གློག་རྡུལ་ཐ་མག་འདི་རིགས་ལ་ལག་པ་མ་འཆང་།

    ཉེ་ཆར། ཅང་སུའུ་ཅིན་ཐན་ཉེན་རྟོག་ཕྱོགས་ཀྱིས་“དབྱིངས་ཞུགས་གློག་རྡུལ་ཐ་མག”ཉོ་ཚོང་བྱེད་པའི་དུག་རྫས་གྱོད་གཞི་རྣམ་པ་གསར་པ་ཞིག་ཡོངས་བསྒྲགས་བྱས་ཡོད་དེ། ཁྲིམས་འགལ་མི་སྣས་གློག་རྡུལ་ཐ་མག་ཁྲོད་ཡི་ཐུའོ་མི་ཀྲི་དང་། ནི་པིང་ཕཱ་ཀྲི་སོགས་དུག་རྫས་ཀྱི་གྲུབ་ཆ་བསྣན་ཡོད། བསམ་ཡུལ་ལས་འདས་པ་ཞིག་ལ་དུག་རྫས་ཉོ་ཚོང་ངན་ཚོགས་ཀྱི་ཚོགས་མིའི་གྲས་སུ་ནར་མ་སོན་པའི་མི་མང་པོ་ཡོད་ཅིང་། དུས་རྫས་ཉོ་ཚོང་གཏེ་པོ་ལོ་17ཡིན་པ་རེད།ཉེན་རྟོག་ཕྱོགས་ཀྱིས་“དབྱིངས་ཞུགས་གློག་རྡུལ་ཐ་མག”གི་དུས་རྫས་གྱོད་གཞི་རྣམ་པ་གསར་པ་ཞིག་རྩད་ཆོད་བྱུང་ཞིང་། དུག་རྫས་ཉོ་ཚོང་གཏེ་པོ་ལོ་17ལས་སླེབས་མེད།

      2024ལོའི་ཟླ་8པར། ཁྲང་ཀྲོའུ་གྲོང་ཁྱེར་སྤྱི་བདེ་ཅུས་ཅིན་ཐན་ཡན་ལག་ཅུས་ཀྲི་ཆན་མངགས་གཏོང་ཁང་དུ། ཁོངས་གཏོགས་ཁུལ་གྱི་མགྲོན་ཁང་དུ་མི་ཞིག་གིས་དུག་འཐེན་བཞིན་འདུག་ཅེས་པའི་མང་ཚོགས་ཀྱི་ཐེར་འདོན་གོང་ཞུ་འབྱོར་རྗེས། མི་དམངས་ཉེན་རྟོག་པས་ཐེར་འདོན་གོང་ཞུ་བྱས་པའི་ས་གནས་སུ་དུག་རྫས་རིགས་གསར་པ་“དབྱིངས་ཞུགས་གློག་རྡུལ་ཐ་མག”འཐེན་པའི་དོགས་གཞི་ཡོད་པའི་མི་4རྩད་ཆོད་ཡོད། ཐོག་མའི་རྟོག་ཞིབ་བྱས་པ་བརྒྱུད། གྱོད་གཞི་དང་འབྲེལ་བའི་“དབྱིངས་ཞུགས་གློག་རྡུལ་ཐ་མག”ནི་མཚང་མིང་ལ་“ཞུའོ་ཡ་ཐོའུ་”ཟེར་བ་ཞིག་ནས་ཐོན་པ་རེད།      ཉེན་རྟོག་ཕྱོགས་ཀྱིས་དེ་མུར་ཆེད་དམིགས་གྱོད་དོན་ཚོ་ཚུང་བཙུགས་ནས་མྱུལ་ཞིབ་བྱས་པ་དང་། དུག་རྫས་ཉོ་ཚོང་ཉེས་བསགས་དོགས་ཡོད་མི་སྣ་12དང་དུག་འཐེན་མཁན་38འཛིན་བཟུང་བྱས་ཡོད། རྟོག་ཞིབ་བྱས་པ་བརྒྱུད། དུག་རྫས་ཉོ་ཚོང་ངན་ཚོགས་དེའི་ཁོངས་མིའི་གྲས་སུ་ནར་མ་སོན་པའི་མི་མང་པོ་ཞིག་ཡོད་ཅིང་། གཏེ་པོ་གཙོ་བོ་ཝང་ཆེ་གེ་མོ་ཐིང་ལོ་17ལས་སླེབས་མེད།

