མཚོ་སྔོན་ཞིང་ཆེན་མི་དམངས་སྲིད་གཞུང་དྲ་བ།
ཟླ་7ཚེས་23ཉིན་ནས་བཟུང་2025ལོའི་སློབ་ཆེན་སློབ་མའི་ནུབ་རྒྱུད་འཆར་གཞིའི་བོད་ཀྱི་ཆེད་དོན་དང་བླངས་པ་གཅིག་རྗེས་གཉིས་མཐུད་ཐོག་བོད་དུ་འབྱོར་ནས་ཐོ་འགོད་བྱས་པ་རེད། 2025ལོའི་ནུབ་རྒྱུད་འཆར་གཞིའི་བོད་ཀྱི་ཆེད་དོན་དང་བླངས་པ་ཁྱོན་བསྡོམས་1200ལྷག་ཙམ་བསྡུས། དེ་དག་པེ་ཅིང་དང་། ཧོ་པེ། ཧོ་ནན། སི་ཁྲོན། བོད་ལྗོངས་སོགས་ཞིང་ཆེན་22(རང་སྐྱོང་ལྗོངས་དང་ཐད་སྐྱོང་གྲོང་ཁྱེར་)ནས་ཡོང་བ་དང་དེའི་ནང་ཞིབ་འཇུག་སློབ་མའི་སློབ་གསོ་རོགས་སྐྱོར་ཚོགས་པའི་མི་གྲངས་124ཡོད་པ་རེད།
ངོ་སྤྲོད་བྱས་པར་གཞིགས་ན། དང་བླངས་པ་བོད་དུ་ཐོ་འགོད་བྱས་རྗེས་དུས་ཡུན་ཉིན་བཞིའི་རིང་ལས་ཀར་མ་ཞུགས་གོང་གི་གསོ་སྦྱོང་བྱ་རྒྱུ་ཡིན་པ་རེད། གསོ་སྦྱོང་མཇུག་བསྒྲིལ་རྗེས། དང་བླངས་པ་རྣམས་ཞབས་ཞུའི་ལས་གནས་ཁག་ཏུ་བགོས་ནས་ཞབས་ཞུའི་ཁྱབ་ཁོངས་དེ་གྲོང་གསེབ་འཛུགས་སྐྲུན་དང་། གཞོན་ནུའི་ལས་དོན། གྲོང་གསེབ་སྐྱོན་བྲལ། རྒྱལ་སྲུང་མཐའ་སྲུང་། གྲོང་གསེབ་ཀྱི་སློབ་གསོ། གྲོང་གསེབ་ཀྱི་སྤྱི་ཚོགས་བཅོས་སྐྱོང་སོགས་དང་འབྲེལ་བ་ཡོད་པ་རེད།
དང་བླངས་པ་ཝུའུ་མིང་དབྱང་གིས་རང་ཉིད་ཀྱི་གདམ་གའི་སྐོར་གླེང་སྐབས་“ངའི་སྤོ་ལགས་ནི་ཏང་ཡོན་རྙིང་པ་ཞིག་ཡིན་པས། ང་ལ་རྒྱལ་ཁབ་ལ་ལེགས་སྐྱེས་འབུལ་བའི་བྱ་བ་བསྒྲུབ་དགོས་པའི་སློབ་སྟོན་ཡང་ཡང་གནང་གི་ཡོད། སློབ་ཆེན་ལོ་རིམ་དང་པོ་ནས་བཟུང་ངས་ནུབ་རྒྱུད་འཆར་གཞིའི་དང་བླངས་པའི་རྣམ་གྲངས་ཤེས་རྟོགས་བྱུང་རྗེས་དེའི་ནང་ཞུགས་རྒྱུའི་སེམས་ཐག་བཅད་པ་ཡིན། ད་ཆ་བོད་ལྗོངས་སུ་ཡོང་ཐུབ་པ་འདི་ཁོ་བོའི་བསམ་པར་དོན་སྙིང་ཆེན་པོ་ལྡན་འདུག་སྙམ་”ཟེར།
དང་བླངས་པ་ལིའུ་ཀྲེན་ཧྥུང་ལ་བོད་དུ་ཡོང་བའི་རྒྱུ་རྐྱེན་དམིགས་བསལ་ཅིག་ཡོད། ཁོང་གི་གཅེན་མོ་ལོ་བཅུའི་སྔོན་ལ་བོད་ལྗོངས་སུ་ཡོང་ནས་འདི་གར་སྤྲོ་སེམས་འཁོལ་ཞིང་དཀའ་བ་སྤྱད། ད་ལྟ། ཁོ་པས་གཅེན་མོའི་ལས་ཀ་བྱེད་མྱོང་སའི་ས་ཆར་ཡོང་ནས་ཁོ་མོས་འབད་བརྩོན་བྱེད་མྱོང་སར་བལྟ་རེ་བྱེད་ཀྱི་ཡོད།
