མཚོ་སྔོན་ཞིང་ཆེན་གྱི་ཆེས་མཛེས་པའི་མཐོ་སྒང་གི་འབད་འཐབ་མཁན་ལས་ཆེས་མཛེས་པའི་མི་དམངས་འདུམ་སྒྲིག་པ་དངོས་སུ་ཁྱབ་བསྒྲགས་བྱས།

ཟླ7པའི་ཚེས18ཉིན། ཞིང་ཆེན་ཏང་ཨུའི་དྲིལ་སྒྲོག་པུའུ་དང་ཞིང་ཆེན་ཁྲིམས་འཛིན་ཐིན་གྱིས་གཙོ་སྒྲུབ་བྱས་པའི་མཚོ་སྔོན་ཞིང་ཆེན་གྱི་ཆེས་མཛེས་པའི་མཐོ་སྒང་གི་འབད་འཐབ་མཁན་ལས་ཆེས་མཛེས་པའི་མི་དམངས་འདུམ་སྒྲིག་པ་ཁྱབ་བསྒྲགས་བྱེད་པའི་མཛད་སྒོ་ཟི་ལིང་དུ་བསྡུས།

ཐེངས་འདིའི་བྱེད་སྒོའི་དམིགས་ཡུལ་ནི་སྔོན་ཐོན་དཔེ་མཚོན་གྱིས་དཔེ་སྟོན་སྣེ་ཁྲིད་ཀྱི་ནུས་པ་འདོན་སྤེལ་བྱས་ནས་རྒྱ་ཆེའི་མི་དམངས་འདུམ་སྒྲིག་པའི་བྱ་བའི་རང་འགུལ་རང་བཞིན་དང་ཧུར་བརྩོན་རང་བཞིན་སྐུལ་སློང་བྱེད་པ་དང་། ཞིང་ཆེན་ཡོངས་ཀྱི་མི་དམངས་འདུམ་སྒྲིག་བྱ་བའི་གསར་གཏོད་འཕེལ་རྒྱས་ལ་རྒྱུན་ཆད་མེད་པར་སྐུལ་འདེད་གཏོང་བ། མི་དམངས་མང་ཚོགས་ཀྱིས་མི་དམངས་འདུམ་སྒྲིག་ལ་བརྟེན་ནས་འགལ་བ་སེལ་བར་ཁྲིད་སྟོན་བྱེད་པ། སྤྱི་ཚོགས་བརྟན་ལྷིང་ཡོང་བའི་ཐབས་ལམ་དང་པོར་སྲུང་སྐྱོང་བྱ་རྒྱུ་དེ་ཡིན། བྱེད་སྒོའི་སྐབས་སུ། གཙོ་སྒྲུབ་ལས་ཁུངས་ཀྱིས་རྒྱ་ཁྱབ་ངང་སྐུལ་སློང་དང་། རྩ་འཛུགས་འོས་སྦྱོར། ཐོབ་ཐང་ཞིབ་བཤེར་སོགས་ཀྱི་གོ་རིམ་བརྒྱུད་ནས་མཚོ་སྔོན་ཞིང་ཆེན་གྱི་ཆེས་མཛེས་པའི་མི་དམངས་འདུམ་སྒྲིག་པ10འདེམས་སྒྲུག་བྱས།

ཡོངས་བསྒྲགས་བྱ་ཡུལ་དུ་བརྙན་ཐུང་གཏོང་བ་དང་། དཔེ་མཚོན་གྱོད་དཔེའི་འདྲི་གླེང་། མི་དམངས་འདུམ་སྒྲིག་རྣམ་པ་འཁྲབ་སྟོན། ཁྲིམས་སྐྱོང་རིག་རྩལ་ལེ་ཚན་སོགས་ཀྱི་རྣམ་པ་བརྒྱུད་དེ་ཕྱོགས་མང་པོ་ནས་མཚོ་སྔོན་མཐོ་སྒང་གི་རྒྱ་ཆེའི་མི་དམངས་འདུམ་སྒྲིག་པས་འགལ་རྩོད་རྩོད་གླེང་སེལ་བ་དང་ཁྱིམ་ཚང་ཁྲི་སྟོང་མང་པོའི་འཆམ་མཐུན་ལ་སྲུང་སྐྱོབ་བྱེད་པའི་མི་སེམས་འགུལ་བའི་གཏམ་རྒྱུད་གསལ་འགྲེལ་བྱས་ལ། མི་དམངས་འདུམ་སྒྲིག་གི་བརྒྱུད་རིམ་དང་འབྲེལ་ཡོད་ཤེས་བྱ་ཁྱབ་གདལ་བཏང་། མཛད་སྒོའི་རྗེས་སུ། གཙོ་སྒྲུབ་ལས་ཁུངས་ཀྱིས་ཞིང་ཆེན་མི་དམངས་འདུམ་སྒྲིག་མཐུན་ཚོགས་སོགས་འདུམ་སྒྲིག་རྩ་འཛུགས་སྒྲིག་འཛུགས་བྱས་ནས་དཀྱིལ་སྙིང་ཐང་ཆེན་དུ་མི་དམངས་འདུམ་སྒྲིག་གི་བྱེད་སྒོ་སྤེལ།

གཞི་རིམ་བཅོས་སྐྱོང་གི་མཛེས་རིས་ཁྲོད། མི་དམངས་འདུམ་སྒྲིག་པས་ཁྱིམ་ཚང་ཁྲི་སྟོང་མང་པོའི་འཆམ་མཐུན་དང་བདེ་འཇགས་ཐད་བྱ་བ་གང་མང་བསྒྲུབས་པ་དང་། མཚོ་སྔོན་མཐོ་སྒང་གི་འགལ་བ་དང་རྩོད་གཞི་སེལ་བའི་འཐབ་ཕྱོགས་དང་པོར་འབད་འཐབ་བྱས་ཤིང་། གཞིས་ཁུལ་དང་སྲང་ལམ། ཡུལ་ཚོ་དང་གྲོང་རྡལ། སྡེ་བ་དང་འབྲོག་ཁུལ་གྱི་རྩྭ་ཐང་དུ་ཟབ་ཞུགས་བྱས་ཏེ། བྱ་སྤྱོད་དངོས་ལ་བརྟེན་ནས་འདུམ་སྒྲིག་ནི་དམངས་ཀྱི་ཆེད་དུ་ཡིན་པའི་དུས་རབས་ཀྱི་ཉམས་འགྱུར་ལག་ལེན་བྱེད་བཞིན་ཡོད།