རྒྱུན་པར་ལུས་སྦྱོང་བྱེད་མཁན་དང་མི་བྱེད་མཁན་བར་ཁྱད་པར་ཅི་ཡོད།

རྒྱུན་པར་འཚོ་བའི་ཁྲོད་ལུས་སྦྱོང་བྱེད་པར་གོམས་པའི་མིར་འགུལ་སྐྱོད་མང་ཙམ་བྱས་ན། ལུས་སྟོབས་རྒྱས་ཤིང་སེམས་ཤུགས་ཀྱིས་ཁེངས་པའི་མྱོང་ཚོར་ཟབ་མོ་ཡོད། དེས་ན་ལུས་སྦྱོང་བྱས་ཚེ། དོན་དངོས་ཐོག་ལུས་པོར་འགྱུར་ལྡོག་ཅི་འདྲ་ཞིག་འབྱུང་སྲིད་དམ།  རྒྱུན་དུ་ལུས་སྦྱོང་བྱེད་མཁན་དང་ལུས་སྦྱོང་བྱེད་ཉུང་བའི་མི་གཉིས་ལ་ཁྱད་པར་ཅི་ཞིག་ཡོད་དམ།  

གཅིག  རྒྱུན་དུ་ལུས་སྦྱོང་བྱེད་མཁན་གྱི་མིའི་སྙིང་དང་གློ་བའི་ནུས་པ་དེ་བས་བཟང་བ།

རྒྱུན་དུ་འགུལ་སྐྱོད་དང་ལུས་སྦྱོང་བྱས་ན་དབྱུགས་རྔུབ་འབྱིན་པའི་དྲག་ཚད་དང་ཤུགས་ཚད་ཇེ་དྲག་ཏུ་འགྲོ་བ་དང་། གློ་བའི་བསྟུན་གཤིས་ལེགས་བཅོས་བྱ་ཐུབ་ཅིང་།  གློ་བའི་བྱེད་ནུས་དང་གློ་བའི་ཆ་ཤས་ཀྱི་འགོག་ཤུགས་སོགས་ཇེ་དྲག་ཏུ་གཏོང་ཐུབ་པ་དང་།    ད་དུང་སྙིང་གི་འཕར་ཤུགས་སྔར་ལས་སྟོབས་དང་ལྡན་པ་དང་ཆོས་ཉིད་ཡོད་པར་གྱུར་ནས།  སྙིང་གི་ཁྲག་འཐེན་འགྲོས་སྟངས་དང་སྙིང་གི་ཁྲག་འཐེན་ནུས་ཆོད་ཁག་ཐེག་ཐུབ་པ་དང་སྙིང་ཁམས་ཁྲག་རྩའི་ནད་རིགས་འཇུ་ཚད་ཇེ་ཉུང་དུ་གཏོང་ཐུབ།  དེ་བས་སྙིང་དང་གློ་བའི་ནུས་པ་ཡག་པོ་ལྡན་པའི་མི་ལ་དལ་བའི་རང་བཞིན་གྱི་ནད་རིགས་སྟེ།  དཔེར་ན། སྙིང་རྩ་རེངས་པའི་ནད་དང་གློ་བའི་འགག་འགལ་གྱི་ནད་རིགས་འཇུ་ཚད་ཀྱང་ཅུང་དམའ་རུ་འགྲོ་སྲིད།

འོ་ན་ལུས་རྩལ་རྣམ་གྲངས་གང་ཞིག་མིའི་སྙིང་དང་གློ་བའི་ནུས་པ་མཐོ་རུ་གཏོང་བར་ཕན་ནུས་ཆེ་ཤོས་ཐོན་ཐུབ།

