མཚོ་སྔོན་ཞིང་ཆེན་མི་དམངས་སྲིད་གཞུང་དྲ་བ།
རང་རྒྱལ་རྩ་ཁྲིམས་ཀྱི་གླེང་གཞིའི་ནང་དོན་གཙོ་བོ་ནི་རྒྱལ་ཁབ་ཀྱིས་འཐབ་རྩོད་བྱས་པའི་ལོ་རྒྱུས་དང་། རྩ་ཁྲིམས་བཟོ་བའི་དམིགས་ཡུལ། རྒྱལ་ཁབ་ཀྱི་གཞི་རྩའི་ལས་འགན་དང་འབད་འཐབ་བྱེད་པའི་དམིགས་ཚད་སོགས་བཀོད་ཡོད་ལ། དེ་ཡང་ནང་དོན་གསུམ་གྱི་ཆ་ནས་ངོ་སྤྲོད་ཅུང་ཙམ་བྱས་ན།
དང་པོ། ཀྲུང་གོའི་ལོ་རྒྱུས་འཕེལ་རིམ་དང་རྩ་ཁྲིམས་བཟོ་བའི་རྒྱབ་ལྗོངས་ལ་ཕྱི་མིག་བལྟས་པ། དེའི་ནང་དུ་ཀྲུང་གོ་བཀས་བཀོད་རྒྱུད་འཛིན་གྱི་སྲིད་དབང་སྒེར་གཅོད་ལམ་ལུགས་ཀྱི་རྒྱལ་ཁབ་ནས་མི་དམངས་དམངས་གཙོས་སྲིད་དབང་སྒེར་འཛིན་བྱས་པའི་སྤྱི་ཚོགས་རིང་ལུགས་ཀྱི་རྒྱལ་ཁབ་ཏུ་གྱུར་བའི་ལོ་རྒྱུས་ཀྱི་འཕེལ་རིམ་གླེང་ཞིང་། ཀྲུང་གོ་མི་དམངས་ཀྱིས་གུང་ཁྲན་ཏང་གི་མགོ་ཁྲིད་འོག་དུས་ཡུན་རིང་པོའི་གསར་བརྗེའི་འཐབ་རྩོད་བརྒྱུད་མཐར་ཀྲུང་གོ་གསར་པ་བཙུགས་པ་ནན་བཤད་བྱས་ཡོད།
གཉིས་པ། རྩ་ཁྲིམས་ཀྱི་གླེང་གཞི་རུ་རྩ་ཁྲིམས་བཟོ་བའི་དམིགས་ཡུལ་རྒྱས་བཤད་བྱས་ཡོད། རྩ་ཁྲིམས་གཏན་འབེབས་བྱེད་པ་ནི་ཀྲུང་གོ་གསར་པའི་བྱ་གཞག་ཁག་སྲ་བརྟན་དང་འཕེལ་རྒྱས་གཏོང་བ་དང་། མི་དམངས་ཀྱི་ཁེ་དབང་སྲུང་སྐྱོབ་བྱེད་པ། རྒྱལ་ཁབ་ཀྱི་གཅིག་གྱུར་དང་བདེ་འཇགས་སྲུང་སྐྱོབ་བྱེད་པ། སྤྱི་ཚོགས་རིང་ལུགས་ཀྱི་བྱ་གཞག་དར་རྒྱས་ཡོང་བར་སྐུལ་འདེད་གཏོང་བ་བཅས་ཀྱི་ཆེད་དུ་ཡིན་ཞེས་གསལ་པོར་བསྟན་ཡོད།
