འོ་མ་མཆོད་སྟངས་འདི་སང་ཞོགས་ནས་བཟུང་ཚོད་ལྟ་གྱིས་ཤིག

ཚན་རིག་དང་མཐུན་པའི་སྒོ་ནས་དགུན་དུས་བསྟེན་ན་མཆོག་ཏུ་གྱུར་པའི་“འོ་མའི་སྦྱོར་ཐབས”རྣམ་པ་གཉིས་དེས་ཁྲག་ཚིལ་དང་ཁྲག་མངར་གཅོག་པ། རྒྱུ་མ་གསོ་བ། དེ་བཞིན་བཞིན་མདངས་རྒྱས་པར་བྱེད་པར་ཕན་ནུས་ལྡན།

དྲ་གྲོགས་རྣམ་པ། ཁྱེད་ཀྱིས་རྒྱུན་དུ་ཞོགས་ཟས་སུ་འོ་མ་རྐྱང་རྐྱང་བཞེས་ཀྱི་ཡོད་དམ། དེ་ལྟར་ཡིན་ན། དགུན་དུས་འདིར་འོ་མ་གཅིག་པུར་མི་བསྟེན་པར། དེའི་ནང་དུ་ཤུན་མཁྲེགས་ཤིང་ཏོག་དང་འབྲུ་རིགས་ཁ་ཤས་བསྣན་ནས་བསྟེན་དང་། དེ་ནི་སྤྱིར་བཏང་གི་འོ་མ་ཙམ་མིན་པར། སྙིང་དང་ཁྲག་རྩ་སྲུང་སྐྱོབ་དང་། ཁྲག་མངར་སྙོམས་སྒྲིག་བྱེད་པའི་“ལུས་ཟུངས་གསོ་བའི་བདུད་རྩི་”ལྟ་བུར་འགྱུར་ངེས་རེད།དེ་རིང་ངས་ཁྱེད་རྣམ་པར་དགུན་ཁ་བསྟེན་ན་ཧ་ཅང་འཕྲོད་པའི་“མཆོག་གྱུར་བཏུང་བྱ་”རིགས་གཉིས་ངོ་སྤྲོད་ཞུ་རྒྱུ་ཡིན།

དང་པོ། “མཐོ་གསུམ་ནད་པའི་”མཆོག་གྱུར་བཏུང་བྱ།— གྲོ་ཆག་དང་ཤིང་ཏོག་སྐེད་འབྲས་ཀྱི་འོ་མ། (མཐོ་གསུམ་ནི་ཁྲག་ཤེད་མཐོ་བ། ཁྲག་ཚིལ་མཐོ་བ། ཁྲག་མངར་མཐོ་བ་བཅས་སོ།།)

བཟོ་སྟངས།

གྲོ་ཆག་ཁེ་30-50 དང་། ཤིང་ཏོག་སྐེད་འབྲས་ཁེ་10-15 འོ་མ་ཧའོ་ཧྲེང་150བཅས་མཉམ་དུ་གློག་གི་སྲུབ་འཁོར་ནང་བླུགས་ནས་ཞིབ་མོར་འཐག་རྗེས་བསྟེན་ཆོག

བཏུང་བྱ་འདིའི་ཕན་ནུས་གཙོ་བོ།

1.ཁྲག་རྩ་སྲུང་ཞིང་ཁྲག་ཚིལ་གཅོག་པ།

 ཤིང་ཏོག་སྐེད་འབྲས་ཀྱི་ནང་ཁྲག་རྩ་ལ་ཕན་པའི་ཚིལ་དང་འཚོ་བཅུད་K ཡོད། 

2.  ཁྲག་མངར་བརྟན་པོ་བཟོ་བ།

 གྲོ་ཆག་ཟོས་རྗེས་གྲོད་པ་འགྲངས་པའི་ཚོར་སྣང་སྟེར་ལ། ཟས་ཟོས་རྗེས་ཀྱི་ཁྲག་མངར་འཕར་ཚད་འགོར་དུ་གཏོང་བས། གཅིན་སྙི་ཟ་ཁུའི་ནད་པ་རྣམས་ལ་ཧ་ཅང་འཚམ་པོ་ཡོད། (དམིགས་བསལ་གཅིན་སྙི་ཡོད་མཁན་གྱིས་མངར་ཆ་མེད་པའི་གྲོ་ཆག་འདེམས་དགོས།)

