མཚོ་སྔོན་གྱིས་ཟས་རིགས་སྦྱོར་རྟ་ཐོན་སྐྱེད་དང་བེད་སྤྱོད་ཚད་ལྡན་དུ་གཏོང་རྒྱུའི་གྲོས་འདོན་ཡི་གེ་ཁྱབ་སྒྲོག་བྱས།

ཉེ་ལམ། མཚོ་སྔོན་ཞིང་ཆེན་ཁྲོམ་ར་ལྟ་སྐུལ་དོ་དམ་ཅུའུ་ཡིས་ཞིང་ཆེན་ཡོངས་ཀྱི་ཟས་རིགས་ཐོན་སྐྱེད་གཉེར་སྐྱོང་པར་གྲོས་འགོ་བཏོན་ཡོད་ཅིང་། དེའི་དམིགས་ཡུལ་ནི་ཞིང་ཆེན་ཡོངས་ཀྱི་ཟས་རིགས་ཐོན་སྐྱེད་ཁེ་ལས་དང་ཟས་རིགས་ལས་ར་ཆུང་གྲས་ཀྱིས་ཟས་རིགས་སྦྱོར་རྟའི“ཇེ་ཡང་དུ་གཏོང་བ་གཉིས”ཀྱི་བྱེད་སྒོའི་ཁྲོད་འབད་པས་ཞུགས་རྒྱུར་སྐུལ་མ་གཏོང་བ་དང་ཁྲིད་སྟོན་བྱས་ཏེ། ཟས་རིགས་སྦྱོར་རྟ་གང་བྱུང་དུ་སྤྱོད་པའི་ཉེན་ཁ་སྔོན་འགོག་གང་ལེགས་བྱས་ནས། མི་དམངས་ཀྱི་ཟས་རིགས་བདེ་འཇགས་ལ་འགན་ལེན་ནན་མོ་བྱ་ཆེད་ཡིན།

གྲོས་འདོན་ཡི་གེ་ལས་ཟས་རིགས་ཐོན་སྐྱེད་བྱེད་མཁན་གྱིས་ཁྲིམས་ལྟར་ཐོན་སྐྱེད་གཉེར་སྐྱོང་གི་ཆོག་མཆན་བླངས་ནས། ཟས་རིགས་བདེ་འཇགས་ཚད་གཞིའི་ནང་གཏན་འབེབས་བྱས་པའི་རྒྱུ་ཆ་དང་བཟོ་རྩལ། དམིགས་འབེན་བཅས་གཞིར་བཟུང་ནས་གཟབ་ནན་སྒོས་ཐོན་སྐྱེད་བྱེད་དགོས། ཟས་རིགས་སྦྱོར་རྟའི་ཤོག་བྱང་དང་མཚོན་རྟགས་སྔར་ལས་ཚད་ལྡན་དུ་སྤྱོད་རྒྱུ་དང་། སྦྱོར་རྟའི་ཤོག་བྱང་དང་མཚོན་རྟགས་ཀྱི་སྟེང་དུ་ཐོན་རྫས་ཀྱི་གྲུབ་ཆ་དང་བེད་སྤྱོད་ཁྱབ་ཁོངས། བེད་སྤྱོད་ཚད་བཀག་བཅས་དོན་དངོས་ལྟར་འགོད་དགོས། 《ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་ཟས་རིགས་བདེ་འཇགས་སྐོར་གྱི་བཅའ་ཁྲིམས》སོགས་བཅའ་ཁྲིམས་ཁྲིམས་སྲོལ་དང་ཚད་གཞི་གཞིར་བཟུང་ནས་ཟས་རིགས་ཀྱི་སྦྱོར་རྟ་བེད་སྤྱོད་ནན་མོ་བྱེད་པ་དང་། ཁྱབ་ཁོངས་ལས་བརྒལ་བ་དང་ཚད་ལས་བརྒལ་ནས་ཟས་རིགས་ཀྱི་སྦྱོར་རྟ་སྤྱོད་པ་གཏན་འགོག་བྱེད་པ། ཟས་རིགས་ཀྱི་སྦྱོར་རྟ་ཕུད་པའི་རྫས་འགྱུར་དངོས་རྫས་དང་མིའི་ལུས་ཁམས་བདེ་ཐང་ལ་གནོད་འཚེ་ཐེབས་སྲིད་པའི་དངོས་རྫས་གཞན་དག་ཁ་སྣོན་པར་གཏན་འགོག་བཅས་བྱས་ཏེ། ཟས་རིགས་བདེ་འཇགས་ཀྱི་འགན་འཁྲི་གཙོ་བོ་ལྷོད་གཡེང་མེད་པར་ཏན་ཏིག་ངང་འཁུར་དགོས།