《ཡོ་རོབ་གླིང་གི་སྙིང་གི་དུས་དེབ》ཐོག་སྤེལ་བའི་ཞིབ་འཇུག་ལྟར་ན།   ཆ་སྙོམས་ལོ་54ཡིན་པའི་མི་2070ལ་དུས་ཡུན་ལོ་8ཀྱི་རིང་འཁོར་ཡུན་རང་བཞིན་གྱི་འགུལ་སྐྱོད་དང་བདེ་ཐང་རྣམ་པའི་བར་གྱི་འབྲེལ་བའི་ཐད་ཞིབ་འཇུག་བྱས་ཡོད། མཇུག་འབྲས་ལས་ཤེས་རྟོགས་བྱུང་བར།  ལུས་པོ་འགུལ་སྐྱོད་འབྲིང་ཙམ་བྱས་པ་སྟེ།  དཔེར་ན། རྐང་ཐང་མར་མགྱོགས་པོ་འགྲོ་བ་དང་ཡང་ན་རྐང་འཁོར་བཞོན་ནས་འགྲོ་བ་ནི་སྙིང་དང་གློ་བའི་ནུས་པ་མཐོ་རུ་གཏོང་བར་ཆེས་འཚམ་པའི་འགུལ་སྐྱོད་བྱེད་སྟངས་ཤིག་ཡིན་པ་རེད། 

གཉིས། རྒྱུན་དུ་ལུས་སྦྱོང་བྱེད་པའི་མིའི་ཤེས་རྟོགས་ནུས་པ་དེ་བས་ལེགས་པ།

མི་མང་པོ་ཞིག་ལ་ལུས་པོར་སྦྱོང་བརྡར་བྱས་རྗེས་དབུགས་འབྱིན་རྔུབ་བྱེད་ཚད་སྔར་ལས་བག་ཕེབས་དང་། ལུས་པོ་སྔར་ལས་ཡང་བ། སེམས་ཁམས་ཀྱང་ཇེ་སྐྱིད་དུ་འགྲོ་བའི་ཚོར་སྣང་ཡོང་གི་ཡོད། རྒྱུ་མཚན་ནི་འགུལ་སྐྱོད་བྱས་རྗེས་ཀླད་པའི་ཕྲ་ཕུང་གིས་ཟགས་ཐོན་བྱས་པའི་“内啡肽”ནེ་ཧྥེའི་ཐའེ་ཟེར་བ་དེས་དུས་ཐུང་ནང་མི་རྣམས་ལ་སྤྲོ་སྣང་སྟེར་ཐུབ།

