མཚོ་སྔོན་གྱིས་ཕྱོགས་བསྡུས་བཅོས་སྐྱོང་ལྟེ་གནས་ཚད་ལྡན་ཅན་འཛུགས་སྐྲུན་ལ་སྐུལ་འདེད་བཏང་བ།

“དེ་རིང་ངར་དངུལ་མ་སྤྲད་ན་ང་ཁྲོམ་རའི་ནང་སྡོད་ཀྱི་ཡིན། ཁྱེད་ཚོས་ཇི་ལྟར་བྱེད་དགོས་མིན་ལྟོས་ཤིག” མཚོ་སྔོན་ཞིང་ཆེན་ཟི་ལིང་གྲོང་ཁྱེར་མཚོ་བོད་ས་མཐོའི་ཞིང་ཞོར་ཐོན་རྫས་བསྡུ་འགྲེམས་ལྟེ་གནས་སུ་ཡུལ་གཞན་གྱི་ཚོང་པ་ཞིག་དང་ཚོང་དུད་ཅིག་དབར་འགལ་བ་བྱུང་ཡོད།

ཕྱོགས་གཉིས་པོས་མཁོ་སྤྲོད་གན་རྒྱ་བཞག་མོད། འོན་ཀྱང་དངོས་ཟོག་སྐྱེལ་འདྲེན་གྱི་བརྒྱུད་རིམ་ཁྲོད་འཕྲོ་བརླག་ཕྱིན་པའི་དབང་གིས་ཕྱོགས་གཉིས་པོའི་དབར་རིན་གོང་ཐད་མི་མཐུན་པ་བྱུང་བ་དང་སུས་ཀྱང་གྱོང་ཁུར་འདོད་བྱེད་ཀྱི་མེད། དེ་གར་འདུམ་འགྲིག་ལ་ཡོང་བའི་ཁྲོམ་རའི་དྲ་མིག་པས་གནས་ཚུལ་དེ་ཉེན་བརྡའི“སེར་མདོག”གི་རིམ་པར་གཏན་འཁེལ་བྱས་པ་མ་ཟད། འཕྲལ་དུ་ཁྲོམ་རའི་ཕྱོགས་བསྡུས་བཅོས་སྐྱོང་ལྟེ་གནས་ལ་གོང་ཞུ་བྱས་པ་རེད།

མཚོ་བོད་ས་མཐོའི་ཞིང་ཞོར་ཐོན་རྫས་བསྡུ་འགྲེམས་ལྟེ་གནས་ནི་མཚོ་བོད་ས་མཐོའི་ཞིང་ཞོར་ཐོན་རྫས་བསྡུ་འགྲེམས་ལྟེ་གནས་ཆེ་ཤོས་དེ་ཡིན་ཞིང་། གནས་ཡུལ་དམིགས་བསལ་ཡིན་པའི་དབང་གིས་དེ་གར་གྲོང་ཚོ་དང་སྡེ་ཁུལ་རིམ་པའི་ཕྱོགས་བསྡུས་བཅོས་སྐྱོང་ཆེད་མངགས་ལྟེ་གནས་བཙུགས་ཡོད།

དེ་ཉིན་མི་དམངས་ཉེན་རྟོག་པས་སྔོན་ལ་ཕྱོགས་གཉིས་པོར་སློབ་གསོ་བརྒྱབ་པ་དང་འབྲེལ། སྐོར་སྐྱོད་ཁྲིམས་དཔོན་གྱིས་ས་གནས་ས་ཐོག་ཏུ་འཕྲོ་བརླག་ཕྱིན་པའི་ཤིང་ཏོག་གི་རིན་ཐང་སྒམ་རེ་རེ་བཞིན་ཞིབ་བཤེར་གཏན་འཁེལ་་བྱས་ཤིང་། མཉམ་འབྲེལ་གྲོས་མོལ་བྱས་པ་བརྒྱུད། གན་རྒྱའི་རིན་གོང་ནས་འཕྲོ་བརླག་ཕྱིན་པའི་རིན་གོང་འཐེན་པ་དང་དུས་བགོས་དངུལ་འཇལ་གྱི་ཇུས་གཞི་བཏོན་པར་མཐར་ཕྱོགས་གཉིས་པོས་དང་ལེན་བྱས་པ་རེད།

