ཁྲིན་ཀང་དང་ཝུའུ་ཞའོ་ཅུན་གྱིས་ཀྲུང་གོ་གསར་པ་དབུ་བརྙེས་ནས་ལོ་དོན་ལྔ་འཁོར་བའི་སྐབས་འདིར་འཚམས་འདྲིའི་བྱ་འགུལ་སྤེལ།

ཀྲུང་གོ་གསར་པ་དབུ་བརྙེས་ནས་ལོ་དོན་ལྔ་འཁོར་བའི་དུས་འདིར། ཞིང་ཆེན་ཏང་ཨུའི་ཧྲུའུ་ཅི། ཞིང་ཆེན་དམངས་ཆེན་རྒྱུན་ལས་ཨུ་ཡོན་ལྷན་ཁང་གི་ཀྲུའུ་རིན་ཁྲིན་ཀང་དང་། ཞིང་ཆེན་ཏང་ཨུའི་ཧྲུའུ་ཅི་གཞོན་པ། ཧྲིན་ཀྲང་ཝུའུ་ཞའོ་ཅུན་གཉིས་ཀྱིས་ཏང་ཡོན་རྒན་པ་དང་། འཐབ་མོ་པ་རྒན་པ། ཕུལ་བྱུང་གུང་ཁྲན་ཏང་ཡོན། ཕུལ་བྱུང་ཏང་དོན་ལས་བྱེད་པ་སོགས་ལ་འཚམས་འདྲི་བྱས་ནས། ཁོ་ཚོར་དུས་ཆེན་གྱི་རྟེན་འབྲེལ་དང་བླ་མེད་ཀྱི་གུས་འདུད་ཞུས།

ཟླ9པའི་ཚེས30ཉིན། ཁྲིན་ཀང་ཟི་ལིང་གྲོང་ཁྱེར་མཁར་དཀྱིལ་ཆུས་དང་མཁར་བྱང་ཆུས་ལ་སོང་ནས་འཐབ་མོ་བ་རྒན་པ་ཡཱན་པིན་རིན་དང་ཕུལ་བྱུང་ཏང་དོན་ལས་བྱེད་པ་ཐེན་ཞའོ་ཧོང་གཉིས་ལ་འཚམས་འདྲི་བྱས། ལོ་གོ་གཅིག་ལ་བུད་པའི་ཡཱན་པིན་རིན1949ལོའི་ཟླ1པར་དམག་དཔུང་དུ་ཞུགས་པ་དང་། སྔ་རྗེས་སུ་བཅིངས་འགྲོལ་དམག་འཁྲུག་དང་ཀོང་ཞིའི་ཇག་རྒོལ་འཐབ་རྩོད། མེ་འགོག་ཁྲའོ་རོགས་དམག་འཁྲུག་སོགས་ལ་ཞུགས་ཤིང་། ལས་གནས་སྤར་རྗེས་མགོ་ལོག་ཁུལ་ནས་བྱ་བ་བསྒྲུབས་ཏེ། ལོ་ངོ་ཉེར་དྲུག་རིང་ལ་ས་གནས་དེ་གའི་འཛུགས་སྐྲུན་ལ་རོགས་སྐྱོར་བྱས་པ་དང་། ལས་འཁྱུར་ངལ་གསོ་བྱས་རྗེས་གསར་བརྗེའི་གཏམ་རྒྱུད་སྒྲོག་འགྲེལ་བྱེད་པའི་རྒྱུན་བསྐྱངས་ནས་རྗེས་རབས་པའི་སེམས་སུ་གསར་བརྗེའི་ས་བོན་བཏབ་ཡོད། ཁྲིན་ཀང་གིས་ཡཱན་པིན་རིན་དང་མཉམ་དུ་གསར་བརྗེའི་ལོ་ཟླར་ཕྱིར་དྲན་བྱས་པ་དང་། ཁོའི་བདེ་ཐང་དང་འཚོ་བའི་གནས་ཚུལ་སྐོར་དྲིས། རྒན་པོས་སེམས་འགུལ་ཐེབས་བཞིན་བཤད་རྒྱུར། ང་རང་ཚེ་གང་པོར་ཏང་དང་མཉམ་དུ་བསྐྱོད་པ་ཡིན་ཞིང་། ཏང་གིས་ང་ཚོ་ཁྲིད་ནས་ད་ལྟའི་འཚོ་བ་སྐྱིད་པོ་རོལ་དུ་བཅུག་པ་ཡིན་པས། ངས་ཏང་གི་བཀའ་དྲིན་ནམ་ཡང་བརྗེད་མི་སྲིད་ཟེར། ཁྲིན་ཀང་གིས་བཤད་རྒྱུར། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ཀྲུང་གོའི་གསར་བརྗེའི་བྱ་གཞག་ཐད་ཁྲག་བཏོན་དམར་འཛིང་བྱས་པའི་འཐབ་མོ་བ་རྒན་པ་རྣམས་དུས་ནམ་ཡང་བརྗེད་ཀྱིན་མེད་ལ། ཏང་དང་རྒྱལ་ཁབ་ཀྱིས་ཀྱང་ཁྱེད་ཅག་གིས་བྱས་རྗེས་གལ་ཆེན་བཞག་པ་བརྗེད་ཀྱིན་མེད། མི་རབས་རེ་རེར་ལས་འགན་རེ་ཡོད་ལ། ང་ཚོའི་མཚོ་སྔོན་གྱི་མི་རབས་འདིས་སྔར་སྲོལ་རྒྱུད་འཛིན་བྱས་ནས་ལས་འགན་གསར་པ་ཕྲག་ཏུ་ལེན་པ་དང་། དངོས་གཉེར་མདུན་སྐྱོད་བྱས་ཏེ་ནུས་ཤུགས་ཡོད་རྒུས་ཀྲུང་གོའི་ལུགས་ཀྱི་དེང་རབས་ཅན་གྱི་མཚོ་སྔོན་ལག་ལེན་ལ་སྐུལ་འདེད་གཏོང་དགོས། ཁྲིན་ཀང་གིས་ཡཱན་པིན་རིན་ལ་མགོ་ལོག་གི་གནམ་ས་བླ་འོག་བརྗེ་བ་ལྟ་བུའི་འགྱུར་ལྡོག་བྲིས་པའི་སྒྲུང་རིང་ཞིག་ལེགས་སྐྱེས་སུ་ཕུལ་བར་མ་ཟད། ལུས་སེམས་བདེ་ཐང་ཡོང་བ་དང་ཚེ་མཇུག་གི་འཚོ་བ་སྐྱིད་པོ་རོལ་དགོས་པར་གདམས་ཤིང་། འབྲེལ་ཡོད་སྡེ་ཁག་གིས་ཞབས་ཞུ་འགན་སྲུང་ལེགས་པོར་སྒྲུབ་དགོས་པའི་བླང་བྱ་བཏོན།

ཁྲིན་ཀང་ཞའོ་ཆའོ་སྲང་ལམ་གྱི་ཞིན་ཧེ་ཆའོ་སྡེ་ཁུལ་དུ་སོང་ནས་ཐེན་ཞའོ་ཧོང་ལ་འཚམས་འདྲི་བྱས། ཐེན་ཞའོ་ཧོང་ནི་ཏང་གི་ཚོགས་ཆེན་བཅོ་བརྒྱད་པའི་འཐུས་མི་ཡིན་ལ། སྔོན་ཆད་ཞིན་ཧེ་ཆའོ་སྡེ་ཁུལ་གྱི་ཏང་ཨུའི་ཧྲུའུ་ཅི་དང་སྡེ་ཁུལ་ཨུ་ཡོན་ལྷན་ཁང་གི་ཀྲུའུ་རིན་གྱི་འགན་ཁུར་མྱོང་ཞིང་། 2016ལོར་རྒྱལ་ཡོངས་ཀྱི་ཕུལ་བྱུང་ཏང་དོན་ལས་བྱེད་པ་དང་མཚོ་སྔོན་ཞིང་ཆེན་གྱི་ཕུལ་བྱུང་ཏང་དོན་ལས་བྱེད་པར་བདམས་པ་དང་། 