ཡུན་རིང་ལུས་སྦྱོང་བྱེད་པའི་སྲོལ་རྒྱུན་སྐྱོང་ན་ཀླད་པར་ཕན་ནུས་ཐོན་ཐུབ་བམ།

དབྱིན་ཇིའི་ལོ་10རིང་། ལོ་50དང་དེའི་ཡན་གྱི་མི་ཚོགས་8958ཀྱི་ཤེས་རྟོགས་ནུས་པར་ཞིབ་འཇུག་བྱས་པ་ལས་ཤེས་རྟོགས་བྱུང་བ་ལྟར་ན། ལོ་ན་ཆེ་རུ་ཕྱིན་པ་དང་བསྟུན་ནས་ལུས་སྦྱོང་ལུགས་མཐུན་བྱས་ན་ཤེས་རྟོགས་ནུས་པ་ཞན་འགྱུར་སྔོན་འགོག་བྱེད་ཐུབ་མོད། འོན་ཀྱང་གཉིད་ཉལ་བ་མི་འདང་བའི་མིའི་ངོས་ནས་བརྗོད་ན།  སྲུང་སྐྱོང་ནུས་པ་དེ་རིགས་ཉམས་ཞན་དུ་འགྲོ་སྲིད། དེ་ཡང་ལོ་བཅུའི་རིང་རྒྱུན་མཐུད་བྱས་པའི་རྗེས་འདེད་ཞིབ་འཇུག་གཞན་ཞིག་ལས་ཤེས་རྟོགས་བྱུང་བ་ལྟར་ན། ཞིབ་འཇུག་དེ་འགོ་བརྩམས་དུས་དེའི་ནང་ཞུགས་མཁན་གྱི་མིའི་གཉིད་ཉལ་བའི་དུས་ཡུན་རིང་ཐུང་ཅི་འདྲ་ཡིན་རུང་། ལུས་སྦྱོང་བྱེད་ཚད་མང་བའི་མི་ཚང་མར་ཕལ་ཆེར་ཤེས་རྟོགས་ནུས་པ་སྔར་ལས་ལེགས་པོ་ཡོད་མོད།   འོན་ཀྱང་ལོ་བཅུའི་རིང་རྒྱུན་མཐུད་བྱས་པའི་རྗེས་འདེད་ཞིབ་འཇུག་ཁྲོད་གནས་ཚུལ་དེ་རིགས་ལ་འགྱུར་ལྡོག་བྱུང་བ་སྟེ། གཉིད་ཉལ་བའི་དུས་ཚོད་ཐུང་བ་(ཆ་སྙོམས་ཉིན་རེར་གཉིད་ཉལ་བའི་དུས་ཚོད་ཆུ་ཚོད་6ལས་ཉུང་བ་)ནི་ཤེས་རྟོགས་ཇེ་དམའ་རུ་འགྲོ་བའི་རྒྱུ་རྐྱེན་གཙོ་བོ་ཡིན་པ་དང་། གཉིད་ཉལ་བའི་དུས་ཚོད་ཉུང་བ་མ་ཟད་འགུལ་སྐྱོད་ཀྱང་ཉུང་བའི་མིའི་ཤེས་རྟོགས་ནུས་པ་མགྱོགས་པོ་ཇེ་ཞན་དུ་འགྲོ་བ་དང་།  ལོ་50ནས་ལོ་70བར་གྱི་མིའི་ཤེས་རྟོགས་ནུས་པ་ཇེ་དམའ་རུ་འགྲོ་བ་ཅུང་མངོན་གསལ་ཡིན། ལོ70དང་དེའི་ཡན་གྱི་རྒན་རྒོན་ལ་མཚོན་ན། གཉིད་མི་འདང་ནའང་ལུས་པོར་སྦྱོང་བརྡར་བྱས་ཚེ། ཁོང་ཚོའི་ཤེས་རྟོགས་ནུས་པར་ཕན་ཐོགས་ཀྱི་ཡོད།   

གསུམ། རྒྱུན་དུ་ལུས་སྦྱོང་བྱེད་མཁན་གྱི་རུས་པ་དང་། ཤ་གནད། རུས་ཚིགས་བཅས་དེ་བས་ཡག་པ། 

དང་ཐོག་རྒྱུན་དུ་ལུས་པོ་འགུལ་སྐྱོད་བྱས་ན་རུས་པའི་ཁྲག་གི་འཁོར་རྒྱུག་ལེགས་སུ་གཏོང་བ་དང་། རུས་པའི་རྙིང་ཚབ་གསར་འབྱེད་ཇེ་དྲག་ཏུ་གཏོང་བས། རུས་པའི་ཚངས་ཐིག་སྦོམ་དུ་གཏོང་བ་དང་། ཤ་རྒྱུ་མཐུག་ཏུ་གཏོང་བ། རུས་པ་གྲལ་སྒྲིག་པོ་ཡོང་ཐུབ།རུས་པའི་གྲུབ་ཚུལ་རྣམ་པར་འགྱུར་ལྡོག་བཟང་པོ་བྱུང་བ་དང་བསྟུན་ནས། རུས་པའི་ལྟེབ་འགོག་དང་འཁྱོག་འགོག གནོན་འཁུམ་འགོག་པ་སོགས་རུས་པའི་དྲག་ཚད་ཐད་ཀྱི་ནུས་པ་ཆེས་ཆེར་ཇེ་མཐོར་འགྲོ་ཐུབ། 

