མཚོ་སྔོན་ཞིང་ཆེན་མི་དམངས་སྲིད་གཞུང་དྲ་བ།
ཟླ10པའི་ཚེས14ཉིན་གྱི་ཕྱི་དྲོར། རྒྱལ་ཁབ་ཀྱི་ཀྲུའུ་ཞི་ཞི་ཅིན་ཕིང་གིས་དུས་བཅད་ལྟར་ཧིན་རྡུ་ཉི་ཞི་ཡའི་ཙུང་ཐུང་ཙའོ་ཁི་ལ་ཁ་པར་བཏང་།
ཞི་ཅིན་ཕིང་གིས་བསྟན་དོན། ཁྱེད་ཀྱིས་ཙུང་ཐུང་གི་འགན་བཞེས་ནས་ལོ་བཅུའི་རིང་ཀྲུང་གོར་འཚམས་འདྲི་ཐེངས་བརྒྱད་གནང་བ་དང་། འུ་གཉིས་ཀྱིས་ཐེངས་བཅུ་གཉིས་ལ་ཐུག་འཕྲད་བྱས་ཏེ། རྒྱལ་ཁབ་གཉིས་ཀྱི་སྣེ་ཁྲིད་ནས་ལས་སྐལ་གཅིག་མཐུན་ཚོགས་པ་འཛུགས་པའི་ལེའུ་གསར་པའི་འགོ་བརྩམས་པ་དང་། དུས་རྣམ་ཀུན་གྱི་འཐབ་ཇུས་མཉམ་ལས་ཀྱི་རྣམ་པ་གསར་པ་བསྐྲུན་ཡོད། ཁྱེད་ཀྱིས་ཀྲུང་གོ་དང་ཧིན་རྡུ་ཉི་ཞི་ཡའི་མཛའ་མཐུན་བྱ་གཞག་ཐད་བྱས་རྗེས་ཆེན་པོ་བཞག་པར་ཀྲུང་གོ་ཕྱོགས་ཀྱིས་བསྔགས་བརྗོད་ཆེན་པོ་བྱེད་བཞིན་ཡོད། ཧིན་རྡུ་ཉི་ཞི་ཡའི་སྐབས་གསར་པའི་སྲིད་གཞུང་གིས་ཀྲུང་གོར་མཛའ་མཐུན་འགྲོ་འོང་གི་སྲིད་ཇུས་རྒྱུན་འཛིན་བྱས་ཏེ། ཀྲུང་གོ་དང་ཧིན་རྡུ་ཉི་ཞི་ཡའི་ལས་དབང་གཅིག་མཐུན་ཚོགས་པ་འཛུགས་སྐྲུན་བྱེད་པར་སྐུལ་འདེད་གཏོང་རྒྱུ་དེ་ཆུ་ཚད་སྔར་ལས་མཐོ་བའི་ཕྱོགས་སུ་གོང་དུ་སྤེལ་ཐུབ་པར་ཡིད་ཆེས་ཡོད།
ཞི་ཅིན་ཕིང་ནན་གྱིས་བསྟན་དོན། ཀྲུང་གོ་ཕྱོགས་ཀྱིས་ཧིན་རྡུ་ཉི་ཞི་ཡ་དང་སྤུས་ཚད་མཐོ་བའི་སྒོ་ནས་རྒྱུད་གཅིག་ལམ་གཅིག་མཉམ་སྐྲུན་དང་། ཡཱ་ཅ་ཏ་ནས་ཝན་ལུང་བར་གྱི་མྱུར་བགྲོད་ལྕགས་ལམ་རྒྱུན་མཐུད་ངང་འཁོར་སྐྱོད་ཡག་པོ་བྱེད་པ། མཉམ་ལས་ཀྱི་བཀྲག་མདངས་འཚེར་ས་སྔར་ལས་མང་པོ་གཏོད་པ་བཅས་བྱས་ཏེ། རྒྱལ་ཁབ་