མཚོ་སྔོན་ཞིང་ཆེན་མི་དམངས་སྲིད་གཞུང་དྲ་བ།
མཚོ་སྔོན་གསར་འགྱུར་དྲ་བའི་འཕྲིན། ཟླ11པའི་ཚེས22ཉིན་ནས་ཚེས23ཉིན་བར། གསར་འགོད་པས་ཟི་ལིང་གྲོང་ཁྱེར་གྱི་ཁ་ལོ་བ་མང་ཤོས་ཀྱིས་མེ་ཟོན་མེ་འགོག་རླངས་འཁོར་འགྲོ་ལམ་མི་གཅོད་པར་མེ་ཟོན་བདེ་འཇགས་འདུ་ཤེས་ཇེ་ཆེར་ཕྱིན་ཡོད་པའི་སྣང་ཚུལ་ལེགས་པོ་དེ་མཐོང་།
མེ་ཟོན་རླངས་འཁོར་འགྲོ་ལམ་སྟོང་པ་ཡིན་རུང་རླངས་འཁོར་གཞན་དག་སྐྱོད་མི་རུང་།
ཉེ་བའི་ཉིན་གཉིས་རིང་། གསར་འགོད་པས་འདུ་འཛི་ཆེ་བའི་སྲང་ལམ་མམ་ཡང་ན་ཞི་འཇགས་ཀྱི་སྡོད་ཁུལ་དང་གཞུང་སྒྲུབ་ཁང་གི་མདུན་བཅས་གང་རུང་དུ་མེ་ཟོན་མེ་འགོག་གི་རླངས་འཁོར་ལམ་རྟགས་བརྒྱབ་པའི་ས་དེར་རླངས་འཁོར་བཞག་ཡོད་མཐོང་རྒྱུ་མི་འདུག གྲོང་མི་ཝུའུ་ཅུན་གྱིས་འདི་སྐད། ལས་ཁུངས་ཀྱིས་མེ་ཟོན་མེ་འགོག་གི་འཁྲབ་སྦྱོང་ཞིག་སྒྲིག་འཛུགས་ཐོག་སྤེལ་པའི་ཁྲོད། མེ་ཟོན་པས་བརྙན་ལམ་བརྒྱུད་ནས་མེ་ཟོན་མེ་འགོག་གི་འགྲོ་ལམ་ནི‘སྲོག་སྐྱོབ་ཀྱི་མྱུར་ལམ’ཡིན་པས། མེ་ཟོན་མེ་འགོག་གི་འགྲོ་ལམ་སྟོང་པ་ཡིན་ཡང་རླངས་འཁོར་འཇོག་མི་རུང་བ་དང་། གལ་ཏེ་སྣང་མེད་དུ་བསྐྱར་ན་རང་གི་ཚེ་སྲོག་ལ་གཅེས་སྲུང་མ་བྱས་པ་དང་གཅིག་མཚུངས་ཡིན་སྐོར་འཆད་པས་དེ་གལ་ཆེན་ཡིན་པ་གཞི་ནས་རྟོགས་ཟེར།
ཞ་ཏུའུ་སྲང་ལམ་ཆེན་མོའི་རླངས་འཁོར་འཇོག་སའི་ལས་བྱེད་པས་འདི་སྐད། མེ་ཟོན་ལམ་རྟགས་འདི་བརྒྱབ་ནས་ཡུན་རིང་འགོར། སྔོན་ཆད་གྲོང་མི་མང་པོས་རླངས་འཁོར་འཇོག་ས་མེད་ཚེ་ལམ་རྟགས་དེའི་ནང་འཇོག་པ་ཡིན། ལྷག་པར་དུ་དགོང་མོར་མི་ལ་ལས་མེ་ཟོན་རླངས་འཁོར་གྱི་འགྲོ་ལམ་དུ་འཇོག་རྒྱུར་དགའ། ད་ལྟ་ཚང་མའི་རང་རྟོགས་ཇེ་ཆེར་ཕྱིན་ནས་རླངས་འཁོར་འཇོག་ས་མེད་ན་ཡང་ས་དེར་འཇོག་མི་སྲིད་ཟེར།
ཉེ་བའི་ལོ་རིང་ལ། ཟི་ལིང་གྲོང་ཁྱེར་གྱིས་མེ་ཟོན་མེ་འགོག་གི་རླངས་འཁོར་འགྲོ་ལམ་བཅོས་སྐྱོང་བྱ་བ་དེ“ལོ་གསུམ་གྱི་འགུལ་སྐྱོད”ནང་བླངས། ད་སྔའི་བར་དུ་སྡོད་ཁུལ་རྙིང་པར་མེ་ཟོན་རླངས་འཁོར་ལམ་རྟགས་471བརྒྱབ་པར་མ་ཟད། སྤྱི་བདེ་འགྲིམ་འགྲུལ་སྡེ་ཚན་བར《རླངས་འཁོར་གྱིས་མེ་ཟོན་འགྲོ་ལམ་བཅད་པའི་ཁྲིམས་འགལ་བྱ་སྤྱོད་ལ་ཞིབ་གཅོད་ཞུ་སྐྱེལ་བྱེད་པའི་སྒྲིག་སྲོལ》བཟོས་ཏེ། སྔ་གཞུག་ཏུ་གྱོད་དོན307ཞུ་སྐྱེལ་བྱས་པ་དང་། གྱོད་དོན140ཐག་བཅད། དེ་དང་ཆབས་ཅིག