ལུའོ་ཏུང་ཁྲོན་གྱིས་ཞིང་ཆེན་ཡོངས་ཀྱི་ཞོད་འགོག་བྱ་བར་ཞིབ་བཤེར་བཀོད་འདོམས་བྱས།

ཟླ7པའི་ཚེས19ཉིན། ཞིང་ཆེན་ཏང་ཨུའི་ཧྲུའུ་ཅི་གཞོན་པ། ཧྲིན་ཀྲང་ལུའོ་ཏུང་ཁྲོན་ཞིང་ཆེན་འཕྲལ་བསྟུན་བཀོད་འདོམས་ལྟེ་གནས་སུ་སོང་ནས། ཞིང་ཆེན་ཡོངས་ཀྱི་ཞོད་འགོག་བྱ་བར་ཞིབ་བཤེར་བཀོད་འདོམས་བྱས་པར་མ་ཟད་ལས་ཡུལ་དང་པོའི་ལས་རེས་ལས་སྲུང་མི་སྣར་འཚམས་འདྲི་བྱས། ཁོས་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་གནོད་འགོག་གནོད་སེལ་རྒུད་སྐྱོབ་སྐོར་གྱི་རྒྱས་བཤད་གལ་ཆེན་སློབ་སྦྱོང་དང་ལག་བསྟར་གཏིང་ཟབ་བྱེད་པ་དང་། ཞིང་ཆེན་ཏང་ཨུའི་བཀོད་སྒྲིག་བླང་བྱ་ཕྱོགས་ཡོངས་ནས་དོན་འཁྱོལ་བྱེད་པ།  མི་དམངས་བླ་ན་མེད་པ་དང་ཚེ་སྲོག་བླ་ན་མེད་པ་རྒྱུན་འཁྱོངས་བྱེད་པ།  ཟླ་བདུན་པའི་མཇུག་དང་ཟླ་བརྒྱད་པའི་འགོའི་ཞོད་འགོག་གི་འགག་རྩའི་དུས་རིམ་ལ་དམ་པོར་དམིགས་ནས། ཞོད་འགོག་གནོད་སེལ་གྱི་བྱ་བ་དམ་འཛིན་བྱེད་པ་དང་། སེམས་ཤུགས་གཅིག་སྒྲིལ་དང་དཀའ་སེལ་འགག་སྒྲོལ་བྱེད་པ། བློ་བརྟན་འགྱུར་མེད་སྒོས་གསལ་འདེབས་ཀྱི་རྐྱེན་སྲོལ་དོན་འཁྱོལ་བྱེད་པ། དྲག་ཆར་བབས་རྗེས་ཀྱི་བསྐྱར་བྱུང་གནོད་འཚེར་སྔོན་འགོག་ནན་མོ་བྱས་ཏེ། མང་ཚོགས་ཀྱི་གནས་སྤོ་ཉེན་གཡོལ་བྱ་བ་ལེགས་པོར་བསྒྲུབ་པར་སྐུལ་སློང་བྱེད་པ་དང་། ནུས་ཤུགས་ཡོད་རྒུས་ཞོད་འགོག་རྒུད་སྐྱོབ་ཀྱི་བྱ་བ་ལེགས་པོར་བསྒྲུབ་ནས། མི་དམངས་ཀྱི་ཚེ་སྲོག་དང་རྒྱུ་ནོར་བདེ་འཇགས་ལ་མཐའ་གཅིག་ཏུ་འགན་སྲུང་བྱེད་དགོས་པ་ནན་གྱིས་བསྟན།

ཞིང་ཆེན་འཕྲལ་བསྟུན་བཀོད་འདོམས་ལྟེ་གནས་ཀྱི་མཉམ་འབྲེལ་ལས་རེས་ལས་སྲུང་ཁང་དུ། ལུའོ་ཏུང་ཁྲོན་གནམ་གཤིས་དང་རང་བྱུང་ཐོན་ཁུངས། ཆུ་བེད། མེ་ཟོན་སྔོན་འགོག ཉེན་ཁའི་རྫས་འགྱུར་དངོས་རྫས། ས་ཡོམ་སོགས་སྡེ་ཁག་གི་མཉམ་འབྲེལ་ལས་རེས་ལས་སྲུང་ཁང་དུ་སོང་ནས། དུས་ཚོད་ཉེར་བཞིའི་རིང་ལ་ལས་རེས་ལས་སྲུང་བྱེད་པའི་ལས་བྱེད་མི་སྣར་བརྗེ་རེས་ཟབ་མོ་བྱས་ཤིང་། ཐེངས་འདིའི་ཆར་བབས་པའི་གནས་ཚུལ་དང་ཆུའི་གནས་ཚུལ། ཞོད་སྐྱོན་གྱི་གནས་ཚུལ་དང་ཉེ་དུས་ཀྱི་གནམ་གཤིས་སྔོན་བརྡའི་གནས་ཚུལ་བཅས་ལ་རྒྱུས་ལོན་ཞིབ་མོ་བྱས་པ་དང་། སེམས་ཁུར་ཆེན་པོས་ལས་རེས་མི་སྣའི་བྱ་བ་དང་འཚོ་བའི་གནས་ཚུལ་དྲིས་ཏེ། འབྲེལ་ཡོད་སྡེ་ཁག་གིས་ལས་རེས་མི་སྣའི་ཞབས་ཞུ་འགན་སྲུང་ལེགས་པོར་བསྒྲུབ་དགོས་པའི་མངགས་བཅོལ་བྱས། ཐེངས་འདིའི་ཆར་ཆུའི་འབྲེལ་ཡོད་གནས་ཚུལ་གྱི་སྙན་ཞུར་ཉན་རྗེས། ལུའོ་ཏུང་ཁྲོན་གྱི་གྲོས་མོལ་ཞིབ་གཅོད་ལ་སྔར་ལས་ཤུགས་སྣོན་པ་དང་། ཉམས་མྱོང་དང་བྱེད་ཐབས་བཟང་པོ་དུས་ཐོག་ཏུ་ཕྱོགས་སྡོམ་དང་གསེད་བཀྲོལ་བྱེད་པ། གནད་དོན་དང་མི་འདང་ས་འཚོལ་ཞིབ་ནན་མོ་བྱེད་པ། ལས་ཡུལ་དང་པོའི་སྟོབས་ཤུགས་ཀྱི་གྲ་སྒྲིག་དང་འཕྲལ་བསྟུན་དངོས་རྫས་ཀྱི་འགན་སྲུང་ལ་ཤུགས་བསྣན་ཏེ། བྱ་བའི་གདུབ་སིམ་རྣམ་པ་ཆགས་པར་བྱེད་པ་དང་། བྱ་བའི་བྱེད་ཐབས་སྣ་ཚོགས་མུ་མཐུད་དུ་ཞིབ་ཕྲར་བཟོས་ནས་དངོས་འབེབས་བྱེད་དགོས་པའི་བླང་བྱ་བཏོན།

དེའི་རྗེས། ལུའོ་ཏུང་ཁྲོན་གྱིས་ཞིང་ཆེན་འཕྲལ་བསྟུན་བཀོད་འདོམས་བརྙན་རིས་བཀོད་གཏོང་མ་ལག་བརྒྱུད་དེ། ཐེངས་འདིའི་དྲག་ཆར་འབབ་ཚད་ཆེ་བའི་ས་ཁུལ་གཙོ་བོའི་ལས་རེས་ལས་སྲུང་དང་དོགས་ཟོན་ཁ་གཏད་གཅོག་པའི་བྱ་བར་བཀོད་གཏོང་བྱས། ཁོས་བསྟན་དོན། ཐེངས་འདིའི་ཆར་ཆུ་འབབ་ཞོད་ཆེ་ཞིང་། རྒྱུན་མཐུད་དུས་ཡུན་རིང་བ་དང་། གཏད་རྒྱུག་རང་བཞིན་དྲག་ལ། ཤུགས་རྐྱེན་ཐེབས་པའི་ཁྱབ་ཁོངས་རྒྱ་ཆེ་བས། ཞིང་ཆེན་ཡོངས་ཀྱི་ཞོད་འགོག་གནས་བབ་རྙོག་འཛིང་ཆེ། ས་ཁུལ་སོ་སོ་དང་སྡེ་ཁག་སོ་སོས་ཚད་མཐའི་བསམ་བློ་དང་མཐར་ཐུག་བསམ་བློར་བརྟེན་ནས། དུས་དང་རྣམ་པ་ཀུན་ཏུ་སེམས་ཁུར་བྱེད་པའི་འགན་འཁྲིའི་འདུ་ཤེས་དང་ལས་འགན་འདུ་ཤེས་དེ་བྱ་བ་གང་ལ་འཕྲད་ཀྱང་གདེང་ཚོད་ཡོད་པའི་འགུལ་སྐྱོད་ནུས་པར་བསྒྱུར་བ་དང་། བྱ་བའི་གཏན་འཁེལ་རང་བཞིན་གྱིས་ཞོད་སྐྱོན་གནས་ཚུལ་གྱི་གཏན་འཁེལ་མིན་པའི་རང་བཞིན་ལ་ཁ་གཏད་བཅག་སྟེ། བདེ་འཇགས་དང་སྐྱོན་བྲལ་ངང་ཞོད་སྐྱོན་གནོད་འཚེ་ལས་གཡོལ་ཐུབ་པར་ཁག་ཐེག་བྱེད་དགོས།

