ཞི་ཅིན་ཕིང་གིས་ནི་ཀྲེ་རི་ཡའི་སྲིད་འཛིན་ཟུར་པ་པུའུ་ཧ་ལིས་སྐུ་གཤེགས་པར་ནི་ཀྲེ་རི་ཡའི་སྲིད་འཛིན་ཐིས་ནུའུ་པུའུ་ལ་གློག་འཕྲིན་བཏང་ནས་མྱ་ངན་ཞུས།

ཟླ7པའི་ཚེས16ཉིན། རྒྱལ་ཁབ་ཀྱི་ཀྲུའུ་ཞི་ཞི་ཅིན་ཕིང་གིས་ནི་ཀྲེ་རི་ཡའི་སྲིད་འཛིན་ཟུར་པ་པུའུ་ཧ་ལིས་སྐུ་གཤེགས་པར་ནི་ཀྲེ་རི་ཡའི་སྲིད་འཛིན་ཐིས་ནུའུ་པུའུ་ལ་གློག་འཕྲིན་བཏང་ནས། ཀྲུང་གོ་སྲིད་གཞུང་དང་ཀྲུང་གོ་མི་དམངས་ཀྱི་ཚབ་ཞུས་ཏེ་མྱ་ངན་ཞུས་པ་དང་། པུའུ་ཧ་ལིས་ཀྱི་གཉེན་ཉེ་དང་ནི་ཀྲེ་རི་ཡའི་སྲིད་གཞུང་དང་མི་དམངས་ལ་ལྷག་བསམ་ཟོལ་མེད་ཀྱི་སྒོ་ནས་འཚམས་འདྲི་ཞུས།

ཞི་ཅིན་ཕིང་གིས་སྲིད་འཛིན་ཟུར་པ་པུའུ་ཧ་ལིས་ནི་ནི་ཀྲེ་རི་ཡའི་འགོ་ཁྲིད་པ་གལ་ཆེན་ཞིག་ཡིན་ལ། ནི་ཀྲེ་རི་ཡའི་རྒྱལ་ཁབ་ཀྱི་གནས་ཚུལ་དང་མཐུན་པའི་འཕེལ་ལམ་འཚོལ་ཞིབ་བྱ་རྒྱུར་རྩེ་གཅིག་ཏུ་གཞོལ་ནས། རྒྱལ་ཁབ་ཀྱི་མཐུན་སྒྲིལ་ཡར་ཐོན་ལ་བྱས་རྗེས་ཆེན་པོ་བཞག་ཡོད་པར་བརྟེན། རྒྱལ་སྤྱིའི་སྤྱི་ཚོགས་སུ་སྙན་གྲགས་ཆེན་པོ་རྒྱས་ཡོད། ཁོ་རང་སྐུ་འཚོ་བཞུགས་གནང་སྐབས་ཀྲུང་གོར་མཛའ་མཐུན་བྱེད་རྒྱུ་རྒྱུན་འཁྱོངས་བྱས་ནས།　　 རྒྱལ་ཁབ་གཉིས་ཀྱི་མཛའ་བརྩེ་དང་ཀྲུང་ཧྥེའི་མཛའ་མཐུན་མཉམ་ལས་ལ་སྐུལ་འདེད་ཧུར་ཐག་བཏང་ཡོད། ཁོ་རང་སྐུ་གཤེགས་པ་ནི་ནི་ཀྲེ་རི་ཡའི་མི་དམངས་ཀྱི་གྱོང་གུད་ཆེན་པོ་ཡིན་ལ། ཀྲུང་གོ་མི་དམངས་ལ་གྲོགས་པོ་བཟང་པོ་ཞིག་མེད་པར་གྱུར་པའང་ཡིན། ཀྲུང་གོ་ཕྱོགས་ཀྱིས་རྒྱལ་ཁབ་གཉིས་ཀྱི་འབྲེལ་བའི་འཕེལ་རྒྱས་ལ་ཚད་མཐོའི་མཐོང་ཆེན་བྱས་ནས། ནེ་ཀྲེ་རི་ཡ་ཕྱོགས་དང་མཉམ་དུ། རྒྱལ་ཁབ་གཉིས་ཀྱི་ཁྱོན་ཡོངས་འཐབ་ཇུས་གྲོགས་པོའི་འབྲེལ་བ་མུ་མཐུད་དུ་འཕེལ་རྒྱས་འགྲོ་རྒྱུར་སྐུལ་འདེད་གཏོང་འདོད་ཡོད་ཅེས་གསུངས།