མཚོ་སྔོན་ཞིང་ཆེན་མི་དམངས་སྲིད་གཞུང་དྲ་བ།
མཚོ་སྔོན་གསར་འགྱུར་དྲ་བའི་འཕྲིན། ཟླ9པའི་ཚེས2ཉིན་མཚོ་སྔོན་ཞིང་ཆེན་གྱིས2024ལོའི“སྨན་རྫས་བདེ་འཇགས་དྲིལ་སྒྲོག་གཟའ་འཁོར”གྱི་བྱེད་སྒོ་དངོས་སུ་སྤེལ་འགོ་ཚུགས་ཤིང་། གཙོ་བོ་སྤྱི་དམངས་ཀྱི་བདེ་འཇགས་སྨན་སྤྱོད་ཤེས་བྱ་དྲིལ་སྒྲོག་དང་ཁྱབ་གདལ་གཏིང་ཟབ། སྤྱི་དམངས་ཀྱི་སྨན་རྫས་བདེ་འཇགས་ཀྱི་ཚན་རིག་བྱང་ཚད་ཇེ་མཐོར། བདེ་འཇགས་སྨན་སྤྱོད་སྤྱི་ཚོགས་ཀྱི་མཉམ་སྐྱོང་མཉམ་ཤུགས་གཅིག་སྒྲིལ་བཅས་བྱ་བའི་ཆེད་དང་། སྨན་རྫས་བདེ་འཇགས་སྲ་བརྟན་དང་མཐོར་འདེགས་ཀྱི་བྱ་སྤྱོད་དམ་འཛིན་ལ་བྱས་ཏེ་སྨན་རྫས་བདེ་འཇགས་ལ་གནོད་འཚེ་གཏོང་བའི་ཁྲིམས་འགལ་ཉེས་གསོག་བྱ་སྤྱོད་ལ་རྡུང་རྡེག་ནན་པོ་དང་། སྨན་རྫས་བདེ་འཇགས་ཀྱི་མ་མཐའི་མཚམས་ཐིག་མཐའ་གཅིག་ཏུ་སྲུང་བ། མི་དམངས་མང་ཚོགས་ཀྱིས་སྨན་སྤྱོད་བདེ་འཇགས་དང་འགན་སྲུང་ནུས་ལྡན་བཅས་ཀྱི་ཆེད་སྤེལ་བ་ཞིག་རེད།
ཞིང་ཆེན་ཡོངས་ཀྱི2024ལོའི“སྨན་རྫས་བདེ་འཇགས་དྲིལ་སྒྲོག་གཟའ་འཁོར”བྱེད་སྒོས“སྨན་རྫས་བདེ་འཇགས་ཀྱི་བཅའ་ཁྲིམས་ཡག་པོས་སྲུང་སྐྱེལ་བྱེད”ཅེས་པ་བརྗོད་དོན་དུ་བཟུང་སྟེ། སྤྱི་ཚོགས་ལས་རིགས་ཁག་གི་སྨན་རྫས་བདེ་འཇགས་ལས་དོན་ནང་རྒྱ་ཁྱབ་ཏུ་ཞུགས་པར་སྐུལ་སློང་དང་། སྤྱི་ཚོགས་ཀྱི་ལྟ་སྐུལ་ལ་ཤུགས་སྣོན། ཁེ་དབང་སྲུང་སྐྱོང་འདུ་ཤེས་ཟབ་བསྐྱེད། སྤྱི་དམངས་ཀྱིས་ཚན་རིག་དང་མཐུན་ཞིང་། བདེ་འཇགས། ལུགས་མཐུན་གྱི་སྒོ་ནས་སྨན་སྤྱོད་པར་སྐུལ་འདེད་བཅས་བྱས་ནས་སྨན་རྫས་ལྟ་སྐུལ་དོ་དམ་གྱི་ཁྲིམས་སྐྱོང་ཁོར་ཡུག་བཟང་པོ་ཐུན་མོང་ཐོག་གཏོད་དགོས་པའི་འབོད་སྐུལ་བྱས། དེའི་རིང་རྣམ་པ་སྣ་མང་དང་ནང་དོན་ཕུན་སུམ་ཚོགས་པའི་དྲིལ་སྒྲོག་བྱེད་སྒོ་རབ་དང་རིམ་པ་སྤེལ་ནས་སྤྱི་ཚོགས་རྩ་འཛུགས་དང་། སྨན་བཅོས་སྒྲིག་གཞི། ཚན་ཞིབ་ལས་ཁུངས། ཁེ་ལས་ཆེ་གྲས། གསར་འགྱུར་སྨྱན་སྦྱོར་སོགས་བྱེད་སྒོར་ཧུར་ཐག་ཞུགས་པར་སྐུལ་ལྕག་དང་ཁྲིད་སྟོན་བྱ་རྒྱུ་ཡིན་ལ། སྔ་རྗེས་སུ《ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་སྨན་རྫས་དོ་དམ་བཅའ་ཁྲིམས》ཀྱི་བཅའ་ཁྲིམས་དང་ཁྲིམས་སྲོལ་རབ་དང་རིམ་པའི་གསོ་སྦྱོང་དང་དྲིལ་སྒྲོག་ལག་བསྟར་བཞུགས་མོལ་ཚོགས་འདུ་དང་། ཚོད་ལྟ་ཁང་གི་སྤྱི་དམངས་སྒོ་དབྱེའི་ཉིན་མོ། སྨན་རྫས་བདེ་འཇགས་སྡེ་ཁུལ་དང་ཁེ་ལས་སློབ་གྲྭར་བསྐྱོད་པ། ཆེད་མཁས་པའི་ཞབས་ཞུ་རུ་ཁག་གིས་ཁེ་ལས་ལ་རོགས་རམ་དང་དྲོ་སྐྱིད་གནང་བ། མཛེས་འཆོས་བྱུག་རྫས་ཀྱི་རྒྱུ་ཆ་ལྷད་མེད་ཚུར་བསྡུ། “ཐོན་རྫས་གཉིས་དང་ཡོ་བྱད་གཅིག”དྲ་རྒྱའི་ཤེས་བྱའི་འགྲན་སྡུར་སོགས་དམིགས་ས་རང་བཞིན་དང་ཕན་འབྲས་རང་བཞིན་ལྡན་པའི་བྱེད་སྒོ་གཙོ་བོར་སྒྲིག་འཛུགས་བྱས་ཏེ། སྤྱི་དམངས་ལ་ཁ་ཕྱོགས་ནས་སྨན་རྫས་བདེ་འཇགས་ཀྱི་ཤེས་བྱ་ཁྱབ་གདལ་དང་། སྤྱི་ཚོགས་ཡོངས་ལ་བདེ་ཐང་གི་འཚོ་བའི་འདུ་ཤེས་དང་འཚོ་བ་སྐྱེལ་སྟངས་དར་སྤེལ། སྤྱི་དམངས་ཀྱི་སྨན་རྫས་བདེ་འཇགས་ཀྱི་ཚན་རིག་བྱང་ཚད་སྔར་བས་ཇེ་མཐོར་བཅས་གཏང་རྒྱུ་རེད།
རྩོམ་སྒྲིག་པ། ཨ་གཡང་སྐྱིད།