3. རྒྱུ་མ་གསོ་བ།

 རྒྱུ་མའི་ནང་གི་སྲིན་ཕྲན་བཟང་པོ་མང་དུ་གཏོང་བ་དང་། བཤང་བ་བདེ་བ། རྒྱུ་མའི་ཚ་བ་འཇོམས་པ་བཅས་ཀྱི་ཕན་ནུས་ཁྱད་པར་བ་ལྡན་ཡོད།

དོ་སྣང་བྱ་དགོས་པ།

 ཕོ་བ་དང་མཆེར་པ་གྲང་བའི་ནད་པ་དང་། རྒྱུ་ཆ་འདི་དག་མ་འཕྲོད་མཁན་གྱིས་བསྟེན་མི་རུང་། འདི་ཞོགས་ཟས་སུ་བསྟེན་སྐབས་བག་ལེབ་སོགས་ཟས་གཞན་ཉུང་ཙམ་མཆོད་ན་ལེགས།

 

གཉིས་པ། “ཤ་མདངས་རྒྱས་ཤིང་པགས་པ་གསོ་བའི” གསང་ཐབས། — བ་དམ་དང་ཁམ་བུ་མངར་མོའི་འོ་མ།

བཟོ་སྟངས།

 བ་དམ་ཁེ་10དང་། ཁམ་བུ་མངར་མོའི་ནང་སྙིང་ཁེ་10 འོ་མ་ཧའོ་ཧྲེང་200བཅས་མཉམ་དུ་འཐག་དགོས། (མངར་དྲགས་ན་སྦྲང་རྩི་ཉུང་ཙམ་བླུགས་ཆོག་ཀྱང་། ཁྲག་མངར་ཡོད་མཁན་གྱིས་མ་བླུགས་ན་ལེགས།)

བཏུང་བྱ་འདིའི་ཕན་ནུས་གཙོ་བོ།

1. གློ་བ་གསོ་ཞིང་གློ་ལུ་འགོག་པ།

དགུན་ཁ་སྐམ་ཤས་ཆེ་བའི་སྐབས་སུ། བ་དམ་གྱིས་ཕོ་བ་གསོ་བ་དང་། ཁམ་བུ་མངར་མོས་གློ་བ་བརླན་པར་བྱེད་པས། མིད་པ་སྐམ་པ་དང་གློ་ལུ་བ་སོགས་ལ་ཕན་ཐོགས་ཆེ།

2. ངོ་གདོང་མཛེས་པོ་ཆགས་པ།

དེའི་ནང་གི་འཚོ་བཅུད་Eལ་རྒས་པ་འགོག་པ་དང་། ཤ་མདངས་གསོ་བ། པགས་པ་འཇམ་པོ་བཟོ་བའི་ནུས་པ་ཡོད།

3. བཤང་བ་བདེ་བ།

གནམ་གཤིས་སྐམ་པའི་རྐྱེན་གྱིས་བཤང་བ་སྐམ་པོ་ཆགས་མཁན་རིགས་ལ་ཤིན་ཏུ་ཕན།

དོ་སྣང་བྱ་དགོས་པ།

གྲུམ་བུའི་ནད་པ་རྣམས་ཀྱིས་མང་པོ་བསྟེན་རྒྱུ་མེད་པ་དང་། ཉིན་རེར་ཧའོ་ཧྲེང་300ལས་མང་བ་མ་མཆོད་ན་ལེགས། རྒྱུ་ཆ་འདི་དག་མ་འཕྲོད་མཁན་གྱིས་གཏན་ནས་བསྟེན་མི་རུང་།

མཇུག་བསྡོམས་སློབ་སྟོན།

འོ་མའི་ནང་དུ་སྨན་གྱི་ནུས་པ་ལྡན་པའི་ཟས་རིགས་འདི་དག་བསྲེས་ན། བྲོ་བ་ཞིམ་ལ་འཕྲོད་བསྟེན་ལའང་ཕན་པ་ཆེན་པོ་ཡོད་པས། སང་ཉིན་ཞོགས་པ་ནས་བཟུང་ཚོད་ལྟ་རེ་གནང་དང་། ཁྱེད་ཀྱི་སྐུ་གཟུགས་བདེ་ཐང་ཡོང་བའི་སྨོན་འདུན་ཞུ།