ཀྲུང་དབྱང་སྒྲིག་ཨུད་དང་རྒྱལ་ཁབ་ལྟ་ཞིབ་ཨུ་ལྷན་གྱིས་བརྡ་ཁྱབ་བཏང་དོན་དུ།

 

     ཟླ་7པར་རྒྱལ་ཡོངས་སུ་ཀྲུང་དབྱང་གི་གཏན་འབེབས་དོན་ཚན་བརྒྱད་ཀྱི་དགོངས་དོན་ལས་འགལ་བའི་གནད་དོན་25420ཞིབ་བཤེར་ཐག་གཅོད་བྱས།

     ཀྲུང་དབྱང་སྒྲིག་ཨུད་དང་རྒྱལ་ཁབ་ལྟ་ཞིབ་ཨུ་ལྷན་གྱི་དྲ་ཚིགས་ཐོག་ཚེས་28ཉིན་རྒྱལ་ཡོངས་སུ་ཀྲུང་དབྱང་གི་གཏན་འབེབས་དོན་ཚན་བརྒྱད་ཀྱི་དགོངས་དོན་ལས་འགལ་བའི་གནད་དོན་ཞིབ་བཤེར་ཐག་གཅོད་བྱས་ཚུལ་གྱི་ཟླ་རེའི་སྙན་ཞུའི་གཞི་གྲངས་ཁྱབ་བསྒྲགས་བྱས་པ་དང་། བརྡ་ཁྱབ་ནང་མངོན་པར་གཞིགས་ན། འདི་ལོའི་ཟླ་བདུན་པར་རྒྱལ་ཡོངས་སུ་ཀྲུང་དབྱང་གི་གཏན་འབེབས་དོན་ཚན་བརྒྱད་ཀྱི་དགོངས་དོན་ལས་འགལ་བའི་གནད་དོན་25420ཞིབ་བཤེར་ཐག་གཅོད་བྱས་པ་དང་། མི་32905(དེའི་ནང་ཞིང་ཆེན་དང་པུའུ་རིམ་པའི་ལས་བྱེད་པ་3དང་ས་ཁུལ་དང་ཐིང་རིམ་པའི་ལས་བྱེད་པ་104བཅས་ཚུད་ཡོད་)པར་སྐྱོན་བརྗོད་སློབ་གསོ་དང་ཐག་གཅོད་བྱས་པ། མི་22621ལ་ཏང་སྲིད་ཀྱི་ཆད་པ་བཅད་པ་རེད།

     བརྡ་ཁྱབ་ལ་གཞིགས་ན། འདི་ལོའི་ཟླ་7པར་རྒྱལ་ཡོངས་སུ་ཕྱི་ཚུལ་རིང་ལུགས་དང་དཔོན་ཉམས་རིང་ལུགས་ཀྱི་གནད་དོན་ཁྱོན་12826ཞིབ་བཤེར་ཐག་གཅོད་བྱས་པ་དང་། མི་16799ལ་སྐྱོན་བརྗོད་དང་སློབ་གསོ་བཏང་བ་དང་ཐག་གཅོད་བྱས་པ་དེའི་ནང་“འགན་འཁྲི་གཙང་སྒྲུབ་དང་། དཔལ་འབྱོར་དང་སྤྱི་ཚོགས་འཕེལ་རྒྱས། སྐྱེ་ཁམས་ཁོར་ཡུག་སྲུང་སྐྱོང་བཅས་ལ་ཞབས་འདེགས་ཞུ་བའི་ཐད་འགན་མི་འཁུར་བ་དང་། ལས་དོན་མི་སྒྲུབ་པ། ལས་དོན་གང་བྱུང་དུ་སྒྲུབ་པ། ལས་དོན་སྒྲུབ་ཁུལ་བྱེད་པ་བཅས་ཀྱིས་འཕེལ་རྒྱས་སྤུས་ཚད་ཐོན་པོར་གཏོང་བར་ཤུགས་རྐྱེན་ངན་པ་བཟོས་པའི་”གནད་དོན་ཐོན་མང་ཤོས་ཡིན་པ་དང་། ཞིབ་བཤེར་ཐག་གཅོད་བྱས་པའི་གྲངས་འབོར་ཡང་10843ཟིན་པ་དང་མི་14323ལ་སྐྱོན་བརྗོད་དང་སློབ་གསོ་བཏང་བ་དང་ཐག་གཅོད་བྱས་པ་རེད།

     བརྡ་ཁྱབ་ལས་མངོན་པར་གཞིགས་ན། འདི་ལོའི་ཟླ་7པར་རྒྱལ་ཡོངས་སུ་སྐྱིད་འདོད་རིང་ལུགས་དང་བག་མེད་ཆུད་ཟོས་ཀྱི་གནད་དོན་ཁག་12594ཞིབ་བཤེར་ཐག་གཅོད་བྱས་པ་དང་མི་16106ལ་སྐྱོན་བརྗོད་དང་སློབ་གསོ་བཏང་བ་དང་ཐག་གཅོད་བྱས་ཡོད། དེའི་ནང་གཏན་འབེབས་ལས་འགལ་ཏེ་ཐོན་ཟོག་སྤུས་ལེགས་དང་ལག་རྟགས་སྤྲོད་ལེན་གྱི་གནད་དོན་ཁག་6576ཞིབ་བཤེར་ཐག་གཅོད་བྱས་པ་དང་། གཏན་འབེབས་ལས་འགལ་ཏེ་ཕོགས་སྣོན་དང་ཁ་གསབ་སྤྲད་པའམ་ཡང་ན་ཕན་བདེ་སྤྲད་པའི་གནད་དོན་ཁག་1500ཞིབ་བཤེར་ཐག་གཅོད་བྱས་པ། གཏན་འབེབས་ལས་འགལ་ཏེ་ཟ་འཐུང་བྱས་པའི་གནད་དོན་ཁག་3065ཞིབ་བཤེར་ཐག་གཅོད་བྱས་པ་རེད།