      ཉེན་རྟོག་པས་ངོ་སྤྲོད་བྱས་པར་གཞིགས་ན། སྲོལ་རྒྱུན་གྱི་ཐ་མག་དང་ཚད་ལྡན་གྱི་གློག་རྡུལ་ཐ་མག་དང་བསྡུར་ན། “དབྱིངས་ཞུགས་གློག་རྡུལ་ཐ་མག”གི་ནང་དུ་ཡི་ཐུའོ་མི་ཀྲི་སོགས་དུག་རྫས་ཀྱི་གྲུབ་ཆ་འདུས་པ་དང་། ལྟེ་བའི་དབང་རྩར་ཚོད་འཛིན་གྱི་ནུས་པ་ལྡན་པས། ཡུན་ཐུང་གི་དགའ་སྤྲོ་དང་། ལྷོད་གཡེང་ངམ་ར་བཟི་བ་དང་མགོ་ཡུ་འཁོར་བ་ལྟ་བུའི་ཚོར་སྣང་སྐྱེད་ཐུབ།      རྒྱུ་ཆ་བསྣན་པའི་གློག་རྡུལ་ཐ་མག་གློའི་ནང་ཁུལ་དུ་འཇིབ་རྗེས། དུག་རྫས་ཀྱིས་ཐོན་པའི་ནུས་པ་དེ་སྐར་ཆ་ཁ་ཤས་ནང་ཐད་ཀར་ཀླད་པའི་ནང་དུ་སླེབས་ཐུབ་ཅིང་། དབྱིངས་ལ་ཞུགས་པའི་རང་བཞིན་དང་གནོད་པ་སྐྱེལ་བའི་རང་བཞིན་དྲག་པོ་ལྡན་པས། འཇིབ་འཐེན་བྱེད་མཁན་གྱི་ལུས་སེམས་གཉིས་ཀའི་བདེ་ཐང་ལ་གནོད་འཚེ་ཚབས་ཆེན་བཟོ་སྲིད།

ཇི་ལྟར་“དབྱིངས་ཞུགས་གློག་རྡུལ་ཐ་མག”དབྱེ་འབྱེད་ངོས་འཛིན་བྱེད་དགོས་སམ།     “དབྱིངས་ཞུགས་གློག་རྡུལ་ཐ་མག”གི་ཕྱི་དབྱིབས་གློག་རྡུལ་ཐ་མག་ཕལ་པ་དང་འདྲ་བས། རྒྱུན་ལྡན་འཚོ་བའི་ཁྲོད་ཇི་ལྟར་ངོས་འཛིན་བྱེད་དགོས་སམ་ཞེ་ན།  དུག་འགོག་མི་དམངས་ཉེན་རྟོག་པས་ངོ་སྤྲོད་བྱས་དོན། ངེས་པར་དུ“བལྟ་བ་དང་། སྣོམ་པ། འདྲི་བ། མྱོང་བ་”བཅས་བྱ་རྒྱུ་ཡིད་ལ་འཛིན་དགོས།     “བལྟ་བ”ནི་ཐོན་རྫས་ཀྱི་ཕྱི་ཐུམ་དང་ཕྱི་དབྱིབས་ལ་ལྟ་ཞིབ་བྱ་རྒྱུ་དེ་ཡིན་ཞིང་། “དབྱིངས་ཞུགས་གློག་རྡུལ་ཐ་མག”ལ་ཚད་ལྡན་གྱི་ཐོན་སྐྱེད་བཟོ་གྲྭ་མེད་པ་དང་། གྲུབ་ཆའི་རེའུ་མིག་དང་ཚད་ལོན་དཔང་ཡིག་སོགས་ཀྱི་མཚོན་རྟགས་མེད་པ་རེད།      “སྣོམ་པ”ནི་དུ་སྣུམ་གྱི་བྲོ་བ་བརྒྱུད་དབྱེ་འབྱེད་ངོས་འཛིན་བྱེད་པ་ཡིན། ཚད་ལྡན་གྱི་གློག་རྡུལ་ཐ་མག་ནི་དུ་རྩྭའི་བྲོ་བ་ཡིན་མོད། འོན་ཀྱང་“དབྱིངས་ཞུགས་གློག་རྡུལ་ཐ་མག”ལ་སྣ་ལ་གདུང་བ་སྐྱེད་པའི་དྲི་ངན་ཡོད།      “འདྲི་བ”ནི་ཚོང་ལམ་དང་རིན་གོང་འདྲི་བ་ཡིན། རྒྱུན་ལྡན་“དབྱིངས་ལ་ཞུགས་པ་དང་།”“འཕུར་སྐྱོད་”སོགས་ཀྱི་ལྐོག་བརྡ་སྤྱད་ནས་ལྐོག་ཏུ་ཉོ་ཚོང་བྱེད་བཞིན་པ་མང་ཆེ་བ་ནི་“དབྱིངས་ཞུགས་གློག་རྡུལ་ཐ་མག”ཡིན། དེའི་རིན་གོང་གློག་རྡུལ་ཐ་མག་ལས་མངོན་གསལ་གྱིས་མཐོ་བ་ཡོད་ཅིང་། རྐང་གཅིག་ལ་སྒོར་བརྒྱ་ཕྲག་དགོས།      “མྱོང་བ”ནི་འཇིབ་འཐེན་བྱས་རྗེས་ལུས་པོའི་འགྱུར་ལྡོག་དང་ཚོར་བར་ལྟ་ཞིབ་བྱེད་པ་ཡིན། འཇིབ་འཐེན་བྱས་རྗེས་མགོ་ཡུ་འཁོར་བ་དང་། ཡར་ལངས་ནས་འདུག་མི་ཐུབ་པ། དྲན་ཤེས་མག་མོག་སོགས་ཀྱི་ཚོར་བ་བྱུང་བ་དང་། ཚབས་ཆེ་སྐབས་ད་དུང་ཅི་ཡིན་འདི་ཡིན་མེད་པར་དགོད་པ་དང་ངུ་བ། ད་དུང་མི་གཞན་ལ་ཚིག་མཚོན་འདེབས་པ་སོགས་བྱེད་སྲིད།