ཁྲག་ནང་གི་མངར་ཆ་འཕར་སླ་ཤོས་ཀྱི་ཟས་གཙོ་བོ་འབྲས་མིན།

མི་མང་པོ་ཞིག་གིས་རང་གི་ཁྲག་གི་མངར་ཆ་ཚོད་འཛིན་ཏེ། གཅིན་སྙིའི་ནད་ སྔོན་འགོག་བྱེད་དགོས་ཚེ་ཐོག་མར“འབྲས་དང་མོག་མོག་སོགས་གཅོད་དགོས་པར”བསམ་གྱི་ཡོད། འོན་ཀྱང་དོན་དངོས་ཐོག་རྒྱུན་ལྡན་གྱི་འཚོ་བའི་ཁྲོད་དུ“སྣུམ་ཚིལ་ཉུང་བའི་བཅུད་ཡང་ཟས་རིགས་”ཡིན་པར་ངོས་འཛིན་བྱས་པའི་ཟས་རིགས་གཙོ་བོ་ཁག་ཅིག་གིས་ཁྲག་གི་མངར་ཆ་དེ་བས་ཀྱང་མྱུར་དུ་འཕར་འཇུག་གི་ཡོད།

གལ་ཏེ་ཁྱེད་རང་ཟ་མ་ཟོས་རྗེས་རྒྱུན་དུ་གཉིད་ཅོག་རྒྱག་པ་དང་། ཁ་སྐོམ་པ། རྒྱུ་མཚན་མེད་པར་སེམས་འཚབ་པ་བཅས་བྱུང་ན། དེ་ནི་ཁྱེད་ཀྱི་ཁྲག་གི་མངར་ཆ“ཚོད་འཛིན་ཤོར་བའི”མཚོན་རྟགས་ཡིན། གཤམ་གྱི“མངོན་མེད་དུ་ཁྲག་གི་མངར་ཆ་མྱུར་དུ་འཕར་བར་བྱེད་པའི”ཟས་རིགས་གཙོ་བོ6པོ་འདི་དག་གང་ཐུབ་ཀྱིས་ཉུང་ཙམ་མཆོད་དགོས།

གཅིག ཁྲག་གི་མངར་ཆ་མྱུར་དུ་འཕར་བར་བྱེད་པའི་ཟས་རིགས་གཙོ་བོ6ལ་དོགས་ཟོན་གནང་རོགས།

1. ལིང་ཕི། (凉皮)  ཕྱེ་དང་སིང་ཕྱེ་ལས་བཟོས་པ་ཡིན་ཞིང་། འབྱར་བག་གི་རང་བཞིན་ཆེ་བས་ཕོ་རྒྱུས་མྱུར་དུ་འཇུ་ལེན་བྱེད་སླ་ཞིང་ཁྲག་གི་མངར་ཆ་དྲག་ཏུ་འཕར་བར་བྱེད། གལ་ཏེ་དེའི་སྟེང་ཚི་ལུ་དང་ཚ་ནུས་མཐོ་བའི་ཏིལ་སྐྱོ་བསྲེས་ཚེ། ཟས་རྗེས་ཀྱི་ཁྲག་གི་མངར་ཆ་མཐོ་བའི་དུས་ཡུན་ཇེ་རིང་དུ་གཏོང་སྲིད།

2. ཙོང་བག་སྣུམ་སྲེག་མ། (葱油饼) གྲོ་ཞིབ་དང་སྣུམ་ཚིལ་མང་པོ་བསྲེས་ནས་བཟོས་པའི་ཕྱེ་ཟས་ཤིག་ཡིན། ཚི་ལུ་མང་པོས་ལུས་སྟེང་གི་གཤེར་རྨེན་རྒྱུའི་ནུས་པ་ཉམས་སུ་བཅུག་སྟེ། ཟས་རྗེས་ཀྱི་ཁྲག་གི་མངར་ཆ་མགྱོགས་མྱུར་གྱིས་འཕར་དུ་འཇུག

3. མངར་ཆ་དང་སྣུམ་མང་པོ་བསྲེས་པའི་ཟས་རིགས། (སྒོང་འབྲས་དང་། ཡུའུ་ཐིའོ། ཏིལ་རིལ་སྣུམ་བཙོས་སོགས་)