གཉིས་ཀྱི་མཉམ་ལས་ཀྱིས་རྒྱལ་ཁབ་གཉིས་ཀྱི་མི་དམངས་ལ་སྔར་ལས་ལྷག་པའི་ཁེ་ཕན་བསྐྲུན་འདོད་ཡོད། སང་ལོ་ནི་ཝན་ལུང་གྲོས་ཚོགས་འཚོགས་ནས་ལོ70འཁོར་བའི་དུས་རེད། ཀྲུང་གོ་ཕྱོགས་ཀྱིས་ཧིན་རྡུ་ཉི་ཞི་ཡ་དང་མཉམ་དུ་ཞི་བདེ་མཉམ་གནས་ཀྱི་རྩ་དོན་ལྔ་དང་ཝན་ལུང་གི་སྙིང་སྟོབས་དར་སྤེལ་བཏང་ནས། གོ་ལ་ཧྲིལ་པོའི་འཕེལ་རྒྱས་སུ་འགྲོ་བཞིན་པའི་རྒྱལ་ཁབ་བར་གྱི་མཐུན་སྒྲིལ་མཉམ་ལས་ལ་སྐུལ་འདེད་གཏོང་བ་དང་། རྒྱ་ཆེའི་འཕེལ་རྒྱས་འགྲོ་བཞིན་པའི་རྒྱལ་ཁབ་ཀྱི་ཐུན་མོང་ཁེ་ཕན་སྲུང་སྐྱོང་བྱས་ཏེ། རང་ས་ཁུལ་དང་ཐ་ན་འཛམ་གླིང་འཕེལ་རྒྱས་དང་། དར་རྒྱས། བརྟན་ལྷིང་བཅས་ཡོང་བར་སྐུལ་འདེད་གཏོང་འདོད་ཡོད།
ཙའོ་ཁི་ཡིས་བསྟན་དོན། འདས་ཟིན་པའི་ལོ10ཡི་རིང་ང་དང་ཀྲུའུ་ཞི་ཞི་ཅིན་ཕིང་ནི་བློས་ཐུབ་ཀྱི་གྲོགས་པོ་བཟང་བོར་གྱུར་ཡོད་ལ། རྒྱལ་ཁབ་གཉིས་ཀྱི་ཕྱོགས་ཡོངས་ཀྱི་འཐབ་ཇུས་གྲོགས་པོའི་འབྲེལ་བ་དང་ཁྱབ་ཁོངས་ཁག་གི་གཉིས་ཕན་མཉམ་ལས་ལ་གྲུབ་འབྲས་གལ་ཆེན་བླངས་ཡོད། ཀྲུང་གོ་ཕྱོགས་ཀྱིས་ཧིན་རྡུ་ཉི་ཞི་ཡའི་དཔལ་འབྱོར་འཕེལ་རྒྱས་སུ་གཏོང་བར་བྱས་རྗེས་ཆེན་པོ་བཞག་པར་ཐུགས་རྗེ་ཆེ་ཞུ་རྒྱུ་ཡིན། ཡཱ་ཅ་ཏན་ནས་ཝན་ལུང་བར་གྱི་མྱུར་བགྲོད་ལྕགས་ལམ་དེ་ཕྱོགས་གཉིས་ཀྱིས“རྒྱུད་གཅིག་ལམ་གཅིག”མཉམ་སྐྲུན་མཉམ་ལས་ཀྱི་མིག་དཔེར་གྱུར་ཡོད། ཧིན་རྡུ་ཉི་ཞི་ཡའི་སྐབས་གསར་པའི་སྲིད་གཞུང་གི་འགོ་ཁྲིད་འོག་རྒྱལ་ཁབ་གཉིས་ཀྱི་འབྲེལ་བར་མུ་མཐུད་དུ་འཕེལ་རྒྱས་ཀྱི་རྣམ་པ་བཟང་པོ་འབྱུང་བར་ཡིད་ཆེས་ཡོད།