2021ལོར་ལས་འཁྱུར་ངལ་གསོ་བྱས་རྗེས་ཐེན་ཞའོ་ཧོང་གིས་ཏང་དམངས་ལས་སྒྲུབ་ཁང་བཙུགས་ནས་ཁེ་ལས་གཉིས་དང་གསར་པ་གསུམ་ལ་ཞབས་འདེགས་ཞུས། ཁྲིན་ཀང་གི་ལས་སྒྲུབ་ཁང་གི་འབྲེལ་ཡོད་གནས་ཚུལ་སྐོར་ཞིབ་མོར་དྲིས་པ་དང་། ལས་འཁྱུར་ངལ་གསོ་བྱས་ཀྱང་རང་བཞིན་མི་འགྱུར་བ་དང་ལས་གནས་དང་བྲལ་ཡང་ཏང་དང་མི་འབྲལ་བའི་ཁག་ཁུར་ལ་ཁས་ལེན་གང་ལེགས་བྱས། ཐེན་ཞའོ་ཧུང་གིས་ཏང་ཡོན་གྱི་རང་གཤིས་སྲུང་འཛིན་བྱས་ནས་གཞི་རིམ་ཉམས་མྱོང་གི་དགེ་མཚན་འདོན་སྤེལ་གང་ལེགས་བྱས་ཏེ། གཞི་རིམ་སྤྱི་ཚོགས་བཅོས་སྐྱོང་ཐད་བྱས་རྗེས་སྔར་ལས་མང་པོ་འཇོག་པར་རོགས་ཤུགས་འདོན་དགོས་པའི་སྐུལ་མ་བཏང་། ཐེན་ཞའོ་ཧུང་གིས་བསྟན་དོན། རང་ནུས་འདོན་སྤེལ་བྱེད་པ་དང་། ལས་སྒྲུབ་ཁང་བཙུགས་ནས་བེད་སྤྱོད་གང་ལེགས་བྱས་ཏེ། ཏང་གི་ཡིད་ཆེས་སྟོང་ཟད་དུ་གཏོང་མི་སྲིད་ཟེར།

ཟླ9པའི་ཚེས28ཉིན། ཝུའུ་ཞའོ་ཅུན་གྱིས་ཀྲུང་གོ་གསར་པདབུ་བརྙེས་པའི་སྔོན་ལ་གསར་བརྗེའི་བྱ་བར་ཞུགས་པའི་ཏང་ཡོན་རྒན་པ་ཡུས་ཅིན་ཀྲུའུ་ལ་འཚམས་འདྲི་བྱས་པ་དང་། རྒན་པོའི་ལུས་ཕུང་གནས་ཚུལ་དང་འཚོ་བའི་གནས་ཚུལ་སྐོར་ཞིབ་མོར་དྲིས་ནས། ཁོ་མོས་ལོ་ངོ་མང་པོའི་རིང་མཚོ་སྔོན་གྱི་འཛུགས་སྐྲུན་དང་བཅོས་སྒྱུར་འཕེལ་རྒྱས་ཐད་བྱས་རྗེས་གལ་ཆེན་བཞག་པར་བཀའ་དྲིན་ཞུས། ཁོས་བཤད་རྒྱུར། ད་ལོར་སྤྱི་ཁྱབ་ཧྲུའུ་ཅི་ཞི་ཅིན་ཕིང་ཡར་བསྐྱར་མཚོ་སྔོན་དུ་གཟིགས་ཞིབ་ལ་ཕེབས་པས། ཞིང་ཆེན་ཡོངས་ཀྱི་ལས་བྱེད་མང་ཚོགས་ལ་དྲིན་བསམ་མདུན་སྐྱོད་བྱེད་པར་སྐུལ་ལྕག་ཐེབས་པ་དང་། ང་ཚོས་ཐོག་མཐའ་བར་གསུམ་དུ་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་མངགས་བཅོལ་ཡིད་ལ་དམ་པོར་བཟུང་ནས། གསར་བརྗེ་པ་དང་གུང་ཁྲན་ཏང་ཡོན་རྒན་པ་རྣམས་ཀྱིས་བཞག་པའི་གཟི་བརྗིད་སྲོལ་རྒྱུན་དང་སྤྱོད་ཚུལ་ལེགས་པོ་རྒྱུད་འཛིན་དང་དར་སྤེལ་གང་ལེགས་བྱེད་པ་དང་། བྱ་བ་ཧུར་ཐག་གིས་སྒྲུབ་སྟེ། ཞིང་ཆེན་ཡོངས་ཀྱི་བྱ་གཞག་སྣ་ཚོགས་སྐས་རིམ་གསར་པར་སླེབས་པར་སྐུལ་འདེད་གཏོང་དགོས། འབྲེལ་ཡོད་སྡེ་ཁག་གི་འགན་ཁུར་བློ་མཐུན་རྣམས་ཀྱིས་ཁོ་ཚོའི་འཚོ་བར་ཐུགས་ཁུར་བྱས་ནས་ཁོ་ཚོར་བདག་སྐྱོང་བཟང་པོ་བྱས་ཏེ། ཚེ་མཇུག་གི་འཚོ་བ་སྐྱིད་པོ་རོལ་དུ་འཇུག་དགོས་པའི་མངག་བཅོལ་བྱས། ཝུའུ་ཞའོ་ཅུན་གྱིས་རྒྱལ་ཡོངས་ཕུལ་བྱུང་གུང་ཁྲན་ཏང་ཡོན་གྱི་གཟི་བརྗིད་མཚན་སྙན་ཐོབ་པའི་མཚོ་སྔོན་སློབ་ཆེན་གྱི་ཁོངས་གཏོགས་སྨན་ཁང་ནད་པ་ལྗིད་མོའི་གསོ་རིག་ཚན་ཁག་གི་ཀྲུའུ་རིན་གཞོན་པ་ཐུང་ཧྲི་ཅུན་གྱི་ཁྱིམ་ནས་སྨན་ཁང་གི་སྨན་བཅོས་ཞབས་ཞུ་དང་རིག་ཚན་གཙོ་བོ། ཚན་རིག་ཞིབ་འཇུག་གསར་གཏོད་སོགས་ཀྱི་གནས་ཚུལ་ངོ་སྤྲོད་བྱས་པར་ཉན་ཞིང་། རིམས་ནད་སྔོན་འགོག་དང་མཚོ་སྔོན་གྱི་ནད་པ་ལྗིད་མོའི་གསོ་རིག་རིག་ཚན་འཛུགས་སྐྲུན་ཐད་བྱས་རྗེས་བཞག་པར་བཀའ་དྲིན་ཞུས། ཁོས་བཤད་རྒྱུར། མིག་སྔར་ཞིང་ཆེན་གྱི་གོང་འོག་ཚང་མས་ཏང་གི་སྐབས་ཉི་ཤུ་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་གསུམ་པའི་དགོངས་དོན་དང་སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་མཚོ་སྔོན་དུ་གཟིགས་ཞིབ་མཛད་སྐབས་གནང་བའི་གསུང་བཤད་གལ་ཆེན་གྱི་དགོངས་དོན་སློབ་སྦྱོང་དང་ལག་བསྟར་ཟབ་མོ་བྱས་ཏེ། ནུས་ཤུགས་ཡོད་རྒུས་ཀྲུང་གོའི་ལུགས་ཀྱི་དེང་རབས་ཅན་གྱི་མཚོ་སྔོན་གསར་བའི་འཛུགས་སྐྲུན་ལ་སྐུལ་འདེད་གཏོང་བཞིན་ཡོད་པས། ཁྱེད་ཀྱིས་མུ་མཐུད་དུ་ཏང་ཡོན་གྱི་གདོང་ལེན་དཔེ་སྟོན་ནུས་པ་འདོན་སྤེལ་བྱེད་པ་དང་། བློ་རྩ་བརྟན་པོས་ཡར་རྒྱས་བརྩོན་ལེན་དང་ཁག་ཁུར་ལས་སྒྲུབ་བྱས་ཏེ། མཐོ་སྒང་གི་གསོ་རིག་བྱ་གཞག་ཐད་བྱས་རྗེས་གལ་ཆེན་འཇོག་པར་རེ་བ་བྱེད་ཀྱིན་ཡོད་ཟེར།

ཞིང་ཆེན་ཏང་ཨུའི་རྒྱུན་ཨུ། དྲུང་ཡིག་ཆེན་མོ་ཀྲུའུ་ཞང་ཧྥིན་འབྲེལ་ཡོད་འཚམས་འདྲིའི་བྱེད་སྒོར་ཞུགས།