མཚོ་སྔོན་ཞིང་ཆེན་མི་དམངས་སྲིད་གཞུང་དྲ་བ།
ཉེ་ཆར། ས་གནས་ཁག་ཅིག་གི་སློབ་གྲྭ་འབྲིང་ཆུང་གི་སློབ་མའི་“སློབ་གསེང་སྐར་མ་10ལ་ཚོད་འཛིན་ཕོག་པའི་”གནད་དོན་ལ་སྤྱི་ཚོགས་ཐོག་དོ་ཁུར་རྒྱ་ཁྱབ་བྱུང་ཡོད། དེའི་ཐད་ཤིན་ཧྭ་གསར་འགྱུར་ཁང་གི་གསར་འགོད་པས་སློབ་གསོ་པུའི་འབྲེལ་ཡོད་འགན་འཁུར་བློ་མཐུན་ལ་བཅར་འདྲི་ཞུས་པ་རེད།
འགན་འཁུར་བློ་མཐུན་དེས། སློབ་གྲྭ་འབྲིང་ཆུང་གིས་སློབ་གསེང་ངལ་གསོ་བཀོད་སྒྲིག་བྱ་རྒྱུ་དེ་ཧ་ཅང་གལ་འགངས་ཆེ་ལ་དགོས་ངེས་ཤིག་ཀྱང་རེད། དེས་སློབ་མའི་སེམས་ཁམས་སྙོམས་སྒྲིག་དང་། ལུས་སེམས་ཞི་ལྷོད། གཟུགས་གཞི་བདེ་ཐང་། རྒྱང་འགྲིབ་སྔོན་འགོག་བཅས་ལ་ཕན་ཐོགས་ཡོད། སློབ་གསོ་པུས་སློབ་མའི་སློབ་གསེང་ངལ་གསོ་ལ་ཚད་མཐོའི་མཐོང་ཆེན་བྱས་ཏེ་སྤྱི་ལོ་2021ལོའི་ཟླ་9ཚེས་1ཉིན་ནས་བཟུང་ལག་ལེན་བསྟར་བའི་《ནར་མ་སོན་པའི་མི་ལ་སློབ་གྲྭས་སྲུང་སྐྱོབ་བྱེད་དགོས་པའི་གཏན་འབེབས》(སློབ་གསོ་པུའི་བཀའ་རྒྱ་ཨང་50པ)ནང་སློབ་མའི་སློབ་གསེང་དང་དེ་བཞིན་སློབ་ཁྲིད་དུས་ཚོད་མིན་པའི་ལུགས་མཐུན་གྱི་སྤེལ་རེས་དང་། རོལ་རྩེད། སློབ་ཁང་ཕྱིའི་བྱེད་སྒོ་སོགས་ཀྱི་གཏམ་སྤྱོད་རང་དབང་ལ་དགོས་མེད་ཀྱི་ཚོད་འཛིན་བྱེད་མི་ཆོག་ཅེས་ཁ་གསལ་བཏོན་ཡོད། དོན་དངོས་ཀྱི་ལས་ཀའི་ཁྲོད་སློབ་གྲྭ་འབྲིང་ཆུང་གིས་ཉིན་ལྟར་སྐར་མ་30ཡི་སློབ་གསེང་ལུས་རྩལ་བྱེད་སྒོ་གཅིག་གྱུར་ཐོག་བཀོད་སྒྲིག་བྱེད་དགོས་པ་དང་། སློབ་ཐུན་རེའི་སློབ་གསེང་དུ་སློབ་མ་རྣམས་སློབ་ཁང་ནས་དོན་ཏེ་འོས་འཚམ་གྱི་ལུས་པོ་སྦྱོང་བརྡར་དང་སེམས་པ་ཞི་ལྷོད་ཡོང་བ་བྱེད་དགོས་ཞེས་གསུངས་པ་རེད།
འགན་འཁུར་བློ་མཐུན་དེས། སློབ་གསོ་པུས་ས་གནས་དང་སློབ་གྲྭ་ཁག་གིས་རྒྱལ་ཁབ་ཀྱི་འབྲེལ་ཡོད་གཏན་འབེབས་དོན་འཁྱོལ་ནན་པོ་བྱེད་པའི་ཐད་སྔར་བས་ལྟ་སྐུལ་བྱ་རྒྱུ་དང་སློབ་གསོའི་ཆོས་ཉིད་དང་སློབ་མའི་ལུས་སེམས་འཕེལ་རྒྱས་ཀྱི་ཆོས་ཉིད་ལ་བརྩི་སྲུང་ཞུ་བ་ལས། “སློབ་མའི་བདེ་འཇགས་འགན་ལེན་”རྒྱུ་མཚན་དུ་བྱས་ནས་སློབ་མའི་དགོས་ངེས་ཀྱི་སློབ་གསེང་ངལ་གསོ་དང་བྱེད་སྒོར་ཚོད་འཛིན་བྱེད་པའི་བྱེད་སྟངས་ཡོ་བསྲང་མཐའ་གཅིག་ཏུ་བྱ་རྒྱུ། ས་གནས་དང་སློབ་གྲྭ་ཁག་གིས་ཚན་རིག་དང་མཐུན་པའི་ངང་དོ་དམ་དང་བདེ་འཇགས་དོགས་ཟོན་བྱ་ཐབས་ལག་བསྟར་བྱས་ནས་སློབ་ཁང་ཕྱིའི་ཁོར་ཡུག་གི་སྒྲིག་ཆས་གྲལ་བཤེར་དང་མི་སྣའི་ལས་རེས་ལ་ཤུགས་སྣོན་རྒྱག་པ། སློབ་མའི་བདེ་འཇགས་རྒྱུན་ཤེས་སློབ་གསོ་རྒྱག་རྒྱུར་ཤུགས་སྣོན་བརྒྱབ་ནས་བདེ་འཇགས་ལས་འཛོལ་གྱི་ཉེན་ཁ་དམའ་ཤོས་སུ་ཚོད་འཛིན་བྱས་ཏེ་སློབ་མ་ཚོ་སྤྲོ་སྣང་དང་བློ་བདེ་པོའི་ངང་འགུལ་སྐྱོད་ཐུབ་པ་ཡོང་བར་མཛུབ་སྟོན་བྱ་རྒྱུ། དེ་དང་ཆབས་ཅིག སློབ་གྲྭས་སློབ་གྲྭ་དང་ཁྱིམ་ཚང་དབར་མཐུན་སྦྱོར་འབྲེལ་བ་དམ་ཟབ་བཙུགས་ནས་ཁྱིམ་བདག་གི་བསམ་ཤེས་དང་སྤྱི་ཚོགས་ཀྱི་རྒྱབ་སྐྱོར་ཐོབ་རྒྱུར་བརྩོན་ལེན་བྱས་ཏེ། ཐུན་མོང་ཐོག་སློབ་མའི་སློབ་གསེང་གི་རྒྱུན་གཏན་བྱེད་སྒོ་འགན་ལེན་ཧུར་ཐག་བྱས་ནས་སློབ་མ་ཚོ་བདེ་ཐང་ངང་འཚར་ལོངས་དང་ཁྱོན་ཡོངས་ནས་འཕེལ་རྒྱས་ཡོང་བར་སྐུལ་འདེད་གཏོང་དགོས་པའི་ཐད་བླང་བྱ་འདོན་རྒྱུ་ཡིན་ཞེས་བཏོན་གནང་བ་རེད།
རྩོམ་སྒྲིག་པ། ཁོན་ཐར་འཚོ།