དེ་མིན་རྒྱུན་དུ་ལུས་པོ་འགུལ་སྐྱོད་བྱས་ཚེ། ཚིགས་ངོས་ཀྱི་ཕྲུམ་རུས་དང་རུས་པའི་སྟུག་ཚད་ཀྱི་མཐུག་ཚད་ཇེ་མཐོར་བཏང་སྟེ། ཚིགས་མཐའི་ཤ་གནད་དར་རྒྱས་ཕྱིན་པ་དང་སྟོབས་ཤུགས་ཇེ་དྲག་ཏུ་འགྲོ་བ། ཚིགས་སྣོད་དང་ཆུ་བ་ཇེ་མཐུག་ཏུ་འགྲོ་བས། ཚིགས་ཀྱི་ཁུར་ཐེག་ཇེ་ཆུང་དུ་གཏོང་བ་དང་ཚིགས་ཀྱི་བརྟན་བརླིང་རང་བཞིན་ཇེ་མཐོར་གཏོང་ཐུབ། ཚིགས་ཀྱི་བརྟན་བརླིང་རང་བཞིན་ཇེ་མཐོར་གཏོང་བ་དང་དུས་མཚུངས། ཚིགས་སྣོད་དང་ཆུས་རྒྱུ། ཚིགས་མཐའ་འཁོར་གྱི་ཤ་གནད་ཀྱི་ལྡེམ་ཤུགས་དང་རྐྱོང་འབྱེད་རང་བཞིན་ཇེ་མཐོར་ཕྱིན་པས། ཚིགས་ཀྱི་འགུལ་སྐྱོད་བྱེད་ཚད་དང་སྟབས་བསྟུན་རང་བཞིན་ཡང་ཆེས་ཆེར་ཇེ་མཐོར་འགྲོ་སྲིད།

བཞི། རྒྱུན་པར་ལུས་སྦྱོང་བྱེད་མཁན་ལ་ཕྱི་ཚུལ་དེ་བས་མཛེས་པ་དང་ནང་སེམས་དེ་བས་སྤྲོ་སྣང་ལྡན་པ།

རྒྱུན་དུ་ལུས་པོ་འགུལ་སྐྱོད་བྱེད་པ་ནི་ལུས་ཤ་སྐམ་དུ་གཏོང་བར་ཕན་པ་མ་ཟད། ད་དུང་ལུས་ཡོངས་ཀྱི་རུས་སྒྲོམ་གྱི་ཤ་གནད་ཀྱི་མ་ལག་བདེ་ཐང་ཡོང་བར་ཡང་ཕན་ཐོགས་ཡོད། ནུས་སྟོབས་ཆེ་བའི་ཤ་གནད་ཀྱིས་གཟུགས་གཞི་རྐྱོང་སྐུམ་དང་། ལུས་གཟུགས་དྲང་པོ་བྱེད་ཐུབ་པས། མི་རྣམས་ལ་བལྟས་ཚོད་ཀྱིས་དེ་བས་མཛེས་པ་དང་ཡག་པོ་ཡོང་ཐུབ། 

རྒྱུན་དུ་འགུལ་སྐྱོད་བྱས་ཚེ། མིའི་ཀླད་པར་ཟགས་ཐོན་བྱས་པའི་内啡肽ནེ་ཧྥེ་ཐའེ་འབྱུང་བ་དང་དེས་སེམས་ཁམས་ལ་འགྱུར་ལྡོག་ཡག་པོ་གཏོང་ཐུབ་པས། སེམས་ཁྲལ་དང་ཡི་མུག་པའི་སེམས་ཁམས་ཞི་ལྷོད་དུ་གཏོང་བར་ཕན་པ་དང་། སེམས་ཁམས་བདེ་ཐང་ཡོང་བར་ཕན་ཐོགས་ཡོད། དེ་བས་དལ་བའི་རང་བཞིན་གྱི་ནད་རིགས་ཁ་ཤས་ཀྱི་རྗེས་འབྱུང་དང་བདེ་ཐང་ལ་ཡང་ཕན་པ་ཡོད།

