མཚོ་སྔོན་ཞིང་ཆེན་མི་དམངས་སྲིད་གཞུང་དྲ་བ།
ཟླ7པའི་ཚེས19ཉིན། རྒྱལ་ཁབ་ཀྱི་ཀྲུའུ་ཞི་ཞི་ཅིན་ཕིང་དང་མོ་རི་ཐ་ནི་ཡའི་སྲིད་འཛིན་ཅ་ཚི་ཝ་ཉི་གཉིས་ཀྱིས་ཕན་ཚུན་ལ་རྟེན་འབྲེལ་ཞུ་བའི་གློག་འཕྲིན་བཏང་སྟེ། རྒྱལ་ཁབ་གཉིས་བར་ཕྱི་འབྲེལ་བཙུགས་ནས་ལོ60འཁོར་བར་རྟེན་འབྲེལ་ཞུས། ཞི་ཅིན་ཕིང་གིས་ཀྲུང་མོ་བར་ཕྱི་འབྲེལ་བཙུགས་པའི་ལོ60ཡི་རིང་། རྒྱལ་སྤྱིའི་གནས་བབ་ལ་འགྱུར་ལྡོག་ཇི་ལྟར་བྱུང་རུང་། ཕྱོགས་གཉིས་ཀྱིས་ཐོག་མཐའ་བར་གསུམ་དུ་ཕན་ཚུན་ལ་བརྩི་འཇོག་དང་འདྲ་མཉམ་གྱི་ལྟ་སྟངས་བཟུང་ཡོད་ཅིང་། འཕེལ་རྒྱས་སུ་འགྲོ་བཞིན་པའི་རྒྱལ་ཁབ་བར་སོ་སྲུང་རོགས་རེས་དང་གཉིས་ཕན་མཉམ་རྒྱལ་གྱི་མིག་དཔེ་བཞག་ཡོད་པར་བསྟན། ཉེ་བའི་ལོ་འགའི་རིང་། ཀྲུང་མོ་བར་གྱི་འབྲེལ་བ་བདེ་ཐང་བརྟན་བརླིང་ངང་འཕེལ་བ་དང་། ཆབ་སྲིད་ཡིད་རྟོན་ཉིན་རེ་བཞིན་སྲ་བརྟན་ཡིན་ལ། ཁྱབ་ཁོངས་སོ་སོའི་བརྗེ་རེས་མཉམ་ལས་ལ་ཕན་འབྲས་ཆེན་པོ་མངོན་ཡོད། ན་ནིང་ཀྲུང་ཧྥེ་མཉམ་ལས་གླེང་སྟེགས་པེ་ཅིང་རྩེ་ཚོགས་ཀྱི་སྐབས་སུ། ངས་སྲིད་འཛིན་ཅ་ཚི་ཝ་ཉི་དང་མཇལ་འཕྲད་གནང་ནས་ལྟ་བ་གཅིག་མཐུན་གལ་ཆེན་གྲུབ་སྟེ། ཀྲུང་མོ་འབྲེལ་བ་འཐབ་ཇུས་གྲོགས་པོའི་འབྲེལ་བར་སྤར་བ་མཉམ་དུ་བསྒྲགས་ཤིང་། རྒྱལ་ཁབ་གཉིས་ཀྱི་འབྲེལ་བའི་ལེའུ་གསར་པ་འགོ་བརྩམས། ངས་ཀྲུང་མོ་འབྲེལ་བའི་འཕེལ་རྒྱས་ལ་མཐོང་ཆེན་བྱེད་བཞིན་ཡོད། སྲིད་འཛིན་ཅ་ཚི་ཝ་ཉི་དང་མཉམ་དུ་འབད་པ་བྱེད་པ་དང་། ཕྱི་འབྲེལ་བཙུགས་ནས་ལོ60འཁོར་བ་འགོ་རྩོམ་ས་གསར་བ་བྱས་ཏེ། སྲོལ་རྒྱུན་གྱི་མཛའ་བརྩེ་རྒྱུན་འཛིན་དང་། ཕན་ཚུན་བར་གྱི་ཡིད་རྟོན་དང་མཉམ་ལས་ཟབ་སྤེལ། ཀྲུང་མོ་འཐབ་ཇུས་གྲོགས་པོའི་འབྲེལ་བའི་མ་འོངས་པ་གསར་བའི་འཕེལ་རྒྱས་མཉམ་དུ་བསྐྲུན་ཏེ། རྒྱལ་ཁབ་གཉིས་ཀྱི་མི་དམངས་ལ་སྔར་ལས་ལེགས་པའི་སྒོ་ནས་བདེ་སྐྱིད་བསྐྲུན་འདོད་ཡོད།
ཅ་ཚི་ཝ་ཉི་ཡིས། ལོ60ཡི་རིང་། མོ་རི་ཐ་ནི་ཡ་དང་ཀྲུང་གོ་གཉིས་བར་མཛའ་བརྩེ་ཟབ་མོ་ཆགས་ནས་རིམ་པ་སོ་སོ་རུ་མཉམ་ལས་དམ་ཟབ་བྱས་པ་དང་། རྒྱལ་སྤྱིའི་གནས་བབ་ཐད་ནས་ཕན་ཚུན་ལ་རྒྱབ་སྐྱོར་བྱས་པར་བསྟན། 2024ལོའི་ཟླ9པའི་ཀྲུང་ཧྥེ་མཉམ་ལས་གླེང་སྟེགས་པེ་ཅིང་རྩེ་ཚོགས་ཀྱི་སྐབས་སུ། ང་དང་ཀྲུའུ་ཞི་ཞི་ཅིན་ཕིང་གཉིས་ཀྱིས་མཉམ་དུ་མིག་དཔེར་གྱུར་ཡོད་པའི་མོ་ཀྲུང་འབྲེལ་བ་དེ་འཐབ་ཇུས་གྲོགས་པོའི་འབྲེལ་བའི་ཆུ་ཚད་དུ་སྤར་བ་བསྒྲགས། འདི་ནི་རྒྱལ་ཁབ་གཉིས་ཀྱི་འབྲེལ་བ་འཕེལ་རྒྱས་གཏིང་ཟབ་ཕྱིན་པའི་དངོས་དཔེ་ཡིན། འདིས་རྒྱལ་ཁབ་གཉིས་ཀྱི་མི་དམངས་ལ་བདེ་སྐྱིད་བསྐྲུན་ངེས་ཡིན་ལ། རྒྱལ་ཁབ་སོ་སོའི་མི་དམངས་ལ་བདེ་འཇགས་དང་དར་རྒྱས། བདེ་སྐྱིད་ལྡན་པར་ཕན་ཐོགས་པ་བསྟན།
ཉིན་དེར། རྒྱལ་སྲིད་སྤྱི་ཁྱབ་ཁང་གི་ཙུང་ལི་ལིས་ཆང་དང་མོ་རི་ཐ་ནི་ཡའི་ཙུང་ལི་ཨའེ་ཅ་དབྱི་གཉིས་ཀྱིས་ཕན་ཚུན་ལ་རྟེན་འབྲེལ་ཞུ་བའི་གློག་འཕྲིན་བཏང་། ལིས་ཆང་གིས་ཀྲུང་གོའི་ཕྱོགས་ཀྱིས་མོ་ཕྱོགས་དང་མཉམ་དུ་འབད་པ་བྱེད་པ་དང་། ཀྲུང་མོ་བར་ཕྱི་འབྲེལ་བཙུགས་ནས་ལོ60འཁོར་བ་གོ་སྐབས་སུ་བཟུང་སྟེ། ཀྲུའུ་ཞི་ཞི་ཅིན་ཕིང་དང་སྲིད་འཛིན་ཅ་ཚི་ཝ་ཉི་བར་གྲུབ་པའི་ལྟ་བ་གཅིག་མཐུན་གལ་ཆེན་དོན་འཁྱོལ་གང་ལེགས་དང་། ཀྲུང་མོ་འཐབ་ཇུས་གྲོགས་པོའི་འབྲེལ་བའི་ནང་དོན་རྒྱུན་མི་ཆད་པར་ཕུན་སུམ་ཇེ་ཚོགས་སུ་གཏོང་འདོད་ཡོད་པ་བསྟན།
ཨའེ་ཅ་དབྱི་ཡིས་མོ་ཕྱོགས་ཀྱིས་ཀྲུང་གོ་གཅིག་གི་རྩ་དོན་དམ་སྲུང་ནན་མོ་བྱེད་པ་དང་། སྲིད་འཛིན་ཅ་ཚི་ཝ་ཉི་དང་ཀྲུའུ་ཞི་ཞི་ཅིན་ཕིང་གི་མཁྱེན་རྒྱ་ཡངས་པའི་མཛུབ་ཁྲིད་འོག ཀྲུང་གོའི་ཕྱོགས་དང་མོ་ཀྲུང་གི་འཐབ་ཇུས་གྲོགས་པོའི་འབྲེལ་བར་ཤུགས་བསྣན་ནས། རྒྱལ་ཁབ་གཉིས་ཀྱི་འཕེལ་རྒྱས་ལ་ཞབས་འདེགས་ཞུ་འདོད་པ་བསྟན།
