མཚོ་སྔོན་འབྲི་སྟོད་ཀྱི་ནོར་ཁུལ་དང་ལུག་བལ་ལྷ་སའི་ཁྲོམ་རར་བསྐྱོད་པ།

མཚོ་སྔོན་གསར་འགྱུར་དྲ་བའི་འཕྲིན། ཟླ2ཚེས27ཉིན།  ནོར་ཁུལ་དང་ལུག་བལ་གང་བླུགས་པའི་ཟོག་འདྲེན་རླངས་འཁོར་ཡུལ་ཤུལ་བོད་རིགས་རང་སྐྱོང་ཁུལ་འབྲི་སྟོད་རྫོང་ཞིང་གྲོང་དར་སྤེལ་ཐོན་ལས་ཁུལ་ནས་དལ་གྱིས་ལམ་ལ་ཆས་ཏེ།  བོད་རང་སྐྱོང་ལྗོངས་ལྷ་ས་གྲོང་ཁྱེར་ཕྱོགས་སུ་བསྐྱོད།

དུས་ཡུན་རིང་བོར་སྤུས་ལེགས་ཐོན་ཁུངས་ཀྱིས་ཁྲོམ་ར་རྙེད་མི་ཐུབ་པ་དང་། ཁྲོམ་རས་སྤུས་ལེགས་ཐོན་ཁུངས་རྙེད་མི་ཐུབ་པ་ནི་འབྲོག་ཁུལ་ཞིང་གྲོང་ཐོན་ལས་དར་སྤེལ་གྱི་བཀག་རྡོ་ལྟ་བུར་གྱུར་ཡོད། འབྲི་སྟོད་རྫོང་ལ་ནོར་ཁུ་དང་ལུག་བལ་ཐོན་ཁུངས་ཕུན་སུམ་ཚོགས་ན་ཡང་། བརྟན་འཇགས་ཡིན་པའི་བྲིན་འཚོང་གི་ཐབས་ལམ་ཞིག་རྙེད་པར་དཀའ་བའི་གནས་སུ་གྱུར་ཡོད།  བོད་ལྗོངས་ཀྱི་ཁྲོམ་རར་མཚོན་ན་སྤུས་ལེགས་པའི་ནོར་ཁུལ་དང་ལུག་བལ་ལས་བཟོས་པའི་ཐོན་རྫས་དགོས་མཁོ་ཧ་ཅང་ཆེ་ན་ཡང་ཡོང་ཁོངས་བརྟན་པོ་ཞིག་འཚོལ་རྙེད་དཀའ་བའི་གནས་སུ་གྱུར་ཡོད། ཐེངས་འདིའི་མཉམ་ལས་ནི་ཕྱོགས་གཉིས་ཀའི་བར་གྱི་ཆ་འཕྲིན་འགག་སྒོ་གཏོར་ཏེ་དགེ་མཚན་གསབ་རེས་ཀྱི་ལག་ལེན་གསོན་ཉམས་ཅན་ཞིག་མངོན་འགྱུར་བྱུང་།

ཉེ་བའི་ལོ་རིང་ལ།  འབྲི་སྟོད་རྫོང་གིས་ཡུལ་ཤུལ་ཁུལ་ལྷད་མེད་སྐྱེ་ལྡན་ཞིང་ཕྱུགས་ཐོན་རྫས་ཕྱིར་གཏོང་བྱེད་གནས་གཙོ་འདོན་ཁུལ་གྱི་ལོ་གསུམ་འགུལ་སྐྱོད་བླང་བྱ་ལག་ལེན་མཐར་ཕྱིན་བྱས་ཤིང་།  “འོ་མ་དང་། ཤ། བལ་ཁུལ”བཅས་ཁྱད་ལྡན་ཐོན་ལས་དམིགས་སུ་བཟུང་སྟེ།  སྲིད་གཞུང་གི་ལས་དོན་སྡེ་ཁག་བར་འཕྲིན་སྟེགས་བཙུགས་ཤིང་། ཞིང་འབྲོག་དང་འབྲེལ་བའི་ཁེ་ལས་གསར་འབྱེད་དང་ཁྲོམ་ར་རྒྱ་བསྐྱེད་བཏང་།  ཐེངས་འདིའི་འབྲི་སྟོད་ཀྲུང་ཧྥུ་ཏ(中孚达)ནོར་ཁུ་ཐོན་ལས་ཚད་ཡོད་ཀུང་སི་དང་བོད་ལྗོངས་ཧྲེང་ཞིན(圣信)བཟོ་ཚོང་ཚད་ཡོད་ཀུང་སི་གཉིས་ཀྱིས་སྒོར་འབུམ་བཞི་ལྷག་གིས་ནོར་ཁུལ་ནོར་རྩིད་ལུག་བལ་བཅས་ཏུན40མངག་ཉོ་བྱས་ཤིང་། དེ་ནི་འབྲི་སྟོད་རྫོང་གིས་ཁྲོམ་ར་རྒྱ་བསྐྱེད་བཏང་བར་ཐོབ་པའི་གྲུབ་འབྲས་ཆེན་པོ་ཞིག་རེད།

ཐེངས་འདིའི་མཉམ་ལས་ཀྱིས་ང་ཚོས་བོད་ལྗོངས་ཀྱི་ཁྲོམ་ར་ཕྱེས་པར་རོགས་བྱས་པར་མ་ཟད།  ང་ཚོས་ནོར་ཁུལ་ཐོན་ལས་གོང་སྤེལ་ལ་གདེང་ཚོད་བརྟན་པོ་ཡོད་སོང་ཞེས་ཡུལཤུལ་འབྲི་སྟོད་ཀྲུང་ཧྥུ་ཏ་ནོར་ཁུལ་ཐོན་ལས་ཚད་ཡོད་ཀུང་སིའི་འགན་ཁུར་བ་ཚེ་དབང་རྒྱལ་མཚན་གྱིས་དེ་ལྟར་བཤད།  ཀུང་སིས་ཐེངས་འདིའི་མཉམ་ལས་གོ་སྐབས་སུ་བཟུང་སྟེ།  བོད་ལྗོངས་ཀྱི་འཛད་སྤྱོད་ཁྲོམ་ར་རྒྱ་ཆེན་པོར་གཞི་བཅོལ་ནས་ཐོན་རྫས་ཀྱི་རྒྱུ་སྤུས་ཇེ་ལེགས་སུ་གཏང་རྒྱུ་དང་། ནོར་ཁུལ་ཡི་སྔོན་ཐོན་བཟོ་ལས་ཁེ་ལས་གསར་དུ་བཏོད་དེ་ཡུལ་ཤུལ་ནོར་ནག་གི་སྙན་གྲགས་དང་ལས་རིགས་ཀྱི་མཚན་སྙན་ཇེ་ཆེར་བཏང་ནས་ཡུལ་ཤུལ་ནོར་ནག་གི་ཐོན་ལས་སྤུས་ཚད་མཐོ་བའི་སྒོ་ནས་གོང་དུ་འཕེལ་བར་སྐུལ་འདེད་གཏང་རྒྱུ་རེད།