ལིས་ཆང་གིས་རྒྱལ་སྲིད་སྤྱི་ཁྱབ་ཁང་གི་བཀའ་རྒྱར་མཚན་རྟགས་བཀོད་དེ《སྡོད་ཁང་བོགས་གཏོང་སྲོལ་ཡིག》ཁྱབ་བསྒྲགས་བྱས།

 ཉེ་ཆར། རྒྱལ་སྲིད་སྤྱི་ཁྱབ་ཁང་གི་ཙུང་ལི་ལིས་ཆང་གིས་རྒྱལ་སྲིད་སྤྱི་ཁྱབ་ཁང་གི་བཀའ་རྒྱར་མཚན་རྟགས་བཀོད་དེ《སྡོད་ཁང་བོགས་གཏོང་སྲོལ་ཡིག》ཁྱབ་བསྒྲགས་བྱས་ཤིང་།　 2025ལོའི་ཟླ9པའི་ཚེས15ཉིན་ནས་བཟུང་ལག་བསྟར་བྱ་རྒྱུ་རེད།

《སྲོལ་ཡིག》ལ་བསྡོམས་པས་ལེའུ་བདུན་དང་དོན་ཚན་ང་བཅུ་ཡོད་ལ། གཙོ་བོ་གཤམ་གསལ་གྱི་ནང་དོན་གཏན་འབེབས་བྱས་ཡོད། གཅིག་ནི་སྤྱིའི་བླང་བྱ་གཏན་འཁེལ་བྱས་ཡོད་དེ།　 སྡོད་ཁང་བོགས་གཏོང་ཁྲོམ་ར་འཕེལ་རྒྱས་སུ་གཏོང་བར་ཁྲོམ་རའི་གཙོ་ཁྲིད་དང་སྲིད་གཞུང་གི་ཁྲིད་སྟོན་ཟུང་འབྲེལ་བྱ་རྒྱུ་རྒྱུན་འཁྱོངས་བྱེད་པ་དང་། ཐབས་ལམ་མང་པོར་བརྟེན་ནས་བོགས་གཏོང་སྡོད་ཁང་མཁོ་སྤྲོད་བྱེད་ཤུགས་ཆེ་རུ་བཏང་ནས།　 ཁྲོམ་ར་ཅན་དང་ཆེད་ལས་ཅན་གྱི་སྡོད་ཁང་བོགས་གཏོང་ཁེ་ལས་གསོ་སྐྱོང་བྱ་དགོས། གཉིས་ནི་བོགས་མར་གཏོང་ལེན་གྱི་བྱེད་སྒོ་ཚད་ལྡན་དུ་གཏོང་དགོས་པ་སྟེ། བོགས་མར་གཏོང་རྒྱུར་སྡོད་ཁང་དེ་བཟོ་སྐྲུན་དང་མེ་ཟོན་སྔོན་འགོག་སོགས་ཐད་ཀྱི་བཅའ་ཁྲིམས་དང་། ཁྲིམས་སྲོལ། སྒྲིག་སྲོལ། བཙན་ཤེད་རང་བཞིན་གྱི་ཚད་གཞི་བཅས་དང་བསྟུན་ནས། མི་ལུས་བདེ་འཇགས་དང་བདེ་ཐང་ལ་གནོད་པ་བཟོ་མི་རུང་བ་གཏན་འབེབས་བྱས།  གསུམ་ནི་སྡོད་ཁང་བོགས་གཏོང་ཁེ་ལས་ཀྱི་བྱ་སྤྱོད་ཚད་ལྡན་དུ་གཏོང་དགོས་པ་སྟེ། སྡོད་ཁང་བོགས་གཏོང་ཁེ་ལས་ཀྱིས་ཁང་པའི་འབྱུང་ཁུངས་ཀྱི་ཆ་འཕྲིན་བདེན་པ་དང་། ཡང་དག་པ། ཆ་ཚང་བ་བཅས་ཁྱབ་བསྒྲགས་བྱ་དགོས་ལ། སྡོད་ཁང་བོགས་གཏོང་ཡིག་ཚགས་བཟོས་ནས། ནང་ཁུལ་གྱི་དོ་དམ་ལམ་ལུགས་འཐུས་ཚང་དུ་གཏོང་དགོས། བཞི་ནི་ཚོང་གཉེར་སྡེ་ཁག་གི་བྱ་སྤྱོད་ཚད་ལྡན་དུ་གཏོང་དགོས། ལྔ་ནི་ལྟ་སྐུལ་དོ་དམ་ལ་ཤུགས་སྣོན་དགོས། དྲུག་ནི་འགན་འཁྲི་བདའ་འདེད་ནན་མོ་བྱེད་དགོས་པ་བཅས་ཡིན།