མཚོ་སྔོན་ཞིང་ཆེན་མི་དམངས་སྲིད་གཞུང་དྲ་བ།
ཟླ9པའི་ཚེས1ཉིན་མཚོ་སྔོན་ཞིང་ཆེན་མཚོ་ལྷོ་བོད་རིགས་རང་སྐྱོང་ཁུལ་རིག་ལྡན་ཞིང་ཕྱུགས་སྒྲིག་ཆས་ཚན་རྩལ་གསར་གཏོད་ལྟེ་གནས་མཚོ་སྔོན་ཆིང་ཆིང་(青晴)ཚན་རྩལ་ཚད་ཡོད་འགན་འཁྲི་ཀུང་སིས་དངོས་སུ་སྒོ་བྱང་བཀལ་ནས། ལོ་རེར་གློག་རྡུལ་ཐོབ་ཐང་མཚོན་བྱེད་ཀྱི་རྣ་རྟགས་ཁྲི200ཐོན་སྐྱེད་ཐུབ་པའི་གྲངས་ཀའི་བཟོ་གྲྭ་དངོས་སུ་ཐོན་སྐྱེད་བྱེད་འགོ་ཚུགས་པ་མཚོན་ཞིང་། མཚོ་ལྷོ་ཁུལ་གྱི་ལྗང་མདོག་སྐྱེ་ལྡན་ཞིང་ཕྱུགས་ཐོན་རྫས་ཕྱིར་གཏོང་བྱ་ཡུལ་འཛུགས་སྐྲུན་ལ་གསོན་ཤུགས་གསར་པ་བསྣན།
ཉེ་བའི་ལོ་ཤས་རིང་མཚོ་ལྷོ་ཁུལ་གྱིས་ལྗང་མདོག་སྐྱེ་ལྡན་ཞིང་ཕྱུགས་ཐོན་རྫས་ཕྱིར་གཏོང་བྱ་ཡུལ་གཏོད་པའི་ལས་ལ་གཞོལ་ཏེ། རྒྱལ་ཁབ་ཀྱི་རྒྱུན་མཐུད་འཕེལ་རྒྱས་ལྡན་རིམ་གསར་གཏོད་དཔེ་སྟོན་ཁུལ་འཛུགས་སྐྲུན་ལ་སྐུལ་འདེད་ཧུར་ཐག་བཏང་ནས། བོད་ལུག་དང་ནོར་ནག་སོགས“ཆེན་པོ་ལྔའི”ལེགས་ཆའི་ཐོན་ལས་རྒྱུན་ཆད་མེད་པར་རྒྱ་ཆེ་སྟོབས་ཆེན་བཏང་། 2023ལོར་མཚོ་ལྷོ་ཁུལ་གྱི་སྐྱེ་ལྡན་རྩྭ་རའི་ཁོར་ཡུག་ལྟ་ཞིབ་ཚད་ལེན་རྒྱ་ཁྱོན་མུའུ་ཁྲི3842.14དང་བོད་ལུག་ཁྲི237.66ཟིན་ནས་ཁུལ་དང་རྫོང་རིམ་པ་གཉིས་ཀྱི་ཞིང་ཕྱུགས་ཐོན་རྫས་གཙོ་བོའི་ཐོན་ཡུལ་ཁུངས་འདེད་ཐུབ་པའི་སྟེགས་བུ་ཐོག་མ་བཙུགས་ཏེ། ཐོན་ཁུངས་མཉམ་སྤྱོད་དང་། གཞི་གྲངས་མཉམ་སྤྱོད། འབྱུང་ཁུངས་ཚོད་འཛིན་བཅས་མངོན་འགྱུར་བྱས།