ཟི་ལིང་གྲོང་ཁྱེར་མེ་ཟོན་སྡེ་ཚན་གྱིས་འགྲིམ་འགྲུལ་ཉེན་རྟོག་པ་དང་། གྲོང་ཁྱེར་དང་གྲོང་ཚོ་འཛུགས་སྐྲུན། གྲོང་ཁྱེར་དོ་དམ། ས་ཁང་དོ་དམ་ལ་སོགས་སྡེ་ཚན་དང་མཉམ་དུ་བཅོས་སྐྱོང་བྱེད་སྒོ་སྤེལ་ཏེ། ལས་བགོས་འོས་འགན་ལྟར་སྐུལ་འདེད་ཕན་ཆོད་པ་བྱས། ད་སྔའི་བར་དུ་“མེ་ཟོན་རླངས་འཁོར་གྱི་འགྲོ་ལམ་བེད་སྤྱོད་དང་། ལམ་ཁ་འགག་པ། འགྲོ་ལམ་བཅད་པ་ལ་སོགས་ཀྱི་ཁྲིམས་འགལ་བྱ་སྤྱོད1321ཐག་གཅོད་བྱས་པ་དང་། འགྲིམ་འགྲུལ་ཉེན་རྟོག་སྡེ་ཚན་ལ་གྱོད་དོན73ཞུ་སྐྱེལ་བྱས།
མེ་ཟོན་རླངས་འཁོར་འགྲོ་ལམ་བཅད་ན་མྱུར་སྐྱོབ་ལ་གེགས་ཆེན་པོ་ཐེབས་སྲིད་པས་དུས་རྒྱུན་ཡིད་འཇོག་བྱ་རྒྱུ་གལ།
དུས་རྒྱུན་བལྟས་ཚོད་ཀྱིས་ཆོད་ཆེན་པོ་མེད་སྙམ་པའི་འགྲོ་ལམ་དེ་མེ་སྐྱོན་བྱུང་དུས“སྲོག་སྐྱོབ་ཀྱི་མྱུར་ལམ”ལྟ་བུ་ཡིན། 《ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་མེ་ཟོན་མེ་འགོག་བཅའ་ཁྲིམས》ཀྱི་དོན་ཚན28པའི་ནང་དུ། ལས་ཁུངས་གང་དང་མི་སྒེར་སུ་ཞིག་གིས་ཁ་བཀྲམ་རྒྱུ་ལམ་དང་བདེ་འཇགས་འགྲོ་ལམ། མེ་ཟོན་རླངས་འཁོར་གྱི་འགྲོ་ལམ་སོགས་བཀོལ་སྤྱོད་དང་། ལམ་སྒོ་འགོག་པ། ལམ་ཁ་གཅོད་པ་སོགས་བྱེད་མི་རུང་། མི་ཚོགས་འདུ་སའི་སྒོ་ལམ་དང་སྒེའུ་ཁུང་དུ་གེགས་དངོས་བརྩིགས་མི་རུང་བ་གཏན་འབེབས་བྱས་ཡོད། 《ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་མེ་ཟོན་མེ་འགོག་བཅའ་ཁྲིམས》ཀྱི་དོན་ཚན་དྲུག་ཅུ་བའི་ནང་དུ། མེ་ཟོན་རླངས་འཁོར་གྱི་འགྲོ་ལམ་བཀོལ་སྤྱོད་དང་ལམ་སྒོ་བཀག་ནས་སྒོ་ལམ་གཅོད་པ་ལ་སོགས་བྱ་སྤྱོད་གང་རུང་ཡོད་ན། ལས་ཁུངས་ལ་བཅོས་སྒྱུར་བྱེད་དགོས་པའི་བཀའ་བགོ་རྒྱུ་མ་ཟད། སྒོར་སྟོང་ལྔ་ཡན་ནས་ཁྲི་ལྔའི་མན་གྱི་ཆད་པ་གཅད་རྒྱུ་དང་། མི་སྒེར་ལ་ཐ་ཚིག་བསྒྲིགས་ནས་སྒོར་ལྔ་བརྒྱ་ཡི་ཆད་པ་གཅད་རྒྱུ་གཏན་ལ་ཕབ་ཡོད། 《ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་མེ་ཟོན་མེ་འགོག་བཅའ་ཁྲིམས》དོན་ཚན་ལྔ་ཅུ་བའི་ཁག་གསུམ་པའི་ནང་། འཕྲལ་བསྟུན་ལས་འགན་བསྒྲུབ་མཁན་མེ་ཟོན་རླངས་འཁོར་དང་། མྱུར་སྐྱོབ་རླངས་འཁོར། ལས་གཞིའི་མྱུར་སྐྱོབ་རླངས་འཁོར། ཉེན་རྟོག་རླངས་འཁོར་སོགས་ཀྱི་འགྲོ་ལམ་ལ་བཀག་རྒྱ་བཟོས་ན། ཐ་ཚིག་བསྒྲགས་ནས་སྒོར200མན་གྱི་ཆད་པ་གཅད་རྒྱུ། གལ་ཏེ་མཇུག་འབྲས་ཚབས་ཆེན་ཡིན་ན་ཉིན་ལྔ་ཡན་དང་ཉིན་བཅུ་མན་ལ་བཀག་སྡོམ་བྱ་རྒྱུ་མ་ཟད། སྒོར500མན་གྱི་ཆད་པ་གཅད་རྒྱུ་གཏན་ལ་ཕབ་ཡོད་དོ། །
རྩོམ་སྒྲིག་པ། ཁོན་ཐར་འཚོ།