འོ་ན། ལུས་སྦྱོང་བྱེད་ཚད་གང་འདྲ་ཞིག་ལ་རྒྱུན་དུ་ལུས་སྦྱོང་བྱེད་པ་ཟེར།

ལུས་སྦྱོང་བྱས་ན་འོས་འཚམ་བྱེད་དགོས། ཚད་གཞི་དེ་ནི་གཙོ་བོ་སྙིང་གི་འཕར་ཚད་ལ་བལྟ་དགོས་པ་སྟེ། སྙིང་གི་འཕར་ཚད་མཐོ་ཤོས་བརྒྱ་ཆ་60ནས་བརྒྱ་ཆ་85བར་ཡིན་ཞིང་། དོ་སྣང་བྱེད་དགོས་པ་ཞིག་ལ་མི་རེ་རེའི་དོན་དངོས་ཀྱི་གནས་ཚུལ་ལ་ཁྱད་པར་ཧ་ཅང་ཆེན་པོ་ཡོད་པས། ལྷིང་འཇགས་སྐབས་ཀྱི་སྙིང་གི་འཕར་ཚད་དང་བསྡུར་ན་བརྒྱ་ཆ་15ནས་བརྒྱ་ཆ་30བར་གྱི་ཁྱད་པར་ཡོད་པ་དང་། ཐ་ན་དེ་ལས་ཀྱང་མང་བ་ཡོད།  ལུས་སྦྱོང་བྱེད་ཡག་ཤོས་དེ་རང་ཉིད་ཀྱི་ལོ་ཚོད་དང་།  ཕོ་མོའི་དབྱེ་བ།   ལས་རིགས་ཀྱི་ཁྱད་ཆོས། ལུས་ཤུགས་ཀྱི་གནས་ཚུལ། བདེ་ཐང་གི་ཆུ་ཚད། ལུས་རྩལ་གྱི་རྨང་གཞི། འཚོ་བའི་ཁོར་ཡུག་སོགས་གནས་ཚུལ་མི་འདྲ་བར་གཞིགས་ནས་འདེམས་དགོས། གནད་འགག་གཙོ་བོ་ནི་འགུལ་སྐྱོད་ཀྱི་དྲག་ཚད་དམ་འཛིན་ཡག་པོ་བྱེད་དགོས་པ་དང་། སྙིང་གི་འཕར་ཚད་འོས་འཚམ་བྱས་ནས་རྒྱུན་འཁྱོངས་བྱེད་དགོས་པ་མ་ཟད། ད་དུང་དུས་ཚོད་ཀྱི་རུང་ཐུང་ལ་དམ་འཛིན་ནན་པོ་བྱེད་དགོས།

ཨ་རིའི་སྙིང་ཁམས་སློབ་ཚོགས་ཀྱིས་མི་དར་མའི་འགུལ་སྐྱོད་ཚད་གཞིར་བཏོན་པའི་གྲོས་འགོ་ནི། གཟའ་འཁོར་རེར་ཉིན་ལྔ་ལ་ཉུང་མཐར་ཡང་སྐར་མ་30ཡི་ལུས་སྦྱོང་བྱེད་ཚད་འབྲིང་རིམ་གྱི་ཐོག་ནས་ལུས་རྩལ་སྦྱོང་བརྡར་བྱེད་དགོས། བསྡོམས་པས་སྐར་མ་150ཡིན། ཡང་ན་གཟའ་འཁོར་རེར་ཉིན་གསུམ་ལ་ཉུང་མཐར་ཡང་སྐར་མ་25ཡི་ལུས་སྦྱོང་བྱེད་ཚད་མཐོ་པོས་ལུས་རྩལ་སྦྱོང་བརྡར་བྱེད་དགོས། བསྡོམས་པས་སྐར་མ་75ཡིན། ད་དུང་གཟའ་འཁོར་རེར་ཉུང་མཐར་ཡང་ཉིན་གཉིས་ལ་ལུས་སྦྱོང་བྱེད་ཚད་འབྲིང་རིམ་རིམ་པ་མཐོ་ཤོས་ཀྱི་ཐོག་ནས་སྦྱོང་བརྡར་བྱས་ནས་ལུས་པོའི་བདེ་ཐང་ལེགས་སུ་གཏོང་ཐུབ།