 སྒོང་འབྲས། ཞག་ལུས་འབྲས་ལ་སྣུམ་མང་པོ་བླུགས་ཏེ་བསྐྱར་དུ་བརྔོས་པས་ཚ་ནུས་ཧ་ཅང་མཐོ།

ཡུའུ་ཐིའོ། (油条) དྲོད་ཚད་མཐོན་པོས་སྣུམ་ནང་བཙོས་པའི་ཕྱེ་ཟས་ཡིན་པས་ཁྲག་གི་མངར་ཆ་འཕར་བ་མ་ཟད། ཁྲག་ཚིལ་ཡང་མཐོ་རུ་བཏང་ནས་ཁྲག་གི་མངར་ཆ་མར་འབབ་དཀའ་བར་བྱེད།

 ཏིལ་རིལ་སྣུམ་བཙོས་མ། ཁྲག་གི་མངར་ཆ་འཕར་སླ་བའི་འབྲས་དང་། མངར་ཆ། སྣུམ་མང་པོ་བཅས་ལྡན་པས་ཁྲག་གི་མངར་ཆ་འཕར་ཚད་ཉིས་བརྩེགས་སུ་གཏོང་།

4. ནན་ཀྭའི་ཐུག་པ། (南瓜粥) ནན་ཀྭ་རླངས་བཙོས་བྱས་ན་ཁྲག་གི་མངར་ཆར་ཕོག་ཐུག་ཆེན་པོ་མེད་མོད། འོན་ཀྱང་ནན་ཀྭའི་ཐུག་པ་གར་པོ་བསྐོལ་རྗེས་དེའི་ནང་གི་བཅུད་རྣམས་འབྱར་བག་ཏུ་སོང་སྟེ། ནན་ཀྭའི་ཐུག་པ་དཀར་ཡོལ་གང་བཏུང་ན་ཐད་ཀར་མངར་ཆུ་འཐུང་བ་དང་ཁྱད་པར་མེད།

5. བག་ཐུག གྲོ་ཞིབ་ལས་བཟོས་ཤིང་བཙོས་ནས་ཁུ་བ་ལྟ་བུར་གྱུར་རྗེས་ཕོ་བས་འཇུ་སླ་བས། འཐུང་མ་ཐག་ཁྲག་གི་མངར་ཆ་མྱུར་དུ་འཕར་ནས་བརྟན་པོ་ཡོང་དཀའ།

6. མངར་སྣུམ་བག་ལེབ། (糖油饼) སྤུས་ལེགས་གྲོ་ཞིབ་དང་། ཚི་ལུ། མངར་ཆ་བཅས་གསུམ་མ་ལུས་འཛོམས་པས་ཁྲག་གི་མངར་ཆ་ལ་ཕོག་ཐུག་དྲག་པོ་གཏོང་གི་ཡོད།

གཉིས། ཁྲག་གི་མངར་ཆ་བརྟན་པོ་ཡོང་བར་བྱེད་པའི་ཐབས་མཆོག་ནི། ཟས་གཙོ་བོ་བརྗེ་བ་དང་། བཟའ་ཚད་ཚོད་འཛིན་བྱེད་པ། ཟ་སྟངས་ཀྱི་གོ་རིམ་བསྒྱུར་བ་བཅས་ཡིན།

ཁྲག་གི་མངར་ཆ་ཚོད་འཛིན་གྱི་གཙོ་གནད་ནི་“ཟས་རྦད་དེ་བཅད་ནས་མི་ཟ་བ་” མ་ཡིན་པར། ཟ་སྟངས་ཀྱི་ཐབས་ཇུས་འདི་དག་ལ་དོ་སྣང་བྱེད་དགོས་ཏེ།

1. ཟ་སྟངས་ཀྱི་གོ་རིམ་བསྒྱུར་བ། ཐོག་མར་དྭངས་མོའི་ཁུ་བ་འཐུང་བ་➔སྔོ་ཚལ་ཟ་བ་ ➔ཤ་དང་སྒོ་ང་ཉ་རིགས་ཟ་བ་ ➔མཐའ་མར་འབྲས་དང་བག་ལེབ་སོགས་ཟས་རིགས་གཙོ་བོ་ཟ་བ། དེ་ལྟར་སྔོ་ཚལ་དང་ཤ་རིགས་ཀྱིས་ཕོ་བའི་ནང་ཐོག་མར་སོང་ནས་འཇུ་སའི་སྟོང་ཆ་ཟིན་པར་བྱས་ཚེ། རྗེས་སུ་བཟས་པའི་ཟས་ཀྱི་མངར་ཆ་ལུས་ལ་བསྡུ་ལེན་བྱེད་ཚད་ཇེ་དལ་དུ་གཏོང་ཐུབ།

