མཚོ་སྔོན་ཞིང་ཆེན་མི་དམངས་སྲིད་གཞུང་དྲ་བ།
ཟླ10ཚེས19ཉིན། རྒྱལ་ཁབ་ཀྱི་ཀྲུའུ་ཞི་ཞི་ཅིན་ཕིང་གིས2024ལོའི་རྒྱལ་སྤྱིའི་ཤེས་བྱའི་ཐོན་དབང་སྲུང་སྐྱོབ་མཐུན་ཚོགས་ཀྱི་འཛམ་གླིང་ཤེས་བྱའི་ཐོན་དབང་ཚོགས་ཆེན་ལ་རྟེན་འབྲེལ་འཕྲིན་ཡིག་སྤྲིངས།
ཞི་ཅིན་ཕིང་གིས་ཀྲུང་གོས་ཐོག་མཐའ་བར་གསུམ་དུ་ཤེས་བྱའི་ཐོན་དབང་སྲུང་སྐྱོབ་བྱ་བར་མཐོང་ཆེན་ཚད་མེད་བྱེད་བཞིན་ཡོད་ལ། ཤེས་བྱའི་ཐོན་དབང་གི་རྒྱལ་ཁབ་སྟོབས་ལྡན་འཛུགས་སྐྲུན་བྱ་བར་སྐུལ་འདེད་གཏིང་ཟབ་བཏང་ནས། ཤེས་བྱའི་ཐོན་དབང་ལས་དོན་ལ་སྐུལ་འདེད་གཏོང་བའི་ཐད་ནས་ལོ་རྒྱུས་རང་བཞིན་གྱི་གྲུབ་འབྲས་བླངས་ཤིང་། ཀྲུང་གོའི་ཁྱད་ཆོས་ཀྱི་ཤེས་བྱའི་ཐོན་དབང་འཕེལ་རྒྱས་ཀྱི་བགྲོད་ལམ་དུ་བསྐྱོད་བཞིན་ཡོད། ཀྲུང་གོས་ཕྱོགས་སོ་སོ་དང་མཉམ་དུ། མུ་མཐུད་དུ་མཉམ་ལས་ལ་ཤུགས་སྣོན་དང་། རྒྱལ་སྤྱིའི་ཤེས་བྱའི་ཐོན་དབང་ཕྱོགས་མང་མ་ལག་སྲུང་སྐྱོང་བརྟན་པོ་བྱས་ནས། གསར་གཏོད་འཕེལ་རྒྱས་ཀྱི་རྒྱལ་སྤྱིའི་ཁོར་ཡུག་ཅིག་བསྐྲུན་པར་ཀྲུང་གོའི་བློ་གྲོས་དང་ཀྲུང་གོའི་ཇུས་གཞི་འབུལ་འདོད་ཡོད་ཅིང་། གོ་ལ་ཧྲིལ་བོའི་ཤེས་བྱའི་ཐོན་དབང་བཅོས་སྐྱོང་མ་ལག་སྔར་ལས་དྲང་གཞག་ལུགས་མཐུན་གྱི་ཕྱོགས་སུ་འཕེལ་རྒྱས་འགྲོ་བར་སྐུལ་འདེད་བཏང་སྟེ། མིའི་རིགས་ཀྱི་ཕན་བདེ་ཇེ་མང་དུ་གཏོང་བའི་ཐད་ཀྲུང་གོའི་སྟོབས་ཤུགས་འབུལ་རྒྱུ་ཡིན་ཞེས་ནན་གྱིས་གསུངས།
2024ལོའི་རྒྱལ་སྤྱིའི་ཤེས་བྱའི་ཐོན་དབང་སྲུང་སྐྱོབ་མཐུན་ཚོགས་ཀྱི་འཛམ་གླིང་ཤེས་བྱའི་ཐོན་དབང་ཚོགས་ཆེན་ཚེས་བཅུ་དགུ་ཉིན་ཀྲེ་ཅང་ཞིང་ཆེན་ཧང་ཀྲིག་གྲོང་ཁྱེར་ནས་ཚོགས་མགོ་བརྩམས་པ་དང་། ཤེས་བྱའི་ཐོན་དབང་གི་དོ་སྙོམ་སྲུང་སྐྱོབ་དང་གསར་གཏོད་འཕེལ་རྒྱས་ཞེས་པ་བརྗོད་དོན་དུ་བཟུང་ཞིང་། ཀྲུང་གོའི་ཉོང་ཚོང་སྐུལ་སྤེལ་མཐུན་ཚོགས་དང་རྒྱལ་སྤྱིའི་ཤེས་བྱའི་ཐོན་དབང་སྲུང་སྐྱོབ་མཐུན་ཚོགས་ཀྱིས་མཉམ་དུ་གཙོ་སྒྲུབ་བྱས།
