ཞི་ཅིན་ཕིང་གིས་ཨ་མེ་རི་ཁའི་ཨའེ་ཨའོ་ཝ་མངའ་སྡེའི་གྲོགས་པོར་ལོ་གསར་གྱི་རྟེན་འབྲེལ་ཤོག་བྱང་བསྐུར།

ཟླ1ཚེས27ཉིན། རྒྱལ་ཁབ་ཀྱི་ཀྲུའུ་ཞི་ཞི་ཅིན་ཕིང་གིས་ཨ་མེ་རི་ཁའི་ཨའེ་ཨའོ་ཝ་མངའ་སྡེའི་གྲོགས་པོར་ལོ་གསར་གྱི་རྟེན་འབྲེལ་ཤོག་བྱང་བསྐུར་ནས་དུས་ཆེན་གྱི་སྨོན་འདུན་ཞུས།

ཞི་ཅིན་ཕིང་གིས་བསྟན་དོན། ང་རང་ལོ40ཡི་སྔོན་ལ་མཛེས་སྡུག་གི་ཨའེ་ཨའོ་ཝ་མངའ་སྡེར་འཚམས་འདྲིར་སོང་སྐབས། ཁྱེད་ཚོའི་སྤྲོ་སེམས་འཁོལ་བའི་སྣེ་ལེན་བྱས་པ་དེ་ད་ལྟའི་བར་དུ་བརྗེད་རྒྱུ་མི་འདུག ཀྲུང་གོ་དང་ཨ་རི་རྒྱལ་ཁབ་གཉིས་ལ་ཐུན་མོང་གི་ཁེ་ཕན་རྒྱ་ཆེན་པོ་དང་མཉམ་ལས་ཀྱི་བར་སྟོང་རྒྱ་ཆེན་པོ་ཡོད་པས། ཟླ་གྲོགས་དང་གྲོགས་པོར་གྱུར་ནས་ཕན་ཚུན་གྲུབ་འབྲས་ཐོབ་པ་དང་མཉམ་དུ་དར་རྒྱས་བཏང་ན་རྒྱལ་ཁབ་གཉིས་ལ་བདེ་སྐྱིད་བསྐྲུན་ཐུབ་པ་དང་འཛམ་གླིང་ལ་ཕན་པ་ཐོབ་ཐུབ།     རྒྱལ་ཁབ་གཉིས་ཀྱི་མི་དམངས་ཀྱིས་འགྲོ་འོང་དང་བརྗེ་རེས་མང་ཙམ་བྱས་ཏེ། མུ་མཐུད་དུ་མཛའ་བརྩེའི་གཏམ་རྒྱུད་མཉམ་དུ་བྲིས་ནས། ཀྲུང་གོ་དང་ཨ་རིའི་འབྲེལ་བ་འཕེལ་རྒྱས་གཏོང་ཆེད་བྱས་རྗེས་གསར་པ་འཇོག་རྒྱུའི་རེ་བ་བཅངས་ཡོད།

དེ་སྔོན། ཨ་རིའི་ཨའེ་ཨའོ་ཝ་མངའ་སྡེའི་གྲོགས་པོ་པེ་ལུང་དང་། ཏི་ཝོ་ཆེ་ཁི། ལན་ཏིས།    ཀྲུང་གོར་སྡོད་པའི་ཨ་རིའི་གཞུང་ཚབ་ཆེན་མོ་ཟུར་པ་པུའུ་ལན་སི་ཐ་ཏི་བཟའ་ཟླ། འཛམ་གླིང་འབྲུ་རིགས་བྱ་དགའ་ཐེབས་རྩ་ཚོགས་པའི་ཀྲུའུ་ཞི་ཟུར་པ་ཁུའེ་ཡུན། དེ་མིན་མངའ་སྡེ་དེའི“མ་འོངས་པའི་ལོ་ལྔའི་ནང་ཨ་རིའི་གཞོན་ནུ་ལོ་ཆུང་ཁྲི5ཀྲུང་གོར་བརྗེ་རེས་དང་སློབ་སྦྱོང་བྱེད་པར་གདན་འདྲེན་ཞུས་པའི”གྲོས་གཞིའི་ནང་ཞུགས་པའི་དགེ་སློབ་དང་ཁྱིམ་བདག་གི་འཐུས་མི་སོགས་མི58ཀྱིས་མཉམ་འབྲེལ་སྒོས་ཀྲུའུ་ཞི་ཞི་ཅིན་ཕིང་ལ་ལོ་གསར་གྱི་རྟེན་འབྲེལ་ཤོག་བྱང་བསྐུར་ཡོད། ཨ་རི་ཕྱོགས་ཀྱི་གྲོགས་པོས་རྟེན་འབྲེལ་ཤོག་བྱང་དུ་ཀྲུའུ་ཞི་ཞི་ཅིན་ཕིང་གིས1985ལོར་ཨའེ་ཨའོ་ཝ་མངའ་སྡེ་ལ་འཚམས་འདྲི་ཐེངས་དང་པོ་བྱས་པའི་གནས་ཚུལ་ལ་ཕྱིར་དྲན་བྱས་པ་དང་། ཀྲུའུ་ཞི་ཞི་ཅིན་ཕིང་ལ་སྦྲུལ་ལོའི་ལོ་གསར་གྱི་སྨོན་འདུན་ཞུས། དགེ་རྒན་དང་སློབ་མ། ཁྱིམ་བདག་གི་འཐུས་མི་བཅས་ཀྱིས་ཀྲུའུ་ཞི་ཞི་ཅིན་ཕིང་གིས“ལོ་ལྔར་ཁྲི་ལྔ”ཡི་གྲོས་འགོ་བཏོན་པར་ཐུགས་རྗེ་ཆེ་ཞུས་པ་དང་། ཀྲུང་གོར་འཚམས་འདྲིར་ཡོང་པའི་མྱོང་ཚོར་མཉམ་སྤྱོད་བྱས་པ་མ་ཟད་སླར་ཡང་ཀྲུང་གོར་འཚམས་འདྲིར་ཡོང་འདོད་པའི་ཚུལ་བསྟན།