ཆེད་བསྐོས་མི་དམངས་འདུམ་འགྲིག་པ་མཱ་ཅི་ཡོན་གྱིས“ཁྲོམ་རའི་ཕྱོགས་བསྡུས་བཅོས་སྐྱོང་ལྟེ་གནས་ཀྱིས་ཁྲོམ་རའི་དམངས་ཁྲོད་ཀྱི་དངུལ་བུན་གཏོང་ལེན་རྩོད་གཞི་དང་སྐྱེལ་འདྲེན་གན་རྒྱའི་རྩོད་གཞི་སོགས་ལ་ཆེད་མངགས་འདུམ་འགྲིག་ཐག་གཅོད་བྱེད་ཀྱི་ཡོད”ཁྲོམ་རའི་ཕྱོགས་བསྡུས་བཅོས་སྐྱོང་ལྟེ་གནས་ཀྱིས་ཉེན་ཁའི་རིམ་པའི་དཔྱད་བསྡུར་ལ་གཞིགས་ཏེ་འགལ་བའི་རིམ་པ་དམའ་བ་ནས་མཐོ་བའི་བར“སྔོ་སེར་ལི་དམར་བཅས”ཉེན་བརྡའི་རིམ་པ་བཞི་རུ་དབྱེ་ཡོད། རིམ་པ་ཞིག་ཏུ་འགལ་བ་འདུམ་འགྲིག་མ་ཐུབ་ཚེ་གོ་རིམ་ལྟར་རིམ་པ་རེ་རེ་བཞིན་མཐོ་རུ་བཏང་ནས་ཐག་གཅོད་བྱེད་ཀྱི་ཡོད་ཅེས་ངོ་སྤྲོད་བྱས་པ་རེད།

ད་ལོའི་ཟླ་3ཚེས་1ཉིན། ཟི་ལིང་གྲོང་ཁྱེར་གྲོང་བྱང་ཆུས་ཕྱོགས་བསྡུས་བཅོས་སྐྱོང་ལྟེ་གནས་ཀྱི་སྒོ་བྱང་གི་ཡོལ་བ་དངོས་སུ་ཕྱེ་ནས་འཁོར་རྒྱུག་བྱེད་འགོ་ཚུགས་ཤིང་། ཆུས་ཁོངས་གཏོགས་ཀྱི་ཚན་པ་12དང་། ཁྲིམས་རྩོད་པའི་ལས་དོན་ཁང་15 འདུམ་འགྲིག་ལས་དོན་ཁང་4བཅས་ཀྱི་མི་40ཙམ་འདིར་བཅའ་ཞུགས་བྱས་པ་དང་། གཏུག་བཤེར་འདུམ་འགྲིག་དང་ཡིག་འབུལ་ཞུ་བཅར་སྣེ་ལེན་སོགས་ཀྱི་སྐར་ཁུང་6བཙུགས་ཡོད་པ་རེད།

ཉེ་བའི་ལོ་ཤས་རིང་། སྣ་མང་ཞབས་ཞུ་གཞི་གཅིག་ཏུ་འདུས་པའི“གཅིག་འཐུས་རྣམ་པའི”ལས་སྟེགས་དེ་དག་བརྒྱུད། མཚོ་སྔོན་གྱི་ཐག་གཅོད་མ་ཐུབ་པའི་གྱོད་གཞི་ཁག་གཅིག་ཐག་གཅོད་ནུས་ལྡན་ཐུབ་པ་དང་། འགལ་བ་དང་རྩོད་གཞི་དང་སྤྱི་ཚོགས་བདེ་འཇགས་ཀྱི་ཉེན་ཁའི་གནད་དོན་1947གྲལ་བཤེར་ཐུབ་ཡོད། “ད་ལོ་མཚོ་སྔོན་གྱིས་ཞིང་ཆེན་ཡོངས་ཀྱི་གཅིག་གྱུར་གྱི་ཕྱོགས་བསྡུས་བཅོས་སྐྱོང་གི་ཆ་འཕྲིན་ལས་སྟེགས་འཛུགས་སྐྱོང་ལས་དོན་སྤེལ་རྒྱུ་བཀོད་སྒྲིག་བྱས་ཏེ། ཕྱོགས་བསྡུས་བཅོས་སྐྱོང་ཆ་འཕྲིན་ལས་སྟེགས་དང་གྲངས་གཞི་ཆེན་པོ་དང་མི་ཐབས་རིག་ནུས་ཀྱི་ལག་རྩལ་གསར་པ་མཉམ་འདྲེས་བཀོལ་སྤྱོད་འཚོལ་ཞིབ་བྱས་ནས། ཕྱོགས་བསྡུས་བཅོས་སྐྱོང་ལས་སྒོའི་གྲངས་གཞིའི་རིག་ནུས་དབྱེ་ཞིབ་དང་སྔོན་བརྡ་གཏོང་བར་རྒྱུན་ཆད་མེད་པར་ཤུགས་སྣོན་རྒྱག་རྒྱུ་རེད”ཅེས་མཚོ་སྔོན་ཞིང་ཨུད་སྲིད་ཁྲིམས་ཨུ་ལྷན་གཞི་རིམ་སྤྱི་ཚོགས་བཅོས་སྐྱོང་ཁྲུའུ་ཡི་འགན་འཁུར་བ་ཞེ་ཧྲེང་ཐུང་གིས་བརྗོད་པ་རེད།