མཚོ་ལྷོ་ཁུལ་གྱི་ཐུན་མོང་མ་ཡིན་པའི་ཕྱུགས་ལས་གསོ་སྤེལ་ཆ་རྐྱེན་ལ་བརྟེན་ནས་ཆིང་ཆིང་ཚན་རྩལ་གྱིས་བློ་ལྡན་ཕྱུགས་ལས་ཀྱི་གློག་རྡུལ་ཐོབ་ཐང་མཚོན་པའི་རྣ་རྟགས་དང་། དངུལ་ཁང་འགན་སྲུང་ལྟ་སྐུལ་དོ་དམ་གྱི་རིག་ནུས་རྣ་རྟགས། དངུལ་ཁང་འགན་སྲུང་ལྟ་སྐུལ་དོ་དམ་གྱི་བྱང་སྐར་སྤུན་བདུནRDSSའཕྲིན་གཏོང་མཐའ་སྣེ། དེ་བཞིན་བློ་ལྡན་ཕྱུགས་ལས་སྐྱེ་ཁམས་སྦྲེལ་ཐག་ཕྱོགས་བསྡུས་དོ་དམ་སྟེགས་བུ་སོགས་ཚན་རྩལ་མཐོ་བའི་ཐོན་རྫས་རབ་དང་རིམ་པ་རང་བརྟེན་ཞིབ་འཇུག་གསར་སྤེལ་བྱས། གསར་གཏོད་ཀྱི་གྲུབ་འབྲས་དེ་དག་གིས་རྒྱལ་ནང་གི་འབྲེལ་ཡོད་ཁྱབ་ཁོངས་ཀྱི་སྟོང་ཆ་གསབ་པ་མ་ཟད། མཚོ་ལྷོ་ཁུལ་གྱི་ཕྱུགས་ལས་གསོ་སྤེལ་ལས་རིགས་ལ་སྔར་བྱུང་མྱོང་མེད་པའི་འཕོ་འགྱུར་བྱུང་ཡོད།
རྒྱུས་ལོན་བྱུང་བ་ལྟར་ན། རྣ་རྟགས་དེར་སྔོན་ཐོན་གྱི་ཟོག་སྦྲེལ་དྲ་རྒྱའི་ལག་རྩལ་དང་ཆ་འཕྲིན་དབྱེ་འབྱེད་ལག་རྩལ་འདུས་ཡོད་པས་ཕྱུགས་རིགས་ཚང་མར་གློག་རྡུལ་ཐོབ་ཐང་མཚོན་རྟགས་འབའ་ཞིག་བགོ་བཤའ་རྒྱག་ཐུབ་ཀྱི་ཡོད། དེས་གསོ་སྤེལ་བྱེད་མཁན་གྱིས་དོ་དམ་ཞིབ་ཚགས་བྱེད་བདེ་པོ་ཡོད་པ་མ་ཟད། ཕྱུགས་རིགས་ཀྱི་ཚེ་སྲོག་གི་དུས་འཁོར་ཧྲིལ་པོར་ཁུངས་འདེད་ཀྱང་ཐུབ་ཀྱི་ཡོད། གློག་རྡུལ་ཐོབ་ཐང་རྣ་རྟགས་བརྒྱུད་གསོ་སྤེལ་བྱེད་མཁན་གྱིས་ཕྱུགས་རིགས་ཀྱི་བདེ་ཐང་གནས་ཚུལ་དང་། སྐྱེ་འཚར་མྱུར་ཚད། གནས་ཡུལ་ཆ་འཕྲིན་སོགས་འགག་རྩའི་གཞི་གྲངས་ལ་དུས་ཐོག་ཏུ་ལྟ་ཞིབ་ཚད་ལེན་བྱས་ནས་ཚན་རིག་དང་མཐུན་པའི་གསོ་སྤེལ་ལ་རྒྱབ་སྐྱོར་ནུས་ལྡན་བྱེད་ཀྱི་ཡོད།