ལུའོ་ཏུང་ཁྲོན་གྱིས་ནན་གྱིས་བསྟན་དོན། ཞོད་དུས་ཀྱིས་ཆར་འབབ་པའི་གནས་ཚུལ་དང་། ཆུའི་གནས་ཚུལ། ནམ་ཟླའི་འགྱུར་ལྡོག་བཅས་ཀྱི་གནས་ཚུལ་ལ་ཚད་ལེན་བྱས་ཏེ། གནམ་གཤིས་གནོད་འཚེའི་སྔོན་བརྡ་དང་ཉེན་བརྡའི་གནད་འཁེལ་རང་བཞིན་ཇེ་དྲག་དང་ཁེབས་ཚད་ཇེ་ཆེར་གཏོང་བ་དང་། ཞིང་ཆེན་དང་གྲོང་ཁྱེར། ཁུལ། རྫོང་། ཆུའུ་བཅས་རིམ་པ་སོ་སོའི་འཕྲལ་བསྟུན་བཀོད་འདོམས་མ་ལག་གི་སྦྲེལ་མཐུད་བྱེད་ནུས་འདོན་སྤེལ་ལེགས་པོ་བྱས་ནས། ཇུས་ཆོད་ཚན་རིག་དང་མཐུན་ཞིང་། བཀའ་བཀོད་གེགས་མེད་ཡོང་བར་ཁག་ཐེག་བྱེད་དགོས། དྲག་ཆར་བབས་རྗེས་ཀྱི་བསྐྱར་སྐྱེ་གནོད་འཚེར་དོགས་ཟོན་བྱེད་པ་དེ་རྗེས་མཐུད་བྱ་བའི་གཙོ་གནད་ལ་བརྩི་བ་དང་། བསྟུད་མར་དྲག་ཆར་བབས་རྗེས་ཀྱི་འདམ་རྡོའི་ཆུ་རུད་དང་རི་ཉུལ་བ་སོགས་བསྐྱར་སྐྱེ་གནོད་འཚེ་སྔོན་འགོག་ནན་མོ་བྱས་ཏེ། ཉེན་ཁ་མཐོང་ཚེ་དུས་ལྟར་གནས་སྤོ་ཉེན་གཡོལ་བྱེད་པ་དང་། གནས་སྤོ་དགོས་པ་མྱུར་དུ་གནས་སྤོ་བ་དང་སྔ་མོ་ནས་གནས་སྤོ་ཐུབ་པར་བྱེད་དགོས། མཚོ་དང་མཚེའུ། ཆུ་མཛོད་དང་ཆུ་གློག་ས་ཚིགས། ལྗོངས་ཁུལ། གྲོང་ཁྱེར་ནང་ཁུལ་གྱི་ས་བབ་དམའ་ས་སོགས་ཁུལ་ཁོངས་གཙོ་བོར་དམིགས་ནས། ཞོད་འགོག་གྲ་སྒྲིག་ལ་ཞིབ་བཤེར་དང་མི་མངོན་པའི་ཉེན་ཁར་དག་ཐེར་བྱེད་པ་དང་། ཕྱོགས་ཡོངས་ནས་གནོད་འཚེར་དོགས་ཟོན་གང་ལེགས་བྱེད་དགོས། ཞོད་འགོག་གི་འགན་འཁྲི་དངོས་འབེབས་ནན་མོ་བྱེད་པ་དང་། མཉམ་འཛིན་སྤྱི་འདོམས་ཀྱི་མཉམ་ཤུགས་དྲག་པོ་ཆགས་པར་བྱེད་པ། གྲ་སྒྲིག་ལེགས་པོ་དང་སྔ་མོ་ནས་བཀོད་འདོམས་བྱས་ཏེ། ཞོད་འགོག་གནོད་སེལ་གྱི་བདེ་འཇགས་འགོག་ར་མཐའ་གཅིག་ཏུ་བརྟན་པོར་བསྐྲུན་དགོས།

ཀྲང་ཅིན་ཀང་འབྲེལ་ཡོད་བྱེད་སྒོར་ཞུགས།