ཚེ་རིང་ལོ་བརྒྱ་ཐུབ་དགོས་ན། བྱ་བ་འདི་དག་སེམས་ལ་ངེས།

 

རྒྱལ་ཁབ་འཕྲོད་བསྟེན་བདེ་ཐང་ཨུ་ལྷན་གྱི་ཀྲུའུ་རེན་ལེ་ཧའེ་ཁྲའོ་ཡིས་ངོ་སྤྲོད་གནང་བར་གཞིགས་ན།  སྤྱི་ལོ་2024ལོར་ཀྲུང་གོའི་གྲོང་མིའི་ཚེ་ཚད་ལོ་79ལ་སླེབས་ཡོད་པ་དེ་སྤྱི་ལོ་2023ལོ་ལས་ལོ་0.4རིང་དུ་ཕྱིན་ཡོད། མི་རེའི་ཆ་སྙོམས་ཚེ་ཚད་རིང་དུ་འགྲོ་བ་དང་བསྟུན་ནས་མི་ཚང་མའི་ངོས་ནས་བརྗོད་ན། ལུས་ནད་སེམས་ནད་མེད་པར་བདེ་ཐང་ངང་མི་ཚེ་རིང་ཙམ་འཁྱོལ་ན་བསམ་གྱི་ཡོད།  གལ་ཏེ་ང་ཚོས་ཚེ་རིང་ལོ་བརྒྱ་ཐུབ་པའི་སྨོན་འདུན་བཟང་པོ་མངོན་འགྱུར་བྱེད་དགོས་ན། རང་ལོ་40དང་50བར་ནས་བཟུང་བྱ་བ་བཞི་པོ་འདི་དག་བསྒྲུབ་པར་འབད་བརྩོན་བྱེད་དགོས།

1. ཁ་ལག་ཉུང་ཙམ་བཟའ་དགོས། 

 “ནད་མེད་ཚེ་རིང་ཡོང་དགོས་ན། ཁ་ལག་རྒྱགས་ཚད་ཟ་རྒྱུ་མེད་”ཅེས་ཟེར་བ་བཞིན། བཀྲེས་ལྟོགས་འོས་འཚམ་རྒྱུན་འཁྱོངས་བྱེད་པ་ནི་རང་རྒྱལ་གྱི་སྲོལ་རྒྱུན་གྱི་བདེ་སྲུང་བློ་གྲོས་ཡིན་པ་མ་ཟད། ལུས་པོའི་བདེ་ཐང་ཐད་ཕྱོགས་མང་པོར་ཕན་ཐོགས་ཡོད་པ་དེང་རབས་ཚན་རིག་ཞིབ་འཇུག་གིས་ཀྱང་ར་སྤྲོད་བྱས་ཡོད།

སྤྱི་ལོ་2023ལོར་ཁོ་ལོམ་པི་ཡའི་སློབ་ཆེན་གྱི་ཞིབ་འཇུག་མི་སྣས་སྤེལ་བའི་ཞིབ་འཇུག་བྱས་འབྲས་ལས་ཤེས་རྟོགས་བྱུང་བ་ལྟར་ན། ཟས་བཅུད་ཁལ་ལོ་རའེ་ཞེས་པ་གཟུགས་པོར་བསྡུ་ལེན་བྱེད་ཚད་25%ཉུང་དུ་བཏང་ན། ལུས་པོ་བདེ་ཐང་ཡིན་པའི་མི་དར་མ་རྒས་འགྲོ་བའི་མྱུར་ཚད་2%ནས་3%བར་ཇེ་དལ་དུ་འགྲོ་བ་དང་འཆི་བའི་ཉེན་ཁ་10%ནས་15%བར་ཇེ་ཆུང་དུ་གཏོང་ཐུབ། དེས་ན། ཟས་ཉུང་ཙམ་ཟ་བ་ནི་ཟ་མ་གྲོན་ཆུང་བྱེད་པ་མ་ཡིན་པར། ལུས་ཕུང་གི་ཕོ་བ་དང་རྒྱུ་མར་ངལ་གསོའི་དུས་ཚོད་ཏོག་ཙམ་སྤྲོད་པ་ཙམ་ཡིན།

2.ཁྲག་ཚིལ་དམའ་ཙམ་དགོས།

སྤྱི་ལོ་2023ལོར་སྤེལ་བའི་ཞིབ་འཇུག་ཅིག་ལས་ཤེས་རྟོགས་བྱུང་བ་ལྟར་ན། ལོ་100ལ་སོན་པའི་རྒན་རྒོན་སྐུ་ཚེ་རིང་པོ་ཚོར་ཆ་བཞག་ན། ལོ་60ནས་བཟུང་། ཁོང་ཚོའི་ཁྲག་མངར་དང་ཤ་གནད་ཀན།(肌酐) གཅིན་སྐྱུར་བཅས་ཀྱི་ཆུ་ཚད་རྒྱུན་དུ་ཅུང་དམའ་བ་ཡོད། གསལ་པོར་བཤད་ན། ཚེ་རིང་བའི་གནད་འགག་ནི་ལོ་60ཡི་རྗེས་སུ། ལུས་ཕུང་གི་ཁྲག་དང་བརྗེ་ཚབ་ཚད་གཞི་བདེ་ཐང་གི་ཆུ་ཚད་དུ་རྒྱུན་འཁྱོངས་བྱེད་དགོས་པ་སྟེ། ཁྲག་ཚིལ་ཙམ་མ་ཟད། ཁྲག་ཤེད་དང་ཁྲག་མངར། གཅིན་སྐྱུར། ཤ་གནད་ཀན་སོགས་ཚང་མ་ཧ་ཅང་གལ་འགངས་ཆེ་བ་ཡིན་པས། ཟས་སྤྱོད་ཐད་འབྲུ་རིགས་སྣ་འཛོམས་དང་སྔོ་ཚལ། ཤིང་ཏོག་བཅས་མང་ཙམ་བཟའ་དགོས་པ་དང་ཆང་རག་དང་མངར་ཆ་མཐོ་བའི་ཟས་རིགས་ཉུང་ཙམ་བསྟེན་དགོས་པ། དབྱང་ལྡན་ལུས་སྦྱོང་དང་ཤ་གནད་ལུས་སྦྱོང་། རྒྱུན་ལྡན་ལུས་སྦྱོང་བཅས་ཚང་མས་ཁྲག་ཚིལ་ཉུང་དུ་འགྲོ་བར་དགེ་མཚན་ལྡན་པའི་ནུས་པ་ཐོན་གྱི་ཡོད།

3. གཟུགས་པོའི་ལྗིད་ཚད་དམའ་ཙམ་དགོས།

ལུས་ཤ་རྒྱགས་པ་ནི་“ནད་གཞི་སྟོང་གི་འབྱུང་ཁུངས་”ཡིན་ཞིང་། དེ་དང་གཅིན་པ་མངར་འགྱུར་རིགས་2པ་དང་། ཁྲག་ཤེད་མཐོ་བའི་ནད། སྙིང་ནད་ཁྲག་གཟེར། མཆིན་པ་ཚིལ་འགྱུར། གཉིད་ལོག་དུས་དབུགས་འབྱིན་རྔུབ་མཚམས་འཇོག་སོགས་ནད་རིགས་200ལྷག་ཙམ་དང་འབྲེལ་བ་ཆེན་པོ་ཡོད་པ་མ་ཟད། ད་དུང་འབྲས་སྐྲན་རིགས་10ལྷག་ཙམ་འབྱུང་ཚད་ཇེ་མང་དུ་འགྲོ་སྲིད། དེས་ན། ནམ་རྒྱུན་བཟའ་བཏུང་ལ་ཚོད་འཛིན་གང་ལེགས་དང་ཟ་མ་ཟོས་རྗེས་ལུས་སྦྱོང་ལ་སྣང་ཆེན་བྱས་ནས་གཟུགས་པོའི་ལྗིད་ཚད་དམའ་རུ་གཏོང་ཐབས་ལ་འབད་དགོས།

4.ཤ་གནད་ལ་སྦྱོང་བརྡར་བྱེད་དགོས། 

ཤ་གནད་ནི་ལུས་པོའི་རྨང་གཞིའི་བརྗེ་ཚབ་ཀྱི་རྨང་རྡོ་དང་སྟོབས་ཤུགས་ཀྱི་འབྱུང་རྩ་ཡིན་ལ། རྒས་ཀ་སྲ་བའི་གནད་འགག་ཀྱང་ཡིན།  དེས་ན། རང་ལོ་40ལ་སླེབས་རྗེས།  ཤ་གནད་ལ་སྦྱོང་བརྡར་བྱེད་པའི་ཐབས་མཆོག་གསུམ་ཡོད་དེ། གཅིག་ནི་ཡར་མར་དགྱེ་གུག་ལུས་རྩལ་དང་། ཁ་བུབ་ལག་བཙུགས་སྒྲེང་འགུག་ལུས་རྩལ། གན་རྐྱལ་དུ་མར་ཉལ་ཡར་ལངས་ལུས་རྩལ་སོགས་རྩེད་དགོས། གཉིས་ནི་འགྱིག་ཐག་གི་འཐེན་ཤུགས་སྤྱད་དེ་ལུས་པོའི་ཤ་གནད་མི་འདྲ་བར་སྦྱོང་བརྡར་བྱེད་དགོས། གསུམ་ནི་ལུས་སྦྱོང་ཁང་ངམ་ལུས་སྦྱོང་ལས་སྒྲུབ་ཁང་ནང་ཆེད་ལས་རྩལ་ཁྲིད་པའི་མཛུབ་སྟོན་འོག་ལུས་སྦྱོང་ཡོ་བྱད་སྤྱད་དེ་ཤ་གནད་ཀྱི་སྟོབས་ཤུགས་སྦྱོང་བརྡར་བྱེད་དགོས་པ་བཅས་ཡིན།