ཟས་རིགས་ཐོན་སྐྱེད་དང་གཉེར་སྐྱོང་པས་རྒྱུ་ཆ་དང་རམ་འདེགས་མཁོ་སྤྲོད་བྱེད་མཁན་ལ་ཞིབ་བཤེར་གཏན་འབེབས་བྱེད་པའི་ལམ་ལུགས་ནན་མོ་བཙུགས་ཏེ། མ་བཅོས་པ་དང་སྡེབ་ནས་ཐོན་པའི་རྒྱུ་ཆ་སོགས་ཟས་རིགས་སྦྱོར་རྟའི་འདུས་ཚད་ཅུང་དམའ་བའི་སྤུས་ལེགས་རྒྱུ་ཆ་དང་རམ་འདེགས་མཁོ་སྤྲོད་བྱེད་མཁན་ཚོང་པ་སྔོན་ལ་བདམས་ཏེ། ཟས་རིགས་སྦྱོར་རྟའི་རྒྱུ་ཆ་ཉོ་སྒྲུབ་ཀྱི་ཚད་ཉུང་དུ་གཏོང་གང་ཐུབ་བྱེད་དགོས། ཐོན་ལས་ཕྲེང་འབྲེལ་གྱི་གོང་འོག་ཁེ་ལས་མཐུན་སྦྱོར་མཉམ་འགུལ་ལ་ཤུགས་སྣོན་པ་དང་། ཐོན་རྫས་སྡེབ་ཁའི་ཇུས་འགོད་ཇེ་ལེགས་སུ་གཏོང་བ་དང་ཟུང་འབྲེལ་དམ་ཟབ་བྱས་ནས། མཁོ་འདོན་ཚོང་པ་དང་མཉམ་དུ་རྒྱུ་ཆ་དང་གཞོགས་འདེགས་རྒྱུ་ཆའི་སྤུས་ཚད་མཐོ་རུ་གཏོང་རྒྱུར་སྐུལ་འདེད་བཏང་སྟེ། འབྱུང་རྩ་ནས་ཟས་རིགས་སྦྱོར་རྟ་སྤྱོད་ཚད་དང་སྣ་ཁ་ཉུང་དུ་གཏོང་རྒྱུར་འགན་ལེན་བྱེད་དགོས། ཟས་རིགས་བདེ་འཇགས་ཀྱི་འགན་འཁུར་མི་སྣ་དང་པོའི་འོས་འགན་ནན་ཏན་སྒོས་ལག་བསྟར་བྱས་ཏེ། ཟས་རིགས་བདེ་འཇགས་ཀྱི“ཉིན་རེའི་དོ་དམ་ཚོད་འཛིན་དང་གཟའ་འཁོར་རེར་ཞིབ་བཤེར་བྱེད་པ། ཟླ་རེར་བཀོད་གཏོང་བྱེད་པ་བཅས་ཀྱི་ལས་ཀའི་ལམ་སྲོལ་ལག་བསྟར་ནན་མོ་བྱས་ནས། ཟས་རིགས་སྦྱོར་རྟའི་བེད་སྤྱོད་དོ་དམ་ལམ་ལུགས་འཛུགས་པ་དང་དེ་སྔར་ལས་འཐུས་ཚང་དུ་བཏང་སྟེ། ཟས་རིགས་སྦྱོར་རྟའི“ཆེད་ཚན་ལྔ”དོ་དམ་ལག་བསྟར་བྱས་ནས། ཆེད་གཉེར་ཚོང་ཁང་གི་ཉོ་སྒྲུབ་དང་ཆེད་གཉེར་མི་སྣའི་དོ་དམ། ཆེད་གཉེར་སྒམ་གྱི་ཉར་འཇོག ཆེད་གཉེར་ཡོ་བྱད་ཀྱི་འཇལ་ཚད། ཆེད་གཉེར་རྩིས་ཐོའི་ཐོ་འགོད་བཅས་ལ་དམ་འཛིན་བྱེད་དགོས། ཁྲིམས་མཐུན་ངང་སྤྱོད་པའི་ཟས་རིགས་སྦྱོར་རྟ་དེ་རྒྱུན་ལྡན་གྱི་གསོ་སྦྱོང་ནང་དོན་ནང་བཅུག་ནས། ཟས་རིགས་སྦྱོར་རྟ་སྤྱོད་པའི་སྒྲིག་སྲོལ་ཡང་དག་ཁོང་དུ་ཆུད་པར་བྱེད་པ་དང་། བེད་སྤྱོད་སྐབས་ཟས་རིགས་སྦྱོར་རྟ་ཆེད་སྤྱོད་ཡང་དག་ཅན་གྱི་ཚད་འཇལ་ཡོ་བྱད་སྒྲིག་སྦྱོར་བྱེད་དགོས།