མཚོ་སྔོན་ཞིང་ཆེན་མི་དམངས་སྲིད་གཞུང་དྲ་བ།
བསྟུད་མར་ཉིན་འགའི་རིང་ལ། མཚོ་སྔོན་གྱི་རིམ་པ་སོ་སོའི་མེ་འགོག་མེ་གསོད་སྡེ་ཁག་གིས་མི་མང་ཚོགས་ས་དང་ཚོང་ཁང་ཆེན་པོ། གནས་སྐོར་ལྗོངས་རྒྱུ་ཁུལ་སོགས་ལ་སོང་ནས། མེ་འགོག་མེ་གསོད་བདེ་འཇགས་ཀྱི་ཆེད་དོན་ཞིབ་བཤེར་འགུལ་སྐྱོད་སྤེལ་བ་དང་། མེ་སྐྱོན་བདེ་འཇགས་ཉེན་པར་གྲལ་བཤེར་དང་མེད་པར་བཟོས་ནས། ཀྲུང་གོ་གསར་བ་དབུ་བརྙེས་ནས་ལོ་དོན་ལྔ་འཁོར་བ་དང་མི་དམངས་མང་ཚོགས་ཀྱིས་སྤྲོ་སྐྱིད་ཀྱི་དུས་ཆེན་ཞིག་རོལ་བའི་ཐད་མེ་འགོག་མེ་གསོད་ཀྱི་བདེ་འཇགས་ཁོར་ཡུག་བསྐྲུན།
མཚོ་སྔོན་གྱི་རིམ་པ་སོ་སོའི་མེ་འགོག་མེ་གསོད་སྡེ་ཁག་གིས་ལྟ་སྐུལ་ཞིབ་བཤེར་ལ་ཤུགས་བསྣན་པ་དང་། དུས་ཆེན་གྱི་བདེ་འཇགས་འགོག་ཟོན་དང་ཆེད་དོན་བཅོས་སྐྱོང་ལ་སྐུལ་འདེད་བཏང་ལ། ཉམས་ཞན་ས་དང་འབུར་ཐོན་གནད་དོན་གསལ་བོར་བཙལ་བ་དང་། མང་ཚོགས་ཉེ་འགྲམ་གྱི་ཉེན་ཁ་་གཙོར་བཟུང་ཞིང་། མི་མང་ས་དང་ཐོན་སྐྱེད་ཚོང་གཉེར་བྱེད་ས། བྱ་འགུལ་ཆེན་པོ་བཅས་གཙིགས་སུ་བཟུང་བ་དང་། སྐོར་གཅིག་ཅན་བཞིའི་བཅོས་སྐྱོང་བརྟན་བརླིང་ངང་སྤེལ་ལ། འབུར་ཐོན་ཉེན་ཁར་ཕྱོགས་ཡོངས་ནས་ཞིབ་བཤེར་དང་བཅོས་སྐྱོང་བྱས་པ་དང་། ཁྲིམས་ལྟར་ཁྲིམས་འགལ་སྤྱོད་ཚུལ་ལ་ཞིབ་བཤེར་རྩད་གཅོད་བྱས་ལ། དཔེ་མཚོན་ལྡན་པའི་མེ་སྐྱོན་ཉེན་ཁ་གཅིག་བསྡུས་སྒོས་ཡོངས་བསྒྲགས་བྱས། ཁུལ་ཁོངས་གཙོ་བོར་ཁ་གཏད་དེ། རིམ་པ་སོ་སོའི་མེ་འགོག་མེ་གསོད་མྱུར་སྐྱོབ་སྡེ་ཁག་གིས་ཆེད་དོན་སྦྱོང་བརྡར་འཆར་གཞི་གཏན་འབེབས་བྱས་པ་དང་། རྒྱུས་ཤེས་དྲུག་དང་ཡུལ་དངོས་ཀྱི་མེ་གསོད་མྱུར་སྐྱོབ་འཁྲབ་སྦྱོང་སྤེལ་ལ། འཕྲལ་བསྟུན་ཇུས་གཞི་དང་བྱ་འགུལ་ཡུལ་དངོས་ཀྱི་བདེ་འཇགས་འགན་སྲུང་ཇུས་གཞི་འཐུས་ཚང་དུ་བཏང་། དེར་མ་ཟད་དུས་ཆེན་གྱི་ཁྱད་ཆོས་ལྟར། གཙོ་གནད་ཁྱབ་ཁོངས་དང་གཙོ་གནད་ཡུལ་གནས་སུ་འཕྲལ་བསྟུན་ལས་སྲུང་སྟོབས་ཤུགས་བཀོད་སྒྲིག་བྱས་པ་དང་། གནས་གཏན་བཅའ་སྲུང་དང་དུས་བསྣོལ་སྐོར་ཞིབ། འགུལ་རྣམ་དྲིལ་སྒྲོག་གི་བྱེད་ཐབས་སྤྱད་དེ། མེ་འགོད་མེ་གསོད་ཀྱི་མཉམ་འབྲེལ་ལས་རེས་ལ་ཤུགས་བསྣན་པ་དང་། དུས་ཐོག་ཏུ་ནུས་པ་ལྡན་པའི་སྒོ་ནས་ཐོལ་བྱུང་དོན་རྐྱེན་སྣ་ཚོགས་ལ་ཁ་གཏད་འཇལ་བར་ཁག་ཐེག་བྱས། དེ་དང་མཉམ་དུ། གནམ་གཤིས་བརྟག་དཔྱད་ཁང་དང་ཆུ་བེད། འགྲིམ་འགྲུལ་སོགས་སྡེ་ཁག་བར་གྱི་མཉམ་ལས་ལ་ཤུགས་སྣོན་པ་དང་། ཆ་འཕྲིན་མཉམ་སྤྱོད་དང་མཉམ་ལས་ཐག་གཅོད་ཀྱི་རྐྱེན་སྲོལ་བཙུགས་ནས། སྟོབས་ཤུགས་ཡོད་རྒུས་གནོད་འཚེ་ཆེན་པོ་དང་དོན་རྐྱེན་ཐག་གཅོད་པའི་གྲ་སྒྲིག་བཟང་བོ་བྱས།
རྒྱུས་ལོན་བྱུང་བ་ལྟར་ན། ཞིང་ཆེན་ཡོངས་ཀྱི་རིམ་པ་སོ་སོའི་མེ་འགོག་མེ་གསོད་རུ་ཁག་གིས་དུས་ཆེན་སྔོན་དུ་བསྡོམས་པས་སྡེ་ཁག་སྟོང་གཅིག་དང་བརྒྱད་བརྒྱ་ང་དྲུག་ལ་ཞིབ་བཤེར་བྱས་པ་དང་། མེ་སྐྱོན་གྱི་ཉེན་ཁ་དང་ཁྲིམས་འགལ་སྤྱོད་ཚུལ་སྟོང་གཉིས་དང་བཞི་བརྒྱ་སོ་ལྔར་དག་ཐེར་ལེགས་བཅོས་བྱས།