2. སྤྱིའི་བཟའ་ཚད་ཚོད་འཛིན་བྱེད་པ། ལྟོ་དུས་རེའི་ཟས་གཙོ་བོ་དེ་རང་གི་ཁུ་ཚུར་གཅིག་གི་ཆེ་ཆུང་ཙམ་ཏུ་ཚོད་འཛིན་བྱེད་དགོས། ཟ་མ་ཟ་སྐབས་བཅུ་ཆ་བདུན་བརྒྱགས་ཙམ་བཟས་ཏེ། ཅུང་ལྟོགས་པའི་ཚོར་སྣང་ཡོད་པ་བྱས་ན་འཚོ་བཅུད་ཐོབ་པ་མ་ཟད་ཁྲག་གི་མངར་ཆ་འཕར་བ་འགོག་པར་ཕན།

3. ཟས་གཙོ་བོ་རགས་ཞིབ་སྡེབ་སྒྲིག་བྱེད་པ། འབྲས་དང་གྲོ་ཞིབ་རྐྱང་པ་མི་ཟ་བར། དེའི་ནང་དུ་ནས་དང་། མ་རྨོས་ལོ་ཏོག སྲན་མའི་རིགས་སོགས་འབྲུ་རིགས་རྩིང་པོ་བསྲེས་ནས་བཟས་ཚེ། ཟས་རྗེས་ཀྱི་ཁྲག་གི་མངར་ཆ་མྱུར་དུ་འཕར་བ་བཀག་སྟེ་བརྟན་པོར་གནས་ཐུབ།

གསུམ། ཚབ་བྱེད་ཆེས་ལེགས་པའི་ཟས་རིགས་ཏེ། ཉིན་རེར་ཡུག་པོ་ཅུང་ཟད་སྣོན་དགོས།

འབྲུ་རིགས་རྩིང་པོའི་ཁྲོད་དུ། ཡུག་པོའི་ནང་ཕོ་རྒྱུའི་འཇུ་སྟོབས་ལ་ཕན་པའི་ཚི་སྣ་དང་བཅུད་རྫས་ཕུན་སུམ་ཚོགས་པར་འདུས་ཤིང་། དེས་ཁྲག་གི་མངར་ཆ་བརྟན་པོ་བཟོ་བ་མ་ཟད་ཁྲག་ཚིལ་ཡང་ལེགས་སུ་གཏོང་ཐུབ།

ཟ་སྟངས། ཡུག་པོ་རྗེན་པ་སྔོན་ལ་ཆུར་སྦངས་ནས། འབྲས་དང་བསྡུར་ཚད་1:3བྱས་ཏེ་འབྲས་ཆན་ནང་མཉམ་དུ་བཙོས་ནས། ཉིན་རེའི་གསུམ་ཆ་གཅིག་གི་ཟས་གཙོ་བོའི་ཚབ་བྱེད་དགོས།

ཉོ་སྟངས་ལ་དོ་སྣང་བྱ་རྒྱུ། ཚོང་ཁང་ནས་ཉོ་སྐབས་ཁུག་མའི་སྟེང་གི་རྒྱུ་ཆའི་རེའུ་མིག་ནང་“ཡུག་པོ་”རྐྱང་པ་ལས་མེད་པའི་རང་བྱུང་ཐོན་རྫས་ཉོ་དགོས། མངར་ཆ་བསྲེས་པའི་མྱུར་ཟས་ཀྱི་རིགས་མི་ཉོ་བར་གཟབ་དགོས།

གཅིན་སྙིའི་ནད་སྔོན་འགོག་གི་བྱ་སྤྱོད་ཕྱོགས་བསྡོམས།

འབྱར་བག་ཏུ་གྱུར་སླ་བ་དང་། མངར་ཆ་མཐོ་བ། སྣུམ་མང་བའི་ཟས་རིགས་ཁག་དང་རིང་དུ་གྱེས་པར་བྱ་དགོས། “ཁུ་བ་-སྔོ་ཚལ་-ཤ་རིགས་-ཟས་གཙོ་བོ་”བཅས་ཀྱི་ཟ་བའི་གོ་རིམ་རྒྱུན་འཁྱོངས་བྱེད་པ། ཡུག་པོ་དང་ནས་སོགས་འབྲུ་རིགས་རྩིང་པོ་མང་ཙམ་བསྟེན་དགོས། ཟས་གཙོ་བོ་ལེགས་པར་བདམས་ནས་བཟས་ན་ད་གཟོད་ཁྲག་གི་མངར་ཆ་བརྟན་པོར་གནས་ཤིང་བདེ་ཐང་ལྡན་པར་འགྱུར་ཐུབ།