གསུམ། རྒྱལ་ཁབ་ཀྱི་གཞི་རྩའི་ལས་འགན་དང་འབད་བརྩོན་བྱ་རྒྱུའི་དམིགས་ཡུལ་སོགས་གླེང་སྐབས། རང་རྒྱལ་ནི་སྤྱི་ཚོགས་རིང་ལུགས་ཀྱི་ཐོག་མའི་དུས་རིམ་དུ་ཡུན་རིང་གནས་རྒྱུ་ཡིན་པ། རྒྱལ་ཁབ་ཀྱི་རྩ་བའི་ལས་འགན་ནི་ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་ཀྱི་བགྲོད་ལམ་སྟེང་སྟོབས་ཤུགས་གཅིག་བསྡུས་ཀྱིས་དེང་རབས་ཅན་གྱི་སྤྱི་ཚོགས་རིང་ལུགས་ཀྱི་འཛུགས་སྐྲུན་བྱ་རྒྱུ། ཀྲུང་གོའི་མི་རིགས་ཁག་གི་མི་དམངས་ཀྱིས་མུ་མཐུད་དུ་ཀྲུང་གོ་གུང་ཁྲན་ཏང་གི་མགོ་ཁྲིད་དང་མར་ཁེ་སི་ལེ་ཉིན་རིང་ལུགས་དང་། མའོ་ཙེ་ཏུང་གི་དགོངས་པ། ཏེང་ཞའོ་ཕིང་གི་རིགས་པའི་གཞུང་ལུགས། མཚོན་བྱེད་གསུམ་གྱི་དགོངས་པ་གལ་ཆེན། ཚན་རིག་དང་མཐུན་པའི་འཕེལ་རྒྱས་ལྟ་བ། ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་ཀྱི་དགོངས་པའི་སྣེ་ཁྲིད་འོག མི་དམངས་དམངས་གཙོའི་སྲིད་དབང་སྒེར་འཛིན་མཐའ་འཁྱོངས་དང་། སྤྱི་ཚོགས་རིང་ལུགས་ཀྱི་བགྲོད་ལམ་མཐའ་འཁྱོངས།བཅོས་སྒྱུར་སྒོ་འབྱེད་མཐའ་འཁྱོངས། སྤྱི་ཚོགས་རིང་ལུགས་ཀྱི་ལམ་ལུགས་ཁག་རྒྱུན་མི་ཆད་པར་འཐུས་ཚང་དུ་གཏོང་བ། སྤྱི་ཚོགས་རིང་ལུགས་ཀྱི་ཚོང་རའི་དཔལ་འབྱོར་འཕེལ་རྒྱས་སུ་གཏོང་བ། སྤྱི་ཚོགས་རིང་ལུགས་ཀྱི་དམངས་གཙོ་འཕེལ་རྒྱས་སུ་གཏོང་བ། སྤྱི་ཚོགས་རིང་ལུགས་ཀྱི་ཁྲིམས་སྐྱོང་འཐུས་ཚང་དུ་གཏོང་བ། འཕེལ་རྒྱས་ཀྱི་འདུ་ཤེས་གསར་པ་ལག་ལེན་མཐར་ཕྱིན་བྱེད་པ། རང་སྟོབས་རང་སྤེལ། དཀའ་སྤྱད་འབད་བརྩོན་བཅས་བྱས་ནས་བཟོ་ལས་དང་། ཞིང་ལས། རྒྱལ་སྲུང་། ཚན་རིག་ལག་རྩལ་བཅས་རིམ་བཞིན་དེང་རབས་ཅན་དུ་འགྱུར་བར་བྱེད་པ་དང་།དངོས་པོའི་དཔལ་ཡོན་དང་། ཆབ་སྲིད་ཀྱི་དཔལ་ཡོན། བསམ་པའི་དཔལ་ཡོན། སྤྱི་ཚོགས་ཀྱི་དཔལ་ཡོན། སྐྱེ་ཁམས་དཔལ་ཡོན་བཅས་མཐུན་སྦྱོར་ངང་འཕེལ་རྒྱས་འགྲོ་བར་སྐུལ་འདེད་བཏང་སྟེ་རང་རྒྱལ་འདི་ཉིད་འབྱོར་ཕྱུག་དང་། དཔལ་ཡོན། འཆམ་མཐུན། མཛེས་སྡུག་བཅས་ཀྱི་སྤྱི་ཚོགས་རིང་ལུགས་ཀྱི་དེང་རབས་ཅན་གྱི་རྒྱལ་ཁབ་སྟོབས་ཆེན་ཞིག་ཏུ་བསྐྲུན་ནས་ཀྲུང་ཧྭ་མི་རིགས་ཀྱི་རླབས་ཆེན་བསྐྱར་དར་མངོན་འགྱུར་ཡོང་བར་བྱ་དགོས་ཞེས་བསྟན་ཡོད།
སྤྱིའི་ཆ་ནས་བཤད་ན། རང་རྒྱལ་གྱི་རྩ་ཁྲིམས་ཀྱི་གླེང་གཞིའི་ནང་དོན་གཙོ་བོ་ནི་ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་ལམ་ལུགས་ཀྱི་ངོ་བོ་དང་རྩ་དོན་མཚོན་ཡོད་པར་མ་ཟད། ཀྲུང་གོའི་མི་དམངས་ཀྱི་རྩ་བའི་ཁེ་ཕན་དང་ཐུན་མོང་གི་རེ་འདུན་ཡང་མཚོན་ཡོད། དེ་ནི་ཀྲུང་གོ་མི་དམངས་ཀྱིས་ཐུན་མོང་ཐོག་འབད་འཐབ་བྱེད་པའི་བསམ་བློའི་རྨང་གཞི་དང་བྱ་སྤྱོད་ཀྱི་ཚད་གཞི་ཞིག་ཡིན་པས་ལོ་རྒྱུས་ཀྱི་དོན་སྙིང་གལ་ཆེན་དང་དངོས་ཡོད་ཀྱི་དོན་སྙིང་གལ་ཆེན་ལྡན།
ལག་ལེན་དངོས་ཀྱི་ནང་རྩ་ཁྲིམས་ཀྱི་གླེང་གཞིའི་ནང་དོན་ཁྱབ་ཁོངས་ཁག་ཏུ་རྒྱ་ཁྱབ་ཏུ་སྤྱད་ཡོད། དཔེར་ན། བཅའ་ཁྲིམས་ཀྱི་ཁྱབ་ཁོངས་སུ་རྩ་ཁྲིམས་ཀྱི་གླེང་གཞིའི་རྩ་དོན་དེ་བཅའ་ཁྲིམས་འགྲེལ་བཤད་རྒྱག་པ་དང་བེད་སྤྱོད་བྱེད་པའི་གཞི་འཛིན་ས་གལ་ཆེན་ཞིག་ཏུ་བརྩིས་པ་དང་། སློབ་གསོའི་ཁྱབ་ཁོངས་སུ་རྩ་ཁྲིམས་ཀྱི་གླེང་གཞིའི་དགོངས་དོན་དེ་སློབ་དེབ་དང་སློབ་ཁང་དུ་མངོན་པར་བཅུག་ནས་གཞོན་ནུ་ལོ་ཆུང་གི་རྩ་ཁྲིམས་ཀྱི་འདུ་ཤེས་དང་ཁྲིམས་སྐྱོང་གི་འདུ་ཤེས་གསོ་སྐྱོང་བྱེད་པ་དང་། སྤྱི་ཚོགས་བཅོས་སྐྱོང་གི་ཁྱབ་ཁོངས་ནང་རྩ་ཁྲིམས་ཀྱི་གླེང་གཞིའི་གཏན་འབེབས་དེ་སྲིད་ཇུས་བཟོ་བ་དང་ལག་བསྟར་བྱེད་པའི་མཛུབ་ཁྲིད་རྩ་དོན་ལ་བརྩིས་ནས་མི་དམངས་ཀྱི་ཁེ་དབང་དང་བདེ་སྐྱིད་འགན་ལེན་བྱས་ཡོད།
