ཡིད་ཆེས་བརྟན་པོ་དང་དངོས་སྒྲུབ་སྔོན་བརྩོན་བྱས་ཏེ།    ནུས་ཤུགས་ཡོད་རྒུས་འཕེལ་རྒྱས་ཀྱི་འགུལ་ནུས་གསར་པ་དང་ཁྱད་སྟོབས་གསར་པ་བསྐྲུན་ནས།  ཐོན་ལས་ཕྲེང་འབྲེལ་དང་མཁོ་སྤྲོད་ཕྲེང་འབྲེལ་མཉམ་འདྲེས་མཉམ་འཕེལ་ལ་སྐུལ་འདེད་གཏོང་བ།    ནུས་ཤུགས་ཡོད་རྒུས་བཟོ་ལས་བརྟན་བརླིང་སྒོས་འཕར་བར་སྐུལ་འདེད་གཏོང་བ།    དཔལ་འབྱོར་བརྟན་བརླིང་ཁྲོད་ཇེ་ལེགས་སུ་འགྲོ་བའི་རྣམ་པ་མུ་མཐུད་སྲ་བརྟན་དུ་གཏོང་དགོས།

ཀྲུང་ཧྥུའུ་ཧྲིན་ཡུན་ཐཱན་ཚི་སྣ་ཟི་ལིང་ཚད་ཡོད་ཀུང་ཟི་རུ། ལུའོ་ཏུང་ཁྲོན་སྔ་རྗེས་སུ་ཐཱན་ཚི་སྣ་འགྲེམས་ཁང་དང་ཐཱན་འགྱུར་འཁོར་ཁང་དུ་བསྐྱོད་དེ། ཁེ་ལས་ཀྱི་འཕེལ་རྒྱས་བརྒྱུད་རིམ་དང་ལག་རྩལ་གསར་གཏོད། ཐཱན་ཚི་སྣའི་རྒྱུ་ཆ་བཀོལ་སྤྱོད་སོགས་ཀྱི་གནས་ཚུལ་ལ་རྒྱུས་ལོན་ཞིབ་ཕྲ་བྱས་ཏེ། ཁེ་ལས་ཀྱིས་འཛམ་གླིང་གི་ཚན་རྩལ་འཕེལ་རྒྱས་ཀྱི་མདུན་གྲལ་ལ་དམིགས་པ་དང་། ཤེས་བྱའི་ཐོན་དབང་སྲུང་སྐྱོབ་དང་བཀོལ་སྤྱོད་ལ་ཤུགས་སྣོན་པ། རིམ་པ་མཐོ་བའི་ཚན་རིག་ཞིབ་འཇུག་གི་འཇོན་མི་གསོ་སྐྱོང་བྱེད་ཤུགས་ཆེ་རུ་གཏོང་བ།  འཛམ་གླིང་གི་སྔོན་ཐོན་གྱི་ཐཱན་ཚི་སྣའི་བཟོ་གྲྭ་ཧུར་ཐག་གིས་སྐྲུན་རྒྱུར་སྐུལ་ལྕག་བྱས། མཚོ་སྔོན་དགུ་ཚིགས་ནུས་རྒྱུ་གསར་པའི་རྒྱུ་ཆའི་ཚད་ཡོད་ཀུང་ཟི་རུ། ལུའོ་ཏུང་ཁྲོན་འཁོར་ཁང་དུ་ཡོང་ནས་ཁེ་ལས་ཀྱི་ཐོན་སྐྱེད་ཚོང་གཉེར་དང་འཁོར་སྐྱོད་དོ་དམ་སོགས་ཀྱི་གནས་ཚུལ་ལ་རྒྱུས་ལོན་ཞིབ་ཕྲ་བྱས་པ་དང་།  ཁེ་ལས་ཀྱིས་སྲིད་ཇུས་དང་ཁྲོམ་རའི་གོ་སྐབས་དམ་འཛིན་བྱས་ནས། ཁྲོམ་རའི་གཙོ་ཁྲིད་དབང་ཆ་སྔར་ལས་ཁོང་དུ་ཆུད་པར་སྐུལ་ལྕག་བྱས་ཏེ། ཧ་ཡང་ཐོན་ལས་འདེགས་སྐྱོར་ཐོན་ལས་སུ་བསྐྲུན་ནས་ཁེ་ལས་ཀྱི་ལྟེ་བའི་འགྲན་རྩོད་ནུས་པ་ཧུར་ཐག་གིས་མཐོ་རུ་གཏོང་དགོས། མཚོ་སྔོན་ལན་སོན་ཚན་རྩལ་ཚད་ཡོད་ཀུང་ཟི་རུ། ལུའོ་ཏུང་ཁྲོན་གྱིས་གཞི་གྲངས་ཟུར་མཆན་ཐོན་ལས་འཕེལ་རྒྱས་གནས་ཚུལ་ལ་ནན་ཏན་གྱིས་ཉན་རྗེས། མིག་སྔར། ཞིང་ཆེན་ཡོངས་ཀྱིས་ནུས་ཤུགས་ཡོད་རྒུས་ལྗང་མདོག་རྩིས་ནུས་མཐུན་སྦྱོར་འཕེལ་རྒྱས་དཔེ་སྟོན་ཁུལ་བསྐྲུན་བཞིན་ཡོད་ལ། ཁེ་ལས་ཀྱིས་ཚད་ལྡན་ཅན་དང་གཞི་ཁྱོན་ཅན་གྱི་མ་ལག་འཛུགས་སྐྲུན་ལ་མགྱོགས་མྱུར་སྒོས་སྐུལ་འདེད་གཏོང་བ་དང་། ཁྲོམ་རའི་བར་སྟོང་རྒྱ་ཆེར་གཏོང་བ། སྔོན་ལ་ལག་བསྟར་དང་སྔོན་ལ་ཚོད་ལྟ་བྱེད་པའི་ཐོན་ལས་འཕེལ་རྒྱས་ཀྱི་ཉམས་མྱོང་བཟང་པོ་དང་བྱེད་སྟངས་བཟང་པོ་འཚོལ་ཞིབ་བྱས་ནས། གཞི་གྲངས་ཟུར་མཆན་ཐོན་ལས་དང་ལྗང་མདོག་རྩིས་ནུས། མི་ཐབས་རིག་ནུས་མཐུན་སྦྱོར་འཕེལ་རྒྱས་ལ་སྐུལ་འདེད་གཏོང་བའི་རེ་བ་ཡོད་ཅེས་བསྟན།

རྟོག་ཞིབ་བྱེད་སྐབས་ལུའོ་ཏུང་ཁྲོན་གྱིས་ནན་གྱིས་བསྟན་དོན། སྤུས་གསར་ཐོན་སྐྱེད་ནུས་ཤུགས་འཕེལ་རྒྱས་ཇེ་མགྱོགས་སུ་གཏོང་རྒྱུར་དམིགས་ནས། མཐོ་རིམ་ཅན་དང་རིག་ནུས་ཅན། ལྗང་མདོག་ཅན་བཅས་ཀྱི་འཕེལ་རྒྱས་ཁ་ཕྱོགས་གཏན་འཁེལ་བྱས་ཏེ། བཟོ་ལས་ཅན་གསར་པར་མུ་མཐུད་དུ་སྐུལ་འདེད་གཏོང་བ་དང་། ཞིབ་འཇུག་གསར་སྤེལ་གྱི་ཐད་མུ་མཐུད་དུ་ཤུགས་བསྣན་ནས། རང་བདག་གསར་སྐྲུན་ནུས་པ་ཆེ་རུ་གཏོང་བ་དང་། ཚན་རྩལ་གསར་གཏོད་དང་ཐོན་ལས་གསར་གཏོད་གཏིང་ཟབ་པའི་མཉམ་འདྲེས་ལ་སྐུལ་འདེད་གཏོང་བ་བཅས་བྱེད་དགོས། བཟོ་ལས་དཔལ་འབྱོར་འཕེལ་རྒྱས་ལ་ཚོད་འཛིན་བྱེད་པའི་འགག་གནས་དང་དཀའ་གནད་སེལ་ནས། སྟོད་རྒྱུད་དང་སྨད་རྒྱུད་ཀྱི་ཁེ་ལས་ལ་ཁྲིད་སྟོན་ཧུར་ཐག་བྱས་ཏེ་ཐོན་ལས་ཁྱབ་ཚུལ་སྔར་ལས་ཆེ་བའི་ཐོན་ལས་ཀྱི་འགྲན་རྩོད་ནུས་པ་འཛུགས་དགོས། ཁྲོམ་ར་ཅན་དང་ཁྲིམས་སྐྱོང་ཅན། རྒྱལ་སྤྱི་ཅན་བཅས་ཀྱི་ཚོང་གཉེར་ཁོར་ཡུག་རྩེ་གྲ་མུ་མཐུད་དུ་བསྐྲུན་ནས། སྤུས་ཚད་མཐོ་བའི་སྲིད་ཇུས་འདོན་སྤྲོད་དང་།  ལས་ཕྱོད་ཆེ་བའི་རྒྱུ་རྐྱེན་གཙོ་བོ་བཀོད་སྒྲིག རྒྱུ་སྤུས་མཐོ་བའི་ཞབས་ཞུའི་འགན་སྲུང་བཅས་འཐུས་ཚང་དུ་བཏང་ནས། ཁེ་ལས་ལ་རོགས་རམ་བྱས་ཏེ་དཀའ་ངལ་སེལ་བ་དང་། མ་རྩ་ཉུང་གཏོང་དང་ཕན་འབྲས་ཐོན་པ། སེམས་བདེ་ངང་འཕེལ་རྒྱས་བཅས་བྱ་དགོས།  བདེ་འཇགས་ཐོན་སྐྱེད་ཀྱི་གྲུབ་ཆ་གཙོ་བོའི་འགན་འཁྲི་ཕྱོགས་ཡོངས་ནས་ཇེ་དམ་དུ་གཏོང་བ་དང་།  བདེ་འཇགས་ཐོན་སྐྱེད་ཀྱི་ཞན་ཆ་ཞིབ་བཤེར་དང་ཉེན་ཁ་སེལ་བའི་བྱ་བ་ཏན་ཏིག་གིས་ལེགས་པར་བསྒྲུབ་པ།  ཉེན་ཁ་དང་ཆུ་མགོ་དོ་དམ་ལ་ཤུགས་སྣོན་པ། བདེ་འཇགས་དང་ཐོན་སྐྱེད་ཀྱི་གནས་བབ་རྒྱུན་མཐུད་བརྟན་པོ་ཡོང་བར་ཁག་ཐེག་བྱེད་དགོས།