རིག་ལྡན་ཞིང་ཕྱུགས་སྒྲིག་ཆས་བེད་སྤྱོད་བྱས་པས་གསོ་སྤེལ་བརྒྱུད་རིམ་སྔར་ལས་རང་འགུལ་ཅན་དང་རིག་ལྡན་ཅན་དུ་གྱུར་ནས་གསོ་སྤེལ་གྱི་ཕན་འབྲས་མངོན་གསལ་དོད་པོས་ཇེ་ཆེར་ཕྱིན། ཕྱུགས་འཚོ་བའི་བརྒྱུད་རིམ་ནང་རིག་ནུས་རྣ་རྟགས་དང་འཕྲིན་གཏོང་མཐའ་སྣེ་ཡིས་གསོ་སྤེལ་བྱེད་མཁན་གྱིས་ཕྱུགས་རིགས་ཀྱི་གནས་ཡུལ་ལ་དུས་ཐོག་ཏུ་ལྟ་སྐུལ་ཚོད་འཛིན་བྱས་ནས་བོར་བའམ་རྐུ་ཤོར་ཐེབས་པར་སྔོན་འགོག་བྱེད་ཐུབ། དེ་དང་ཆབས་ཅིག་རང་བྱུང་གནོད་འཚེ་སོགས་ཛ་དྲག་གི་གནས་ཚུལ་ལ་ཁ་གཏད་གཅོག་སྐབས་ཕྱུགས་རིགས་ཀྱི་གནས་ཡུལ་མགྱོགས་མྱུར་གཏན་འཁེལ་བྱས་ནས་རོགས་སྐྱོབ་བྱེད་ཐབས་ནུས་ལྡན་སྤྱོད་ཐུབ་ཀྱི་ཡོད།
གཞན་ཡང་གློག་རྡུལ་ཐོབ་ཐང་རྣ་རྟགས་དང་ཁུངས་འདེད་མ་ལག་འཛུགས་སྐྱོང་བྱས་པ་བརྒྱུད་ཕྱུགས་ལས་ཐོན་རྫས་ཀྱི་བརྒྱུད་རིམ་ཧྲིལ་པོར་ཁུངས་འདེད་ཐུབ་ནས་ཐོན་རྫས་ཀྱི་ཁྲོམ་རའི་འགྲན་རྩོད་ནུས་པ་ཇེ་ཆེར་ཕྱིན་པ་མ་ཟད། འཛད་སྤྱོད་པར་སྔར་ལས་བདེ་འཇགས་དང་བློ་བདེ་བའི་ཟས་རིགས་གདམ་ག་མཁོ་འདོན་ཐུབ་ཡོད།
མཚོ་ལྷོ་ཁུལ་ཞིང་ཕྱུགས་ཅུའུ་ཡི་འབྲེལ་ཡོད་འགན་འཁུར་བས་བློ་ལྡན་ཞིང་ཕྱུགས་སྒྲིག་ཆས་ཚན་རྩལ་གསར་གཏོད་ལྟེ་གནས་བཙུགས་པ་དང་རྣམ་གྲངས་ལག་བསྟར་བྱས་པས་མཚོ་ལྷོ་ཁུལ་ཕྱུགས་ལས་གསོ་སྤེལ་ལས་རིགས་ཕྱོགས་སྒྱུར་རིམ་སྤོར་ལ་སྐུལ་མ་ཐེབས་ཡོད། ལག་རྩལ་གསར་པ་དང་སྒྲིག་ཆས་གསར་པ་ནང་འདྲེན་བྱས་པ་བརྒྱུད་ཕྱུགས་ལས་གསོ་སྤེལ་གྱི་ཚན་རྩལ་འདུས་ཚད་དང་། ཟུར་སྣོན་རིན་ཐང་ཇེ་མཐོར་ཕྱིན་ནས་མཚོ་ལྷོ་ཁུལ་གྱི་ལྗང་མདོག་སྐྱེ་ལྡན་ཞིང་ཕྱུགས་ཐོན་རྫས་ཕྱིར་གཏོང་བྱ་ཡུལ་འཛུགས་སྐྲུན་བྱ་རྒྱུར་འདེགས་སྐྱོར་ནུས་ལྡན་མཁོ་འདོན་བྱས་ཡོད།
རྩོམ་སྒྲིག་པ། ཨ་གཡང་སྐྱིད།
